Llajtayta tantapuway
1. ¿Imaspitaj rijchʼakun jatun tantakuykuna, ashkha suyuspaj jatun tantakuykuna ima, israelitas Sinaí orqopi tantakusqankuwan?
1 Jehovaqa, Moisesman kamacherqa israelitasta Sinaí orqopi tantachinanta, imaynatachus yuyarikunankupaj, jinallataj wawasninkumanpis yachachinankupaj. Chaytaj karqa Egiptomanta kacharichisqa kasqankutawan (Deu. 4:10-13). Tantakusqankoqa, maytachá creeyninkuta sinchʼiyacherqa. Kay qhepan killaspi Jehovaj llajtanpis, Jehová yachachinawanchejpaj, jatun tantakuykunapi, ashkha suyuspaj jatun tantakuykunapi ima tantakullasuntaj. ¿Imatá ruwasunman chay tantakuy yanapanawanchejpaj?
2. ¿Imatataj ruwasunman jatun tantakuypaj wakichisqa kanapaj?
2 Wakichikushana. Jehovaqa, israelitasta Sinaí orqopi tantakunankupaj wakichikunankuta nerqa (Éxo. 19:10, 11). Ajinallatataj noqanchejpis jatun tantakuyman rinapaj wakichikunanchej kanqa, nitaj chay tantakuypi parlarejkunallachu. Sutʼincharinapaj, ashkhasqa, llankʼayninchejmanta permisota mañakunanchej tiyan. Ichá Nehemías jina rikukusunman. Payqa, rey Artajerjespaj llankʼarqa, Jerusalenmantaj perqasninta watejmanta jatarichimoj riyta munarqa. Chaypajqa, permisota mañakunan karqa, jinapis yacharqa mana munasqan jinapunichu kananta. Chayrayku Nehemiasqa Diosmanta mañakorqa, mana manchachikuspataj kʼachamanta reywan parlarqa. Rey Artajerjestaj, Nehemiasta rejta saqerqa, yanaparqa ima (Neh. 2:1-9). Noqanchejpis patronninchejmanta permisota mañakuspapis, imapichus viajananchejta, maypitajchus alojakunanchejta, ¿yachanchejñachu? Ancianosqa tukuy sonqo yanapariwasun. Niraj qallarishajtin chayanapaj, tukuy sonqo uyarinapajtaj allinta wakichikuna (Heb. 2:1).
3. ¿Imataj jatun tantakuypaj sonqonchejta wakichiyta yanapawasun?
3 Uyarinapaj, yachakunapaj imaqa, sonqonchejta wakichinallataj (Esd. 7:10). Chantá Internetpi jw.org/qu, nisqapi jatun tantakuypaj wakichikusqanta, umallirichiykunaj sutisninkuta, ima versiculosmantachus orqhokusqanta ima tarisun. Familiapi Diosta Yupaychanapaj Chʼisipipis, imatachus jatun tantakuypi yachachikunanmanta parlarisunman. Wakin hermanosqa, chay tantakuypaj wakichikusqanmanta uj copiata imprimikunku, jatun tantakuypi kashaspataj chaypi anotakunku.
4. ¿Imaynatá tatas, wawasninkuta jatun tantakuypi yachachinkuman?
4 ‘Wawasniykichejmanpis yachachiychej’. ¿Imapajtaj israelitas Sinaí orqopi tantakorqanku? Jehovaj nisqanta wawasninkuman yachachinankupaj (Deu. 4:10). Jatun tantakuyninchejpis kikinta ruwanapaj yanapawanchej. Tatasqa wawasninkuwan khuska tiyakunanku tiyan, yanaparinankutaj tiyan. Chantapis familianchejwan chʼisisninpi chayri Diosta Yupaychanapaj Chʼisipi imatachus chay tantakuypi yachakusqanchejmanta parlarisunman.
5. ¿Imaynatá jatun tantakuyninchej yanapawasunchej?
5 Israelitastaqa, Sinaí orqopi tantakusqanku Diospa llajtanmanta kasqankuta jatunpaj qhawanankupaj yanaparqa (Deu. 4:7, 8). Jatun tantakuyninchejpis ajinallatataj yanapawasun. Kinsa pʼunchayta Satanaspa sajra pachanmanta karunchakusun, astawan kallpacharikusun, hermanosninchejwantaj masicharikusun uj paraisopi jina (Isa. 35:7- 9). Jehovaj pʼunchaynin qayllamushasqanrayku, sapa wata jatun tantakuyninchejman rinanchejpuni tiyan, purajmanta kallpacharikunapaj (Heb. 10:24, 25).