Jeremías
Kuyashqan runakunata yanapananpaq Tayta Dios nishqan
33 Palaciupa sawannincho Jeremías jinalaraq prësu kaykaptinmi TAYTA DIOS yapay kayno nirqan: 2 “Patsata kamaq y shumaq kananpaq kamakätsiq TAYTA DIOS karmi kayno nï: 3 Manakamay. Manakamaptikiqa mana tantiyashqaykita y mana musyashqaykitami tantiyatsishayki.
4 “Israel runakunata kuyaq TAYTA DIOS karmi kayno nï: Jerusalén runakunaqa wayikunata juchutsir rumikunata y qerukunata murälla nawpanman qotushqa. Tsaynölami reypa wakin wayinkunata juchutsir murälla nawpanman qotushqa. Tsayno rurapäkushqa Babilonia soldädukuna marka murällata mana juchutsinanpaqmi. 5 Murällata tsayno sigurar Babilonia* soldädukunata ichipaptinpis paykunapita pasaypa rabyashqa kar manami defiendikärinanpaq yanapashaqtsu. Tsaymi tsay soldädukuna markaman yaykamur runakunata tsaytsikata wanutsipäkunqa. Wanutsiptinmi maytsaychöpis ayakuna jitarpanqa. Tsayno kanqa jutsata rurashqanpita castigaptïmi.
6 “Tsayno ushakätsiptinpis watakuna pasarkuptinqa qeshyaykaqta jampir aliyätsiqnömi imaypis jawkana kawananpaq yanapashaq. 7 Tsaymi juk lädu nacionkunacho tashqanpita Judá runakunata y Israel runakunata nacionninman shuntamushaq. Unay kawashqanno tsaycho yapay jawkana kawananpaqmi yanapashaq. 8 Mana cäsukamar conträ sharkushqanpita y jutsata rurashqanpitami perdonashaq. Jutsaynaq kananpaqmi lapan jutsankunata maylashaq. 9 Jerusalén runakunata yanapashqäta musyashpanmi lapan nación runakuna mantsakashqa rikakärinqa. Jawka kawapäkunanpaq yanapaptïmi intëru munducho taqkuna kushikushpan alabamanqa”.
10 TAYTA DIOSMI kayno nin: “Qamkunaqa nirkaykanki kay particho runapis y uywapis walkalana kaptin chunyaq jirkanöna kashqanta. Nishqaykinölami Judá markakunachöpis y Jerusalén cällikunachöpis runakuna ni uywakunapis mana kannatsu. 11 Tsayno kaptinpis yapaymi kaycho runakuna kushikärinqa. Casaray fiesta kaptinmi mözupis y jipashpis kuyanakärishpan cantapänakunqa. Runakunapis yapaymi kayno ninqa:
“ ‘¡Alilata ruraq kashqanpita lapanta mandaq TAYTA DIOSTA agradëcikushun!
¡Kuyapäkuyninqa manami imaypis ushakantsu!’*
“Agradëcikamar templüman ofrendata yapaymi apapäkamunqa. Puntata kashqanno yapay kananpaqmi kuyashqä runakunata juk lädu nacionkunacho tashqanpita nacionninman shuntamushaq. Noqa TAYTA DIOSMI tsayno nï”.
12 Lapanta mandaq TAYTA DIOS kaynömi nin: “Intëru kay nación markakunacho runa mana kaptinpis y uywakuna mana kaptinpis yapaymi uywakunata mitsikärinqa. 13 Jalqakunacho kaykaq markakunachöpis, *Sefelacho kaykaq markakunachöpis, *Neguevcho kaykaq markakunachöpis, Benjamín partichöpis, Jerusalén nawpankunachöpis y intëru Judá nacionchöpis yapaymi rikapäkunkipaq uyshankunata yuparkaykaqta. Noqa TAYTA DIOSMI tsayno nï”.
David aylu reykuna imaypis kananpaq nishqan
14 TAYTA DIOSMI kayno nin: “Tiempu chayamunqanami Israel runakunata y Judá runakunata promitishqänöla yanapanäpaq. 15 Tsay witsanmi David aylupita Renuevo nishqan runata churashaq rey kananpaq. Munashqäno mandarmi kay nacioncho pïmaytapis ali rikanqa. 16 Tsay witsanmi Jerusaléncho y intëru Judácho jawka kawapäkunqa. Tsaymi Jerusalén markapa jutin kanqa TAYTA DIOSMI Salvamaqnintsi*”.*
17 TAYTA DIOSMI kayno nin: “Davidpita miraq runami imaypis Israel runakunapa mandaqnin rey kanqa.* 18 Cürakuna y *levitakuna imaypis kanqami *altarnïcho rupatsina sacrificiuta, tsaki mikuy ofrendata y wakin sacrificiutapis waran waran rupatsipäkunanpaq”.*19 Jeremíasta TAYTA DIOS mastapis kayno nirqan: 20 “Noqa TAYTA DIOSMI kayno nï: Tsakaywan y junaqwan *pactu rurashqäta cumplirmi intita imaypis jeqatsimü y jeqatsï. Tsay pactuta imaypis cumplishqänömi 21 sirvimaqnï Davidwan pactu rurashqätapis* cumplishaq. Cumpliptïmi paypita miraqkuna imaypis rey kanqa. Tsaynölami imaypis cumplishaq levitakunawan y cürakunawan pactuta rurashqäta. Paykunawanmi pactuta rurarqä imaypis sirvimänanpaq.* 22 Qoylarkuna yupaytapis mana atipaypaq kashqanno y lamar kuchuncho aquyshapis yupayta mana atipaypaq kashqannömi sirvimaqnï Davidpita miraqkuna y sirvimaqnï levitakunapis kanqa”.
23 Jeremíasta TAYTA DIOS mastapis kayno nirqan: 24 “¿Tantiyankiku akrashqä Israel y Judá runakunata manana yanapaykashqäta runakuna rimarkaykashqanta? Tsayno rimarmi manakaqman churar naciontanönatsu rikarkaykan. 25 Tsakaywanpis junaqwanpis pactuta ruraq TAYTA DIOS kar y jana patsapaqpis kay patsapaqpis leyta churaq TAYTA DIOS karmi kayno nï: 26 Jacobpita y sirvimaqnï Davidpita miraqkunata imaypis yanapashaq. Davidwan pactuta rurashqäta cumpliptïmi paypita miraqkuna imaypis rey kanqa. Tsaymi Abrahampita, Isaacpita y Jacobpita miraq runakunapa mandaqnin rey imaypis kanqa. Paykunata kuyaparmi juk lädu nacioncho tashqanpita nacionninman shuntamushaq”.