¿Mayllapipis willanapaq wakichisqachu kachkanchik?
1. Jesús mayniqpichus willasqanmanta sutʼinchay.
1 Mayllapipis willayqa, may allin. Bibliaqa, Jesús mayllapipis kachkaspa runasman Diosmanta sumaqta parlarisqanmanta willawanchik (Juan 4:7-15). Mayllapipis willananchikpaq, ¿imaynatá wakichikusunman?
2. ¿Imaraykutaq maychus kaqta pʼachallikunanchik tiyan?
2 Pʼachallikusqayki, kʼachanchakusqayki ima. Mana allin pʼachallisqa kaspaqa, ichapis Bibliamanta wakkunaman parlayta pʼinqakusunman, chaywanpis maychus kaqta pʼachallikuspaqa, mana pʼinqakuspa imapichus creesqanchikmanta tukuyman willasunman (1 Tim. 2:9, 10). Chantapis, llimphu pʼachawan maychus kaqta pʼachallikuptinchikqa, wakin runas chiqa cristianos kasqanchikta reparanqanku. Chaytaq Jehovamanta sutʼinchaq juk qhariwarmip kawsayninkupi rikukurqa. Paykunaqa, wak religionmanta juk runap ladonpi viajachkarqanku. Chay runataq maychus kaqta pʼachallisqas kachkasqankuta rikuspa, ima religionmantachus kasqankuta tapurirqa, jinamanta kimsa horastapuni Bibliamanta parlarqanku.
3. ¿Maykʼaqllapis Jesusjina pisillata parlaspa Diosmanta juk runawan parlayta qallarirqankichu?
3 Runaswan parlayta qallarinapaq. Jesusqa, Jacobpa pukyu qayllapi tiyarikuchkaspa, pisillata parlaspa juk samaritanawan Diosmanta parlayta qallarirqa, nirqataq: “Yakuta qoriway ujyanaypaj”, nispa. Ñuqanchikpis Jesusjinallataq, pisillata parlaspa chayri juk tapuyta ruwaspa runaswan parlayta qallarisunman. Ichá wakin kuti runaswan parlayta manchachikusunman, chaywanpis Jehová Diospi atienekusunchik chayqa, pay ‘kallpachawasunchik’ manchachikuyninchikta atipananchikpaq (1 Tes. 2:2).
4. Mayllapipis willanapaq, ¿imaynatá wakichikusunman?
4 Mayllapipis willanapaq wakichikuna. Achkha hermanos mayllapipis, imaymanamanta Diospa Reinonmanta runasman willachkanku. Qampis paykunajina ruwayta atinki. Qallarinapaq sapa pʼunchay pikunawanchus Diosmanta parlayta atisqaykipi tʼukuriy. Chantá mayllamanpis richkaspa juk juchʼuy Bibliata, publicacionesta ima apakuy. Tukuy runasmanta dakuy. Ajinata ruwaspaqa, mayllapipis willanaykipaq wakichisqa kanki (Fili. 1:12-14; 1 Ped. 3:15).
5. ¿Imaraykutaq mayllapipis willanapaq wakichisqas kananchik tiyan?
5 Jehovata, runamasinchikta ima munakusqanchikrayku, mayllapipis runasman willayta munanchik (Mat. 22:37-39). Kay pachap tukukuynin sapa pʼunchay astawan qayllaykamuchkasqanrayku mayllapipis willananchikpaq wakichisqas kananchik tiyan. Arí, tiempo kachkaptillanraq mayllapipis Diospa Reinonmanta runasman willanapaq kallpachakuna (Rom. 10:13, 14; 2 Tim. 4:2).