Lamentaciones

4 ¡Qoripis yanayashqanami kaykan!

¡Mananami chipchipyannatsu!

Templuta perqashqan rumikunapis intëru cälli esquïnakunachömi jitarpaykan.

 2 Sión runakuna alinnin qoripitapis mas kuyaylapaqmi kashqa.

Kananqa mana yachaq runa rurashqan mitu mankanömi karkaykan.

 3 *Chacalkunapis wawankunata kuyarmi chuchun.

Kuyashqä runakunami itsanqa chunyaq jirkacho taq *avestruzno wamrankunatapis mana kuyapäkuntsu.*

 4 Chuchuykaq wamrakunapa qallunpis yakunaypita tsakirmi jaqrunman* laqakaykan.

Wamrakuna mikanar manakuptinpis manami pipis kantsu imalatapis qaraykunanpaq.

 5 Ali mikuyta mikuqkunapis kananqa yarqaypitami cällikunacho wanurkaykan.*

Kuyaylapaq wayicho winaqkunapis kananqa qanra jitakunachömi tarkaykan.

 6 Sodoma runakuna jutsata rurashqanpitapis peormi marka mayïkuna jutsata rurapäkushqa.

Sodoma markaqa pipis mana atacaykaptinmi elaqpita ushakarqan.*

 7 Raju y lëchi yoraq kashqannömi Jerusalén autoridäkunapis jutsaynaq y ali runakuna karqan.

Wera kaptinmi nawinkunapis saltanarqanraq.

Qaqlankunapis zafiro ruminöraqmi chipchipyarqan.

 8 Kananqa yana mankapa sikinno karkaykan.

Cällikunacho purirpis mana reqiypaqnami purirkaykan.

Uyu kaptin tulunkunapis pasaypa yupariylapaqmi kaykan.

 9 Yarqaypita wanuqkunaqa pasaypami nakarqan.

Guërracho wanuqkunami itsanqa aläpa mana nakashqatsu.

10 Jerusalénpita yarquyta mana kamäpakurmi pasaypa yarqanar wamrankunatapis mikupäkushqa.

Kuyapäkuq warmikunapis wawankunatami yanukärishqa.*

11 Jerusalénta tsayno castigarraqmi fiyupa rabyakushqanta TAYTA DIOS pasatsishqa.

Sión markata ninawan rupatsirmi wayikunata cimientuntinta chipyaq ushakätsishqa.

13 Tsayno lapanpis kashqa profëtakuna jutsata rurashqanpita y cürakuna mana alikunata rurashqanpitami.

Tsaynölami paykunaqa jutsaynaq runakunatapis wanutsipäkushqa.*

14 Tsay profëtakunami y cürakunami cällikunacho qaprano tapra tapra purirkaykan.

Wanutsishqan runakunapa yawarninwan pichushqa kaptinmi yataykuylatapis pipis munantsu.*

15 Paykunata rikarmi runakuna kayno nipäkun:

“¡Qanra shonqu runakuna, ama yatapäkamaytsu!

¡Qamkunaqa kaypita maypapis aywakäriy!”

Tsayno nipäkuptinmi Jerusalénpita qeshpir maytsay nacionkunamanpis aywakärishqa.

Tsay nacionkunacho taq runakunapis kaynömi nipäkun:

“Kay purikuq runakunaqa markantsicho ama tätsuntsu”.

16 Kikin TAYTA DIOSMI rabyakushpan profëtakunata y cürakunata Jerusalénpita qarqushqa.

Paykunataqa manami yanapannatsu.

Tsaymi cürakunatapis ni mayor runakunatapis mana respitapäkunnatsu.

17 Juk lädu nación soldädukuna yanapamänantsipaq shuyarashqapis manami chayamushqatsu.

Rikachakuykaptilantsimi nawintsipis tsakakäkushqa.*

18 Contrantsi runakuna watqarämaptintsimi cälliman mana yarqushqantsitsu.

Ushakänantsipaq höra chayamuptinmi wanuypis janantsichöna kashqa.

19 Ankapitapis mas warakayla aywaqmi contrantsi runakuna kashqa.

Jirkakunapapis qatikachämashqantsimi.

Chunyaq jirkapa qeshpiptintsipis shuyaraykämashqantsimi.

20 TAYTA DIOS akrashqan mandamaqnintsi reytapis prësumi tsarishqa.*

Paymi tsapämaqnintsi kashqa.

Pay rikaykämaptintsimi yarparqantsi mayqan nacionpis achäquita mana ashipämänantsipaq kashqanta.

21 Uz particho taq Edom nación runakuna, noqakunata ama kushipämaytsu.

Qamkunamanpis castïgu chayamunqami.

Tsaymi shinkashqa qarapächu jitaraq runa penqaypaq kashqanno qamkunapis penqaypaq kapäkunkipaq.

22 *Sión runakuna, castïguta chaskishqantsinami.*

Yapayqa manami prësu apamäshunnatsu.

Edomita runakuna, qamkunatami itsanqa jutsata rurashqaykipita Tayta Dios castigashunkipaq.

Paymi lapan jutsa rurashqaykikunata careashunkipaq.*