Mayllapipis willayta, ¡qam atinki!
1. a) Mayllapipis willay, ¿ima niyta munan? b) Kaypi kaqkunamanta ¿machkhataq callepi chayri mayllapipis willasusqaykichikrayku chiqa kaqta yachakurqankichik?
1 ¿Qutuchakuymanta machkha hermanostaq callepi, chayri mayllapipis willasqankurayku chiqa kaqta yachakurqanku? Yachaspaqa maytachá tʼukuriwaq. Mayllapis willay, ¿ima niyta munan? Yachaywasi, llamkʼaypi, rantiq rispa, familiaresta chayri vecinosta waturispa, viajaspa, wak lugarespi ima, Diosmanta willay niyta munan. Juk qutuchakuypi iskay pachak bautizasqa hermanosmanta, pusaq chunka hermanos callepi chayri mayllapipis willasqankurayku, chiqa kaqta yachakusqanku, chay rikuchiwanchik mayllapipis willayqa, may sumaqpuni kasqanta.
2. Bibliapi mayllapipis willasqankumanta, ¿pikunamantá parlachkan?
2 Ñawpa siglomanta willaqkunapis, yaqha mayllapipis runasman willaqpuni kanku. Sutʼincharinapaq, Jesús Samariapi kachkaspa, Jacobpa pukyumanta juk warmi jakuta urqhuchkaqman, Diosmanta parlarqa (Juan 4:6-26). Etiopiamanta reinap kapuyninta qhawaq runa, profeta Isaiaspa qillqasqanta ñawirichkaptin, Felipe paywan parlarinanpaq kayta tapurirqa: “Entiendenkichu imatachus leesqaykita?”, nispa (Hech. 8:26-38). Apóstol Pablo Filipos llaqtapi wisqʼasqa kachkaptin, carceleroman Diosmanta willarqa (Hech. 16:23-34). Aswan qhipamanpis, wisqʼasqa kachkaptin, ‘payta waturikuqkunata’ kʼachamanta waqyariq, “mana manchachikuspa, Diospa reinonmanta yachacherqa, Señor Jesucristomantawan” (Hech. 28:30, 31). Paykuna willarqanku chayqa, qampis atiwaq, manchali kaspapis. ¿Imaynatá?
3. ¿Imaynatá manchali kasqanchikta atipayta atisunman?
3 Qallarinapaq. Wakinkunaqa, mana riqsisqa runawan mana parlariyta atillanchikchu. Riqsispapis, mana Diosta yupaychaqtaqa, allin willaykunamanta mana willariyta atillanchikchu. Chaywanpis Jehová kʼacha kasqanpi, espiritualmente quwasqanchikpi, runas may llakiypi kawsachkasqankupi ima tʼukuriyqa, runasman parlariyta mana manchachikusunchu (Jon. 4:11; Sal. 40:5; Mat. 13:52). Chantapis, Jehová kallpachanawanchikta mañakusunman (1 Tes. 2:2). Galaadpi yachakuq kayta nirqa: “Runaswan Diosmanta mana parlayta atiptiy, paymanta mañakuy mayta yanapawasqanta reparani”. Runaswan parlayta mana atinaykita reparaspaqa, sunquyki ukhullapi Diosmanta mañakuy (Neh. 2:4, 5).
4. ¿Imatá ñawpaqta ruwanayki tiyan, imaraykutaq?
4 Mayllapipis runasman willanaykipaqqa, mana Diosmanta parlariyta, nitaq juk pʼitita ñawirispa qallarinaykipunichu tiyan. Runaswan parlarillayta munanchik, mana chay ratopacha Diosmanta willayta munaspalla. Achkha hermanos, runaswan parlayta qallarisqankumanta, allin willaykunata willayta atillankuña. Chaywanpis mana parlayta munaptinkuqa, ama uyarichikuytapuni munaychu. Kʼachamanta ripuy, wakkunata maskʼamuq.
5. Juk hermana, ¿imaynatá mayllapipis willayta qallarin?
5 Juk manchachikuq hermana kayta ruwan: rantiq rispa pillatapis allinta qhawarispa asirin. Juknin asirillantaq chayqa, parlapariyta qallarin. Allinta kutichiptinqa, parlarinallanpaqpuni may kallpachasqa sientekun. Chantá imatachus kutichisqanta allinta uyarin, chaymanjina ima allin willaytachus yachachinanpaq reparan. Ajinamanta runasman achkha publicacionesta jaywan, chantapis juk runaman Bibliamanta yachachiyta qallarin.
6. ¿Imaynatá mayllapipis kachkaspa runaswan parlariyta qallarisunman?
6 Runaswan parlariyta qallariy. Qallarinapaq, ¿imatá nisunman? Yuyarina, Jesusqa pukyupi kaq warmiwan yakuta mañakuspa, parlayta qallarirqa (Juan 4:7). Ichapis napaykuspa chayri kʼachamanta tapurispa, parlariyta qallarisunman. Parlarisqaykimanjina, ichapis Bibliap juknin yachachiyninmanta parlariwaq, mujutajina sunqunpi tarpunaykipaq (Ecl. 11:6). Wakinkunaqa, yachayta munanankupaqjina imallatapis ninku, jinamanta juk tapuywan qallarinku. Sutʼincharinapaq, doctorta suyaqkunawan kachkaspa, ichapis kayta niwaq: “Unquykuna manaña kaptinqa, ¡may kusisqa kachkaq!”.
7. Allinta qhawarisqanchik, ¿imaynatá Diosmanta willanapaq yanapawasunman?
7 Chantapis allinta qhawariyqa yanapallawasunmantaq. Sutʼincharinapaq, piqpallatapis wawasnin kasukuq kasqankuta rikuspaqa, ichapis allinta yachachisqanta nisunman, tapurisunmantaq: “Jinata uywanaykipaq, ¿imataq yanapasunki?”, nispa. Juk hermana llamkʼaq masisnin imamantachus parlarichkasqankuta allinta uyarin, chaymanjinataq publicacionesta jaywariq. Juk kutipi, llamkʼaq masin casarakunanta yachaspa, imaynatachus casamientota wakichinapaq parlaq ¡Despertad! revistata jaywarqa. Paywan parlayta qallarisqanqa, Diosmanta willananpaq yanaparqa.
8. Runawan parlariyta qallarinapaq, ¿imaynatá publicacionesninchikta apaykachasunman?
8 Chantá runaswan parlanapaq, publicacionesninchikta tukuy rikunankupaqjina ñawirina kanman. Juk hermano Torremanta Qhawaq chayri ¡Despertad! revistapta, yachayta munanapaqjina juknin yachaqananta, chʼinllamanta ñawiriyta qallarin. Pillapis revistata qhawarin chayqa, hermano juk tapuyta ruwarin chayri chay yachaqanamanta parlarin. Jinata ruwasqanqa, Diosmanta willananpaq yanapan. Chantapis llamkʼaypi chayri yachaywasipi publicacionesta wakkuna rikunankupaqjina saqiptinchikqa, chaymanta parlarinapaq yanapallawasunmantaq.
9, 10. a) Mayllapipis runasman Diosmanta willanapaq, ¿imaynasmanta maskʼasunman? b) Qamrí, ¿imaynasmanta ruwanki?
9 Diosmanta willanapaq, imaynasmantapis maskʼana. Mayllapipis willanapaqqa wakichisqa kana tiyan, mana jinallaman saqinachu, imaraykuchus usqhayta tukuy runasman willamuna tiyan. Chayrayku, sapa pʼunchay ruwasqasninchikpi, runasman imaynasmantachus Diosmanta willayta maskʼana. Pikunawanchus sapa kuti tinkunki, paykunapi tʼukuriy chantá imatachus ninaykita ñawpaqmantapacha wakichikuy. Chantapis Bibliata apakuypuni, publicacionesta ima, pikunachus yachakuyta munaqkunaman jaywarinaykipaq (1 Ped. 3:15).
10 Achkha Diosmanta willaqkuna, mayllapipis willanapaq tukuy imaynasmanta maskʼanku. Juk hermanamanta parlarina, payqa sumaq jarkʼasqa edificiopi tiyakun, chay edificiopta pukllanapaq chayri samarinapaq lugarpi, Diospa kʼacha ruwaykunasninmanta rompecabezas nisqasta armaq. Runastaq chay cuadrosta rikuspa, may kʼachitu kasqanta niq kanku, ajinamanta hermanaqa, Biblia ‘juk musuq cielomanta, juk musuq jallpʼamantawan’ parlasqanta willariq (Apo. 21:1-4). ¿Imaynasmantawantaq mayllapipis runasman Diosmanta willarisunman?
11. Mayllapipis willasqanchikmanta runas astawan yachakuyta munaptinku, ¿imatá ruwasunman yanapanallapaqpuni?
11 Yachakuyta munaqkunata yachachiy. Pillapis allinta uyarisunki chayqa, yachachillaypuni. Chaypaqqa, ichapis niwaq: “Mayta kusikuni qamwan parlarisqaymanta. Waturisunaypaq, ¿maypitaq tiyakunki?”. Wakin hermanostaq maypichus tiyakusqankuta, telefononkuq numeronta ima willanku, ninkutaq: “Parlarisqanchikmanta kusikuni. Kaymanta astawan yachakuyta munaspaqa, kaypi maskʼariwankiman”. Waturiyta mana atinkichu chayqa, usqhayllata kay Sírvase visitar (S-43) nisqa formulariota, qutuchakuymanta secretario nisqaman jayway, mayqin qutuchakuyllapis waturinanpaq.
12. a) Mayllapipis willasqanchikmanta, ¿imaraykutaq machkha tiempotachus willasqanchikta anotakunanchik tiyan? b) Mayllapipis willasqanchik, ¿imaynatá runasta yanapachkan? (Kay “Mayllapipis willayqa may allinpuni” nisqa recuadrota qhawariy.)
12 Mayllapipis willasqaykimanta machkha tiempotachus willasqaykita willaypuni. Sapa pʼunchay machkha minutostachus willasqaykita anotakuy. Tukuy willaqkuna, sapa pʼunchay mayllapipis phichqa minutosta willaspaqa, killantinpi chunka qanchisniyuq junukuna horasmanta astawanraq kanman.
13. ¿Imaraykutaq mayllapipis willamunchik?
13 ¿Imaraykutaq mayllapipis willamunchik? Diosta, runa masinchikta ima, mayta munakusqanchikrayku (Mat. 22:37-39). Chantapis Jehovap kʼacha kaykunasninta, munayninta ima may jatunpaq qhawasqanchikqa, ‘Reinonpa jatun kayninmanta parlanapaq’ yanapawanchik (Sal. 145:7, 10-12). Runa masinchikta munakusqanchikrayku, tiempo kachkaptillanraq mayllapipis allin willaykunamanta willanapaq mayta kallpachakunchik (Rom. 10:13, 14). Pillawanpis tinkunanchikta yachaspa, ñawpaqmantapacha wakichikuspa ima, mayllapipis willayta atinchik. Ichapis juk kʼacha sunquyuq runata, chiqa kaqta yachakunanpaq yanapasunman.
[4 paginapi sutʼinchaynin]
Runaswan parlayta qallarinaykipaqqa, sutiykita willawaq, ajinamanta parlaparillankiña
[5 paginapi sutʼinchaynin]
Achkha Diosmanta willaqkuna, mayllapipis willanapaq tukuy imaynasmanta maskʼanku
[5 paginapi recuadro]
Runaswan parlanapaq yuyaychaykuna
◼ Parlayta qallarinaykipaq Jehovamanta yanapayninta mañakuy
◼ Uyarisunankupaqjina kaqkunata maskʼay
◼ Qhawarisuptin asiriy chantá imatapis iskayniykichikpaqjina parlariy
◼ Parlaptin allinta uyariy
[6 paginapi recuadro]
Mayllapipis willayqa may allinpuni
• Juk hermano autonta arreglanankukama suyaspa, chay tallerpi runasman Diosmanta parlarqa, tukuypaq tantakuyman rinankupaq waqyarina hojitasta jaywarqa. Chaymanta juknin watanman, juk jatun tantakuypi juk hermano napaykurqa, ¿pitaq chay hermano karqa? Payqa tallerpi, waqyarina hojitasta japʼikuqkunamanta juknin karqa. Chaypacha chay umallirichiyta uyariq rirqa, Bibliamanta yachachinankutataq mañakurqa. Kunantaq pay, warmin ima bautizasqasña kanku.
• Juk hermana mayllapipis willasqankurayku chiqa kaqta yachakurqa, kunantaq pikunatachus kimsantin wawasninnipta riqsiqkunaman willan. Ajinamanta vecinoswan, yachaywasipi pikunatachus riqsin, tatasmanta tantakuypi pikunawanchus riqsinakun paykunaman ima, Diosmanta parlan. Chantapis atisqanmanjina, Biblia wawasninta uywananpaq mayta yanapasqanta nin, chaymanta wak yachaqanasmantañataq parlan. Runaswan parlayta qallariptinqa, Bibliamanta parlayta qallarillanña. Chayta ruwaspa, chunka iskayniyuq runasta bautizakunankupaq yanaparqa.
• Segurosta vendeq runa juk hermanap wasinman risqa, chaypitaq hermanaqa, chay runata tapurisqa: ‘Mana unquspa, kusisqa, wiñay wiñaypaq kawsakuyta ima, ¿munawaqchu?’, nispa. Paytaq arí nirqa, chantá ima seguromantachus parlachkasqanta yachayta munarqa. Hermanataq Diospa munayninmanta parlarqa. Chay runataq juknin publicacionninchikta apakuspa, juk tardellapi ñawirirqa. Diosmanta astawan yachakunallanpaqpuni yanaparqanku, tantakuykunamantaq riyta qallarirqa, ajinamanta aswan qhipaman bautizakurqa.
• Juk hermana avionpi viajachkaspa juk warmiwan parlayta qallarirqa, ajinamanta Diosmanta willarirqa. Chayachkaspañataq hermanaqa, maypichus tiyakusqanta, telefononpa numeronta ima willarqa, chantá Jehovamanta sutʼinchaqkuna waturiptinku Bibliamanta yachakuyta munasqan ninanta nirqa. Qʼayantintaq iskay Jehovamanta sutʼinchaqkuna punkunta takarqanku. Chay warmiqa Bibliamanta yachakuyta qallarirqa, usqhayllata kawsayninta tikrachispa bautizakurqa, pisi tiempomantaq kimsa runasmanña Bibliamanta yachachichkarqa.
• Juk hermano pachak watasniyuq, machu runasta qhawanapaq wasipi tiyakuq, payqa cieguito karqa, kutin kutitataq niq: “Diospa Reinonta necesitanchik”, nispa. Chayta uyarispa, enfermeras wakkuna ima, imatachus niyta munasqanta tapuriq kanku, hermanotaq imachus chay Reino kasqanta sutʼinchaq. Juk pʼunchay, chaypi llamkʼaq warmi: ‘¿Imatá Paraisopi ruwanki?’, nispa tapurqa. Hermanotaq kutichirqa: “Watiqmanta rikusaq, purisaq ima, chantá chay silla ruedasniyta ruphachichkaq”, nispa. Cieguito kasqanrayku chay warmita revistasta ñawiripunanta mañaq. Juk pʼunchay, hermanop warmi wawan waturiq jamurqa, llamkʼaq warmitaq chay revistasta apakuyta munasqanta nirqa. Juk enfermerataq nirqa: “Kunanqa, tukuy kaypi kaqkuna, ‘Diospa Reinonta necesitanchik’, nispa niyku”.
• Juk hermana restaurantepi filakuchkaspa, machu runas politicamanta parlachkasqankuta uyarirqa. Chay runasmanta juknin nirqa, kamachiqqa runaspa chʼampaykunasninta mana chinkachiyta atinanta, hermanataq tʼukurirqa: “Kunan Diosmanta parlarichkaq”. Diosmanta mañakuspa paykunaman qayllaykurqa. Ñawpaqta sutinta willarqa, chaymantataq Diospa Reinollan tukuy chʼampaykunata chinkachiyta atisqanta willarqa, chaymanta juk folletota jaywarqa. Chantá restaurantemanta encargado jamurqa. Hermanaqa ripuy ninanta yuyarqa, chaywanpis encargadoqa parlachkasqankuta uyarirqa, paypis juk folletota munasqanta ima nirqa. Chantapis juk empleada waqay ñawilla jamurqa, paypis uyarimullachkasqataq. Payqa ñawpaqpi Bibliamanta yachakuchkarqa, kunantaq watiqmanta yachakuyta munasqan nirqa.