Jueces
Micaíapa ïdulunkuna y cüran kashqan
17 Efraín jalqakunachömi tarqan juk runa Micaía jutiyuq. 2 Paymi juk kuticho mamanta kayno nirqan: “¿Yarpankiku juk waranqa pachak (1,100) siclo qellayniki suwaq runata maldicionashqaykita? Noqami tsay suwapäshuqniki kaykä”.
Tsayno niptinmi maman kayno nirqan: “¡TAYTA DIOS bendicionninta qoykuläshunki, hïju!”
3 Qellayta kutiykatsiptinmi maman kayno nirqan: “Kananqa kay qellay TAYTA DIOSPAQMI kanqa. Tsaymi kay qellaywan juk ïduluta rurarkatsir qamta qoykushaykipaq”.
4 Tsayno nishpanmi wawan kutitsishqan ishkay pachak (200) qellayta ïdulu ruraq runata qoykurqan. Ïdulu rurayta usharkuptinnami Micaíapa wayinman churarqan. 5 Micaíanami tsaycho takshala capillata rurarqan ïdulunta tsayman churaykur adorananpaq. *Efodta y wakin ïdulukunatapis ruraykurmi juk tsurinta cüra kananpaq churarqan.
6 Tsay witsan Israel runakunapa mandaqnin rey mana kaptinmi cada ünun munashqanno imatapis rurapäkuq.*
7 Tsay witsanmi Leví trïbupita juk purikuq mözu Judácho kaykaq Beléncho tarqan. 8 Paymi juk junaq Belénpita aywakurqan maychöpis tänanpaq sitiuta ashir. Efraín jalqakunapa puriykashqanchömi chayarqan Micaíapa wayinman. 9 Chayaykuptinmi Micaía kayno tapurqan: “¿Maypitataq shamushqanki?”
Tsawraqa kayno nirqan: “Judácho kaykaq Belénpitami shamushqä. Tsaynöpis Leví trïbu runami kä. Maycho tänäpaq kaqta ashirmi puriykä”.
10 Niptinmi Micaía kayno nirqan: “Kaycho täkushun noqapa cürä y papänïno kanaykipaq. Watacho pägashayki chunka siclo qellaytami. Tsay jananmanpis röpata y mikuytami kamaripäshayki”.
11 Tsayno niptinmi tsay mözuqa tsaycho tashpan Micaíapa tsurinno karqan. 12 Tsaynöpis cüra kananpaq Micaía churaptin paypa wayilancho tarqan. 13 Leví trïbupita cüran kaptinmi Micaíaqa kushikur yarparqan TAYTA DIOSPA bendicionninwan ali kawananpaq kashqanta.