Tapuykuna

◼ ¿Pikunataq visitanankuta, publicacionesta ima mañananku tiyan?

Publicacionespa wasanpi, chantá Internetpi kay www.watchtower.org/qub nisqapi, publicacionesta chayri Jehovamanta sutʼinchaq visitananta mañakunapaq juk invitación rikhurin. Kay yanapasniqta achkha runas Bibliamanta yachakunku. Chaywanpis Reinomanta willaqkuna, amigosninkup, chayri familiaresninkup sutinpi mañasqankurayku ichá chʼampaykuna kanman.

Sutʼinchanapaq, sucursalmanta mana mañasqa publicacionta japʼispa, wakin runasqa, paykunata mana munachkaqta religionninchikman yaykunankupaq tanqasqanchikta, maypichus tiyakusqankutataq juk listapijina japʼichkasqanchikta ima ninku. Chantapis willaqkunaqa, chay runaspa wasinkuman rispa pʼinqaypi rikukunku, chay runas ni jaykʼaq visitanankuta mañasqankumanta phiñakusqankurayku. Chayrayku ni pi hermano publicacionesninchikpa wasanpi kaq invitacionman chayri Internetpi kaqman wakpa, sutinpi juntʼachinanchu tiyan. Manaqa, yachakuyta munaqkunalla juntʼachinanku tiyan. Imaraykuchus yachakuyta munaq mana juntʼachisqanta sucursal reparaptin, chay solicitudta mana atiendenchu.

Chantá, ¿imatá ruwasunman familianchikmanta pillapis chayri riqsisqanchik, Diosmanta yachakunanpaq? Publicacionesta leenanta munaspaqa, ichá juk publicacionta juk regalotajina apachisunman. Yachachinanchikta munaptintaq, chayniqpi kaq qutuchakuymanta ancianowan parlarisunman. Chayta mana ruwayta atiptinchiktaq kay Sírvase visitar (S-43) nisqa formulariota juntʼachisunman, qutuchakuymanta secretarioman jaywasunman, sucursalman apachinanpaq. Chantapis sucursalman carcelpi kaqpa, hospitalpi kaqpa sutinpi ima mana qillqanachu tiyan. Astawanpis chay runata yanapanapaq, chay lugarta mayqin qutuchakuymanta hermanoschus visitanku paykunawan parlarinta, chayri pay kikin sucursalman qillqananta nisunman.