“Qanqa may munasqa kanki”

1, 2. ¿Imataj yanapawasunman Jehovapaj may munasqa kasqanchejmanta mana iskayrayanapaj?

JEHOVAPAJQA tukuy kamachisnin may munasqas kanku. Jinapis wakenqa pisipaj qhawakunku. Ichapis ajinata qhawakunkuman wajkuna kʼumuykachachisqankurayku, ni imapaj valesqankutataj yuyachisqankurayku. ¿Qanpis ajinapichu rikukushanki? ¿Imataj yanapasunkiman Jehovapaj may munasqa kasqaykimanta mana iskayrayanaykipaj?

² Jehová ni pita pisipaj qhawanata munasqanmanta Bibliapi leeriwaj. Wawan Jesusqa runasta mana kʼumuykachachejchu, respetajtaj. Chaywan rikucherqa paypajpis Tatanpajpis pisipaj qhawakojkuna may munasqas kasqankuta (Juan 5:19; Heb. 1:3). Kay yachaqanapi iskay imasta qhawarisun: 1) ¿Imaynatá Jesús runasta yanaparqa Jehovapaj may munasqa kasqankuta reparakunankupaj? 2) ¿Imatá ruwawaj qanpis Jehovapaj may munasqa kasqaykimanta mana iskayrayanaykipaj? (Ageo 2:7).

¿IMAYNATÁ JESÚS RUNASTA YANAPARQA MAY MUNASQAS KASQANKUTA REPARAKUNANKUPAJ?

3. ¿Imaynataj Jesús Galileamanta runaswan karqa?

³ Jesús Galileapi willashajtin ashkha runas rej kanku yachachisqanta uyariyta munaspa, jampichikuyta munaspa ima. Jesuspajtaj chay runasqa “mitharasqas, tʼaqa tʼaqallataj kasharqanku, mana michejniyoj ovejas jina” (Biblia de estudio nisqapi Mateo 9:36 versiculoj sutʼinchaykunasninta leeriy). Religionta kamachejkunaqa nej kanku chay runas ni imata yachasqankuta, ni imapaj valesqankuta, ‘maldecisqastaj’ kasqankuta (Biblia de estudio nisqapi Juan 7:47-49 versiculospa sutʼinchayninta leeriy). Jesustaj chay pisipaj qhawasqa runaswan kʼacha karqa, respetarqataj. Chayrayku tiempochakorqa paykunaman yachachinanpaj, jampinanpajtaj (Mat. 9:35). Aswan ashkha runasta yanapananpajtaj apostolesninta wakicherqa predicanankupaj, atiytapis qorqa tukuy laya onqoykunata jampinankupaj (Mat. 10:5-8).

4. Jesús pisipaj qhawasqa kajkunawan kʼacha kasqan, ¿imatá reparachiwanchej?

⁴ Jesusqa kʼumuykachachisqa kajkunawan kʼacha karqa, respetarqataj. Chaywan rikucherqa paypajpis Tatanpajpis may munasqa kasqankuta. Sichus qan Jehovata sirvispapis pisipaj qhawakunki chayqa, yuyarikuy Jesusqa pisipaj qhawasqa kajkunawan, paymantataj yachakuyta munajkunawan may kʼacha kasqanta. Ajinamanta Jehovapaj may munasqa kasqaykita reparanki.

5. ¿Ima llakiyniyojtaj karqa Jesuswan tinkorqa chay warmi?

⁵ Jesusqa mana ashkha ukhullapichu runasta yachachej, yanapajpis. Sapa ujtapis yanapallajtaj. Galileapi predicashajtin 12 watastaña yawar apaywan onqosqa warmiwan tinkorqa (Mar. 5:25). Chay warmeqa onqoyninrayku chʼichipaj qhawasqa karqa, pipis payta llankharejtintaj chʼichipaj qhawasqallataj kanan karqa. Chayrayku nichá wajkunawan khuska kayta atejchu. Chantapis mana wajkunawan khuska sinagogaman, fiestasmanpis Jehovata yupaychaj riyta atejchu (Lev. 15:19, 25). Chayrayku maytachá sufrerqa onqoyninwan, llakiywan ima (Mar. 5:26).

6. ¿Imaynapí yawar apaywan onqosqa warmi sanoyaporqa?

⁶ Chay warmeqa khuyayta sufrisharqa, munarqataj Jesús sanoyachinanta. Jinapis manchachikorqa sanoyachinanta mañakuyta. Ichapis payqa onqoyninrayku pʼenqakorqa chayri ichapis manchikorqa chʼichipaj qhawasqa kashaspa runas chaupiman risqanmanta Jesús rimananta. Chayrayku payqa ropallanta llankharerqa, imajtinchus payqa sinchʼi creeyniyoj kasqanrayku yacharqa ropallantapis llankharispa sanoyapunanta (Mar. 5:27, 28). Ajinapunitaj karqa, sanoyaporqapuni. Chantá Jesusqa taporqa pichus llankhaykusqanta. Chay warmitaj pay llankharisqanta willarqa. Jesusrí, ¿imatataj ruwarqa?

7. ¿Imatataj Jesús ruwarqa uj warmi ropanta llankhaykojtin? (Marcos 5:34).

⁷ Jesusqa repararqa chay warmi ‘manchariywan kharkatitishasqanta’ (Mar. 5:33). Chayrayku munakuywan, kʼachamanta, respetowantaj parlapayarqa. Chantapis “wawáy” nerqa. Chaytataj mana respetota rikuchinallanpajchu nerqa, manachayqa paywan kʼacha kasqanrayku, munakusqanraykutaj (Marcos 5:34 leey). Biblia de estudiopi “wawáy” nisqanmanta kayta sutʼinchan: “Jesusqa chay kutillapi uj warmita ‘wawáy’ nispa nerqa, ichapis ajinata nerqa ‘manchariymanta kharkatitishasqanta’ rikusqanrayku”. Chay warmitaj chayta uyarispa maytachá kusirikorqa. Sichus Jesús mana ajina kʼachachu paywan kanman karqa chay, ¿imaynataj kashanman karqa? Sanoyapuspapis ichá ninman karqa: “Amallapis ropanta llankhaykuymanchu karqa, amallapis chay runas chaupiman riymanchu karqa”, nispa. Chayrayku Jesusqa mana sanoyachillarqachu, Tatan Jehová mayta munakusqantapis reparachillarqataj.

8. ¿Ima llakiykunaspitaj rikukorqa Brasilmanta hermananchej?

⁸ Kunanpis wakin hermanostaqa onqoyninku mayta llakichin, ni imapaj valesqankutataj yuyachin. Renatamantaa parlarina, payqa Brasilmanta precursora regular. Payqa mana chakisniyoj, mana lloqʼe makiyojtaj nacekorqa. Renata nin: “Escuelapeqa tukuy tiempo burlakuwaj kanku, imaymanastataj niwaj kanku asipayanawankupaj. Wakin kutis familiaresniypis ni imapaj valesqayta yuyachiwaj kanku”.

9. ¿Imataj Renatata yanaparqa Jehovapaj may munasqa kasqanta reparananpaj?

⁹ ¿Imataj Renatata yanaparqa? Testigoman tukojtin congregacionninmanta hermanosqa munakuywan kallpacharqanku, yanaparqankutaj Jehová munakusqanta reparananpaj, niñataj pisipaj qhawakunanpaj. Pay nin: “Tukuy yanapawajkunamanta uj listata ruwajtiy ni jaykʼaj tukuymanchu. Maytapuni Diosman agradecekuni chay jina sumaj familiata qowasqanmanta”, nispa. Hermanos yanapasqankurayku Renataqa entienderqa Jehovapaj may munasqa kasqanta.

10. ¿Ima llakiypitaj María Magdalena rikukorqa? (Dibujostawan qhawariy).

¹⁰ Jesusqa María Magdalenatapis yanapallarqataj. Paypeqa qanchis supaykuna karqa (Luc. 8:2). Chayraykutaj ichá payqa loca jina imatapis ruwarakullaj, runaspis paymanta ayqekojchá kanku. Payqa mayta sufrisharqa, chantapis mancharisqallachá kaj, yuyarqatajchá ni pi munakusqanta, ni pi yanapanantapis. María Magdalenamantaqa, Jesussina chay supaykunata qharqorqa, paytaj Jesuspa qhepanta rerqa. ¿Imaynamantawantaj Jesús María Magdalenata yanaparqa Diospaj may munasqa kasqanta reparananpaj?

11. ¿Imaynatá Jesús María Magdalenata reparacherqa Jehovapaj may munasqa kasqanta? (Dibujostawan qhawariy).

¹¹ Jesús ranchomanta rancho predicaj rishajtin, María Magdalenatapis pusallarqataj.b Chayrayku payqa Jesuspa yachachisqanta uyarerqa. Chantapis Jesusqa kausarimusqan diapacha payman rikhurerqa, paywantaj parlarqa. Chantapis nerqa apostolesninman kausarimusqanta willamunanta. Chaywan reparacherqa Jehovapaj may munasqa kasqanta (Juan 20:11-18).

12. ¿Imajtintaj Lidia yuyaj ni pi munakusqanta?

¹² María Magdalena jinallataj kay tiempopipis may chhika runas chejnisqas kanku. Españamanta Lidia sutiyoj hermananchejmanta parlarina. Mamanqa paymanta onqoj kashajtin orqhochikuyta munasqa. Mana orqhochikojtinpis, wawitamantapacha mana cuidasqachu. Chantapis sonqonta nanachinanpaj jina tukuy imasta nej. Lidia nin: “Maytapuni munaj kani wajkuna allinpaj qhawanawankuta, munasqa kaytapis. Mamay ni imapaj valesqayta, ni pi munakunawanpaj jina kasqayta yuyachiwasqanraykutaj, manchikorqani ni jaykʼaj ajinachu kananta”.

13. ¿Imataj Lidiata yanaparqa Jehovapaj may munasqa kasqanta reparananpaj?

¹³ Lidiaj kausaynenqa Bibliata estudiajtin cambiarqa. ¿Imataj yanaparqa Jehovapaj may munasqa kasqanta reparananpaj? Orakusqan, Bibliata leesqan, hermanos munakusqanku ima. Lidia nin: “Qosayqa sapa kuti niwan mayta munakuwasqanta, yuyarichishawanpunitaj ima sumaj imastachus noqapi rikusqanta. May munasqa amigosniypis kikillantataj yanapariwanku”, nispa. Lidia jina ichá congregacionninchejmanta pillapis yanaparinanchejta necesitashanman Jehovapaj may munasqa kasqanta reparananpaj. Payta yanaparisunman kʼachamanta parlaspa, paywantaj kʼacha kaspa.

¿IMATÁ RUWASUNMAN JEHOVAPAJ MAY MUNASQA KASQANCHEJTA REPARAKUNANCHEJPAJ?

14. ¿Imatá 1 Samuel 16:7 versiculopi yachachiwanchej imaynatachus Jehová runasta qhawasqanmanta? (“¿Imajtintaj Jehovapaj kamachisnin may munasqas kanku?” nisqa recuadrotawan qhawariy).

¹⁴ Yuyarikuna Diosqa mana runa jinallachu qhawasqanta (1 Samuel 16:7 leey). Runasqa wajkunata valechinankupaj rijchʼaynillankuta, qhapajchus manachus kasqallankuta, escuelayojchus manachus kasqallankuta qhawanku. Jehovatajrí mana chay imastachu qhawan (Isa. 55:8, 9). Chayrayku pisipaj qhawakushanchej chayqa, imastachus Jehová noqanchejpi qhawan chay imasta reparakuna. ¿Imatá chaypaj ruwasunman? Wakin kutis pisipaj qhawakorqanku chaykunamanta Bibliapi leerina: Eliasmanta, Noemimanta, Anamanta, wajkunamantawan, reparanataj imaynatachus Jehová paykunata munakusqanta rikuchisqanta. Chantapis yuyarikusunman ima kutispichus Jehová munakuyninta rikuchiwasqanchejta, chaytataj qhelqaykusunman. Publicacionesninchejpipis mana pisipaj qhawakunamanta parlaj yachaqanasta maskʼasunman.c

15. ¿Imaraykutaj Jehová Danielman nerqa “qanqa may munasqa kanki” nispa? (Daniel 9:23).

¹⁵ Ama qonqakunachu Jehovapajqa tukuy sonqo kasukusqanchejrayku may munasqas kasqanchejta. Profeta Danielqa 100 watasninmanña rishaspa, uj pacha “may saykʼusqa”, desanimasqataj kasharqa (Dan. 9:20, 21). ¿Imaynatá Jehová kallpacharqa? Ángel Gabrielta kacharqa. Paytaj willarqa Jehová mañakusqasninta uyarisqanta, “qanqa may munasqa kanki” nispataj nerqa (Daniel 9:23 leey). ¿Imajtintaj Daniel Jehovapaj may munasqa karqa? Cheqan kajta munakusqanrayku, payta tukuy sonqo kasukusqanrayku, waj imasrayku ima (Eze. 14:14). Chaytataj Diosqa Palabranpi qhelqacherqa sonqochanawanchejpaj (Rom. 15:4). Noqanchejpa mañakusqanchejtapis Jehovaqa uyarillantaj, paypajtaj may munasqa kanchej cheqan kajta munakusqanchejrayku, tukuy sonqotaj sirvisqanchejrayku (Miq. 6:8, sutʼinchaynin; Heb. 6:10).

16. ¿Imataj yanapawasunman Jehovata munakuyniyoj Tatanchejta jina qhawanapaj?

¹⁶ Jehovata munakuyniyoj Tatanchejta jina qhawana. Payqa mana pantasqasnillanchejtachu qhawan, manaqa yanapayta munawanchej (Sal. 130:3; Mat. 7:11; Luc. 12:6, 7). Chaypi tʼukurisqanku ashkhastaña yanapan mana pisipaj qhawakunankupaj. Españamanta Michelle sutiyoj hermanamanta parlarina. Paytaqa qosan imaymanasta nispa watasta kʼumuykachacherqa. Chayraykutaj yuyaj ni imapaj sirvisqanta, nitaj ni pi munakusqanta. Pay nin: “Ni imapaj sirvisqayta yuyajtiy Jehovapi piensarini. Piensarini Jehová ichurikuwaspa munarikushawasqanpi, cuidashawasqanpi ima” (Sal. 28:9). Sudafricamanta Lauren sutiyoj hermanataj nin: “Noqa kikiyman nikuni: ‘Jehová munakuy waskhaswan pusamuwan, kay chhika watastaña paymanta mana karunchakunaypaj yanapawan, noqamanta valekuspataj wajkunaman yachachin. Chayrayku may munasqapuni kani, nitaj qhasichu paypaj kani’, nispa” (Ose. 11:4).

17. ¿Imaraykutaj mana iskayrayasunmanchu Jehová allinpaj qhawawasqanchejmanta? (Salmo 5:12; fototawan qhawariy).

¹⁷ Jehová allinpaj qhawawasqanchejmanta ama iskayrayanachu (Salmo 5:12 leey). Davidqa nerqa Jehová allinpaj qhawawasqanchejqa uj ‘escudo’ jina cheqan runasta jarkʼasqanta. Jehová allinpaj qhawawasqanchejmanta, pay yanapanawanchejmanta mana iskayrayayqa yanapawasun mana pisipaj qhawakunapaj. Chanta, ¿imaynatá yachasunman Jehová allinpaj qhawawasqanchejta? Yachakunchej jina, payqa Palabranpi niwanchej munakuwasqanchejta. Chantapis ancianosnejta, amigosninchejnejta, waj hermanosnejta ima yuyarichiwanchej paypaj may munasqa kasqanchejta. Chayrayku wajkuna kallpacharinawanchejpaj kʼacha imasta niwajtinchej, ¿imatá ruwasunman?

18. ¿Imajtintaj japʼikunapuni tiyan kallpachariwasqanchejta?

¹⁸ Pikunachus rejsisunku, munakusunkutaj chaykuna qanmanta kʼacha imasta nisojtinku, ama yuyaychu llullakushasqankuta. Jehovaqa paykunanejta nishasunkiman allinpaj qhawasusqanta. Michellemanta parlarerqanchejña, pay nin: “Mana atillaspapis pisimanta pisi yachakushani kallpachariwasqankuta tukuy sonqo japʼikuyta. Yachani Jehová chayta japʼikunayta munasqanta”, nispa. Ancianospis munakuywan yanaparqanku. Kunantaj precursora, wasinmantapachataj Betelta yanapakushan.

19. ¿Imaraykutaj mana iskayrayasunmanchu Jehovapaj may munasqa kasqanchejmanta?

¹⁹ Jesusqa munakuywan yachachiwarqanchej Jehovapaj may valorniyoj kasqanchejta (Luc. 12:24). Chayrayku Jehovapajqa may munasqaspuni kanchej, chaytataj ni jaykʼaj qonqakunachu. Tukuy atisqanchejta wajkunata yanaparina Jehovapaj may munasqa kasqankuta reparakunankupaj.