Tukuyniqpi saqinapaq

1. ¿Imapaq Chiqa kutichiykuna tratado ruwakun?

¹ Chiqa kutichiykunata yachayta munawaqchu tratadoqa, Bibliamanta yachachiyta qallarinapaq sumaq yanapa. Chantapis chiqa yachachiykunata mujutajina tukuyniqpi tarpunapaq, yanapawanchik (Ecl. 11:6). Qhipan parrafospi, imaynatachus willaypi sumaqta yanapachikunanchikta sutʼinchakunqa.

2. Runaswan parlayta qallarinapaq, ¿imaynatá tratado yanapawasunman?

² Parlayta qallarinapaq. Kay tratadota wasiyuqman jaywaytawan, suqtantin tapuykunata rikuchiwaq, tapuriwaqtaq: “Kay tapuykunamanta, ¿mayqintataq tapurikurqanki?” Kutichisqantawan, tapuyninman tratadowan Bibliap kutichisqanmanta sutʼinchariy, chantá Bibliamanta ñawiripuy. Chaymantataq tratadop tukukuynin paginanmanta, parlariy chayri ñawiriy. Yachachin librotataq saqinaykipaq rikuchiy. Librota mana munaptinpis, tratadota saqisqaykiqa chiqa yachachiykuna sunqunpi saphichakunanpaq yanapanman (Mat. 13:23).

3. Wasiyuq mana tiempoyuq kaptin, ¿imatá ruwana kanman?

³ Wasiyuq mana tiempoyuq kaptin. Jinata niwaq: “Manasina allin horapichu chayamuni, chaywanpis kay tratadollata saqirisqayki. Kaypi suqta tapuykuna rikhurin, kaykunatataq runas tapurikunku, kay tapuykunamantaq Bibliawan kutichin. Juktawan kutimuptiytaq ñawirisqaykimanta parlarisunman”.

4. Callespi tratadota jaywanaykipaq, ¿imatá niwaq?

⁴ Callespi willachkaspa. Ichá niwaq: “Imaynalla. ¿Maykʼaqllapis kay tapuykunata tapurikurqankichu? [Kutichinanta suyariy.] Kay tratadoqa, kay tapuykunasman Bibliawan sutʼita kutichin, mana iskaychakunapaqjina.” Chay runa tiempoyuq kaptinqa, juk tapuypa kutichiyninta ukhunchariy, chantá Yachachin librota saqinaykipaq rikuchiy.

5. Wasipi ni pi kaptin, ¿imaynatá tratadota saqisunman?

⁵ Wasipi ni pi kaptin. Wakin lugarespiqa, willaqkuna wasipi ni pita taripaspa, tratadota mana rikunapi saqinku, jinata qutuchakuyniykipi ruwanku chayqa, wakin kutipi Chiqa kutichiykuna tratadota saqiwaq. Kutispataq jinata niwaq: “Qaninpa wasiykiman jamuspa ni pita tariparqaykuchu, chayrayku kayjina tratadota saqirqayku. Kay tapuykunamanta, ¿mayqinpa kutichiyninta yachayta munawaqrí?”

6. ¿Imaraykutaq Chiqa kutichiykuna tratado willaypi sumaqta yanapawasunman?

⁶ Chiqa kutichiykuna tratado, Bibliamanta entiendenapaqjina, sumaqta sutʼinchan. Tukuy laya religionniyuq, ususniyuq runas yachakuyta munanankupaqjina. Chantapis kunallanraq willayman lluqsiqkuna, wawas ima, jaywayta atillanku. ¿Qampis runaman jaywarichkankichu?