‘Kayta ruwallaychejpuniʼ
Jesuspa wañuyninta abril 5 pʼunchaypi yuyarikonqa
1. ¿Imaraykutaj Jesuspa wañuyninta yuyarinanchej tiyan?
1 ‘Kayta ruwallaychejpuni noqamanta yuyarikuspa.ʼ (Luc. 22:19.) Kayta nispaqa, Jesús discipulosninta wañuyninta yuyarinankuta kamachisharqa. Wañuynin ashkha bendicionesta apamusqanrayku, Jesuspa wañuyninta yuyariyqa noqanchejpaj may sumaj, chaytataj abril 5 pʼunchaypi yuyarisunchej. Chay pʼunchay qayllaykamushasqanrayku, ¿imaynatá Jehovaman agradecesqas kasqanchejta rikuchisunman? (Col. 3:15.)
2. Jesuspa wañuyninta allinpaj qhawasqanchejta rikuchinapaj, ¿imaynatá ukhunchariy, tʼukuriy ima, yanapawanchej?
2 Wakichikunachej. Uj jatun pʼunchay qayllaykamushajtin, chay pʼunchaypaj wakichikunchej, ¿icharí? Jesuspa wañuyninta yuyarinapaj qayllapiña kasqanrayku, niraj wañushajtin, imaschus kasqanmanta familiawan ukhuncharispa, chaykunapi tʼukurispa ima sonqonchejta wakichina (Esd. 7:10). Chaykunamanta parlaj versiculosqa, calendariopi, Ukhunchana nisqa folletopi ima rikhurin. Chantá Torremanta Qhawaq 2011 abril-junio revistapi (páginas 23, 24) uj lista rikhurin, El hombre más grande nisqa libroj yachaqanasninta leenapaj.
3. ¿Imaynamantawan Jesuspa wañupuyninta jatunpaj qhawasqanchejta rikuchisunman?
3 Willanachej. Chantapis Jesuspa wañuyninta jatunpaj qhawasqanchejta rikuchillanchejtaj, astawan runasman Diosmanta willamuspa (Luc. 6:45). Marzo 17 pʼunchaymantapachataj, tukuy runasta Jallpʼantinpi chay tantakuyman wajyariyta qallarisun. ¿Astawan willanaykipaj tiempochakunkichu, chayri precursor auxiliar jina llankʼankichu? Chayta, Familiapi Diosta Yupaychanapaj Chʼisipi familiaykiwan parlariwajchej.
4. ¿Imaynatá Jesuspa wañuyninta yuyarinapaj tantakuypi kay, kallpachawanchej?
4 ¡Sapa wata Jesuspa wañuyninta yuyarinapaj tantakuypi kayqa, mayta kallpachawanchej! Jehová khuyakuyninrayku Churinta noqanchejrayku qosqanpi tʼukuriyqa, kusichiwanchej, Jehová Diosta astawan munakunapajtaj yanapawanchej (Juan 3:16; 1 Juan 4:9, 10). Chaytaj manaña noqanchejpaj kausanapaj yanapawanchej (2 Cor. 5:14, 15). Jehovaj sutinta runasman rejsichinapajpis yanapallawanchejtaj (Sal. 102:19-21). May kusiywantaj abril 5 pʼunchayta Jesuspa wañuyninta yuyarinapaj suyashanchej, Jesuspa “wañuyninmanta” willamunallapajpuni (1 Cor. 11:26).