3. RESPETANACUY

¿CAYGA IMA NINANTAJ?

Majayojcuna respetanacäriptinga, ima acuerducunaman mana chayarpis jucnin jucninpa yarpachacun. Diez claves para transformar tu matrimonio nishgan libro cayno nin: “Respetanacoj majayojcunaga quiquincuna yarpashganta manami ruranchu, sinoga majan ima pensashganta wiyacun y cuentaman churan. Nircur shumaj parlapäcun juc acuerduman chayapäcunanpaj imalatapis jucla alchananpaj”.

BIBLIAGA NIN: “Cuyacoj carga [...] pitapis manami manacajman churanchu” (1 Corintios 13:4, 5, Tayta Diosninchi Isquirbichishan).

Juc runa cayno nin: “Warmïta alapami respetä y valurämi, chaymi imatapis shumaj yarpachacurcur rurä payta mana laquichinäpaj”.

¿IMANIRTAJ CHAYTA RURANQUIMAN?

Majachacashgacuna mana respetanacäriptinga, olguypaj, nanaj nanajparämi y imatapis lutanpa parlapäcun. Y waquin runacuna nipäcun: “Pipis chayno cawapäcuptinga, ichic ichiclapa divurciuman chayanga”.

Brian jutiyoj runa nin: “Warminchita manacajman churar toscuypa parlapaptinchiga, laquichishwanmi y manana yaracamashunnachu”.

¿IMATARAJ RURANQUIMAN?

YARPACHACUY

Cay ushanan semanacho majayquiwan parlapacushgayquiman yarpachacuy y caycunata tapucuriy:

• ¿Ayca cutitaj jamurpashcanqui y ayca cutitaj ali shimilawan parlapashcanqui?

• ¿Imacunata rurartaj majayquita respetashcanqui?

MAJAYQUIWAN PARLACÄRINAYQUIPAJ

• ¿Imano parlapamänanchita munanchi y ima ruraycuna cushichimanchi?

• ¿Imano parlapämaptinchi rabianächimanchi y ima ruraycuna laquichimanchi?

CAYCUNATA RURAY

• Juc papelcho escribiy majayqui imano tratashunayquita munanqui. Nircur escribishgayquita trucay, y calpachacuy chaycho escribiraycajno ruranayquipaj.

• Majayquipita imata gustashushgayquita juc listata ruray, y alapa cuyashgayquita niriy.

Megan jutiyoj warmi cayno nin: “Imaypis munä runä cushish cananpaj, chaymi calpachacö ruraynëcuna ali cananpaj. Majanchita respetashpanchiga manami jatun ruraycunawanrächu musyachishwan, sinoga ichic ruraycunawanpis”.

Capaz ninquiman “nogaga respetacoj runami cä”, pero más aliga canman majayqui respetado sienticunanpaj.

BIBLIAGA NIN: “Jucniqui-jucniquipis cuyapänacuy. Pï maypäpis alli cay. Ama alli-tucunquichu. Alli shimillayquipa piwanpis parlanqui. Imapitapis pasinsacunqui” (Colosenses 3:12, TDI).