2. JUC YARPAYLAWAN YANAPÄNACUY

¿CAYGA IMA NINANTAJ?

Aviunta manejaj runaga ayudantinwan shumaj yanapänacun mayman chayananpaj cajman chayapäcunanpaj, ima problemacuna yuriptinpis jucla alchapäcun. Chaynolami majayojcunapis jucnin jucninmi yanapänacuptinga cushishgala goyapäcunga.

BIBLIAGA NIN: “Manami ishkaqnatsu kaykan, sinöqa juklaylanönami” (Mateo 19:6).

Juc runa cayno nin: “Casaracushgacunaga jucnin jucninmi yanapänacunman ali cawapäcunanpaj”.

¿IMANIRTAJ CHAYTA RURANQUIMAN?

Majachacashgacuna mana yanapänacuptinga, ima problemalapis yurimuptin rasla rabiachinacun y manami alchanchu; chayga mana alimi. ¿Imanir? Ichic problemacunata mana alcharga, ichiclapa ichiclapa más problemacunaman chayanga.

Juc warmi cayno nin: “Casado vidachoga majanchiwan juc yarpayla cashun, chayno mana carga ima acuerducunamanpis chayayta mana puedishwanchu”.

¿IMATARAJ RURANQUIMAN?

YARPACHACUY

• “Cay guellayga nogapitami, noga arushcä”, ¿chaynochu ninqui?

• ¿“Majä aywacuchun, japalä cushish cawacunäpaj” nir yarpanqui?

• ¿Majayquipa familiancunawan mana alichu apanacärinqui?

MAJAYQUIWAN PARLACÄRINAYQUIPAJ

• ¿Imacunachotaj ishcanchi juc yarpaylawan yanapänacunchi?

• ¿Imalapis canchu mejuranapaj?

• ¿Imacunataraj rurashwan ishcanchi más ali yanapänacunanchipaj?

CAYCUNATA RURAY

• Gamshi majayquiwan juc equipucho caycanquiman puclanayquipaj. ¿Imataraj ruranquiman ishcaniqui gananayquipaj chay puclaycho?

• Quiquilayqui gananayquipaj ama yarpaychu, sinoga ishcaniqui imano gananayquipaj yarparcuy.

Juc runa cayno nin: “Ama ninquimanchu ‘noga nishgäga más alimi’. Chaypa trucanga jaucala y cushishga cawacunapaj calpachacunanchi”.

BIBLIAGA NIN: “Kikilaykikuna ali kawanaykipaq yarpachakärinaykipa trukanqa wakinkunapis ali kawananpaq yarpachakäriy” (Filipenses 2:3, 4).