Josué
Jordán mayuta tsimpashqan
3 Tsaypita jukaqnin tuta tsaka tsakala Josué y lapan Israel runakuna Sitimpita aywarmi Jordán mayu kuchunman chayapäkurqan. Mayuta manaraq tsimpar jinalanchömi patsakärirqan. 2 Tsaypita kimsa junaq pasarkuptinnami Israel autoridäkuna intëru campamentupa purir 3 kayno nipäkurqan: “TAYTA DIOSNINTSIPA *Pactu Babulninta Leví trïbu cürakuna apaykaqta rikar noqantsipis qepalanta aywapäkushun.* 4 Mayu tsimpa nänitaqa manami reqintsitsu. Tsaymi mana pantakänantsipaq paykunapa karu qepalanta aywashun. Itsanqa apaykashqan babulmanqa ama aläpa witipäshuntsu. Tsaypa trukanqa waranqa (1,000) metrutano qepanta aywashun”.
5 Nirkurnami runakunata Josué kayno nirqan: “Wara junaqmi rikaykaptintsi TAYTA DIOS milagruta ruranqa. Tsayno kananpaq kaykaptinqa purificakäriy”.
6 Tsaypita jukaqnin junaq cürakunata Josué kayno nirqan: “TAYTA DIOSPA Pactu Babulninta runakunapa puntanta apapäkuy”.
Tsaymi Josué nishqanno babulta apapäkurqan runakunapa puntanta.
7 Tsaypitami Josuéta TAYTA DIOS kayno nirqan: “Kanan junaqpitami Israel runakuna musyapäkunqa Moisésta yanapashqänöla qamtapis yanapaykashqäta. Tsayno yanapaykashqäta tantiyarmi cäsukushunkipaq. 8 Qamnami Pactu Babulta apaykaq cürakunata ninki Jordán mayuman yaykuykur ichinanpaq”.
9 Tsayno niptinmi Israel runakunata Josué kayno nirqan: “Shapäkamuy TAYTA DIOSNINTSI imata nimashqantapis wilanäpaq”.
10 Juntakaptinmi kayno nirqan: “Kanan junaqmi qamkuna tantiyankipaq imayyaqpis kawaq TAYTA DIOS noqantsiwan kaykashqanta. Paymi yanapamäshun tsimpacho taq runakunata ushakätsinantsipaq. Tsay runakuna kaykan cananeo runakuna, heteo runakuna, heveo runakuna, ferezeo runakuna, gergeseo runakuna, amorreo runakuna y jebuseo runakunami. 11 Tsaynöpis kay patsata munaynincho tsararaq TAYTA DIOSPA Pactu Babulnintami puntantsita Jordán mayuta pasatsinqa. 12 Kanan akrapäkuy chunka ishkay runakunata cada trïbupita jukta.* 13 Kay patsata munaynincho tsararaq TAYTA DIOSPA Pactu Babulninta apaq cürakuna yakuman yaykuriptinmi mayu tsapakanqa tsakilapana pasanantsipaq”.
14 Tsaymi Jordán mayuta tsimpananpaq Israel runakuna toldunkunata shuntarkuptin cürakuna Pactu Babulta umrushqa puntata aywapäkurqan. 15 Cosëcha tiempu kaptinmi Jordán mayu pasaypa cargashqa aywaykarqan. Tsayno kaptinpis Pactu Babulta apaq cürakuna Jordán mayuman yaykuyta qalaykuptinmi 16 Saretán particho kaykaq Adam markapita janaman yaku tsapakäkurqan. Tsaymi tsay markapita uramanpana hasta *Arabá Lamaryaq tsakina karqan. Arabá Lamarqa *Kachi Lamarmi kaykan. Jordán mayu tsayno tsakiptinnami Israel runakuna Jericó marka lädupa tsimpapäkurqan. 17 Israel runakuna pasananyaqmi TAYTA DIOSPA Pactu Babulninta umrushqa cürakuna tsakishqa mayu chawpincho ichirparqan. Tsaymi Israel runakuna lapanpis tsakilapana pasapäkurqan.