Juk jatun regalota quwasqanchikmanta Diosman agradecekuna
1. ¿Imamantataq Diosman may agradecesqa kachkanchik?
1 Juchamanta kacharichinawanchikpaq munasqa juk kʼata Churinta Dios kachamusqanqa juk jatun regalo (Sant. 1:17). Ñuqanchikrayku Jesús wañusqanqa, achkha bendicionesta apamuwanchik, perdonta tarinanchikpaqtaq yanapawanchik (Efe. 1:7). Chayrayku Diosman may agradecesqa kachkanchik, marzo, abril, mayo killaspitaq Jesuspa wañupuyninpi tʼukuriyta munanchik.
2. Jesuspa wañupuyninta astawan jatunpaq qhawananchikpaq, ¿imatataq ruwasunman?
2 Jesuspa wañupuyninta astawan jatunpaq qhawana. Kay watapi Jesuspa wañupuyninta yuyarinapaq, marzo 30 pʼunchaypi tantakusunchik. Jesuspa wañupuyninta astawan jatunpaq qhawananchikpaqqa, niraq 30 pʼunchay kachkaptin familiajina imaraykuchus Jesús kawsayninta qusqanta ukhuncharina. Chantá chay pʼunchaykunapaq Bibliamanta akllasqa pʼitikunata ñawirina. Sapa jukninchik Jesuspa wañupuynin, Jehovata, runa masinchikta ima astawan jatunpaq qhawananchikpaq imaynatachus yanapawasqanchikpi tʼukurina. Allin kanman chay tantakuypi takirinanchikpaq, 8, 109 takinata ima takiyta yachakuchkananchik (Sal. 77:12).
3. ¿Imaynasmantá Diosman agradecekusqanchikta rikuchisunman?
3 Agradecekusqanchikta rikuchina. Churinta kachamusqanmanta Jehovaman may agradecesqa kasqanchikrayku, Paymanta, Churinta qusqanmanta ima, tukuyman willallaytapuni munanchik (Sal. 145:2-7). Chayrayku wakin familiasqa, allinta parlarinku familiamanta jukllapis marzo, abril chayri mayo killapi precursor auxiliarjina llamkʼananpaq. Familianchikmanta mana pipis chay killaspi precursorjina llamkʼayta atinchu chayqa, astawan willaq lluqsinanchikpaq tiempochakusunman (Efe. 5:16). Chantá chay tantakuyman jamunankupaq tukuy runasta yanapasunman (Apo. 22:17). Bibliamanta yachakuyta munaqkunata, Bibliamanta yachakuqkunata, familiaresninchikta, vecinosninchikta, compañerosninchikta ima waqyarinapaq juk listata ruwanallaña. Chantá paykunaman wak runasman ima juk invitacionta saqinanchikpaq kallpachakuna.
4. ¿Imatá marzo, abril, mayo killaspi ima ruwasunman?
4 Marzo, abril, mayo killaspiqa, ñuqanchikrayku wañunanpaq Churinta kachamusqanmanta Diosman agradecekusqanchikta rikuchisunman. Chayrayku Jesuspa wañupuyninta, “Cristoj may qhapaj mana rejsiy atina evangeliota” ima astawan jatunpaq qhawananchikpaq kallpachakuna (Efe. 3:8).