Romanos
Pablo salüdunta apatsishqan
16 Panintsi Febimi watukushuqniki shamunqa. Payqa Cencrea *iglesiacho *diacunïsami kaykan. 2 Paymi yärakuq mayintsikunata shumaq yanapan. Tsaynölami noqatapis wilakur puriptï yanapaman. Jesucristuman yärakuq mayintsi kaykaptinqa chaskiykulanki y lapan nistashqankunata kamaripaykulanki.
3 Priscilata y Aquilata salüdüta qoykulanki. Paykunami Jesucristupa wilakuyninta wilakur puriptï ali yanapamashqa.* 4 Paykunaqa wanuytapis mana mantsakuypami yanapamashqa. Tsayno yanapamashqanpitami noqapis y lapan mana Israel wawqi panikunapis agradëcikärï. 5 Wayincho juntakaq yärakuq mayintsikunatapis salüdüta qoykulanki.
Tsaynöpis salüdüta qoykulanki kuyanakushqä Epenetuta. Paymi Asia provinciacho lapanpita mas puntata Jesucristuta chaskikushqa. 6 Panintsi Maríatapis salüdüta qoykulanki. Paymi qamkunata ali yanapashushqanki. 7 Tsaynöpis salüdüta qoykulanki Israel mayïkuna Andrónicuta y Juniastapis. Paykunawanmi carcilcho wichqararqä. Paykunaqa noqapita mas puntatami Jesucristuta chaskikärishqa. Lapan *apóstol mayïkunapis paykunata kuyapäkunmi.
8 Tsaynöpis salüdüta qoykulanki kuyanakushqä Ampliasta, 9 wilakuq mayï Urbanuta y kuyanakushqä Estaquista. 10 Tsaynöla salüdüta qoykulanki Apelesta. Jesucristupa ali sirviqnin kaptinmi payta lapan yärakuq mayintsikuna respitapäkun. Tsaynöpis salüdüta qoykulanki Aristóbulupa aylunkunata, 11 Israel mayï Herodiónta y Narcisupa ayluncho Jesucristuman yärakuqkunata. 12 Tsaynöla salüdüta qoykulanki Trifenatawan Trifosata. Tsay warmikunami Jesucristupa wilakuyninta wilakuqkunata ali yanaparkaykan. Tsaynöla salüdüta qoykulanki panintsi Pérsidata. Paypis Jesucristupa wilakuyninta wilakuqkunata alimi yanapaykan. 13 Tsaynöla salüdüta qoykulanki kuyay wawqintsi Rufuta* y mamantapis. Payqa mamänömi ali rikamashqa. 14 Tsaynöla salüdüta qoykulanki Asíncrituta, Flegontita, Hermesta, Patrobasta, Hermasta y paykunawan juntakaq wawqi panikunatapis. 15 Tsaynöla salüdüta qoykulanki Filóloguta, Juliata, Nereuta, Nereupa paninta, Olimpasta y paykunawan juntakaq wawqi panikunatapis.
16 Jukniki juknikipis qaqlaykikunacho mutsanakushpayki winchinakäriy. Purishqä markakunacho kaykaq wawqi panikunapis salüdunta qamkunapaq apatsikamun.
17 Wawqi panikuna, pipis chikinakunaykipaq o Jesucristupa wilakuyninta mana cäsupänaykipaq shimita jatipäshuptikipis ama chaskipaytsu. Shimita jatipaqkunaqa lutantami yachatsipäkushunki. Tsayno kaqkunapitaqa witikärinki. 18 Paykuna manami Jesucristo alabashqa kananta munartsu yachatsipäkun, sinöqa kikinkuna alabashqa kayta munalarmi. Paykunaqa ali shimilanpami mana tantiyakuq wawqi panikunata lutanta criyiykätsin.
19 Tayta Diosta cäsukärishqaykitaqa maytsaychöpis yärakuq mayintsikuna musyanmi. Tsayno kapäkushqaykita musyar noqapis kushikümi. Noqa munä jutsata mana ruraypa alilata rurar imaypis kawapäkunaykitami.* 20 Ali kawayta qomaqnintsi Tayta Dios yanapaykuläshunki *Satanásta manakaqman churapäkunaykipaq. Señornintsi Jesucristo kuyapäshushpayki imaypis yanapaykuläshunki.
21 Yanapamaq wawqintsi Timoteupis* qamkunapaq salüdunta apatsikamunmi. Tsaynölami Israel mayïkuna Lucio, Jasón y Sosípaterpis salüdunta qamkunapaq apatsikamun.
22 (Noqa Terciupis Señornintsipa jutincho salüdüta qamkunapaq apatsikamü. Apóstol Pablo dictamashqannölami kay cartata qelqaykämü.)
23 Tsaynölami Gayupis* salüdunta apatsikamun. Paymi wayinta kamaripämashqa patsakunäpaq y yärakuq mayintsikunawan tsaycho juntakänäpaq. Tsaynölami kay markapa tesorërun Erastupis* y wawqintsi Cuartupis qamkunapaq salüdunta apatsikamun. 24 [Señornintsi Jesucristo kuyapäshushpayki imaypis yanapaykuläshunki. Amén.]
Carta ushanan
25 ¡Tayta Diosta alabaykulay! Paymi Jesucristupa wilakuyninta wilakushqänöla yanapaykäshunki payman yärakur munashqanno kawapäkunaykipaq. Tsay wilakuytaqa runakuna nawpata manami musyarqantsu. 26 Kananmi itsanqa profëtakuna qelqashqannöla y imayyaqpis kawaq Tayta Dios nishqannöla wilakuyninta maytsay nacionkunachöpis wilakurkaykan. Tsayno wilakurkaykan pïmaypis Jesucristuman yärakur Tayta Dios munashqanno kawapäkunanpaqmi.
27 ¡Jesucristupa jutincho Tayta Diosta imaypis alabaykuläshun! ¡Pay japalanmi Dios kaykan! ¡Manami pipis payno yachaq kantsu! Amén.