¿Imaynatá Biblia yanapawanman? 2 kaj: Bibliata leespa gustachikuy

Will sutiyoj joven nin: “Wakin kutis Bibliata leeyqa mana gustawajchu. Jinapis imaynatachus leenata yachakorqani. Kunantaj Bibliata leey mayta gustawan”, nispa.

Kay yachaqanaqa Bibliata leespa gustachikunaykipaj yanapasonqa.

• Bibliata leeshaspaqa rikushawajpis jina leeriy

• Astawan ukhunchay

• Wakin jóvenes jinata ninku

Bibliata leeshaspaqa rikushawajpis jina leeriy

Rikushawajpis jina leenaykipajqa, kay imasta ruwawaj:

1. Imamantachus yachayta munasqaykita ajllakuwaj. Bibliapeqa leeriwaj Jesuspa kausayninmanta, imachus ñaupa tiempopi pasasqanmanta, manachayrí jw.org nisqapi “Dramapi jina leerisqas” nisqamanta uj grabacionta uyariwaj.

2. Ajllasqaykita leeriwaj. Leeriwaj sapallayki chayri familiaykiwan, manachayrí amigosniykiwan. Ujninkoqa cuentarishanmanpis leerinman. Wajkunataj ñaupa tiempomanta Diospa kamachisninpis kankuman jina leerinkuman.

3. Kay yuyaychaykunaman jina ruwawaj:

   • Bibliapi pejpa kausayninmantapis leeshaspaqa, dibujosta ruwawaj. Chay dibujopitaj wakin palabrasta anotakuwaj yuyarikunaykipaj.

   • Diospa ujnin kamachinmanta leeshaspaqa, uj papelpi sutinta anotawaj, ladosninmantaj churawaj imaynachus kasqanta, imatachus ruwasqanta, ima bendicionestachus japʼisqantapis.

   • Diospa ujnin kamachinmanta leespaqa, paypis kawaj jina, paytapis tapurishawaj jina ruwawaj. Paymanta yachajkunata chayri rikojkunata tapurishawajpis jina ruwallawajtaj.

   • Diospa ujnin kamachin pantaykusqanmanta leerishanki chayqa, piensariy allin kajta ajllajtin imaynachus kananpi. Apóstol Pedropi piensarina. Payqa Jesusta negarqa (Marcos 14:66-72). Pedro, ¿imaynataj kashanman karqa Jesusta mana negajtin?

   • Bibliapi pejpa kausayninmantapis leeshaspaqa, imachus paywan kasqanta qhelqawaj. Chantapis imatachus paymanta yachakusqaykita qhelqallawajtaj (Romanos 15:4).

     

Astawan ukhunchay

Bibliapi imallamantapis leeshaspaqa, astawan ukhunchay. Chayta ruwanki chayqa, sumaj yachachiykunata tarinki, imamantachus leeshasqaykitapis astawan entiendenki.

Mateo 28:7 kikinchay Marcos 16:7.

• ¿Imaraykutaj Marcos qhelqasqanpi nerqa Jesús discipulosninman, Pedroman ima rikhurisqanta?

• Yanapa: Ichapis Pedro willanman karqa. Imaraykuchus Marcosqa mana rikorqachu imachus pasasqanta.

• ¿Imatá chaymanta yachakunchej? Yachakunchej Jesús Pedrota watejmanta rikuyta munasqanqa, Pedrota mayta sonqochasqanta. Jesusqa mana Pedrowan phiñasqachu kasharqa (Marcos 14:66-72). Yachakullanchejtaj Jesusqa Pedrota sumaj amigonta jina qhawasqanta. Noqanchejpis Jesús jina sumaj amigo kayta munanchej chay, ¿imatataj ruwananchej tiyan?

Bibliapi pejpa kausaynillanmantapis rikushawajpis jina leenki, astawantaj ukhuncharinki chayqa, Bibliata leey astawan gustasonqa.