Runasman willanaypaq, ¿wakichisqachu kachkani?
1. ¿Imaraykutaq mana sumaq willaqkuna kasqanchikta mana yuyananchikchu tiyan?
1 Mana sumaq willaq kasqaykita yuyanki chayqa, ama llakikuychu, imaraykuchus sumaq willaqkuna kayqa, mana yachaywasipi yachakusqanchikmantachu nitaq sumaqta parlayta yachasqanchikmantachu kachkan. Wakin runasqa Jesuspa wakin discipulosnin “mana yachakuyniyoj runaslla kasqankuta” nirqanku, chaywanpis paykunaqa sumaq willaqkuna karqanku. ¿Imarayku? Jesusjina ruwayta munasqankurayku (Hech. 4:13; 1 Ped. 2:21).
2. ¿Imaynatá Jesús yachachiq?
2 ¿Imaynatá Jesús yachachiq? Jesusqa, sutʼita, kawsayninkupi ruwanankupaqjina ima, runasman yachachiq. Rikchʼanachinaswan, tapuykunawan ima yachachispa runasta tʼukuchkaqta saqiq (Mat. 6:26). Chantapis paykunamanta khuyakuq (Mat. 14:14). Astawanpis mana iskaychakuspa atiyniyuqjina yachachiq, imaraykuchus Jehová paywan kachkasqanta yacharqa (Luc. 4:18, 19).
3. ¿Imaynatá Jehová sumaq willaqkuna kananchikpaq yanapawanchik?
3 Jehová yanapawanchik. Sumaq Yachachiqninchik Jehovaqa, Palabranniqta, llaqtanniqta ima, sumaq willaqkuna kananchikpaq yachachiwanchik (Isa. 54:13). Payqa, Bibliapi imaynatachus Jesús yachachisqanta qillqachirqa, chayta ñawirispa ñuqanchikpis Jesusjina ruwananchikpaq. Chantá espíritu santonta quwanchik, tantakuykunapitaq sumaqta yachachiwanchik (Juan 14:26). Chantapis unaytaña willaq hermanosniqta yanapallawanchiktaq paykunawan khuska willaspa imaynatachus astawan allinta willana kasqanta yachakunanchikpaq.
4. ¿Imaraykutaq runasman willayta atinanchikmanta mana iskaychakusunmanchu?
4 Chayrayku runasman willayta atinanchikmanta mana iskaychakusunmanchu, imaraykuchus runasman willananchikpaq ‘atiyninchikqa, kallpachaq Diosmantamin’ (2 Cor. 3:5, Dios Parlapawanchej). Paypi atienekuspa, llaqtanniqta yuyaychawasqanchikta allinta japʼikuspa ima, “tukuy ima allin kajta ruwana[paq]” wakichisqas kasunchik (2 Tim. 3:17).