Salmos
Yanapananpaq Tayta Diosta manakushqan
(1) Cantaqkunapa mandaqninpaqmi. Pusaq cuerdayuq instrumentuta tukapalanpa cantapäkunki. David qelqashqan salmu.
12 (2) TAYTA DIOS, waktsakunata salvaykulay.
Qamman yärakamuq runakuna manami kannatsu.*
Ali ruraq runakuna lapannami ushakashqa.
2 (3) Runakunaqa juknin jukninpis lulapänakunmi.
Tsayno karmi awnirkurpis kutikuriykun.
3 (4) Lula runakunata y orgullösu runakunataqa TAYTA DIOS lapanta ushakätsitsun.
4 (5) Paykunaqa kaynömi nirkaykan: “Parlaychöqa manami pipis yalimäshuntsu.
Imanöpapis tsapakushunmi.
Noqantsitaqa pipis manami upälatsimäshuntsu”.
5 (6) Tsaymi TAYTA DIOS kayno nin:
“Waktsakunata y humildikunataqa aläpami nakarkaykätsin.
Nakatsiptinmi pasaypa waqarkaykan.
Tsaymi paykunata jukla yanapashaq.
Manakamashqannömi paykunata salvashaq”.
6 (7) TAYTA DIOS promitishqankunaqa lapanpis yärakuypaqmi kaykan.
*Püru kananpaq qanchis kuti tsulutsishqa qellaynömi nishqankunapis kaykan.
7 (8) TAYTA DIOS, musyämi waktsakunata yanapanaykipaq kashqanta.
Musyämi fiyu runakunapita imaypis tsapänaykipaq kashqanta.
8 (9) Fiyu runakunaqa maytsaypapis rikapakurmi purirkaykan.
Jutsata ruraptinpis ali kashqantami nirkaykan.