Notacuna

1. ¿Pitaj caycan Jatuncaray Babilonia?

2. ¿Imaytaj Mesías chayamunan cargan?

3. Imacunachotaj doctorcuna yawarta utilizapäcun

4. Raquinacuy captin

5. Fiestacunaman invitashuptiqui imata ruranayquipaj

6. Contagioso gueshyawan caycar

7. Guellayraycur imalapis pasaptin

1. ¿Pitaj caycan Jatuncaray Babilonia?

¿Imanirtaj “Jatuncaray Babiloniata” tincuchin luta religiuncunawan? (Apocalipsis 17:5). Quimsalata ricärishun.

• Entero munduchomi imatapis rurarcaycan. Bibliaga nin “may-chay nasyun” runacunata y “mandajcunatapis munayninchömi” chararan (Apocalipsis 17:15, 18).

• Manami poderoso naciuncuna ni negocianticunachu. Bibliaga nin “mandajcunaga” y “rïcuyaj nigusyanticunaga” jinala cawarcaycanga “Jatuncaray Babilonia” ushacashgana captin (Apocalipsis 18:9, 15).

• Diosta mana cajman churan. Luta religiuncunaga guellayraycur y ima favurlatapis rurapänanpämi mandajcunata yanaparcaycan, chaymi Bibliachoga paycunata “mañosa warmi” nin (Apocalipsis 17:1, 2). Diospita lutanta yachachipäcun y culpanraycurmi achca runacuna wanupäcush (Apocalipsis 18:23, 24).

13 caj yachacuyman cutinapaj, 6 caj punto

2. ¿Imaytaj Mesías chayamunan cargan?

Bibliaga wilacurgan 69 semanacuraj pasananpaj Mesías chayamunanpaj (leiriy Daniel 9:25).

• ¿Imaytaj chay 69 semanacuna galaycamurgan? 455 (J.m.sh) watami galaycamurgan. Chay watachomi Nehemiaspis Jerusalenman aywargan, chay marcata yapay sharcachinanpaj (Daniel 9:25; Nehemías 2:1, 5-8).

• ¿Ayca watacunamantaj chayan 69 semanacuna? Waquin profeciacuna juc junajpaj parlarga juc watapämi parlaycämun (Números 14:34; Ezequiel 4:6). Chaymi ninchi ganchis semanacuna, ganchis watacuna cashganta. Chauraga 69 semanacuna, 483 watacuna caycan (69x7).

• ¿Ima watachotaj ushargan chay 69 semanacuna? 455 (J.m.sh.) watapita, 483 watacunata sumarerga, chayanchi 29 (J.sh.) watamanmi.a Chay watachomi Jesús bautizacurgan y Mesiasman ticrarergan (Lucas 3:1, 2, 21, 22).

15 caj yachacuyman cutinapaj, 5 caj punto

3. Imacunachotaj doctorcuna yawarta utilizapäcun

Cristianucunaga yawarninchita pitapis gonchichu. Öraga docturcuna nimashwan ‘yawarniquita jorgushun listula cananpaj operacunayqui junajcama’. Chaytapis permitinchichu (Deuteronomio 15:23).

Ichanga caycuna ruracaptenga alino canman waquin cristianucunapa (pero cada cristianumi decidinman imano cananpäpis): ima gueshyawan cashganchita musyapäcunanpaj jorgupäcuptin; yawarninchita llanula manguerapa maquinacunaman jorgurir y limpiuyarcachir chay horala cuerpunchiman cutichipäcuptin (chayga hemodiálisis nishganshi). Nircurpis yawarninchita jorgurir juc jampita venanchiman churapäcuptin, y operacushganchi hora yawarninchita cutichipäcuptin (chayga hemodilución nishganshi). Y ultimuchopis caycan, operacushganchi hora yargoj yawarta juc maquinawan shoguypa shoguchipäcuptin y limpiuyarcachir cuerpunchiman cutichipäcuptin. Doctorcunapis öraga manami juc yarpaylachu capäcun. Mayganpis atiendimänanchipaj caycaptenga capazchi imatapis jucnopa rurar galaycunman. Chaymi altanto caycänanchi y caycunamanpis shumaj yarpachacunanchi:

• Yawarniquita jorgurir imalachopis juc tiempo churarächipäcuptenga, ‘chay yawarga cuerpüpita mana yargojno cashga, manami pachaman jichashächu’ ninayquipaj ¿concienciayqui permitishunquichuraj? (Deuteronomio 12:23, 24).

• Operacushgayquicho yawarniquita jorgurcur juc maquinacho limpiuyarcachir chay horala yapay cuerpuyquiman cutichipäcuptenga, ¿imanoraj concienciayqui ricacunga? ¿Imataraj decidinqui?

39 caj yachacuyman cutinapaj, 3 caj punto

4. Raquinacuy captin

Pipis majanpita imaraycurlapis raquicäcuptenga, manami librichu caycan yapay jucwan casacunanpaj. Chaypitaga ali clarumi Biblia parlamun (1 Corintios 7:10, 11). ¿Ichanga imacuna pasaptintaj pipis majanpita raquicäcunman?

• Mana munaptin familianta manteniyta: Runa caj familianraycur imatapis rurayta munanchu. Upunapaj micunapaj cajcunatapis goyta munanchu (1 Timoteo 5:8).

• Pasaypa magacoj captin: Pipis öraga majanpa cawayninta peligruman churanman (Gálatas 5:19-21).

• Jehovapita raquicänanpaj imaycata ruraptin: Maygan cajpis imaycata rurar pasaypa michäcuycanman tranquilula majan Diosta aduracunanta (Hechos 5:29).

42 caj yachacuyman cutinapaj, 3 caj punto

5. Fiestacunaman invitashuptiqui imata ruranayquipaj

Waquin fiestacunaga Jehovapa ricaynincho mana alimi caycan, chaymi noganchega mana aywanchichu. Pero Bibliawan yachachishga conciencianchimi yanapämäshun chay fiestacunaman aywanapaj o manapis; caycunata ricäriy.

• Pilapis ‘felices fiestas’ nishuptiqui. Chayta nishuptiquega ‘gracias’ ninquimanlachi. Pero tapupäshuptiquega wilapanquimanchi imanirtaj chay fiestacunata ruranquichu ni aywanquichu.

• Mana Testigo majayqui familian fiesta rurashganman invitashuptiqui, ‘chaycho micuyla canga’ nir. Aywayta munarga alichi canman ali shimilapa ‘chay fiestacho Jehová chiquishgancuna ruracaptenga, chaycho cashächu’ niptiquega.

• Arushgayqui patronniqui fiesta wichan más guellayta goshunayquipaj caycaptin. ¿‘Mana chasquishächu’ ninquimanchuraj? Cayman yarpay, ¿patronniquega chay fiestacho cashgayquiraycurchu más pagaycäshunqui? ¿O ali aroj cashgayquipita agradecicurchu masla pagaycäshunqui?

• Pilapis juc regaluta goycushuptiqui ima fiestalapis captin. Capaz nishunquiman ‘musyämi gam cay fiestata mana rurashgayquita pero cay regalo goyta munä’. Quiquiquimi tantiacunayqui imanirtaj chay regaluta goycäshunqui, nircur decidinayqui chasquinayquipaj o manapis. Bibliawan yachachishga conciencianchimi yanapämäshun shumajraj tantiacurcur imatapis ruranapaj y Jehovatapis cushichinapaj (Hechos 23:1).

44 caj yachacuyman cutinapaj, 1 caj punto

6. Contagioso gueshyawan caycar

Contagioso gueshyata chararga, runacunata cuyashpanchimi imaycata ruranchi paycunata mana contagianapaj. Cuidadulawanmi purinchi y wilanapaj captenga wilacunchimi. Chayta rurarga, cayno Biblia mandacushgantami cäsucuycanchi: “Runa-masiquita cuyanqui quiquiqui alli cawayta munashayquino” (Romanos 13:8-10).

Aumi, chayno Biblia nishganta cäsucurmi, ima contagioso gueshyalawanpis caycarga lado lado piwanpis purinchichu, ni pitapis muchayparaj saludanchichu ni macalaycunchichu. Y manachi piñacushwanchu gueshyanchiraycur pipis wasinman mana gayachimaptinchi. Bautizacunapaj caycarpis, ancianucunacho coordinador hermanuta wilashwan gueshyanchipita, pajta yacuman yaycur waquincunata contagiashwan. Y pipis ‘¿ima gueshyalawanpis unaycho contagiacushcächuraj?’ nir yarpachacuptenga, alichi canman análisis de sangre nishganta ruracuptin, masraj pipa noviunmanpis ticrananpäna caycar. Chayta rurarga, quiquilanchipa yarpaycänanchipa trucanga ‘yarpachacunchi runa-masinchipis alli cawananpaj’ (Filipenses 2:4).

56 caj yachacuyman cutinapaj, 2 caj punto

7. Guellayraycur imalapis pasaptin

Pipitapis guellayta prestacur, o waquincunata prestarpis alimi canga papelchoraj chayta guelgachiptinchi. Manami nishwanchu ‘payga noganopis cristianumi, quevä firmachiycäshäraj’ nir (Jeremías 32:9-12). Y firmaycarpis, ¿maygan cristianulawanpis guellayraycur ima problemalapis yurimuptenga? Respetulawan parlapacurirchi shumaj arreglapäcunga.

¿Y pipis engañuwan guellayta mañamashganchi captenga? ¿O calumniawan contranchicho parlar galaycuptenga? (Leiriy Mateo 18:15-17). Jesusmi nergan imata ruranapaj, quimsa caycan.

1. Pitapis manaraj wilarmi, paycunala tarinacur shumaj parlapacärinman (15 caj versiculuta ricay).

2. Chayta rurar mana alchacaptenga, congregaciuncho pogushga hermanupa naupanchopis arreglayta puedipäcunmi (16 caj versiculuta ricay).

3. Chay lapanta rurar mana alchacaptenga, canansï puedipäcunna congregaciuncho ancianucunata wilayta (17 caj versiculuta ricay).

Juc wauguiwan o paniwan chayno problemanchi captenga alichi canman autoridäcunaman manaraj aywar arreglapäcuptin, sinoga imataraj hermanunchipita o quiquin Jehovapitapis waquincuna parlapäcunman (1 Corintios 6:1-8). Imano captinpis öraga waquincuna autoridäcunamanrächi aywapäcunga, divorciuraycur, testamentucunaraycur, negociuncunawan ima pasashganraycur, seguruncunata maygan cobrananpaj captin o warmi olgu raquicar wamrancunata maygan charananpaj captinpis. Maygan cristianupis chayno problemacunapa pasaycar autoridäcunaman aywarga, manami Bibliapa contranchoga imatapis ruraycanchu.

Jina Biblia nishgannolami ruraycanman autoridäcunaman aywaycur denunciata churaptin. Capaz pilapis alapa maltrataycan, imaycancunata suwapaycan; o pipis castanta magash o hasta wanuchish. Y chaynola abuso de menores o violación cashga captinpis.

56 caj yachacuyman cutinapaj, 3 caj punto