Jesusqa khuyakuyniyoj Kuraj kaj Sacerdotenchej

1, 2. 1) ¿Imaraykutaj Jehová Wawanta kay jallpʼaman kachamorqa? 2) ¿Imatataj kay yachaqanapi yachakusun? (Hebreos 5:7-9).

JEHOVÁ may munasqa Wawanta kay jallpʼaman kachamusqanmanta 2.000 watas jinaña kashan. Paytaqa kachamorqa juchamanta, wañuymantawan kacharichinawanchejpaj, Satanaspa tukuy ruwasqasnintataj tukuchinanpaj (Juan 3:16; 1 Juan 3:8). Chantapis Jehová yacharqa Jesustaqa runa jina kausasqan Kuraj kaj Sacerdote kananpaj aswan sumajta wakichinanta. Chaywan khuyakunawanchejpaj, entiendenawanchejpaj, noqanchejpajtaj sonqoyoj kananpaj. Jesusqa 29 watapi bautizakusqantawan Kuraj kaj Sacerdote jina sirviyta qallarerqa.a

² Kay yachaqanapi yachakusun, Jesustaqa kay jallpʼapi kausasqan khuyakuyniyoj Kuraj kaj Sacerdote kananpaj aswan sumajta wakichisqanta. Chaytataj sumajta entiendenanchej tiyan. Ajinamanta atillasun Jehovaman qayllaykuyta, paymanta orakuytapis, astawanraj juchasninchejrayku, pantasqasninchejrayku desanimasqa kajtinchej (Hebreos 5:7-9 leey).

DIOSPA ASWAN MUNASQA WAWAN JALLPʼAMAN JAMUN

3, 4. ¿Imaspitaj Jesús kay jallpʼapi rikukorqa?

³ ¿Maykʼajllapis kausayninchejpi imapis cambiarqachu? Ichapis uj lugarpi sumajta kakushaspa familianchejta, amigosninchejta saqespa waj ladoman ripunanchej karqa. Ajinata kausayninchej cambiasqantaj mana facilchu. Jinapis chayqa Jesuspa kausaynin cambiasqanwan kikinchajtinchej mana imapischu. Payqa cielopi kashajtin tukuynin angelesmanta aswan patapi karqa. Chantapis Jehovapaj may munasqa karqa, Tatanpa ‘paña ladonpi’ kaspataj kusisqapuni karqa (Sal. 16:11; Pro. 8:30). Filipenses 2:7 versiculotaj niwanchej “tukuy kapuyninta” tukuy sonqo saqespa kaj jallpʼaman jamusqanta, juchasapa runaswan khuska kausananpaj.

⁴ Wawa kashasparí, ¿imaspitaj Jesús rikukorqa? Wajcha familiallapi nacekorqa. Chayta ninchej Jesús nacekojtin tatasnin jaywanankupaj iskay pʼisqetusllata apasqankurayku (Lev. 12:8; Luc. 2:24). Chantapis sajra rey Herodesqa nacekusqanta yachaytawan wañuchiyta munarqa. Chayraykutaj Egiptoman ayqekorqanku, chaypitaj forasteros jinalla uj tiempota tiyakorqanku (Mat. 2:13, 15). Jesuspa kausaynenqa chay jinatapuni cambiarqa.

5. ¿Imastataj Jesús kay jallpʼapi kashaspa rikorqa, chay rikusqan imaynatá wakicherqa Kuraj kaj Sacerdote kananpaj? (Dibujotawan qhawariy).

⁵ Jesusqa kay jallpʼapi kashaspa ashkha runasta sufrejta rikorqa. Pinillanchejpis wañupojtin imaynatachus sonqonchej nanasqanta paypis sientellarqataj. Kay jallpʼapi kashajtin ashkha rejsisqasninchá wañuporqanku, ichapis tatan Josetapis wañupojta rikorqa. Chantapis rikorqa lepra onqoyniyojkunata, cieguitosta, suchitusta, wawanku wañupusqanmanta waqajkunata ima, tukuy paykunamantataj khuyakorqa (Mat. 9:2, 6; 15:30; 20:34; Mar. 1:40, 41; Luc. 7:13). Cielomantapachaqa ashkha runastaña sufrejta rikumorqa. Jinapis kay jallpʼapi kausaspaqa aswan sumajta entienderqa imaynatachus runas sufrisqankuta (Isa. 53:4). Runaman tukusqanrayku aswan sumajta entienderqa imapi rikukojtinkupis imaynachus runaspa sonqonku kasqanta, llakiykunapi rikukuspataj mayta sufrisqankuta. Chantapis Jesusqa noqanchej jinallataj saykʼorqa, phutikorqa, llakikorqa ima.

JESÚS WAJKUNAPAJ SONQOYOJ KARQA

6. ¿Imatataj yachachiwanchej imawanchus Isaías runasta kikinchasqan? (Isaías 42:3).

⁶ Jesusqa kay jallpʼapi kashaspa sonqoyoj karqa pisi kallpaspaj, kʼumuykachachisqa kajkunapajpis. Ajinamanta juntʼarqa Isaiaspa qhelqasqanta. Hebreo Qhelqasqaspi wakin kutisqa kallpayojkunata, qhapajkunata sumaj qarpasqa huertaswan, jatuchaj sachʼaswan kikinchan (Sal. 92:12; Isa. 61:3; Jer. 31:12). Wajchastawan, kʼumuykachachisqastawantaj kikinchan lajrasqa caña huecawan, ñakʼayllataña laurashaj mechawan ima. Chay imastaj runaspajqa niña valenchu (Isaías 42:3 leey). Chaywan Isaiasqa nisharqa runas pisipaj qhawanku chaykunata Jesús munakunanta, khuyakunanta ima.

7, 8. ¿Imaynatá Jesús Isaiaspa profecianta juntʼarqa?

⁷ Mateoqa kayta nispa rikucherqa Jesús Isaiaspa nisqanta juntʼasqanta: “Mana lajrasqa caña huecallatapis pʼakenqachu, nitaj ñakʼayllataña laurashaj mechallatapis wañuchenqachu” (Mat. 12:20). Jesusqa ashkha milagrosta ruwarqa kʼumuykachachisqa kajkunapaj, niña kausayninku allinyananta yuyajkunapajpis. Lepra onqoywan juntʼa kasharqa chay runapi piensarina. Ichapis yuyarqa niña sanoyapunanta, manañataj familianwan, amigosninwanpis watejmanta khuska karikunanta (Luc. 5:12, 13). Piensarinallataj joqʼaritataj khakitutaj kasharqa chay runapi. ¿Imaynataj kashanman karqa wajkunata sumajta parlarikusqankuta rikuspa, nitaj paykunawan parlarikuyta atispa? (Mar. 7:32, 33). Mana chayllachu.

⁸ Jesuspa tiemponpi ashkha judiosqa onqoykunamanta, malcito kaymantapis pantasqata yuyaj kanku. Paykunaqa nej kanku chay imasqa juchankumanta chayri tatasninkoj juchankumanta castigo kasqanta (Juan 9:2). Chayrayku onqosqasta, malcito kajkunatapis uj ladoman churaj kanku. Jesustaj sanoyacherqa, yanaparqataj Diosninchej paykunamanta mana qonqakusqanta yachanankupaj. Chaywan Isaiaspa profecianta juntʼarqa. ¿Imatataj chay reparachiwanchej?

9. ¿Imaynatá Hebreos 4:15, 16 versículos reparachiwanchej Jesús khuyakuyniyoj Kuraj kaj Sacerdote kasqanta?

⁹ (Hebreos 4:15, 16 leey). Mana iskayrayanchejchu Jesusqa noqanchejtapis khuyakuwasqanchejmanta. Kay versiculopi ‘khuyakuy’ palabrata griego parlaymanta traducikusqanqa, entiendechin wajpa llakiyninta llakiyninchejta jina, wajpa nanayninta nanayninchejta jina sientenata. Hebreos 10:34 versiculopitaj, Pabloqa kikin palabrallatataj oqharerqa carcelpi kajkunata khuyakunamanta parlananpaj. Jesuspa milagrosninmanta qhelqakusqanpi sutʼita reparanchej, wajkunata sufrejta rikuspa Jesuspa sonqon maytapuni nanasqanta. Jesusqa mana ruwananpuni kasqanraykullachu runasta sanoyachej, manachayqa khuyakusqanrayku, yanapariytapunitaj munasqanrayku. Lepra onqoyniyoj runataqa karitullamanta sanoyachiyta atinman karqa, jinapis llankhaykuspapuni sanoyacherqa. Ichapis chay runataqa ashkha watasña ni pi llankharerqachu. Joqʼarita runatapis allinninta munasqanrayku chʼajwamanta ladoyachispa sapallanpi sanoyacherqa. Juchanmanta arrepientekoj warmi Jesuspa chakisninta mayllajtin, chujchanwantaj chʼakichejtin, uj fariseoqa chay warmita pisipaj qhawarqa. Jesustaj payman kutikorqa, mana manchikuspataj chay fariseota cheqancharqa (Mat. 8:3; Mar. 7:33; Luc. 7:44). Jesusqa ni jaykʼaj ladonchakojchu onqosqasmanta, jatun juchasta ruwajkunamantapis. Astawanpis chunka makiwan paykunata japʼikoj, khuyakojtaj. Noqanchejwanpis kikillantataj ruwan.

KURAJ KAJ SACERDOTENCHEJ JINA RUWANA

10. ¿Ima yanapastaj tiyan joqʼaritaspaj, cieguitospajpis? (Fotostawan qhawariy).

¹⁰ Jesús jina ruwayta munasqanchejrayku, kallpachakunchej wajkunata munakunapaj, khuyakunapaj, paykunapaj sonqoyoj kanapajpis (1 Ped. 2:21; 3:8). Noqanchejqa mana joqʼaritasta, ni cieguitostapis sanoyachiyta atinchejchu, jinapis Jehovaman qayllaykunankupaj yanapariyta atinchej. Chayrayku publicacionesninchejqa señas parlaykunapi 100 kurajpiña tiyan. Braillepitaj 60 kuraj parlaykunapiña tiyan. Chantapis ashkha videosña tiyan imachus chay videopi pasashasqanta willaj grabasqasniyoj, ajina videostaj 100 kuraj parlaykunapiña tiyan. Chaywan joqʼaritaspis cieguitospis Jehovaman, Wawanmanwan qayllaykuyta atinku.

11. ¿Imaynatataj Jehovaj llajtan Jesús jina ruwan? (Hechos 2:5-7, 33; fotostawan qhawariy).

¹¹ Jesusqa kausarimuytawan espíritu santota discipulosninman tʼakaykorqa. Ajinamanta Pentecostés Fiestaman jamojkunaman “parlayninkupi” sumaj willaykunata willanankupaj (Hechos 2:5-7, 33 leey). Jehovaj llajtanpis Jesús jinallataj tukuy laya runasta yanapashan Jehovata rejsinankupaj. Chayrayku publicacionesninchejqa 1.000 kuraj parlaykunapiña ruwakun. Chay parlaykunamanta wakintataj may pisilla parlanku. Ajina pasan continente americanomanta wakin parlaykunawan. Jinapis Diospa llajtanqa chay parlaykunamanta 160 kurajpiña publicacionesta ruwan, chay parlayniyoj runas sumaj willaykunata uyarinankupaj. Chantapis romaní chayri gitano runaspaj 20 kuraj parlaykunapiña publicacionesninchej tiyan. Chaytaj may chhika runastaña yanapan cheqa kajta japʼikunankupaj.

12. ¿Imatawantaj Jehovaj llajtan ruwan?

¹² Jehovaj llajtanqa mana sumaj willaykunallatachu runasman willan, manachayqa desastres naturales kajtinpis yanapallantaj. Ashkha hermanos llakiypi tarikojkunata yanapaj rinku. Chantapis Diospa llajtanqa Tantakuna Wasista ruwapullawanchejtaj, chaypi tantakuspa Diospa munakuyninmanta astawan yachakunanchejpaj.

KURAJ KAJ SACERDOTENCHEJ SAPA UJNINCHEJTA YANAPAWANCHEJ

13. ¿Imaynasmantá Jesús yanapawanchej?

¹³ Jesusqa sumaj Michejninchej kasqanrayku, Jehovaman qayllaykunanchejpaj imatachus necesitasqanchejta sapa ujninchejman qowanchej (Juan 10:14; Efe. 4:7). Llakiykunapi rikukusqanchejrayku lajrasqa caña hueca jinallaña kasunman, ñakʼayllataña laurashaj mecha jinataj. Ichapis sinchʼi onqosqa kasqanchejrayku, juchata ruwasqanchejrayku chayri uj hermanowan phiñanakusqanchejrayku ni imapaj valorninchej kanmanchu. Ajinapi rikukuspa chay llakiynillanchejpi yuyasunman, nitaj sumaj suyakuyniyoj kasqanchejta yuyarikusunmanchu. Jinapis chay kutispi yuyarikuna Jesusqa imaspichus rikukushasqanchejta yachasqanta, imaynachus kashasqanchejtapis entiendewasqanchejta. Khuyakuwasqanchejraykutaj yanapawanchej. Ichapis espíritu santonejta kallpata qowasunman (Juan 16:7; Tito 3:6). Ancianosqa congregacionmanta ‘regalos jina’ kanku. Jesustaj paykunamanta chayri waj hermanosninchejmanta valekunman kallpachanawanchejpaj, yanaparinawanchejpaj ima (Efe. 4:8).

14. ¿Imatá ruwasunman desanimasqalla kashajtinchej?

¹⁴ Sichus desanimasqalla kashanchej, nitaj ni imapaj valorninchej kanchu chayqa, Kuraj kaj Sacerdotenchej Jesuspi piensarina. Paytaqa Jehová kay jallpʼaman kachamorqa mana noqanchejrayku kausayninta qonallanpajchu, manachayqa ima llakiykunapichus rikukusqanchejta aswan sumajta entiendenanpaj. Juchasninchejrayku chayri pantasqasninchejrayku llakisqalla kashanchej chaytaj, Jesusqa wakichisqa kashan “yanapata necesitashajtinchejpuni” yanapanawanchejpaj (Heb. 4:15, 16).

15. ¿Imataj uj hermanota yanaparqa congregacionman kutinpunanpaj?

¹⁵ Jesusqa discipulosninta yanapallantaj Diosmanta karunchakojkunata maskʼamunankupaj, yanaparinankupajtaj (Mat. 18:12, 13). Stefanomantab parlarina. Payqa congregacionmanta orqhosqa karqa, 12 watasmantataj watejmanta tantakuyman rerqa. Pay nin: “Pʼenqakorqani salonman yaykuyta. Jinapis munarqani watejmanta Jehovaj familianmanta kayta. Noqawan tantakoj ancianosqa mayta munakuwasqankuta rikuchiwarqanku. Wakin kuteqa Jehovamanta karunchakusqaymanta noqallawantaj phiñakoj kani, niñataj kutinpunaypaj kallpachakuyta munarqanichu. Jinapis ancianosqa yuyarichiwarqanku Jehovapis Jesuspis kallpachakunallaytapuni munasqankuta. Kutinpojtiytaj congregacionqa noqatawan familiaytawan chunka makiwan japʼikuwarqayku. Tiempowan señoray Bibliata estudiarqa, kunantaj familiantin Jehovata sirviyku”, nispa. Munakuyniyoj Kuraj kaj Sacerdotenchejqa maytachá kusikun arrepientekojkunata congregacionman kutinpunankupaj yanaparejtinchej.

16. ¿Imajtintaj maytapuni agradecekunchej khuyakuyniyoj Kuraj kaj Sacerdotenchejmanta?

¹⁶ Jesusqa kay jallpʼapi kashaspa may chhika runasta yanaparqa yanapata necesitashajtinkupuni. Kay tiempopipis kikillantataj yanapanawanchejmanta mana iskayrayanchejchu. Tumpamantawantaj kasukoj runasta paraisopi yanapanqa manaña juchasapas, niñataj pantaj runas kanankupaj. Maytapuni Jehová Diosninchejta agradecekunchej. Payqa munakuwasqanchejrayku, khuyakuwasqanchejrayku Wawanta churarqa khuyakuyniyoj Kuraj kaj Sacerdotenchej kananpaj.