6. WAMRACUNATA ANYAPAY

¿CAYGA IMA NINANTAJ?

Taytacunaga wamrancunata yachachipäcunman, anyapanman y öraga correjinman mana alicunata ruraptin. Nircur tantiarcachinman alicunata rurananpaj, ali purtacunanpaj, chaynopa ali runaman ticrananpaj.

¿IMANIRTAJ CHAYTA RURANQUIMAN?

Cay ushanan junajcunachoga, taytacuna manchacärinmi wamrancunata anyapayta y correjiytapis, chaymi wamracunaga munashgancunatami rurapäcun. Pero ali taytacunaga wamrancunata yachachipäcun casucoj y juiciuyoj cananpaj.

Pamela jutiyoj warmi nin: “Wamracunataga imaypis yachaycächishun imata ali o mana ali cashganta, chayta mana rurarga lamarcho juc buqui timunniynaj cashganno canman, nircur caypa o wacpa aywacur mana alicunaman jaticäcunman”.

¿IMATARAJ RURANQUIMAN?

Cutin cutin yachachiy. Wamrayquita shumaj tantiarcachiy mana casucoj captinga, mana alicunaman chayanga. Casucushuptiqui ichanga, felicitaycuy.

Juc warmi nin: “Canan tiempo wamracunaga mana casucunnachu, pero wamräcuna casucamaptinga imaypis felicitaycö, chaurasga anyapaptinchiga shumaj chasquicun”.

BIBLIAGA NIN: “Imatapis murushqantsitaqa tsaytami cosechantsi” (Gálatas 6:7).

Tantiaj canquiman. Shumajraj yarparcuy wamrayquicuna ayca watayoj cashganta y imacho pantashganta anyapänayquipaj. Capazchi paycuna celularlata arcarar täcunman, chaurasga ama alapa rabiacunquimanchu chaypita, sinoga más aliga canman juc tiempo celularta mana utilizänanpaj michäcunayquipaj.

Juc runa nin: “Puntataga tantiarcö imanir wamrä mana casucamargan. Cutin cutin mana casucamaptinga ali claro parlapä cambiananpaj, pero mana cuentata gocushpan pantarcuptinga, yanapanchi imata cuentaman churananpaj”.

BIBLIAGA NIN: “Mama-taytacunapis wamrayquicunata ama jagayächinquichu. Jagayächiptiquega llaquishami goyanga” (Colosenses 3:21, Tayta Diosninchi Isquirbichishan).

Wamrayquita cuyay. Wamracunaga cushicunmi y chasquicunmi cuyaylapa y ali shimilapa yachachipäcuptiquiga.

Daniel jutiyoj runa nin: “Wamrä imalachopis pantarcuptinga manami gayapächu “imanirtaj chayta rurashcanqui” nir. Sinoga shumaj parlapä pantarcuptinpis alicunata rurayta puedinanpaj, y nogacuna yanapänapaj nipäcö.

BIBLIAGA NIN: “Kuyakuq karqa ima kaptinpis pacienciakuntsimi” (1 Corintios 13:4).