Dios rantiwasqanchikta agradecekuspa yuyarina
1, 2. ¿Imaraykutaq Jesús wañusqanta agradecekuspa yuyarisunman?
1 Kamachikusqanta kasukuspa, tukuy pachapi cristianosqa, 2008 watapi marzo killapi, 22 pʼunchayninpi tantakuspa, Inti yaykupusqantawan, Jesús wañusqanta yuyarisunchik (Luc. 22:19; 1 Cor. 11:23-26). Jesús wañusqanwan may chhika tʼinkakunata apamusqanmanta may agradecesqas kasqanchikrayku, chayta ruwasunchik, 1.975 watasña chaymanta pasan. Qallarinapaq, Jesusqa kurkupi wañuy patapi kaspapis, mana Diosta wasancharqachu, ajinamanta Tatanpa sutinta llimphucharqa, chantapis Kuraq Supay churanakuyninman sumaqta juk kutillata kutichirqa (Job 1:11; Pro. 27:11).
2 Chantapis, Jesuspa yawarninqa, musuq trato ruwakusqanta qallarichirqa, jinamanta Diosqa pantaq runastapis wawasnintajina riqsikapun, paykuna Cristowan khuska janaqpacha Reinopi kamachinankupaq (Jer. 31:31-34; Mar. 14:24). Jesús ñuqanchikrayku wañusqanqa, Dios maytapuni runata munakusqanta rikuchillantaq, imaynatachus Jesús Nicodemoman sutʼincharqa ajinata (Juan 3:16).
3. ¿Imaynatá yanapan runasta Señorpa Cenanman risqanku?
3 Waqyariykuna. Enero killamanta Reinomanta Willayninchikpi nikurqa, pikunatachus Señorpa Cenanman waqyarisunchik, paykunap sutisninkuta juk cuadernopi qillqananchikta. ¿Runata waqyariyta qallarillasunñachu? Chantapis, marzo killapi 1 pʼunchaymantapacha campaña qallarinqa wasimanta wasi runata waqyarinapaq. ¿Tʼukurinchikñachu imaynatachus ñuqanchikpis chay campañapi yanapananchikpaq? Kayta mana qunqanachu, chay tantakuyman riqkunaman Bibliamanta yachachikusqanqa, Dios rantiwasqanchikpi astawan iñinankupaq yanapanqa, chay iñiyninkutaq wiñay kawsayman pusanman (Rom. 10:17).
4. ¿Imaraykutaq may allin kanman Señorpa Cenanman manaraq qallarichkaptin chayay?
4 Atikuptinqa, manaraq qallarikuchkaptin chay tantakuyman chayasunman, jinamanta waqyarisqanchik runata tantakuyman jamuptin napaykurinanchikpaq. Señorpa Cenanman may achkha rinku, chayrayku musuq jamuqkunata allinta qhawarinanchik tiyan, jinallataq wakin kutillata tantakuykunaman jamuq hermanostapis.
5. ¿Imaynatá Señorpa Cenanpaq sunqunchikta wakichisunman?
5 Sunqunchikta wakichinanchik tiyan. Kay Examinando las Escrituras diariamente folletopi, chantapis calendario 2008 nisqapi, Bibliata marzo killapi 17 pʼunchaymantapacha ñawirinapaq wakichikun. Kay wakichikusqanqa, Jesús imatachus manaraq kay Jallpʼapi kawsayninta tukuchkaspa ruwasqanta, yuyarinapaq yanapawasunchik. Ñawirisqanchikpi Diosmanta mañakuspa tʼukuriyqa, Señorpa Cenanpaq sunqunchikta wakichinqa, jinamanta Jehová, Churinpis wañuymanta juchamanta ima, rantispa, munakuyninkuta rikuchiwasqanchikmanta, astawan agradecekusunchik (Esd. 7:10; Sal. 143:5).
6. ¿Imataq kanqa ñuqanchikpaq rantiwasqanchikta agradecekuspa yuyarikuptinchik?
6 Señorpa Cenan qayllapiña kasqanrayku, tukuypis chay tantakuyman rinanchikpaq wakichisqasña kayta munanchik. Chantapis, wakkunata chay tantakuyman rinankupaq yanapayta munanchik. Rantiwasqanchikmanta agradecekuspa yuyarikuptinchik, astawan Jehovaman Churinmanpis qayllaykusunchik (2 Cor. 5:14, 15). Chantapis, runa masinchikta munakusunchik, imaynatachus Jehovapis, Jesuspis munakuwanchik ajinata (1 Juan 4:11).