Mayllapipis kachkaspa Diosmanta willanapaq wakichisqa kana
1. Jesús juk samaritanaman Diosmanta parlasqanmanta, ¿imatá yachakunchik?
1 Jesusqa, achkha horastaña purisqanrayku, may saykʼusqa, yakumanta chʼakisqa ima kachkarqa. Discipulosnin llaqtaman mikhunata rantiq rinankukamataq, payqa, juk pukyu qayllapi samarikuchkarqa. Payqa Samaria llaqtanta Galileaman Diosmanta willaq richkarqa. Chantá Samariamanta juk warmi chay pukyumanta yakuta wisiq jamurqa, Jesustaq samarikuchkaspapis chay warmiman Diosmanta willarqa (Juan 4:5-14). ¿Imaraykutaq? Imaraykuchus payqa, “cheqanta willaj cheqa testigo” karqa (Apo. 3:14). Jesusjinallataq ruwayta munanchik chayqa, mayllapipis kachkaspa Diosmanta willananchik tiyan (1 Ped. 2:21).
2. ¿Imaynatá mayllapipis kachkaspa runasman Diosmanta willanapaq wakichikusunman?
2 Wakichisqa kana. Mayllapipis kachkaspa Diosmanta willananchikpaqqa, mayllamanpis rinapaq publicacionesninchikta apakunanchikpuni tiyan. Achkha hermanosninchik mayllamanpis richkaspa trataditosta apakunkupuni, tiendaspi ranqhaqkunaman, gasolinata ranqhaqkunaman, wak runasman ima saqinankupaq (Ecl. 11:6). Juk hermana sapa kuti viajallanpuni, payqa juchʼuy Bibliata, Yachachin librota ima, bolsanpi apakunpuni, paywan khuska viajaqkunaman Diosmanta willananpaq.
3. ¿Imaynatá runaswan Diosmanta parlayta qallariwaq?
3 ¿Imaynatá Diosmanta parlayta qallariwaq? Mayllapipis kachkaspa Diosmanta parlananchikpaqqa, mana qallariymantapachapunichu Bibliamanta parlananchik kanman. Sutʼincharinapaq Jesusqa, juk pukyu qayllapi juk samaritanawan Diosmanta parlarinanpaq mana pay Mesías kasqanmantachu parlayta qallarirqa, manaqa yakuta mañakuytawankama Diosmanta willayta qallarirqa (Juan 4:7-9). Juk hermana Jesusjinallataq runaswan Bibliamanta parlayta qallarin. Juk pasaq raymipi kusikusqantachus manachus runas tapuptinku, payqa Jehovamanta sutʼinchaq kasqanrayku chay raymita mana ruwasqanta ninanmanta, jinata nin: “Mana ruwanichu chay raymita”, nispa. Tapuqkunataq astawan yachayta munaspa, “¿imaraykutaq?”, nispa tapunkupuni, chantá payqa imatachus Biblia yachachisqanta sutʼinchayta qallarin.
4. Kay Mateo 28:18-20 pʼitikunapi nisqan, ¿imata ruwanaykipaqtaq tanqasunki?
4 Jesús manañapis kay Jallpʼapi Diospa Reinonmanta runasman willachkanchu, tukuy runasman willanallanchiktapuni munan, pay kamachisqanmanjina (Mat. 28:18-20). Chayrayku Jesusjinallataq ñuqanchikpis, mayllapipis kachkaspa imapichus suyakuchkasqanchikta runasman sutʼinchanapaq wakichisqa kanachik (Heb. 10:23).