Enero

Puntataga Jesús ricargan viuda warmi laquishga caycajta, y nircur payta cuyapashpan pasaypa laquicurgan (Luc. 7:13). Pero Jesusga manami laquicurganlachu chayta ricar, sinoga ruraynincunawanpis ricächicurgan. Chaymi warmita cuyapashpan nerganchi: “Ama wagaychu”. Nircur wamranta cawarachimur mamanta nergan “cä wamrayqui” (Luc. 7:14, 15). Jesuspa milagrunpita yachacunchi imano cuyapäcoj canapaj wanupacushgacunata shacyächinapaj. Chaypäga puntata ricashwan imano sienticushganta, nircur imalatapis cuyacuywan nishwan y imalachopis yanapashwan consuelanapaj (Prov. 17:17; 2 Cor. 1:3, 4; 1 Ped. 3:8). Achcataraj mana parlar o imalatapis rurar waquincunata yanapashwanmi. w23.04 5, 6 parr. 13-15

Amigun wanushgana cashganta musyarpis, Jesusga manami jucla aywanchu Betaniaman, sinoga ishcay junaj pasariptinraj. Chayamunanpäga Lazaruga chuscu junajna wanushga caycargan. Jesusga yarparganchi nircur rurananpaj cajga amiguncunata yanapänanpaj y Jehovapis alabashga cananpaj (Juan 11:6, 11, 17). ¿Jesús amiguncunaraycu rurashganpita imataj yachacunchi? Mariawan Martaga manami mañacurganchu Jesús Betaniaman aywananpaj. Sinoga nergan wilacunanpaj amigun Lázaro gueshyaycashganta (Juan 11:3). Lázaro wanuptin Jesusga carulapita cawarachimunmanmi cargan. Ichanga Mariawan Marta cayta munar Betaniaman aywargan, paycunaga amigancuna cargan. ¿Gam mana mañacuptiquipis canmi juc amiguyqui listo caycashganta yanapäshunayquipaj? Chayno captenga musyanquinami ima laquicuycho captiquipis pay yanapäshunayquipaj cajta (Prov. 17:17). Jesusno captinchega waquincunata yanapänanchipaj listo caycäshun. w23.04 10 parr. 10, 11

Ima pruebacunapa pasarga öraga yarpashwanchi Jehová mushoj Pachata mana apamunanpaj cajta. Chayno yarparga, ¿nishwanchuraj yäracuyninchi pishiycämashganchita? Manami. Achca semanacuna pasaypa tamyala captenga, öraga yarpashwanchi inti mana yargunanpaj. Ichanga usya wichanga imaylapis chayamungami. Chaynolami pasaypa guelanashga caycarga ‘imayraj mushoj Pachaga chayamunga’ nir yarpashwanchi. Ichanga yäracuyninchi sinchi caycaptenga musyanchimi Jehová aunishganta rasunpa cumplinanpaj (Sal. 94:3, 14, 15; Heb. 6:17-19). Chayga yanapämäshun imapitapis masga Jehovata adurar caycänapaj. Runacunata yachachicunapäpis yäracuyninchi sinchi caycanman. Diosninchi mushoj Pachata apamunanpaj cajpita runacunaga nipäcun ‘chaycuna ali wilacuycuna captinpis rasunpaga quevä cumplicanga’ (Mat. 24:14; Ezeq. 33:32). Ichanga cuidacunanchi paycunano mana yarpapäcunapaj, chaypa trucanga yäracuyninchita cada cadala masraj sinchiyächishwan. w23.04 27 parr. 6, 7; 28 parr. 14

¿Imaylapis nishcanquichu ‘Jehová wiyanchuraj mañacushgäta’ nir? Öraga lapanchicunami chayno tapucunchi achca problemacunapa pasarga. Canan hora imayca nacaycunapa pasaycaptiquega sasanochi caycan cuentata gocunayquipaj mañacushgayquita Jehová contestashganta. ¿Cuyashgan siervuncuna mañacushgantaga Jehová wiyanchuraj? Bibliata leirga yachacunchimi Jehová amatar cuyaycalämashganchita (Ageo 2:7; 1 Juan 4:10). Chauraga cuyapämashpanchimi payga munan imacunapa pasarpis mañacunanchita (1 Ped. 5:6, 7). Mana raquicäcunapämi yanapämänanchipaj listo caycan, munaycanmi imaycatapis aguantananchita. Bibliata leirga ricanchimi imanotaj Jehová unay sirvejnincuna mañacuptin pay contestargan. w23.05 8 parr. 1-4

Mariaga manami Joseraycurchu Jehovata cuyaj. Quiquinmi calpachacurgan Diospa Palabranta leir Jehovata adurananpaj. Jina shongulancho ali yarpachacoj warmi cargan (Luc. 2:19, 51). Chayno Diosta cuyashganraycurmi runanpäpis ali warmi cargan. Canan wichan cristianacunapis calpachacärinmi Marianola cananpaj. Émiko jutiyoj cristianapitami parlarcushun. Paymi cayno nin: “Solteraraj caycaptëga, maquïchomi caycargan Jehová Dioswan amistänëta sinchiyächinäpaj. Pero casacurishpäga, runäpa maquinchona caycargan Diosninchita imano adurananchipaj. Cuentata gocurgä yäracuynëpis paypa maquincho caycashganta. Chauraga yarpachacunäpaj caycargan Dioswan amistänëta quiquë sinchiyächinäpaj. Aumi, cananga tiempöta ali camacarcachir japalä caycashpä Jehovata mañacö, Palabranta estudiä y leishgämanpis aliraj yarpachacö” (Gál. 6:5). Warmicuna chaynola gamcunapis rurapäcuptiquega, runayquega cuyaparmi ‘alitami ruraycanqui warmilä’ nishunqui (Prov. 31:30). w23.05 22 parr. 6

Jehová camashgancunacho ricanchi fiyupa yachaj, poderyoj y cuyacoj cashganta. Chayta musyarga yanapämanchi payta masraj respetaycunapaj y cuyanapäpis (Rom. 1:20). Y chayta ruranapäga calpachacunanchirämi, manami pipis Diosta manchacurna yurinchu. Cada cadala Diosnilanchiwan parlapacuptinchega, payta rasunpa Taytanchitano ricayta galaycunchi. Chayga yanapämanchi masraj manchacunapaj o respetaycunapaj. Pay poderyoj cashganta yarpanchi ima pruebacunatapis pasar aguantanapaj mañacuptinchi. Y cuyashgan Wamranta noganchiraycu cachamushganpita agradecicuptinchi ricächicunchi agradecido caycashganchita. Pay fiyupa yachaj cashgantaga manami gonganchichu ima problemawanpis caycar yachayta gomänanchipaj mañacuptinchi. Chayno mañacurir payta masraj respetayculanchi y amistäninchita ushacächinanpaj cajcunatapis rurayta munashwanchu. w23.06 15 parr. 6, 7

Jehová Diosnilanchimi leycunata gomanchi. Hechos 15:28, 29 textucunacho wilacun imacunachotaj mana guelanaypa Jehovata jucla cäsucushwan. Chaychoga nin: juc, Jehovalata aduranapaj y mana idulucunataga; ishcay, yawarta mana micunapaj ni churacunapäpis y quimsa, majanchilawan cacunapaj y manaraj casaracushga carga piwanpis mana punucunapaj. Chaycunata cäsucurga, ricacämun Jehovata shongupita cuyashganchita. Pero, ¿imanotaj canan wichan chaycunata cäsucushwan? Jehovalata adurashwan, idulucunataga mana. Quiquin Jehová israelitacunata nergan paylata adurananpaj (Deut. 5:6-10). Jesuspis Diabluta nergan Jehovalata adurananchipaj (Mat. 4:8-10). Chaymi noganchipis idulucunata y santucunatapis aduranchichu, ni naupanmanpis gongurpacunchichu. Jina pushacoj religiosucunata, politicucunata, puclaj, cantaj y actuaj runacunatapis dioscunatano ricanchichu. Chaypa trucanga Camacojninchi Jehová Dioslata aduranchi (Apo. 4:11). w23.07 14, 15 parr. 3, 4

Diosta mana cäsucoj runacunaga jucwan jucwan cacular y ganra ruraycunata o pornografía nishganta ricaycular cawacärin (Efes. 4:19). Chaymi calpachacunanchi Jehovata manchacur mana alicunapita witicunapaj. Proverbios 9 caj capituluchoga ishcay warmicunapita parlaycämun. Juc cajga tincun tantiacoj cashganwan y juc cajna mana tantiacoj cashganwan. Cay ishcay warmicunaga mana yarpachacojcunata cayno nipäcun: “Yanukushqä mikuyta mikunaykipaq y rurashqä vïnuta upunaykipaq fiestaman shapäkamuy” (Prov. 9:1, 4-6). ¿Ichanga jucnin jucnin nishganga maymantaj chayachicun? Puntata parlarcushun “mana tantiyakuq” warmipita (Prov. 9:13-18). Payga mana yarpachacojcuna wasinman aywananpaj gayacamur cayno nin: “¡Mana tantiyakuq mözukuna y jipashkuna! ¡Kayman shapäkamuy!”. Ichanga chay warmi nishganta chasquipacojcunaga manami musyapäcunchu wanunanpaj cashganta. Proverbios libruchoga wilacamunpis runanta jarucoj warmipita y jucwan jucwan cacoj warmipitapis. Paycunawan jaticarga “wanuytami tarinkipaq” nin (Prov. 2:11-19). Jina Proverbios 5:3-10 textucunacho nin wayrapacoj warmiwan jaticarga “manaraqpis aykätami ushakankipaq”. w23.06 21, 22 parr. 6, 7

Ancianucunaga pitapis ali tantiaparmi ali shongulanwan yanapacunman (1 Tim. 3:2, 3). Maygan ancianupis manami ninmanchu ‘nishgäcunata respetapäcuy, gamcunapitaga más unaymi noga caycä’ nir. Jehovaga maygan ancianutapis espiritunwanmi yanapan imacunapis ali camacänanpaj, chaytaga lapan ancianucunami musyapäcunman. Imatapis decidinapaj caycaptin y Bibliapa contrancho mana caycaptenga alimi ricacan maygan ancianupis cayno niptin ‘noga yarpashgäno mana captinpis gamcuna nishgayquino ruracächun’ nir. Ali shongu carga y pitapis ali tantiaparga achca bendiciuncunatami tarishun. Congregaciuncho hermanunchicunawan jaucala cawacur juc shongula caycäshun. Diosta adurar cushicushunmi waquincuna maypita captinpis y ima costumbriyoj captinpis. Jinamanpis Jehová Diosnola carmi waquincunata ali tantiapaycäshun y ali shongulanchiwan yanapaycäshun. w23.07 25 parr. 16, 17

Danielga ali shongulanwan yachacur rasun cajta musyayta munargan. Jina humilde cashpanmi, tantiargan Jehovaga ñanpu shongu cajcunata y cäsucojcunata yanapashganta palabranta tantiananpaj (Dan. 2:27, 28). Juc cuticho humilde cashpan Jehovapa yanapacuyninta ashirgan (Dan. 2:18). Nircur, yachacushganman ali yarpachacoj y chay wichanpaj cashgan waquin profeciacunawanpis tincuchergan (Jer. 25:11, 12; Dan. 9:2). ¿Imataj paypita yachacunchi? Yarparay imanir profeciacunapita yachacunayqui. Pipis rasun cajta musyayta munar profeciacunapita yachacuptenga, Jehová listo caycan yanapänanpaj (Juan 4:23, 24; 14:16, 17). Ichanga waquincunaga mana ali yarpaywan profeciacunapita yachacärin. Chaytaga ruran Bibliata manacajman churananpaj. Paycunaga shongun munashgalanta rurayta munar quiquincuna ali cajta y mana ali cajta acrayta munapäcun. Ichanga, profeciacunapitaga ali shongulanchiwan yachacunanchi. w23.08 9 parr. 7, 8

Rurashganchicuna waquincunawan tincuchiptinchega, lasaj guepino canman (Gál. 6:4). Chayno rurarga pitapis chiquipar y ‘waquincunapita más ali cäman’ nir imatapis rurayta galaycushwanchi (Gál. 5:26). Y laquicuypämi canman öraga waquincunano imatapis rurayta munaptinchi, masraj mana puedirga. Bibliapis nin: “Yarpashqanno mana kamakaptinqa pipis pasaypami lakikun” (Prov. 13:12). Y más sasarämi caycan pipis shuyarashgancunata mana chasquicuptin. Chayno captenga calpaynaj ricacur imaycamapis cawayta tarinapaj carreracho ganas ganaswanga corrishunnachu. Jehovaga manami imaypis mañashunquichu mana puedinayquipaj cajcunata ruranayquipaj (2 Cor. 8:12). Payga rurashgayquicunata manami tincuchinchu jucpatawan (Mat. 25:20-23). Chaypa trucan ali nawilanwan ricashunquimi lapan shonguyquiwan payta sirviptiqui y imacunapa pasarpis jinala valurcharcur mana cachaycuptiqui. w23.08 29 parr. 10, 11

¿Imanotaj Jehová contestargan Sansón mañacushganta? Jehovaga ucrupita yacuta pashtachimurgan. Sansonna chayta upurcuptin “valornin yapay yurirkurqan” (Juec. 15:19). Profeta Samuel Jueces libruta escribinanpaj wichanpäga, chay pashtamushgan yacuga jinalami caycargan achca watacuna pasashgana captinpis. Chaura israelitacuna chayta ricaycurga, yarparganchi Jehovaman yäracäriptenga imaypis yanapänanpaj imayca sasacunapa pasaptinpis. Noganchipis Sansón rurashganno Jehovapa yanapacuyninta ashishwan. Achca watapana Jehovata sirvir imaycata rurayta mayna musyaycarpis jinala paypa yanapacuynintaraj ashishwan. Chaynopa ima rurashganchicunapis ali yargunga y quiquinchi yachashganchilamanga ama yäracuycäshunchu. Jehová camaripashgan yacuta upuptinrämi Sansonpa calpanga yurirgan. Chaynolami ali yäracoj runa cashun Jehovapa tucuy yanapacuynincunata ashiptinchiraj (Mat. 11:28). w23.09 4 parr. 8-10

Imaraj canman pilapis Jehovapita lutancunata parlaptin o Biblia yachachicushgancunapita burlacuptin. Chayno captenga, mana rabiacuylapa parlapänapaj Jehovata ruwacushun espíritu santunta gomananchipaj. ¿Y imataraj rurashwan yapaycho más shumajraj parlapänapaj cashganta cuentata gocurga? Jehovata yapay ruwacushun y shumaj yarpachacushwan yapaycho imata ninapaj. Chayno ruraptinchega, Jehová espiritunwan yanapämäshun mana rabiacuylapa pilatapis ali shimilapa parlapänapaj. Bibliapita waquin textucunata umachicurcuptinchega yanapämashwanmi imapis sasaman ticracuriptin ali shimilapa parlananchipaj. Diospa espiritunga yarpächimäshunmi leishganchi textucunata (Juan 14:26). Proverbios librucho achca consejucuna caycan yanapämänanchipaj piwanpis jaucala goyäcunapaj (Prov. 15:18). Jinamanpis tantiachimanchi chay consejucunata cäsucurga ima alicunata tarinanchipaj (Prov. 10:19; 17:27; 21:23; 25:15). w23.09 15 parr. 6-7

Apóstol Pedruga achca watacunapa Jehovata sirvirgan, Jesustapis yanagargan runacunata yachachicur, mana judío caj runacunatapis predicayta galaycurgan y chay wichan cristianucunata Pushajcunano yanapacurgan. Ichiclana pishiycaptin wanunanpaj 62 y 64 watacuna wichan Jehovapa yanapacuyninwan ishcay cartacunata cristiano masincunata cartacamurgan, 1 y 2 Pedro nishgan (2 Ped. 1:13-15). Pedro cartancunata escribimushgan wichan cristianucunaga tucuy pruebacunaraycu alapa nacarcaycargan (1 Ped. 1:6). Chay wichan congregaciuncho waquin fiyu runacunaga lutancunata yachachicur galaycärergan y waquincunata pantachiyta munargan juchata rurar cawapäcunanpaj (2 Ped. 2:1, 2, 14). Jerusalencho tiyaj cristianucunapis ichiclacho ricanman cargan Jerusalén marca y templuntapis Romapita soldaducuna ushacächishganta (1 Ped. 4:7). Chaymi Pedro cartacamushganga, chay wichan cristianucunata yanapargan pruebacunata aguantananpaj y shamoj watacunapaj camaricushgala carcaycänanpaj. w23.09 26 parr. 1, 2

Jesusno, noganchipis öraga sasacunapa pasar-rämi yachacunchi cäsucoj canapaj. ¿Yarpanquichu COVID-19 gueshya galaycuptin pushaj hermanunchicuna nimashganchita Saluncho manana juntacänapaj y wasin wasinpis manana predicanapaj? ¿Sasachu cashga cäsucunayquipaj? Imano captinpis, cäsucoj cashpayqui hermanucunapita raquicäcushcanquichu y Jehovatapis cushichishcanqui. Chaymi cananga camaricushgana caycanchi jatun nacay galaycuptin ima wilacuycunatapis cäsucunapaj. Cäsucoj cashganchimi salvamäshunpis (Job 36:11). Imapitapis masga Jehovata cäsucushwan Payta cuyashganchiraycu y cushichiyta munarpis (1 Juan 5:3). Jehová noganchiraycu lapan rurashgantaga imaypis pagayta puedishunchu (Sal. 116:12). Ichanga, maquinchichomi caycan Jehovata y autoridäcunatapis cäsucunapaj. Chayta rurarga tantiacoj runami cashun y Jehovapa shonguntapis cushichishun (Prov. 27:11). w23.10 11 parr. 18, 19

Juc ángel parlapäshuptiquega, ¿cäsupanquimanchuraj? ‘Au’ niptiquega, chauraga canan wichan juc ángel cayno nimashganchita cäsucunquiman, payga nin: “¡Tayta Diosta mantsakur payta alabapäkuy! [...] ¡Jana patsata, kay patsata, lamarta y pashtaq yakukunatapis kamaq Tayta Diosta adorapäkuy!” (Apoc. 14:6, 7). Lapanchimi Jehovata adurananchi, paylami rasunpa caj Diosmi. Jehovapa templun nirajcho aduraycashganchega, ¡cushicuypämi! Jehovapa templun nirajcho aduraycashganchi Biblia niptenga, manami parlaycämunchu juc wasicho ni juc templuchoraj payta aduranapaj cashganpita. Sinoga parlaycämun Jesuspa wanuyninwan imataj Jehová camacächishganpita pay munashganno aduranapaj. Punta caj cristianucunata apóstol Pablo chaypita shumaj tantiachicamurgan. Chaytaga tarinchi Judeacho caycaj hebreo cristianucunata cartacamushgancho. w23.10 24 parr. 1, 2

522 watacho chiquejnincunaga judiucunata michäcurgan Jehovapaj templuta mana sharcachinanpaj. Pero Zacariasga judiucunata yarpächergan Jehovapa espiritunwan paycuna chay templuta imanopapis sharcachinanpaj. Y chaynomi cargan, 520 watacho rey Dariuga judiucunata mandargan templuta sharcachipäcunanpaj, hasta guellaytapis gorganmi. Jina waquin marcacunapa autoridänincunatapis mandargan yanapänanpaj (Esd. 6:1, 6-10). Jehovaga sirvejnincunata aunirgan paycunawan caycänanpaj calpachacäriptin templuta sharcachinanpaj (Ageo 1:8, 13, 14; Zac. 1:3, 16). Chayta wiyaycur judiucunaga yapay ganas ganaswan 520 watacho templuta sharcachiyta galaycurgan, y pichga watacunalacho ushargan. Imayca sasacunapa pasarpis Diospa voluntäninta puntaman churapäcushganpita, Jehovaga lapan necesitashgancunata camaripargan. Jina yanaparganpis cushi cushila sirvinanpaj (Esd. 6:14-16, 22). w23.11 15 parr. 6, 7

Achca runacuna Abrahanpita wiyashga captinpis, manami shumajga payta reguinchu. Noganchimi ichanga ali reguinchi pay pï cashganta. Bibliaga nin “yäracoj cajcunapaga Abraham papäninno caycan” (Rom. 4:11). Chaymi Abrahanpita yachacur capaz öraga cayno tapucunchi: ‘¿Nogapis Abrahanno ali yäracoj runa cämanchuraj?’ nir. Au, lapanchi puedishwanmi. Abrahanno ali yäracoj runa cananchipäga paypitarämi yachacunanchi. Payga Diosman alapa yäracur imaypis cäsucurgan, marcanta jaguirgan, carpacunacho achca watacunapa cawargan y churin Isaactapis sacrificiutano goycunanpaj listo caycargan. Chaymi yäracushganraycu y alicunata rurashganraycu Jehová ali nawilanwan ricargan y amigunmanpis ticrargan (Sant. 2:22, 23). Jehovaga munan noganchipis ricaynincho ali caycänapaj y ali amigunmanpis ticranapaj. Chaymi Pabluta y Santiagutapis guelgachimurgan Abrahanpita. w23.12 2 parr. 1, 2

Jipashcuna, shumaj parlapacuyta yachacuy. Chaytaga lapan cristianucuna yachacunmanmi. Jana textucho, Santiaguga shumaj consejuta gomanchi. Pipis parlapaycäshuptiqui atentula wiyaptiquega ricächicuycanqui payman yarpachacushgayquita (1 Ped. 3:8). Y imalatapis nishushgayquita shumaj mana tantiarga respetuwan tapupay. Nircur manaraj contestar shumaj yarpachacuyraj imata ninayquipaj (Prov. 15:28). Tapucuy: “¿Ninäpaj cajga rasunpachuraj caycan? ¿Shacyächingachuraj? ¿Respetuwanchuraj niycä? ¿Cuyacuywanchuraj parlaycä?”. Yarpachacuy pogushga cristianacuna imano parlapacushganman y paycunapita yachacuy (Prov. 31:26). Ricay imata parlashganta y imano nishgantapis. Nircur cutin cutin chaynola gampis parlapacuy, chayta rurarga waquincunawan más shumaj apanacunqui. w23.12 21 parr. 12

Canan wichan Taytalanchi Jehová yanapämashwan familianchicunawan, amigunchicunawan y ancianucunawanpis. Ichanga laquishga caycar, öraga japalanchipis cacuyta munashwanchi. Chayno captenga ama laquicuychu. Chauraga, ¿imataj rurashwan Jehovapa yanapacuyninta chasquinapaj? Waquincunapita raquicäshunchu. Waquincunapita raquicäcurga, quiquinchipa problemanchilaman yarpachacuycanchi. Chayta rurarga mana alitapis decidishwanchi. Ima desgraciapapis pasarga, öraga japalanchi cacuyta munashwanchi. Ichanga, pilapis yanapämänanchita mana munarga, Jehovapa yanapacuynintachi chasquiycashwanchu. Chauraga familianchicunapa, amigunchicunapa y ancianucunapa yanapacuyninta chasquicushun. Chay yanapacuycunata chasquirga Jehovapa yanapacuynintami chasquiycanchi (Prov. 17:17; Is. 32:1, 2). w24.01 24 parr. 12, 13

Nazareucuna Diosta aunishganraycu ajchantapis rutupäcojchu. Chayta rurarmi Jehovapa autoridäninta respetaycargan. Pero israelitacuna mana alicunata rurashgan wichancho, pipis nazareucunata respetapäcojchu ni valurajchu. Öraga sasachi cargan waquincunapita jucnomi cananpaj, chaypäga valurcharcurganrächi (Amós 2:12). Noganchipis Jehovata cäsucuptinchimi runacuna cuentata gocärin paycunano mana cashganchita. Chaymi escuelachopis, trabajuchopis o maycho caycaptinchipis, valurcharcunanchirämi waquincuna Jehovapa testiguncunano reguimänanchipaj. Pero musyanchimi cay munducho runacuna más mana alicunaman chayananpaj, y öraga más sasami canga Jehová munashganno cawacunapaj y Diospa Gobiernunpita ali wilacuynincunatapis runacunata yachachicunapaj (2 Tim. 1:8; 3:13). Chayno captenga cayta ama gongashunchu: Diosta mana cäsucoj runacunano mana canapaj calpachacuptinchega, Jehovapa shonguntami cushichinchi (Prov. 27:11; Mal. 3:18). w24.02 16 parr. 7; 17 parr. 9

Romacho caycaj congregaciunchoga, may chaypita tucuy clase runacuna congregaciuncho caycargan. Waquincuna Judío car Moisesta goshgan Ley nishgannomi ashmashga cargan. Waquincunana juc naciuncunapita car costumbrincunapis jucnomi cargan. Capaz juccunaga esclavo capäcurgan, y juccuna mana. ¿Imataraj paycunata yanapaycushga jucnin jucnin masraj cuyanacärinanpaj? Apóstol Pablo paycunata nergan: “Yärakuq mayintsikunawan kuyanakushun”. Chauraga, chay cristianucunaga cristiano masincunata cuyacuywanmi chasquicärinman cargan. Juc cuticho, Filemonpa ashmaynin Onésimo gueshpicur aywacushga cargan. Chaymi Pabluga Filemonta nergan: ‘Noqata chaskimashqaykino paytapis chaskiykulay’ (Filem. 17). Priscilawan Áquila más unayna cristianucuna caycaptinpis, Apolusta ali chasquicur yanaparganmi (Hech. 18:26). Cay lapan cristianucuna tucuy costumbricunayoj o juc marcapita caycaptinpis, ali chasquinacärergan y juc shongunola capäcurgan. w23.07 6 parr. 13

Pipis Jehovalata sirvinanpaj aunicuyta munarga, payta cuyashganpitami canman. Chay cuyacuyga manami jinaylapitachu yurimun, sinoga Jehová imano cashganta ichic ichiclapa yachacur payta masraj cuyar galaycunchi y shumaj tantiashganchipis munaynin ima cashganta (Col. 1:9). Bibliapita shumaj yachacurga ali tantianchi 1) Jehová rasunpa cashganta, 2) Biblia paypita shamushganta y 3) marcanpis caycashganta voluntäninta rurananpaj. Pipis Jehovata sirvinanpaj aunicuyta munarga, Bibliapa más alinnin caj yachachicuycunata tantianman, Diospa mandätuncunata mayna cäsucuycanman y puedishganmanno creenciancunatapis waquincunata parlapaycanman (Mat. 28:19, 20). Jina Jehovata amatar cuyar, lapan shongunwanmi paylata aduraytapis munanmanmi. ¿Gamga chaynochu ricacunqui? w24.03 4, 5 parr. 6-8

Abigailga casaracushga caycargan Nabalwan, chay runaga mana tantiacoj y fiyumi cargan (1 Sam. 25:3). Abigailpäga sasachi cargan chayno runawan ali tiyananpaj. Chaymi munarga jaguirirchi aywacunman cargan. Juc cuticho, Nabalta y ashmaynincunatapis David wanuchiyta munargan mana ali tratashganpita (1 Sam. 25:9-13). Chayta musyar Abigailga gueshpicunman cargan David runanta wanuchinanpaj. Pero chaypa trucan Davidta ruwacurgan runanpa juchanta perdunananpaj (1 Sam. 25:23-27). ¿Imanirtaj chayta rurargan? Abigailga Jehovata cuyajmi. Chaymi matrimoniupita o casado vidapita Jehová ima nishganta respetargan. Payga shumaj tantiargan Jehová matrimoniuta juc ratulapaj mana camacächishganta. Chaymi Jehovata cushichiyta munar runanta y wasincho caycajcunatapis salvargan. w24.03 16, 17 parr. 9, 10

¿Reguinquichu pilapis congregaciunniquicho Jehovata masraj sirvinanraycu cawaynincho cambiucunata rurashganta? ¿Musyanquichu juc joven escuelancho calpachacuycashganta estudiaj masincunapita jucnomi cananpaj sasa captinpis? ¿Yarpanquichu pilapis Jehovata sirvinanraycu familiancuna contrancho churacashganta? Chaymi imaypis calpachacushun paycunata shacyächinapaj valiente capäcushganpita Jehovata puntaman churananpaj y nirishwanpis alapa cuyashganchita (Filem. 4, 5, 7). Jehovaga musyanmi shongupita cäsucuyta munashganchita y payta sirvinapaj aunishganchita cumplinapaj imaycata rurashganchitapis. Jina jaguimanchi payta cuyashganchiraycu imaycacunata ruranapaj (Prov. 23:15, 16). Chaymi Jehovata sirviycäshunla y noganchipita más ali cajta goycushwan. w24.02 18 parr. 14; 19 parr. 16

Ricärishun 29 caj wata ushanancho ima pasashganta. Jesusga Taytanpita yachachicur galaycushga cargan. Payga mamanwan Caná marcacho juc runa majachacar fiestata rurashganman aywapäcurgan. Mariaga yanapänanpächi aywargan. Ichanga vinuga jucla ushacashganpita, Mariaga Jesús cajman jucla aywar “vïnu ushakäkushqanami” nin (Juan 2:1-3). Chayta wiyar Jesusga yacuta alinnin caj vinuman ticrachin (Juan 2:9, 10). Jesusga Papäninpa voluntäninta rurar, achca milagrucunata rurashga. Poderninwan chaychicaj runacunata yanapargan. Juc cuticho 5.000 olgucunata micuyta garargan, y yapaychopis 4.000 olgucunata. Ichanga chaycho caycaj warmicunata y wamracunatapis yupaptinchega 27.000 runacunapitapis mastaraj chay ishcay milagrucunawan micuyta garargan (Mat. 14:15-21; 15:32-38). Jina gueshyaycajcunatapis alchacächergan (Mat. 14:14; 15:30, 31). w23.04 2 parr. 1, 2

Ima desgraciapa pasarga, laquishga y calpaynajpis sienticushwanmi. Chayno öraga ricacushwan unayno imatapis rurayta mana puedirga, y Elías profetanopis punuylatachi munashwan (1 Rey. 19:5-7). Capaz noganchipis jucpa yanapacuynintaraj necesitanchi Jehovata mana uticaypa sirviycänapaj. Y Jehová aunimanchi yanapämänanchipaj, cay junajpaj acrashgan texto nishganno. Rey David chiquejnincuna gaticachaptin imayca sasacunapa pasaycashgancho, ricargan Jehovapa yanapacuyninta, chaymi payga cayno nergan: “Alawqa kaq makikiwanmi tsararämashqanki” (Sal. 18:35). Öraga Jehová pilawanpis yanapaycalämashwanmi. Juc cuticho Davidpis laquishga calpaynaj ricacurgan, ichanga amigun Jonatán aywargan shacyächinanpaj (1 Sam. 23:16, 17). Eliastana, profeta Eliseuwan Jehová yanapargan (1 Rey. 19:16, 21; 2 Rey. 2:2). w24.01 23, 24 parr. 10-12

Tantiacoj warmipita parlar Proverbios 9 caj capitulucho nin “uywakunata pishtarkur ali alilata yanukurqan” y “ali vïnuta rurarkur [...] mësaman sirvirqan” (Prov. 9:2). Nircur, mana yarpachacojcunata cayno nin: “Yanukushqä mikuyta mikunaykipaq” shapäcamuy. Cayga yarpächimanchi Jehová alapa ali car imayca alicunata gomashganchita. Chaymi cäsucunanchi chay warmi nishganta. Payga munaycunmi yachaj y ali cananchita. “Pay munashqanno kawaqkunataqa imapitapis tsapanmi” (Prov. 2:7). Chauraga Jehovata manchacurga alicunata rurashun, consejuncunata imaypis cäsucushun, chaynoparaj cushishga cawacushun (Sant. 1:25). w23.06 23 parr. 14, 15

Jehovata sirvishganchicho lapan munashganchita rurayta mana puedirpis, Jehovaga cushicunmi puedishganchilata shongupita ruraptinchi. ¿Imanotaj chayta musyanchi? Jehovaga Zacariasta nergan Babiloniacho caycaj judiucuna apachicamushgan guellaywan y goriwanpis juc coronata rurananpaj (Zac. 6:11). Nircur chay coronata templucho churargan waquincuna yarpapäcunanpaj Babiloniacho caycaj judiucuna garacoj cashganta (Zac. 6:14). Chaymi seguro caycanchi sasacunapa pasarpis lapan puedishganchimanno sirviptinchega, Jehová manami imaypis gongangachu (Heb. 6:10). Cay ushanan tiempuchoga imayca nacaycunapa pasashun y cawayninchipis más sasamanraj ticranga (2 Tim. 3:1, 13). Pero chayman yarpachacurga ama manchacushwanchu. Profeta Ageupa tiempuncho Jehová sirvejnincunata nishganman yarpäshun, cayno nergan: “Qamkunawan kaykaptïqa ama mantsakäriytsu” (Ageo 2:4, 5). Noganchipis musyanchimi Jehovapa voluntäninta más puntaman churaptinchega pay noganchiwan caycangapaj. w23.11 19 parr. 20, 21

Jehová munargan apóstol Pedro imacunacho pantashgancunata Palabrancho manami churanmanchu cargan, ichanga chaycho caycan noganchi yachacunanchipaj (2 Tim. 3:16, 17). Pedro noganchino pantaj y sentimientuyoj runa cashganpita yachacurga, cuentata gocunchi Jehovaga manami shuyaranchu sirvejnincuna juchaynaj runacuna cananchita. Payga shuyaran imalachopis pantarcuptinchi guepaman mana cutinapaj, sinoga jinala sirviycänapaj. Öraga achca watacunapana juchaman mana ishquishga carpis, capaz ilajpita juchasapa cashganchiraycu imalachopis pantarcushwanmi. Chayno captenga, guepaman ama cutishunchu. Taytalanchi Jehovaga listo caycan yanapämänanchipaj (1 Ped. 5:10). Achca cuticunacho pantarcuptinpis Jesusga Pedruwan cuyapäcoj cargan, chayga noganchitapis yanapämäshun Jehovata sirviycarla caycänapaj. w23.09 20, 21 parr. 2, 3

Canan junajpaj texto nishganno Jesusga Lazaruta alchacächinman cargan, ichanga payga yarpaycargan más jatun rurayta rurananpaj. Chaymi Martata Jesús nergan: “Turiquega cawarimongami”. Nircur nerganpis: “Nogami cä cawachej, yapay cawarachimojpis” (Juan 11:23, 25). Aumi, Diosga Jesusta poderta goshga wanushgacunata cawarachimunanpaj. Chaycamaga mayna juc warmi wamra wanushganpita ichic pasariptinla cawarachimushga cargan y juc mozutapis cawarachimurgan wanushgan junajlacho (Luc. 7:11-15; 8:49-55). Pero, ¿rasunpachuraj cawarachimunman cargan pipis chuscu junajna wanushga caycar asiaytana galaycushga captin? Lazarupa juc caj paninpis María Jesusman witiycur cayno nergan: “Tayta, gam caycho captiquega turë manami wañunmanchu caran” (Juan 11:32). Mariata y juccunatapis wagaycajta ricar Jesuspis alapa laquicun. Y amiguncunata cuyapashpan paypis wagar galaycun. Jesusga musyanmi alapa laquicuypaj cashganta pipis wanuptin, chaymi maquincho caycajta rurayta munan amiguncuna manana laquicunanpaj. w23.04 10, 11 parr. 12, 13