Joel
Tayta Dios juzganan junaq mantsariypaq kashqan
2 TAYTA DIOS juzganan junaq chayaykämunnami.
udácho taqkuna, lapaniki mantsakushpayki siksikyapäkuy.
Pïmaypis musyananpaq *sagrädu *Sión jirkancho *cornëtata tukapäkuy.
2 Tsay junaq patsa tsakakäkunqami.
Yanawyayparaqmi pukutay tsapakurkunqa.
Patsa waraptin puntakunapa inti mashtashqannömi tsaytsika soldädukuna shapäkamunqa.
Tsaynöqa manami imaypis kashqatsu ni imaypis kanqatsu.
3 Imatapis tarishqan kaqta nina ushaqnömi lapantapis ushapäkunqa.
Atacananpaq manaraq chayamuptin Edén huertanömi lapanpis kuyaylapaq kanqa.
Pasarkuptin itsanqa chunyaqlana rikakunqa.
Manami imapis tsay soldädukunapita qeshpinqatsu.
4 Guërra cawallukunanömi mantsariypaq kanqa.
Cawalluta muntakurkur cörriq soldädukunanömi cörripäkunqa.
5 Guërra carrëtakuna elaqpita puntapa tumamur taqrarayla aywashqannömi paykunapis patatayla aywapäkushqan mayakanqa.
Usya witsan muntita nina bunyaypa bunyar ushaqnömi qaparpanqa.
Guërraman aywaq tsaytsika soldädukuna kamarikushqa aywashqannömi aywapäkunqa.*
6 Tsayta rikaykurmi runakuna pasaypa mantsakar cäranpis yoraqashqa rikakärinqa.
7 Atacaqkunaqa ali chölu karmi mana mantsakuypa cörrishpan marka murälla jananman witsäpäkunqa.
Lapanmi maypapis mana jeqaykachaypa fïlaylanpa aywapäkunqa.
8 Mana tanqanakuypami lapanpis aywashqalanpa aywapäkunqa.
Paykunata flëchaykaptinpis mana qeshpiypami yaykapäkunqa.
9 Markakunamanpis mana mantsakuypami yaykapäkunqa.
Tapia jananpapis cörripäkunqami.
Wayikunamanpis achpaypami witsäpäkunqa.
Ventänapapis suwanömi yaykapäkunqa.
10 Kay patsapis pasaypami mantsakanqa.
Jana patsapis siksikyanqami.
Intipis y killapis tsakakäkunqami.
Qoylarkunapis manami atsikyanqanatsu.*
11 Tsay atacaqkunapa puntantami TAYTA DIOS aywanqa.
Atacananpaq mandaptin räyu pashtaqnöraqmi mayakanqa.
Nishqanta ruraqkunaqa yupaytapis mana atipaypaqmi kanqa.
Paykunaqa tsaytsikami aywapäkunqa.
TAYTA DIOS juzganan junaq pasaypa mantsariypaqmi kanqa.
Tsaytaqa manami pipis awantanqatsu.*
Jutsa ruraykunata kacharinanpaq nishqan
12 Tsaymi TAYTA DIOS kayno nin:
“Lapan shonquykiwan perdonta manakamashpayki makïman kutipäkamuy.
Jutsayuq kashqaykipita lakikur ayunashpayki waqapäkuy”.*
13 Jutsata rurashqaykipita lakikur röpaykita rachinaykipa trukanqa jutsaykikunata kachariy.
Lapan shonquykiwan kuyashuqniki TAYTA DIOSNINTSI munashqanno kawapäkuy.
Payqa kuyapäkuq y perdonakuqmi kaykan.
Imapitapis juklaqa manami rabyakuntsu.*
Perdonashushpaykiqa manami castigashunkinatsu.
14 Capazchari castigashunaykipa trukanqa bendiciontapis qoykushunkiman.
Tsaynöpami TAYTA DIOSNINTSITA agradëcikur tsaki mikuy ofrendata y vïnutapis apapäkunkipaq.
15 *Sión jirkancho *cornëtata tukapäkuy.
Lapayki wilanakäriy juntakaykur ayunapäkunaykipaq.
16 Purificakärinaykipaq lapayki juntakay.
Awkinpis wamrapis lapayki aywapäkuy.
Chuchuykaq wamrakunatapis apapäkuy.
Tsayraq casarashqa kaykaqkunapis punukunaykipita yarqur ayunaq aywapäkuy.
17 TAYTA DIOSTA sirviq cürakuna, *altar kaqcho waqapäkuy.
Tayta Diosta kayno nir manakäriy:
“Kuyashqayki runakunata perdonaykulay, Tayta.
Ama kachapaykulaytsu jäpa nación runakuna munayninman churapäkamänanta.
Ama kachapaykulaytsu qamman mana yärakamuq runakuna asipämashpan kayno nipäkamänanta: ‘¿Maychötaq kaykan Diosnin?’ ”*
18 Tsayno manakuptintsiqa kuyapäkuq kashpanmi TAYTA DIOS perdonamäshunpaq.
19 Tsaymi kayno nimäshun:
“Saksashqa kapäkunaykipaqmi trïgutapis, vïnutapis y aceititapis kamaripäshayki.
Mana yärakamaqkuna makitsakushunaykita manami kachapäshaqtsu.
20 Norti kaq lädupita shamuqkunataqa chunyaq jirkamanmi qarqushaq.
Puntanta aywaqkunatami *Kachi Lamarman qarpushaq.
Qepanta aywaqkunatanami Mediterráneo Lamarman qarpushaq.
Tsaychömi lapanpis ismushpan pasaypa asyanqa.
Tsayno ruraptï espantaypaqmi kanqa.
21 “Israel runakuna, ama mantsakäriytsu.
Yanapanäpaq kaykaptinqa kushikäriy.
22 Jirka uywakuna, ama mantsakäriytsu.
Qewapis loqluyparaqmi winamunqa.
Früta yörakunapis wayunqami.
Hïguspis üvapis tsaytsikatami wayunqa.
23 Sióncho taqkuna, noqaman yärakamashpayki kushikäriy.
Unaynömi punta kaq tamyata y qepa kaq tamyatapis tiempulancho tamyatsimushaq.
24 Tsaymi trïgutapis atskata shuntapäkunkipaq.
Vïnupis aceitipis tsaytsikami kanqapaq.
25 “Kachamushqä chukluskuna wata wata ushashqanpitawanmi arushqaykiman bendicionnïta churamushaq.
26 Tsaymi mikuynikipis putsuy putsuy kanqa.
Qamkunata yanapashpämi espantaypaq kaqkunata rurashaq.
Tsaymi lapan shonquykiwan kushishqa alabapäkamankipaq.
Manami imaypis yapay penqayman churashaykinatsu.
27 Tsaychömi tantiyapäkunkipaq qamkunawan kaykashqäta.
Tsaynöpis tantiyapäkunkipaq TAYTA DIOSNIKI kashqäta.
Noqapita masqa manami juk Dios kantsu.
Kanan kaykashqaykinöqa manami penqaycho yapay kankipaqtsu”.*
Espíritu Santuta Tayta Dios kachamunanpaq nishqan
28 (3.1) “Tsaypitanami Espïritüta kachamushaq lapan runakunaman.*
Tsaymi olqu tsurikikuna y warmi tsurikikunapis wilakuynïta wilakärinqa.
Awkinkunatapis sueñuyninchömi musyatsishaq.
Mözukunapis revelaciontami rikapäkunqa.
29 (3.2) Tsay junaqkunami olqumanpis y warmimanpis sirvimaqnïkunaman Espïritüta kachamushaq.
30 (3.3) Jana patsachöpis y kay patsachöpis rikakätsimushaq imaypis mana rikashqaykikunatami.
Yawartapis, ninatapis y ichiraykaq qoshtaytapis rikapäkunkipaqmi.
31 (3.4) Intipis tsakakäkunqami.
Killapis yawarmanmi tikranqa.*
Tsaykuna kanqa juzganä junaq manaraq chayamuptinmi.
Tsay junaqqa mantsariypaqmi kanqa.
32 (3.5) Tsayno kaptinpis noqata manakamaq kaqtaqa pïmaytapis salvashaqmi.*
Promitishqänölami *Sión jirkancho kaykaq Jerusaléncho runakunata salvashaqpaq.
Qayashqä kaqkunataqa lapantami salvashaq”.