Josué
Jordán mayupita chunka ishkay rumikunata jorqushqan
4 Jordán mayuta lapan tsimpayta usharkuptinnami Josuéta TAYTA DIOS kayno nirqan: 2 “Chunka ishkay runakunata akray cada trïbupita jukta. 3 Nirkur paykunata ninki cürakuna ichiraykashqan tsakishqa mayu chawpinpita chunka ishkay rumikunata jorqunanpaq. Tsay rumikunata churatsun kanan tsakay patsakärinaykipaq kaqman”.
4 Tsayno niptinmi chunka ishkay akrashqan runakunata qayaykur Josué 5 kayno nirqan: “Jordán mayu chawpinman yaykapäkuy TAYTA DIOSNINTSIPA babulnin kaykashqan kaqman. Tsaypita cada ünuyki juk rumita umrukurkur apamunki. Tsaynöpami Israel runakunapa trïbunkuna chunka ishkay kashqanno chunka ishkay rumikunapis kanqapaq. 6 Tsay rumikunata rikar wara warantin tsurikikuna ‘¿imanirtaq qoturaykan kay rumikuna?’ nir tapushuptiki 7 kayno nipäkunki: ‘TAYTA DIOSPA *Pactu Babulninta pasatsimuptinmi Jordán mayu tsakirqan. Tsayno tsakishqanta imaypis yarparänantsipaqmi kay rumikuna qoturaykan’ ”.
8 Josué nishqannölami tsay chunka ishkay runakunaqa Jordán mayu chawpinpita rumita jorqapäkurqan. Nirkurmi Josuéta TAYTA DIOS nishqannöla patsakushqan kaqman apaykur qotupäkurqan. 9 Tsaynölami Pactu Babulta umrushqa cürakuna ichirashqan kaqchöpis chunka ishkay rumikunata Josué qotutsirqan. Tsay rumikunaqa kananyaqmi mayucho qoturaykan.
10 Tsay junaqmi TAYTA DIOS nishqankunata Israel runakuna lapantapis cumplirqan. Moisés yätsishqannölami tsaykunata Josué ruratsirqan. TAYTA DIOS nishqankunata cumplishqanyaqmi babulta apaq cürakuna Jordán mayu chawpincho ichirparqan. Tsaycho ichirpashqanyaqmi Israel runakuna apurädu pasapäkurqan. 11 Runakuna pasarkuptinnami babulta umrushqa apaq cürakuna runakunapa puntanman churakarqan.
12 Moisés nishqannölami runakunapa puntanta pasapäkurqan Rubén trïbu runakuna, Gad trïbu runakuna y pulan Manasés trïbu runakuna. Tsay runakunaqa pelyananpaq kamarikushqami aywarqan. 13 Paykunaqa chusku chunka waranqanömi (40,000) karqan. Pelyananpaq kamarikushqalami TAYTA DIOSPA nawpanta Jericó pampaman aywapäkurqan.
14 Tsay junaqmi Israel runakunata TAYTA DIOS tantiyatsirqan Moisésta respitashqannöla Josuétapis respitapäkunanpaq. Tsaymi Israel runakuna payta imaypis respitapäkurqan.
15 Tsaypitanami Josuéta TAYTA DIOS kayno nirqan: 16 “Cürakunata niy Pactu Babulnin umrushqa Jordán mayupita yarqamunanpaq”.
17 Tsayno niptinmi cürakunata Josué nirqan mayupita yarqamunanpaq. 18 Pactu Babulta apaq cürakuna Jordán mayupita yarquriptinmi mayu nawpata aywashqanno yapay cargashqa aywayta qalaykurqan.
19 Israel runakunaqa Jordán mayuta tsimparqan wata qalaykunan killa chunka junaq kaykaptinmi. Nirkurnami Gilgalcho campamentunta rurarqan. Gilgalqa kaykan Jericópita inti jeqamunan lädupami. 20 Gilgalchömi Jordán mayupita jorqupäkushqan rumikunata Josué qotutsirqan. 21 Nirkurnami Israel runakunata kayno nirqan: “Kananpita wara warantin tsurikikuna: ‘¿Imapaqtaq kaycho rumikuna qoturaykan?’ nir tapushuptiki 22 wilanki Israel runakuna Jordán mayu tsakiptin tsimpashqanta. 23 Paykunata wilapar kayno ninki: ‘Noqakuna pasanäpaq Puka Lamarta tsakitsishqannölami Jordán mayutapis TAYTA DIOSNINTSI tsakitsirqan. 24 Tsayno rurarqan munayniyuq kashqanta maytsaychöpis runakuna musyananpaq y qamkunapis payta imaypis *mantsakärinaykipaqmi’ ”.