Tapuykuna
◼ Internetnejta waj suyupi tiyakoj runaman willay chayri Bibliamanta yachachiy, ¿allillanchu?
Wakin hermanosqa Internetnejta willanku maypichus mana willajta saqewanchejchu chay lugarespi chayri pisi hermanoslla tiyan chaypi. Wakin kutispeqa jinata willasqankupi allin rerqa. Jinapis hermanos waj suyumanta runaswan correonkuta willanakunanku chayri qhelqanakunanku mana allinchu. (Reinomanta Willayninchej, 2007 julio killamanta 3 paginanta leeriy.) Llampʼu sonqo runasman Internetnejta willayta munajtinchejpis, sajra runaswan masichakuyman chayri Diosta wasanchajkunawan parlayman apawasunman (1 Cor. 1:19-25; Col. 2:8). Chantapis maypichus mana willajta saqewanchejchu chaypeqa autoridades tukuy imata qhawashallanku. Chaytaj mana allinchu kanman chay lugarmanta hermanosninchejpaj. Chayrayku, mana Internetnejta waj suyumanta runasta maskʼanachu tiyan sumaj willaykunata willanapaj.
Mayllapipis willashaspa uj forasterota tarispa, suyunman kutipojtin mana Internetnejta yachachinallapunichu, sucursal mana nejtenqa. Astawanqa jw.org nisqaman yaykuyta yachachisunman astawan yachakunanpaj chayri lugarninpi kaj sucursalman qhelqayta atinanpaj. Chantapis nillasunmantaj maypichus tiyakun chaynejpi Tantakuna Wasi kan chayqa, chayman rinanta. Testigos waturinankuta munajtenqa Persona que mostró interés (S-43) nisqata juntʼachisunman, chaytataj qotuchakuymanta secretarioman jaywasunman. Paytaj jw.org nisqanejta Betelman apachenqa. Chay forasteroj suyunpi kaj sucursalqa yanapayta atin Diosmanta yachakunanpaj, imajtinchus yachan imaynachus chay suyu kashasqanta. (Reinomanta Willayninchej, 2014 junio killamanta 7 paginata; Reinomanta Willayninchej, 2011 noviembre killamanta 2 paginata leeriy.)
Visitashanchej chay runa waj suyuman ripojtin chayri mana rejsisqanchej runata Internetnejta yachachishanchej chayqa iskay kaj parrafopi nisqanman jina ruwana. Jinapis yachachishallasunmanpuni uj hermano chay lugarninmanta visitanankama. Chaywanpis mana willajta saqewanchejchu chaypi tiyakun chayqa, Bibliaj yachachisqanta cartanejta, telefononejta, mensajesnejta mana apachinallachu (Mat. 10:16).