Diosta yupaychanapaj mosoj takiykuna
1 Sapa wata allin yuyayniyoj kamacheqa Estados Unidospi uj jatun tantakuyta wakichin, chaytaj kay 4 de octubrepi karqa. Chaypitaj Jehová Diosman takinapaj libronchejta allinchakunanta nikorqa. Chaytaj tantakuyman jamojkunapaj may kusiypuni karqa, imajtinchus Reinomanta takiykunaqa Diosninchejta yupaychanapaj may sumaj (Sal. 96:2).
2 Chantá, ¿imajtintaj allinchakunanpuni tiyan? Imajtinchus Bibliaj yachachiykunasnenqa astawan sutʼinchakushallanpuni, takinapaj libronchejtaj chayman jinallataj allinchakunan tiyan (Pro. 4:18). Chantapis kay Traducción del Nuevo Mundo Biblianchejmanta ashkha palabrasta allinchakorqa, chayraykutaj takinanchejpaj libronchejpis chay allinchasqa palabrasman jinallataj allinchakunan tiyan. Kay takinapaj libronchejta allinchakushasqanraykutaj, waj mosoj takiykunatawan yapakullanqataj.
3 Takinapaj mosoj libronchej chayamunanta, ¿suyanachu kanqa? Mana. Astawanpis may kusiywan niyta munayku, kay qhepan killaspi chay mosoj takiykuna, jw.org nisqaman churakunanta. Sapa churakojtintaj, Willayta Yachanapaj Tantakuyninchej tukukusqantawan takikonqa, Reinomanta Willayninchejpitaj “mosoj takiy” kasqanta nishanqa.
4 ¿Imaynatá mosoj takiykunata yachakusunman? Mosoj takiykunata mana usqhayta yachayta atispapis, salmista jina tantakuykunapi mana chʼinllachu kayta munanchej, astawanqa takiriytapuni munanchej (Sal. 30:12). Chayrayku kay yuyaychaykunaman jina ruwana:
Kutin kutita chay mosoj takiypa grabacionninta uyariy, mayqenchus kay jw.org nisqapi churasqa kashanqa chayta. Uyarillasunpuni chayqa yuyarikuyta atillasun.
Chay mosoj takiykunata kutin kutinta leerina, mana qonqananchejpaj.
Grabacionta churakuspa takiriy. Chaytataj ruwallaypuni chʼuwitata takirinaykikama.
Wakin kuteqa Familiapi Diosta yupaychashaspa takiriychej, tukuyniykichej mana manchachikuspa takirinaykichejpaj.
5 Willayta Yachanapaj Tantakuy tukojtinkama, uj mosoj takiyta takina kajtenqa, tukuyninchej uyarinanchejpaj chay takiypa grabacionnintaraj ñaupajta churakonqa. Chantá imaynatachá takiykunasninchejta takinchej, ajinallatataj takinanchej kanqa.
6 Tantakuykunapi uj kunkalla takirispa Jehovata yupaychayqa, may kusiypuni. Chayrayku takina kajtenqa tiyanasninchejpi kashananchej tiyan, amataj yachaykukunachu qhasillapaj jawaman llojsiyta.
7 Chantapis jatun tantakuypeqa, umallirichiykuna qallarinanpajña kashajtin takiykunata churamuyta yachanku. Chay takiykunata tiyanasninchejmantapacha uyarinanchejta nimuwajtinchejqa kasukunanchej tiyan, imajtinchus chay kʼacha takiykunataqa ashkha hermanostaj, hermanastaj wakichinku. Paykunaqa chayta ruwanankupaj waj suyusmanta qolqenkuwan Patterson Nueva York llajtaman sapa wata iskay kutita rinku. Chay takiykunata uyareyqa, umallirichiykunata sonqonchejpi japʼinanchejpaj yanapawasun (Esd. 7:10).
8 Kay tantakuyninchejta tukuchanapaj uj mosoj takiyta takisun, titulontaj: “¡Sayachisqayki Reinoqa jamuchun Diosniy!”. Chay takiytaqa kay 4 de octubreta jatun tantakuypi kajkuna uyarerqanku, wakichikorqataj Diospa Reinon pachaj watastaña kamachishasqanta yuyarinapaj.
9 Kay mosoj takiykunaqa, Jehovamanta jamoj allin kaj imaspuni kanku (Mat. 12:35). Chayrayku kay mosoj takiykunata yachakunapaj kallpachakuna, tukuy sonqotaj Diosninchejta jatunchanapaj takirina (Sal. 147:1).