¿Familianchiwan cushishga cawacushwanchuraj?

QUIQUIN BIBLIA NINGAN

“Tayta Diosnintsipa wilacuyninta chasquicur cäsucogcunapis cushishga carcaycan.” (Lucas 11:28, Mushog Testamento, Margos—Yarowilca—Lauricocha.)

CAYTA MUSYAYGA IMANOTAJ YANAPÄMANCHI

Rasunpa caj cuyacuytami tarishun (Efesios 5:28, 29).

Lapanchomi respetanacushun (Efesios 5:33).

Ali confianacurmi cawacushun (Marcos 10:6-9).

¿IMALAPIS CANCU BIBLIA NINGANMAN CREINAPAJ?

Awmi, ishcaylata ricärishun:

• Diosmi familiataga camashga. Bibliami wilacun Jehová Dios permitinganraycur familiacuna yurimushganta (Efesios 3:14, 15). Juc parlacuychoga, familiacunaga can Jehová camashga captinmi. ¿Imanötaj yanapämanchi cayta musyayga?

  Cayman pensariy: Juc munapaypaj jaca picantita micuycar, y imano ruracashga canganta musyayta munarga, ¿pitaraj tapurinquiman? Chay yanucojtachari tapurinquiman ari.

  Chaynolami familiayqui imano cushishga cananpaj cajta musyayta munarpis, más aliga canga, ¡camajnin Jehovata tapucungayqui! (Génesis 2:18-24.)

• Diosga cuyamanchimi. Gam y familiayquiga Bibliachomi Jehovapa consejunta ashinayqui, porque payga cuyapämashpanchimi cuentapaj churamanchi (1 Pedro 5:6, 7). Noganchi más ali cananchitami Jehová munan. Y  consejuncunaga imaypis yanapämanchimi (Proverbios 3:5, 6; Isaías 48:17, 18).