2 Crónicas
Judá nacioncho Asa rey kashqan
14 (13.23) Abías wanuykuptinmi *Davidpa Markanman pampapäkurqan. Paypa trukannami tsurin Asana rey karqan. Asa rey kaptinqa Judá nacioncho chunka wata jawkalami kawapäkurqan.
2 (1) Asa kawarqan TAYTA DIOS munashqannömi. 3 (2) Tsaymi juk lädu nación runakunapa diosninkunata adorapäkunanpaq rurashqan *altarkunata y markakunacho kaykaq altarkunatapis juchutsirqan. Adorapäkunanpaq ichitsishqan wankakunata y *Asera diösapaq jawishqan raku qerukunatapis pakirmi usharqan. 4 (3) Judá runakunatami nirqan unay aylunkuna yärakushqan TAYTA DIOSTA *ashir leyninkunata y mandamientunkunata cumplipäkunanpaq. 5 (4) Tsaynölami inciensuwan qoshtatsikuna altarkunata y wakin altarkunatapis Judácho kaq lapan markakunapita jorqutsirqan. Asa mandashqan witsanqa Judá nacioncho runakuna jawkalami kawapäkurqan.
6 (5) Jawkala kawananpaq TAYTA DIOS yanapaptinmi rey Asaqa Judá nacioncho markakunata altsarkatsir tumariq corralatsirqan. 7 (6) Judá nación runakunatami kayno nirqan: “Tayta Diosnintsita ashiptintsimi pay yanapaykämantsi nawpantsicho kaykaq nación runakunawan jawkala kawanantsipaq. Jawkala kawashqantsiyaq markantsikunata shumaq corralatsishun. Törrikunatapis cada markacho sharkatsir punkuntapis tanatsishun. Punkuta siguranantsipaq trancatapis churatsishun”.
Tsayno wilanakurkurmi lapanta shumaq ruratsirqan.
8 (7) Rey Asapa soldädunkuna karqan Judá trïbupita kimsa pachak waranqa (300,000). Cada soldädupami escüdunpis y lanzanpis karqan. Benjamín trïbupitanami karqan ishkay pachak pusaq chunka waranqa (280,000) soldädukuna. Paykunapapis escüdun y flëchan karqanmi. Paykunaqa lapanpis ali chölulantaqmi karqan.
9 (8) Tsaypitanami Judá nacionta atacananpaq Zera jutiyuq runa juk millón (1’000,000) soldädunkunata pushakurkur y kimsa pachak (300) guërra carrëtakunawan Etiopíapita Maresa partiyaq chayapäkurqan. 10 (9) Tsaymi Asapis paykunawan pelyananpaq soldädunkunata pushakurkur Maresapa nawpan Sefata pampaman aywaykur churanakurqan.
11 (10) Tsaychömi TAYTA DIOSTA manakur Asa kayno nirqan: “Tayta Dios, atska soldädü kaptinpis o walkala soldädü kaptinpis qam yanapamaptikiqa vincishaqmi. Tsaymi qamlaman yärakärishpä conträkunawan pelyanäpaq jutikicho shapäkamushqä. Qamlami Diosnï kaykanki, Tayta. Ama kachapaykuytsu conträkuna vincimänanta”.
12 (11) Tsayno manakuptinmi rey Asata y Judá runakunata TAYTA DIOS yanaparqan Etiopía runakunata vincipäkunanpaq. Vinciptinmi Etiopía runakunaqa qeshpir aywakärirqan. 13 (12) Qeshpiykaqta Gerar markayaq soldädunkunawan Asa qatipaykur wanutsiptinmi juklaylapis kawaykarqa quëdarqantsu. Nirkurmi wanushqa runakunapa imaykantapis apakärirqan.
14 (13) TAYTA DIOS tsayno yanapashqanta rikarmi Gerar nawpankunacho taq runakuna pasaypa *mantsakashqa rikakurqan. Tsaymi Judá runakunaqa Gerar nawpancho kaykaq markakunatapis atacar imaykankunatapis apakärirqan. 15 (14) Tsaynölami chakracho taq runakunata atacar uyshankunata y *camëllunkunatapis atskata apakärirqan. Nirkurmi Jerusalénman kutikärirqan.