Sumajta willanapaj kallpachakunallapuni
1. ¿Imatá ñaupa tiempo cristianosmanta yachakunchej?
1 Cristianosqa sumajta willananchejpaj kallpachakunallapuni tiyan. Jesuspis yachachisqasnintaqa, allinta wakicherqa sumajta willanankupaj (Luc. 9:1-5; 10:1-11). Aquilawan, Priscilawanpis Apolosman “aswan sutʼita Diospa ñanninmanta” sutʼincharqanku (Hech. 18:24-26). Pablopis Timoteotaqa unaytaña willajtinpis aswan sumajta yachachinanpaj kallpacharqa, Diospa llajtanpi ñauparishasqanta ‘tukuy rikunankupaj’ (1 Tim. 4:13-15). Chayrayku, unaytaña Reinomanta willashanchej chaypis, sumajta yachachinapaj kallpachakunallapuni tiyan.
2. ¿Imatá ruwasunman hermanosninchejmanta yachakunapaj?
2 Hermanosmanta yachakuna. Sumajta willananchejpajqa, hermanosninchejmanta yachakuna tiyan (Pro. 27:17). Willashaspaqa imaynatachus hermanonchej willashasqanta sumajta qhawana. Chantapis sumajta willanku chay hermanosta yuyaycharinawanchejta nisunman. Yuyaychariwasqanchejtataj sumajta japʼikuna (Pro. 1:5, 6). Ichá wakin kutisqa yachakuyta munajman kutiyta, Bibliamanta yachachiyta qallariyta chayri waj jinasmanta willayta mana atillanchejchu. Jina kajtenqa willaypi kamachej hermanota chayri sumajta willanku chay hermanosta yanapanawanchejta nisunman. Amataj qonqanachu espíritu santo yanapanawanchejta. Chayrayku Diosmanta espíritu santota mañakunallapuni (Luc. 11:13).
3. Mana nisqallanchej uj hermano yuyaychariwanchej chayqa, ¿imaynatá japʼikunanchej tiyan?
3 Uj hermano mana nisqallanchej yuyaychariwanchej chayqa, ama phiñakunachu (Ecl. 7:9). Apolos jina agradecekuna, llampʼu sonqotaj kana, yuyaychaykunatapis japʼikuna. Chaymin yuyayniyoj kayqa (Pro. 12:15).
4. ¿Imaraykutaj sumaj willajkuna kananchejpaj kallpachakunallanchejpuni tiyan?
4 Ñauparispaqa Diosta jatunchanchej. Jesusqa yachachisqasnin astawan sumajta willanankupaj uj rijchʼanachinamanta parlarqa. Nerqataj payqa uj uva sachʼa jina kasqanta, ajllasqa cristianostaj chay sachʼapi poqoj ramasnin jina kasqankuta, mayqenkunatachus Dios “astawan poqona[nku]paj” podan chaykuna (Juan 15:2). Imaynatachus uva huertayoj dueñoqa munan chay sachʼasnin astawan sumajta poqonankuta, kikillantataj Jehová Diosqa sapa kuti astawan sumajta willamunanchejta munan (Heb. 13:15). Sumajta willaspaqa, Jesús nerqa jina ‘ashkha poqoyniyoj rama jina kasunchej Jehovatataj jatunchasunchej’ (Juan 15:8).