Yachakunapaj sumajta uyarina
1. ¿Imaraykutaj jatun tantakuypi mana sumajta uyariyta atillanchejchu?
1 Tumpamantawan 2013 watapaj jatun tantakuykuna qallarenqa. Chaypajtaj sumaj yachachiykunata mayta wakichikushan, tukuy runastataj yanapanqa. Kinsantin pʼunchayta chaypi kanaykipaj, ¿wakichikunkiñachu? Jatun tantakuykunapeqa, ashkha imas jarkʼawasqanchejrayku mana sumajta uyariyta atillanchejchu. Aswan horasta tantakusqanchejrayku, tukuyninta sumajta uyarinapaj mayta kallpachakunanchej tiyan. Wakin kutisqa, viajasqanchejrayku chayri waj imasrayku saykʼusqa kasunman. Sumajta uyarinapajtaj rijchʼarisqa kananchej tiyan. ¿Imataj chaypaj yanapawasun? (Deu. 31:12.)
2. ¿Imaynatá sonqonchejta jatun tantakuypaj wakichisunman?
2 Jatun tantakuy ñaupajta. Internetpi www.jw.org/qu nisqapi jatun tantakuypaj wakichikusqanta, umallirichiykunaj sutisninkuta, ima versiculosmantachus orqhokusqanta ima tarinki. Internet kapusunki chayqa, sonqoykita ñaupajmanta wakichinaykipaj, allin kanman chaykunata qhawarinayki (Esd. 7:10). Familiapi Diosta Yupaychanapaj Chʼisipipis, imatachus jatun tantakuypi yachachikunanmanta parlariwajchej.
3. ¿Imataj sumajta uyarinapaj yanapawasun?
3 Jatun tantakuypi. Atikojtenqa tantakuy niraj qallarishajtin, jispʼana wasiman risunman. Chantapis celularninchejta wañuchina tiyan. Jinamanta wajyamuwajtinchej chayri mensajeta apachimuwajtinchej, mana chʼajwanqachu, nitaj kutichinapaj tanqasqa kasunchu. Celularninchej japʼichisqa kanan kajtintaj, mana chʼajwananpaj jina churana. Celularman rijchʼakoj computadorata apaspaqa, mana reparayllata apaykachana. Umallirichishajtinkutaj, mana mikhunachu, nitaj ujyanachu (Ecl. 3:1). Chantapis umallirichejta qhawana, parlashasqantataj anotakuna. Leekusqan textostapis Biblianchejpi leena.
4. ¿Imaynatá tatas, wawasninku uyarinankupaj, yachakunankupaj ima yanapankuman?
4 Chantapis wawas, sumajta uyarinankuta, yachakunankuta ima munanchej. Proverbios 29:15 nin: “Munayninta ruwajta saqesqa wawa[qa] mamanta pʼenqachin”, nispa. Chayrayku tatasqa, wawasninkuwan khuska tiyakunanku tiyan. Ajinamanta wawasninku, mana celularnejta parlanankupaj chayri mensajesta apachinankupaj, nitaj puriykachashanankupaj sumajta qhawanqanku. Mana tukuy parlakusqanta entiendejtinkupis, juchʼuy wawasta rijchʼarisqas, mana chʼajwaspataj kanankupaj yachachisunman.
5. ¿Imaraykú jatun tantakuypi yachachikusqanta yuyarina? ¿Imaynatá chayta ruwasunman?
5 Chʼisisnin. Chʼisisnenqa allinta samarikuna tiyan. Yachachikusqanta sumajta japʼeqanapaj, allin kanman familianchejwan chʼisisnin chaymanta parlarinanchej. Amigosninchejwan mikhoj rispapis, uj chayri iskay yuyaychaykunamanta parlarisunman. Chaypajtaj ichapis anotakusqanchejwan yanapachikusunman. Aswan qhepamantaj, familiapi Diosta yupaychashaspa, imaynatachus yuyaychakusqanman jina kausanamanta parlarisunman. Chantapis sapa semana, mosoj publicacionesmanta uj chhikanta ukhuncharisunman.
6. Jatun tantakuyman rispa, ¿imatá ruwananchej tiyan, imaraykutaj?
6 Sumaj mikhunaman rispa mana miskʼirichikunchejchu chayqa, qhasi manakajlla risqanchej kanman. Jatun tantakuywan kikillantaj kasqanta nisunman. Chayrayku chaypi yachachikusqanwan miskʼirichikunapajqa, tukuy tantakuypi kanapaj kallpachakuna, sumajta uyarina, yachakusqanchejman jinataj ruwana.