Willayta Yachanapaq Tantakuypaq kamachiykuna
Willayta Yachanapaq Tantakuypi wakin chiqas, kay killamantapacha wakjina sutiyuq kanqa. Kay 2009 wata mayo killamanta Reinomanta Willayninchikqa, “Willayta Yachanapaq Tantakuypaq wakichikuna”, nisqa yachaqanata sutʼincharqa. Chaywanpis kunanqa, chay yachaqana, wakjinamanta sutʼinchakuchkan, chaymanjinataq ruwakunan tiyan.
◼ Umallirichiy. Kayqa, juk yachachiymanta umallirichinapaq. Manataq, tantakuypi kaqkunata, parlarinankuta mañanqachu. Chantapis, qutuchakuyta yanapananpaqjina wakichikunqa.
◼ Tapuykunawan, kutichiykunawan ima. Kayta wakichikuqqa, tumpata parlariytawan, Torremanta Qhawaq revistatajina, tapuykunawan ukhunchanqa. Chantapis, pisillata parlanan tiyan. Tiempo kasqanmanjinataq, wakin pʼitista ñawiriyta atinman. Mana parrafosta ñawirichinanchu tiyan. Chaytaqa, kamachikuptillan ruwakunqa.
◼ Uyariqkunawan ukhunchanapaq. Kaypiqa, uyariqkuna kutichinankupaq, wakin tapuykuna ruwakunqa. Nisunman, umallirichiywan, tapuykunawan, kutichiykunawan ima, chaqrusqajina kachkanku.
◼ Rikuchiykuna, tapuykuna ima. Rikuchiykunawan ruwakunanta kamachikuptinqa, kaymanta yachachiq, chayta wakichinan tiyan. Mana pay kikin ruwayta atiptinqa, sutʼita parlaq, allin kawsayniyuq hermanosta, akllanan tiyan. Juk siervo ministerial umallirichinqa chayqa, niraq hermanosta akllachkaspa, ancianosta umachaq hermanota (chayrí, mayqin ancianollatapis) tapurinan tiyan. Manataq, kunallanraq willaq kaqkunata, akllananchu tiyan. Paykunata ñawpaqman rinankupaq yanapayta munaspaqa, yanapaqtajina churanman. Rikuchiykunata ruwaqkunaqa, ñawpaqmantapacha wakichikunanku tiyan. Rikuchichkaspataq, mana uyariqkunata wasanchanankuchu tiyan. Juk hermanota, Diospaq llamkʼasqanmanta tapurinan kaptinqa, plataformaman wicharichinqa, manataq tiyanallanmantachu parlachimunqa. Umallirichiqqa, imaynatachus rikuchiykuna, tapuykuna ima, wakichikusqanta, payraq ñawpaqta qhawarinan tiyan. Tiempowan saruchikuchkaptinpis, rikuchiykunata, tapuykunata ima, ruwananpuni tiyan.
Kay tantakuypaq wakichikusqanpi, wak kamachiykunawan rikhuriptinqa, chaykunata maychus nisqanmanjinapuni ruwakunan tiyan. Kay yachaqanapi sutʼinchakusqanqa, Willayta Yachanapaq Tantakuyninchik, ‘maychus kananmanjina’ ruwakunapaq yanapawasun (1 Cor. 14:40).