Qhatuspi mana manchachikuspa willana
1. ¿Imaraykutaj qhatuspi willayta mana manchachikunachu tiyan?
1 ¿Manchachikunkichu qhatuspi runasman Diosmanta willayta? Manchachikunki chayqa, ama llakikuychu, apóstol Pablopis sumaj willaj kaspapis, uj kuti Diospa Reinomanta mana manchachikuspa willananpaj mayta kallpachakunan karqa (1 Tes. 2:2). Qhawarinachej imaraykuchus qhatuspi willayta mana atisqanchejta, imaynatachus chayta atipanata ima.
2. ¿Imaraykú vendejkuna uyarinallawanchejta nisunman?
2 ¿Vendejta mana saqeshasqanchejtachu yuyanqanku? Wakin qhatuspi llankʼajkunaqa, rantejkunata atiendenankupaj ruwanasninkuta saqenku. Rantinanchejta yuyaspataj ichá allinta atiendewasunchej. Maychus kajta pʼachallikojtinchej, kʼachamanta parlapayajtinchej imaqa, ichapis paykunaqa allinpaj qhawawasunchej.
3. ¿Maykʼajtaj qhatuspi allin kanman willananchej?
3 ¿Rantikojkunaj ñaupaqenpichu willananchej kanqa? Allin kanman ranqhayta qallarishajtinku chayri manaraj ashkha rantejkuna kashajtinku willaj rinanchej. Vendej chayri dueño sapallan kashajtin, pisisitullata Diosmanta willana allin kanman.
4. Qhatuspi willashaspa, ¿imatá nisunman?
4 ¿Imatá nisunman? Uj qhatupi ashkha vendejkuna kajtenqa, dueñowan parlarina. Ichapis nisunman: “Qhatuspi llankʼajkunata wasisninkupi mana taripayta atillaykuchu, chayrayku Diosmanta parlarej kayman jamuyku. Ashkha ruwanayoj kasqaykirayku, uj ratitullata parlarisqayki”, nispa. Vendejwan mana pantachikunawanchejpaj, ichapis aswan allin kanman revistasmanta ni imata mañananchej, chaytaqa pay tapuwajtillanchej sutʼinchasunman. Atikojtenqa dueñota, chaypi llankʼajkunawan uj ratituta parlariyta atisunmanchus manachus chayta tapurinanchej. Atikojtintaj kay parrafoj qallariyninpi yuyaychakusqanta nisunman. Llankʼajkuna mana tiempoyoj kajtinkoqa, pisisitullata parlarina chantá uj tratadota saqena. Ni piwan parlariyta atejtinchejtaj, maynejmanchus publicacionesta leenankupaj saqenanchejta tapurisunman.
5. ¿Imaraykutaj qhatuspi willanapaj kallpachakuna tiyan?
5 Jesús, Pablo ima, qhatuspi mana manchachikuspa runasman willarqanku, noqanchejpis paykuna jina ruwayta atisunman (Mat. 4:18-21; 9:9; Hech. 17:17). Mana manchachikuspa willanapajqa, Jehovamanta kallpata mañakuna (Hech. 4:29, 30). Qhatuspi willayqa may sumaj, imaraykuchus ashkha runaswan parlariyta atinchej. ¿Manachu chayta ruwanaykipaj kallpachakuwaj?