Agradecekuyninchikta rikuchina
Jesuspa wañuynin abril 17 pʼunchaypi yuyarikunqa
1. Salmistajina agradecesqa kasqanchikta, Jesuspa wañuynin pʼunchay qayllamuchkaptin, ¿imaynamantá rikuchisunman?
1 Jehová llaqtanta kacharichisqanrayku, khuyakuyninta rikuchisqanrayku ima, salmista nirqa: “[¿]Imawantaj Tata Diosman juntʼasaj tukuy allin imasta ruwapuwasqanmantari?”, nispa (Sal. 116:12). Jehovap kamachisninqa astawanraq kay tiempopi agradecekunchik, salmista qillqasqanmanta may chhika watasninmanraq, Jehová runasta munakusqanrayku wawanta kachamurqa rantinawanchikpaq. Chayrayku abril 17 pʼunchaypaq agradecesqa kasqanchikta, wakichikuspa rikuchiyta munanchik (Col. 3:15).
2. ¿Imasraykutaq rantiwasqanchikmanta agradecesqa kanchik?
2 Jesuspa wañuynin yanapawanchik. Rantiwasqanchikrayku ‘juchasninchikqa pampachasqa kanku’ (Col. 1:13, 14). Chaytaq Jehovata llimphu sunquwan sirvinapaq yanapawanchik (Heb. 9:13, 14). Chantapis mana manchachikuspa Payman mañakuypi qayllaykunapaq (Heb. 4:14-16). Cristop wañuyninpi iñisqanchikraykutaq, wiñay wiñaypaq kawsananchikpaq suyakuyniyuq kanchik (Juan 3:16).
3. Churinta qusqanrayku, ¿imaynasmantá Jehovaman agradecesqa kasqanchikta rikuchisunman?
3 Agradecesqa kasqanchikta rikuchina. Jesuspa wañusqanmanta akllasqa pʼitista, sapa pʼunchay ñawirispa, chaypi tʼukurispa ima, may agradecesqa kasqanchikta rikuchisunman. Chayrayku Torremanta Qhawaq abril-junio 2011 revistapi: “Suyasqa pʼunchaypaq, ¿wakichisqañachu kanki?” nisqa yachaqana, yanapanawanchikpaq wakichikun. Chantapis Jehovata, rantiwasqanchikmanta mañakuyninchikpi, may agradecesqa kasqanchikta nisunman (1 Tes. 5:17, 18). Jesús kamachisqanmanjinataq, wañuyninta yuyarinapaq tantakuypi kaspa, agradecesqa kasqanchikta rikuchillasunmantaq (1 Cor. 11:24, 25). Chantapis Jehovajina munakuyninchikta rikuchiyta atisunman, tukuy runasman kay tantakuyman waqyarispa (Isa. 55:1-3).
4. Chay pʼunchay qayllapiña kachkaptin, ¿imatá ruwasunman?
4 Jehovap kamachisninqa, agradecesqa kasqankurayku kay tantakuyta mana wak tantakuytajinachu qhawanku, chayrayku kay tantakuyta mayta suyanku. Chay pʼunchay qayllapiña kachkasqanraykutaq salmistajina nisunman: “Tukuy sonqoywan Tata Diosta yupaychasaj, manataj qonqasajchu tukuy sumaj ruwasqasninta”, nispa (Sal. 103:2).