Febrero

Rey Ezequías pasaypa gueshyaycaptin Jehovata ruwacurgan aliyächinanpaj, y payga aliyarcurganmi (2 Rey. 20:1-6). Apóstol Pabluna mañacurgan cuerpuncho casha japuy gueshyanpita librananpaj, ichanga Jehovaga manami aliyächirganchu (2 Cor. 12:7-9). Santiago y Pedro apostulcunata rey Herodes wanuchiyta munargan. Santiagutaga wanurachergan, ichanga Pedrutaga Jehová salvargan juc milagruwan (Hech. 12:1-11). Chaura tapucunquichi: ¿Imanirtaj Pedrutaga Jehová salvargan y Santiagutaga mana? Biblia chaypita mana wilacuptinpis musyanchimi ishcancunata Jehová alapa cuyashganta. Payga “imaykatapis alilatami ruran” (Deut. 32:4). Capaz öraga munashganchino Jehová contestamäshunchu, chayno captinpis manami ajayashwanchu. Payga amatar cuyamanchi y imaypis alilata ruran (Job 33:13). w23.11 21 parr. 6

Profeta Isaías Jehovata cuyar jana texto nishganta nergan. Noganchipis imaypis camaricushgala caycashwan Jehová churashgan autoridäyoj cajcunata cäsucunapaj, y chaytaga lapan voluntäninchiwan rurashwan. Ichanga autoridäcuna nimashganchicuna Jehovapa contrancho captenga, manami cäsucunanchichu (Hech. 4:18-20). Jehová lapan mandamashganchicunaga ali cananchipämi caycan, chaymi imaypis payta cäsucuyta munanchi (Sal. 19:7). Ichanga runacuna cutin cutin pantarcuptin sasami canman cäsucunapaj. Chayno captinpis Jehovaga munan tayta mamacunata, autoridäcunata y congregaciuncho pushajcunata cäsucunanchipaj (Prov. 6:20; 1 Tes. 5:12; 1 Ped. 2:13, 14). Paycunata cäsucuptinchega quiquin Jehovatami cäsucuycanchi. w23.10 6 parr. 2, 3

Jehová alapa poderyoj cashganman yarpachacuptinchipis yäracuyninchita sinchiyächinchi. Pay poderyoj captinmi lapan aunishgancunata cumplin. Aumi, Lapanta Puedej cashpan munashgancunata ruran (Job 42:2; Mar. 10:27; Efe. 3:20). Abrahantawan Sarata aunirgan juc wamrata tarinanpaj, ishcancuna edayashgana captinpis (Gén. 17:15-17). Jina Abrahanta aunirgan miraynincuna Canaán marcacho tiyananpaj. Ichanga Abrahanpa miraynin israelitacunaga achca watacunapami Egiptucho esclavuno carcaycargan, chaychi israelitacuna yarpapäcurgan Jehová Abrahanta aunishgan rasunpa mana cumplicunanpaj. Ichanga Jehová aunishgantaga imaypis cumplinmi. Mariatapis aunirgan Wamranta gueshyapacunanpaj. Chaynopa cumplicunan cargan Edén huertacho achca guepa watacunacho aunishganta (Gén. 3:15). Jehová poderyoj cashganta ricanchi lapan aunishgancunata imano cumplishganpita yachacur. Chayga yanapämanchi masraj yäracunapaj rasunpa mushoj Pachata apamunanpaj cajta (Jos. 23:14; Is. 55:10, 11). w23.04 28 parr. 10-12

David mañacushgantaga Jehová contestarganmi (1 Sam. 19:10, 18-20; 2 Sam. 5:17-25). Noganchipis seguro caycashwan contestamänanchipaj (Sal. 145:18). Öraga lapan mañacushganchita munashganchino Jehová contestaycalämäshunchu. Juc cuticho apóstol Pablo quimsa cuti Diosta ruwacurgan nacaycashganpita librananpaj. Cuerpunchoshi casha caycajno ‘fiyupa nacaycargan’. ¿Wiyarganchu Jehová chayno Pablo mañacushganta? Aumi, ichanga chay nacaypita librananpa trucanga, calpatami gorgan aguantananpaj (2 Cor. 12:7-10). Mayraj noganchipis cutin cutin Diosta mañacunchi. Pero Taytalanchi Jehovami musyan imano yanapaycalämänanchipaj. Payga “mañacushanchïpitapis, yarpashanchïpitapis masta yanapämanchi” (Efes. 3:20). Chauraga yäracuycäshunla, payga imay horapis imanopapis contestamäshunmi. w23.05 8, 9 parr. 4-6

Alapa alimi caycan yarpachacunapaj wanushgacuna cawarimunanpaj cajman. ¿Imanir? Manami musyanchichu wara imata pasananpaj. Capaz öraga ilajpita gueshyashwanpis o maygan castanchicunapis wanurinmanmi (Ecl. 9:11; Sant. 4:13, 14). Wanushgacuna rasunpa cawarimunanpaj cajman yäracurga yanapämäshun chaycunata aguantanapaj (1 Tes. 4:13). Bibliachoga claro nimanchi Taytalanchi Jehová alapa reguimashganchita y amatar cuyamashganchitapis (Luc. 12:7). Jehová shumaj reguimashganchiraycu wanuptinchipis canan cashganchino cawarachimäshun y ima rurashganchicunatapis yarpächimäshun. Alapa cuyamashpanchimi aunimanchi imaycamapis cawanapaj. Aumi, wanuptinchipis cawarichimänanchipaj nimanchi. ¿Imanirtaj chayman yäracushwan? Musyanchimi Jehová alapa poderyoj cashganta y aunimashganchita cumplinanpaj munashganta. w23.04 8, 9 parr. 2-4

Josewan Mariaga ali yanapänacurmi cawapäcoj Diosta sirvipäcunanpaj. Chayta imapis michänanta permitipäcurganchu (Luc. 2:22-24; 4:16). ¡Canan wichan matrimoniucunaga imaycata yachacunanpaj caycan Josepitawan Mariapita! Wamrayoj captiquega, öraga sasarächi caycan reuniuncunaman aywanayquipaj, o familiayquiwan juntacur Diosta adurapäcunayquipaj. Jinamanpis wasicho imaycata ruranapaj caycaptenga, sasarächi caycan ishcalayquicuna juntacaycur Diospita yachacärinayquipaj. Ichanga cayta gongapäcuychu: ishcayqui Jehovata cuyapäcunayquipaj calpachacäriptiquega, gamcunapis masrämi cuyanacärinqui. Diosta adurashganchimi imapitapis más puntacho caycan. Matrimoniuyquicho problemacuna yurir galaycuptenga capaz ganasniquilapis cannachu familiayquiwan juntacarcur Diosta adurapäcunayquipaj. Chayno captinpis alichi canman imalapitapis cushi cushila parlapacäriptiqui. Diospita yachacuytaga imaypis jaguipäcunquimanchu. Ima problemacunapis manami raquichimashwanchu Taytalanchi Jehovapita. w23.05 22 parr. 7, 8

Abdías alita ruraj y yäracuypaj runa captin, reypa palaciuncho capuralninno o palaciuta ricajno yanapacurgan (Nehemías 7:2 textuwan tincuchiy). Chay wichan Jehovata sirvinapaj alapa sasa caycaptinpis, payga ruraynincunawan musyachicurgan valiente runa cashganta. ¿Imanirtaj chayta ninchi? Chay wichan Israelcho rey Acab caycargan (1 Rey. 16:30). Y mana chaylachu, Acabpa warminga Jezabelmi cargan, payga Baaltami aduraj. Jehovata fiyupa chiquishpan, achca profetancunata wanurachergan y Israelcho rasunpa caj aduraciunta ushacächiyta munargan (1 Rey. 18:4). Jezabelga Diospa profetancunata wanuchinanpaj gaticachar galaycuptin, Abdiasga “pachak (100) profëtakunata ishkay machayman pitsqa chunka kama (50) pakaykurmi mikuyta y yakutapis” garargan (1 Rey. 18:13, 14). Chaynomi ricanchi pay valiente cashganta. Jezabelga wanuchinmanmi cargan imata ruraycashganta musyaycurga. Pay wanucuyta manami munarganchu. Chayno captinpis ‘Jehovata y yäracoj masëcunata alapa cuyashgäta ricächicur wanurpis wanushächari’ nir valurcharcurgan paycunata pacaycunanpaj. w23.06 16 parr. 9, 10

Unay rurashganno, canan wichanpis Jehovaga Palabran Bibliawan y wamranwanpis marcanta pushaycan, Jesusga congregaciunpa umanmi caycan. ¿Ima pruebalapis caycanchuraj Jehová marcanta pushananpaj runacunata acrashganta? Aumi, ricärishun 1870 wata wichan ima pasashganta. Charles Russell y yanapajnincunaga shumaj tantiapäcurgan 1914 watacho Jesús mandacamur galaycamunanpaj Diospa Gobiernuncho (Dan. 4:25, 26). Chayta shumaj tantiapäcurgan Bibliacho caycaj profeciacunata ali yachacushganpita. Pero chay lapanpita guepancho Jehová caycargan. 1914 watacho Punta caj Jatun Guerra galaycurgan, muchuypis, terremotupis y peste gueshyacunapis cargan. Chayga ricächicurgan Diospa Gobiernun mandacur galaycushgantana (Luc. 21:10, 11). Chauraga claro ricacämurgan Jehová ali shonguyoj runacunata acrashganta marcanta pushananpaj. w24.02 22 parr. 11

Jehovapa sirvejnincunaga musyanchimi Pay cuyamashganchita y noganchipaj yarpachacushgantapis (Rom. 8:35-39). Jina cuentatapis gocunchi Jehovapa mandamientuncunata cäsucuptinchega bienninchipämi cashganta (Is. 48:17, 18). Ichanga ¿imaraj canman imaylapis mana yarpashganchi problemacunapa pasaptinchi? Öraga maygan castanchipis imalatapis ruraptin o niptin laquichimanchimi. O ima gueshyaraycurpis munashganchino Jehovata sirviyta puedinchichu. Jina fiyu desgraciacunaraycurpis nacanchimi, o creencianchicunaraycurpis chiquishga canchi. Chaycunapa pasarga, öraga caynochi tapucushwan: “¿Imanirtaj cayga nogata pasaycäman? ¿Imalachopis juchalicushgächuraj? ¿Jehová manana bendiciycämanchuraj?”. Gampis imaylapis chayno ricacushga carga, ama guelanacuychu. Jehovapa waquin cäsucoj sirvejnincunapis chayno ricacushga (Sal. 22:1, 2; Hab. 1:2, 3). w23.04 14 parr. 1, 2

Jehovata mana laquichiyta munarga cuidacunanchi imaman yarpashganchicuna y rurashganchicunatapis; ilajpita mana ali yarpaycuna chayamuptenga jucla ilgächishwan. Lapan shongunchiwan payta cäsucunapaj Jehová munan (Rom. 6:17). Leynincunaga bienninchipämi caycan, chaymi juc ishcaylataga cäsucushwanchu, sinoga lapantami cäsucunanchi (Is. 48:17, 18; 1 Cor. 6:9, 10). Satanasga munan Jehovawan manana amigo cananchipaj, chaymi tucuynopa nacachimanchi; payga yargashga liunno puricachaycan (1 Ped. 5:8). Unaychopis cristianucunata chiquicoj runacuna jurapayparaj magargan y wanucherganpis (Hech. 5:27, 28, 40; 7:54-60). Canan wichanpis Rusiacho y may chay naciuncunacho caycaj hermanunchicunata chiquicoj runacuna pasaypa nacarcaycächin, y chay lapanpita guepanchoga Satanás caycan. Jinamanpis Efesios 6:11 textucho tantiachimanchi mana ricacaj trampacunawan Satanás engañamänanchita munashganta. w23.07 15, 16 parr. 6-9

Bibliapita más yachacuptiquega Jehovata masraj cuyanqui, y payta cushichiyta munar lapan yachacushgayquimanno cawacunayquipaj calpachacunqui. Jina Bibliapa tantiachicuycunata yachacur ali decisiuncunatapis acranqui. Nircur Dios munashganno yarpayta y ruraytapis galaycunqui. Juc wamra taytanpita yachacushganno, gampis Tayta Dios cuyashgan ruraycunata ruranayquipaj calpachacunqui (Efe. 5:1, 2). Cayno tapucushwan: “¿Bautizacushgäpita masrächu canan Jehovata cuyä? ¿Jehová cashganno nogapis yarpä y rurä? ¿Congregaciuncho caycaj hermanucunata Jehová cuyashgannochu cuyä?”. Chaycunata ‘mana’ niptinchega ama laquicushunchu. Chaytami punta caj cristianucunatapis pasargan. Ichanga Jesús paycunata jinala cuyar yarpächergan imano cuyacuyninta mirachinanpaj (Apoc. 2:4, 7). Chayga noganchitapis yanapämäshun Jehovata masraj cuyanapaj y cristiano masinchicunatapis. w23.07 8 parr. 2, 3

Apóstol Pedruga cutin cutin pantaycurgan. Payga ali tucur nergan waquin apostulcuna Jesusta cachariptinpis pay mana cachaycunanpaj cajta (Mar. 14:27-29). Nircur, cutin cutin punucashga quedacurgan (Mar. 14:32, 37-41). Y Jesusta chiquejnincuna charircuptinna, Pedro gueshpir aywacurgan (Mar. 14:50). Chaypitapis, quimsa cuti Jesusta niegargan mana reguishganta (Mar. 14:66-71). ¿Imanotaj Pedro ricacurgan cuentata gocurir jatun juchacunata rurashganpita? Pasaypa laquicur, wagar galaycurgan (Mar. 14:72). Pero pantashgancunapita juzgananpaj trucan Jesusga amigun Pedruta nergan más cargucunata chasquinanpaj (Juan 21:15-17). Pedruga musyarganmi jatun juchata rurashganta, chayno captinpis valurcharcurganmi alicunata rurananpaj. ¿Imanir? Payga convencido caycargan Jesús payman yäracushganta y yäracoj masincunatapis listo caycashganta yanapänanpaj. Jehovaga munan seguro caycänapaj cuyamashganchita y perdunamashganchitapis (Rom. 8:38, 39). w24.03 18, 19 parr. 13-15

Imapitapis más aliga caycan “mana tantiyakuq” warmi nishganta mana cäsupänapaj. ¿Imanir? Pipis jucwan jucwan cacäriptin o fornicación juchata rurarga, quiquintapis cuyacunchu, gueshyaj ricacunman, familiantapis raquicächinman o pengaymanpis chayanmanmi. Y mana chaylachu, Jehovawan amistänintapis ushacächinman, jina ima gueshyawanpis contagiacur wanuyman chayanman (Prov. 7:23). Chaymi Proverbios capítulo 9 versículo 18 ushanancho nin chay warmi “nishqanta chaskipaqkunaqa manami musyapäkuntsu wanunanpaq kashqanta”. Chauraga, ¿imanirtaj chaychica runacuna chay warmi nishganta chasquipan? (Prov. 9:13-18). Achcajmi fornicación juchaman ishquirgan pornografía nishgan o ganra ruraycunata ricashganpita. Chaycunaga may chaychopis caycan. Pipis chaycunata ricaycur ‘chayga imananpischu’ niptenga quiquintami engañacuycan. Jina juc cutilapis ricaycuptin mastaraj ricayta munanga, yarpaynintapis ganratanga y umanpita chaycunata jorguyta munaptenga alapa sasarämi canga (Col. 3:5; Sant. 1:14, 15). Chaypitapis mana ali munaynincunata ushacächinanpaj trucan ricashgancunata mastaraj rurayta munaycunga. w23.06 23 parr. 10, 11

Capaz öraga waquin naciuncunapis Reino Unido y Estados Unidos naciuncunapa contranman churacayta munanga, ichanga camäpacungachu. Bibliacho caycaj profeciaga nin Diospa Gobiernun chay jatuncaray monumentupa chaquincunata shalurachenga (Dan. 2:34, 35, 44, 45). Daniel wilacushgan profeciata shumaj tantiarcurga cawayninchicho ima acrashganchicunacho ricacämunman. Cay mundo ushacänanpäna cashganta musyar manami yarpachacushwanchu imaycayoj cayta y achca guellayta ashinapäpis (Luc. 12:16-21; 1 Juan 2:15-17). Chaypa trucan cay profeciata ali tantiarcurga calpachacushunmi masraj predicanapaj y waquincunatapis yanaparcunapaj Jesuspa gatirajnincunaman ticrananpaj (Mat. 6:33; 28:18-20). Chaymi ali canman cayno tapucunayquipaj: ¿Ichiclacho Diospa Gobiernun runacunapa gobiernuncunata ushacächinanpaj caycaptenga cawaynëcho chayga ricacämungachuraj? w23.08 11 parr. 13, 14

Humilde cashpayqui yarparay edäniquiraycu, saludniquiraycu lapan munashgayquita rurayta mana puedinayquipaj. Saludniquiraycu ima cargutapis cumplinayquipaj sasa captenga, Barzilaino valurcharcunquiman ‘mana’ ninayquipaj (2 Sam. 19:35, 36). Moisespis humilde cashpan juccunapa yanapacuyninta ashergan, y waquincunata acrargan yanapänanpaj (Éx. 18:21, 22). Humilde captiquega calpachacunquimi puedishgayquicunalata ruranayquipaj, y manami yarparanquichu mana puedinayquipaj cajcunamanga. Cada ununchi ima rurashganchipita canga ali caycänapaj o ima nacaymanpis chayanapaj. Öraga juc wamra Jehovata cachaycuptenga, taytancunapäga shonguncunapis alapa nanaycunrämi. Y chayraycu taytacuna culpayoj ricacuptenga laquesanga alapa lasaj guepino canman. Ichanga Jehovaga manami munanchu pipis chayno ricacunanta. w23.08 29 parr. 11, 12

Sansón noganchino juchasapa runa cashpan pantaycurgan. Jehovapa marcanpa juezninno caycaptin juc cuticho ‘Sorec pampacho taq Dalilata Sansonqa kuyakurkurqan’. Pero Dalilata manaraj reguirmi, juc filistea jipashwan casaracuyta munargan. Y Bibliaga nin chayga cargan ‘filisteo runakunata achäquita ashipänanpaq TAYTA DIOS tsay yarpayta Sansonman churashganpita’. Juc cutichopis, Gaza marcaman aywaycur Sansonga juc wayrapacoj warmipa wasincho pacaräcurgan, pulan pagaschona chay marcata täparaycaj puncuta jorgurir hombrucurcur apacurgan. Chaytaga rurargan filisteo runacunata vencinanpaj (Juec. 14:1-4; 16:1-3). Ichanga Dalilaga israelita warmichi cargan y chayga manami yanapargannachu Sansón filisteo runacunata vencinanpaj. Filisteo runacuna Sansonta preso charipäcuyta munar, Dalilata achca guellayta pagargan traiciunananpaj. w23.09 5 parr. 12, 13

Alapa alimi caycan pipis tantiacoj captenga. Chayno runaga geniunta shumaj controlacun pipis creenciancunapita imaycata tapupar galaycuptin. ¿Manachu carucho caycaj jircacunapaga, puntalan ricacämun? ¿Imanir? Waquin jircacuna chaparaycaptinmi. Chaynolami pipis creencianchicunapita tapupämaptinchega, manami musyanchichu imata munartaj tapupaycämanchi. Chaymi ali canman manaraj contestarga yarpachacunanchiraj imanirtaj tapupaycämanchi (Prov. 16:23). Gedeón pasashganman yarpachacushun. Juc cuticho madianitacunawan peliaj aywananpaj mana wilacushganpita, Efraín tribupita runacuna Gedeonta rabiawan parlapargan. ¿Imanirtaj chayno parlapargan? ¿Ali tucoj runacuna cashganraycurchuraj?, o ¿waquin tribucunapita más importante cashganta yarparchuraj? Imano captinpis Gedeonga tantiacoj runa cashganraycu ali shimilapa contestargan. Chayno parlapaptinmi paycunaga cushicärergan (Juec. 8:1-3). w23.09 16 parr. 8, 9

Cielucho Jehová Jesuswan achca watacunapa caycashganraycu alapa cuyanacärin. Chaymi, Jehovapa shongunpis alapachi nanargan Wamranta runacuna magapäcushganta, burlapäcushganta y ashlipäcushganta ricar. Tayta mamacuna musyapäcunmi wamran wanucuptin pasaypa laquicuypaj cashganta. Wanojcuna cawarimunanpaj cajman yäracurpis, jinalami laquicunchi cuyashga aylunchi wanushganpita. Chaywanga cuentata gocunchi Jehová pasaypa laquicushganta 33 watacho Wamran pasaypa nacashganta y wanushganta ricar (Mat. 3:17). ¿Imatataj ruraycashwan Jesús wanushgan junajta yarpänapaj chayamunancama? Familianchiwan o japalanchi Bibliapita yachacunapaj hora chaypitami yachacushwan, y chay junajpaj videutapis ama gongaychu ricayta. Chay lapancunata rurarga listumi caycäshun waquincunatapis yanapänapaj chay junaj reuniuncho caycänanpaj (Esd. 7:10). w24.01 11 parr. 10-12

Jehová calpanta goycalämänanchipäga paytami mañacunanchi, chayta rurarga Diosninchega poderninwanmi yanapaycalämäshun (2 Cor. 4:7). Jina Bibliata leishganchimanpis yarpachacunanchimi (Sal. 86:11). Jehovapa Palabranga poderyojmi o “munayniyuq kaykan” (Heb. 4:12). Chauraga Jehovata mañacuptiqui y Palabranta leiptiquega, payga calpanwan yanaparcushunqui aguantanayquipaj, cushishgala sirvinayquipaj y ima sasa cargucunatapis cumplinayquipaj. Ricärishun imanomi Jehová Jonasta valurta gorgan. Jehová Jonasta juc carguta gorgan. Ichanga chayta rurananpaj manchacurmi, juc ladupaj aywaj buquiman wicharcur gueshpir aywacurgan. Chayraycu, buquicho caycajcuna casi wanupäcurgan locu tamyawan. Yacu pulchajyar galaycuptin Jonasta lamarman jitarergan y juc jatuncaray pescado ultacurcurgan. Jonás jatuncaray pescadupa pachancho caycar Jehovata mañacurgan valurta goycunanpaj (Jon. 2:1, 2, 7). w23.10 13 parr. 4-6

Apóstol Pedro cartacamushgancuna unay cristianucunapaj captinpis, Jehovaga munargan Palabrancho escribishga o guelgashga quedacunanpaj y chaypitaga noganchipis yachacunchimi (Rom. 15:4). Runacunaga manami yäracärinchu shamoj tiempupaj Biblia wilacushganta. Jehovapa testiguncunaga achca watacunapanami wilacuycanchi cay mundupa ushacaynin chayamunanpaj, chayta wiyar capaz waquin runacunaga burlacur galaycärinman, ‘chayga manami rasunpachu canga’ nipäcunmanpis (2 Ped. 3:3, 4). Pilapis predicaciuncho, trabajunchicho o familianchi chayno nimaptinchega capaz dudarpis galaycushwanchi. Chayno captenga, ¿imaraj yanapämäshun? Ricärishun Pedro nishganta. Waquincunaga ‘imayraj Jehová cay mundupa ushacayninta apamunga’ nir yarpapäcunman. Ichanga Pedruga yarpächimanchi imano Jehová tiempupita yarpashganta, payga manami runacunanochu yarpan (2 Ped. 3:8, 9). Paypäga waranga watacunaga juc junajnolami caycan, jina pacienciacoj cashpan mana munanchu pipis wanunanta. Chaymi yäracunchi cay mundupa ushacaynin rasunpa chayamunanpaj cajta. w23.09 26, 27 parr. 2-5

¿Imapätaj apóstol Pabluga Judeacho caycaj cristianucunata escribirgan? Shacyächinanpächi cargan. Achca judiucuna Moisespa Leynin nishganno winashga carpis cristianuman ticrapäcurgan, y chayraycu pushacoj religiosucuna paycunapita burlapäcojchi. Cristianucunapäga juc templun carganchu, ni sacrificiucunata rupachinanpaj altarpis, ni sacerdoticunapis. Chayraycu pushacoj judiucuna burlacäriptin, cristianucunaga laquicurpis guelanäcunmanchi cargan (Heb. 3:12, 14). Waquincunaga unaycho caycashgan religiunmanpis cutinanpaj yarparganchi. Hebreo cristianucuna Diospa más alinnin yachachicuynincunata tantiarcunanpaj mana calpachacuycashganta ricar, Pabluga nergan: “Pishi wamra mikuyta manaraq yachakur lëchilataraq upuqnömi” caycashganta (Heb. 5:11-14). Waquincunaga Moisespa Leyninta cäsucur caycargan. w23.10 24, 25 parr. 3, 4

Waquin warmicunaga manami casaracunchu marcancho ‘casacuy casacuy’ niycaptinpis (Mat. 19:10-12). Waquincunana shongulanchomi musyan imanir mana casaracunchu. Japalayqui caycarga ama gongaychu Jehovawan Jesús alapa valurashushgayquita. Entero munducho soltera cristianacunaga juc bendiciunmi caycan congregaciuncunapaj. Alapa cuyacoj y waquincunata yanapashgancho ricacan pogushga cristianacuna y mamacunano cashganta (Mar. 10:29, 30). Waquincunaga lapan tiempunwan Jehovata sirvipäcunmi. May chaychopis ricanchi predicaciuncho hermanacuna más yanapacuycashganta (Sal. 68:11). Gampis tiempuyquita camacächinquiman precursorano, localcunata sharcachiycho o Betelchopis yanapacunayquipaj. ¿Imaraj yanapäshunqui chaycunacho yanapacunayquipaj? Jehovata mañacuy, chaycunacho yanapacojcunawan parlacaramuy y musyapäcuy imata pishiycäshunqui calpachacunayquipaj. Nircur mana gonganayquipaj anotarcuy imacunata ruranayquipaj munashgayqui cajta logranayquipaj. Lapan tiempuyquiwan Jehovata sirvinayquipaj acraptiquega, Diospa marcancho imaycacuna canga ruranayquipaj. w23.12 22 parr. 16, 17

Jatun nacayga caylachona caycan, chaymi canan wichan masraj calpachacunanchi runacunata yachachicunapaj. Pero guellayraycu sasacunapa pasaycaptinchi o autoridäcuna michäcuptin predicanapaj, sasami canman Diospa voluntäninta puntaman churanapaj. Chauraga, ¿imaraj yanapämäshun? Yäracushwanmi lapanta mandaj Tayta Diosninchi noganchiwan imaypis caycashganta. Payga yanapämäshunmi calpachacuptinchi Gobiernunta imapitapis más puntaman churanapaj. Chaymi imatapis manchacushunchu (Ageo 2:4). Jehovaga munan imapitapis masga runacunata yachachicunapaj paycunapis salvacärinanpaj. Ageo judiucunata shacyächergan templuta yapay sharcachinanpaj. Chaywanga nergan mana pësacunanpaj unaycho imanir mana rurashganpita, sinoga calpachacunanpämi. Y paycuna cäsucäriptenga Jehová bendicinanpämi aunirgan (Ageo 2:18, 19). Noganchitapis Jehovaga bendicimäshunmi imapitapis masga pay mandamashganchita ruranapaj calpachacuptinchi. w23.11 16 parr. 8; 17 parr. 11

Romacho caycaj cristianucunata apóstol Pablo nergan lapanchi juchasapa cashganchita. Chaura juchasapa captinchega, ¿imanotaj ali nawilanwan Dios ricaycalämanchi? Chaypita maslata tantianapaj apóstol Pabluga Abrahanpita parlargan. Canaán marcacho tiyaycaptinmi Jehová Abrahanta alita ruraj runatano ricargan. ¿Imanirtaj chayno ricargan? Chayga manami carganchu Moisés chasquishgan Leycunata cäsucushganpitachu (Rom. 4:13). Israelitacunaga chay Leycunata chasquirgan Abrahán cawashganpita 400 watacuna pasariptinraj. Chaura Abrahán Diosman yäracur cäsucushganpita Jehovapa ricaynincho alita ruraj runa cargan (Rom. 4:2-4). w23.12 3 parr. 4, 5

Natanga rey Davidwan parlashganpita, chay chacaylacho Jehová Natanta nergan David templuta mana sharcachinanpaj (1 Crón. 17:3, 4, 11, 12). ¿Chayta wiyarga imanotaj David ricacurgan? Paymi guellayta y imaycatapis shuntayta galaycurgan wamran Salomón chay jatun rurayta rurananpaj (1 Crón. 29:1-5). Templuta mana sharcachinanpaj wilachishgana captin, Jehovaga Davidwan juc pactuta rurargan: Jehovaga aunirgan Davidpa juc miraynin imaycamapis gobernananpaj (2 Sam. 7:16). Mushoj Pachacho, Jesús Waranga Watacuna gobernamuptin Davidga alapachi cushicunga chay Rey miraynin cashganta musyar. Cayga yachachimanchi öraga Jehovata sirvishganchicho lapan munashganchicunata rurayta mana puediptinchipis, payga mana yarpashganchi bendiciuncunata gomänanchipaj puedinmi. w23.04 16 parr. 8-10

Manchacushganchi hora, Bibliacho caycaj Job, Salmos y Proverbios librucunata leiptinchega yanapämäshunmi y Mateo 6 caj capitulucho Jesús nishganpis. Aumi, Jehovata mañacuptiqui y Palabranta leiptiqui, Jehová imano shogashushgayquitami ricanqui. Alapa sasacunapa pasarga ama gongashunchu Jehová yanapämashganchita. Payga japalanchitaga imaypis jaguimäshunchu (Sal. 23:4). Yarpäshun, Jehová imapitapis chapämäshun, yarpachacuycarla mana caycänapaj yanapämäshun, chararämäshun y shogamäshunpis. Chaymi Isaías Jehovata cayta nergan: “Qamlaman yärakuqkunataqa ali kawapäkunanpaqmi imaypis yanapanki. Qamlapaq yarparaqkunataqa mana lakikärinanpaqmi imaypis tantiyatsinki” (Is. 26:3). Chauraga Jehovalaman yäracuy y lapan yanapacuynincunata chasquipäcuy. Chaynopa calpatapis tarinquimi cawayniquicho ima desgraciapa pasaptiqui aguantanayquipaj. w24.01 25 parr. 16, 17

Jehová nishganga canan wichan cumplicuycan. Payga caytapis nimanchi: “Kikïmi wamraykikunatapis yachatsishaq. Yanapaptïmi pïmaywanpis ali kawanqa. Reypis munashqänömi mandanqa. Manami pipis nakatsishunkipaqnatsu. Jawka kawarmi pitapis mana mantsakunkipaqnatsu” (Is. 54:13, 14). “Kay patsacho kaykaq dios” Satanás contranchicho imaycata ruraptinpis, manami michamäshunchu runacunata jinala Jehovapita yachachir siguinapaj (2 Cor. 4:4). Rasunpa caj aduraciunga manami imaypis talucashga canganachu. Chiquimajninchicuna contranchicho imaycata ruraptinpis yangalapaj canga. w24.02 4 parr. 10

Noganchipis cristianucunaga calpachacunchimi Jehovata aunishganchita imaypis cumplinapaj. Chayga claro ricacämun cawayninchicho imata decidishganchicunacho y familianchitapis imano ricashganchicho. Imaycata ruranchi familianchicuna ali caycänanpaj, pero imapitapis masga Jehová ima munashgantami más puntaman churanchi (Mat. 10:35, 36; 1 Tim. 5:8). Öraga capaz familianchicuna contranchicho churacanga o chiquimashwanpis Jehovata imanopapis cushichiyta o cäsucuyta munaptinchi. Jehovami lapan familiata camargan, chaymi payga munan lapan familiacuna cushishga cawapäcunanpaj (Efes. 3:14, 15). Pero rasunpa cushishga cawacunapäga Jehová munashgannomi lapanta rurananchi. Payga ricaycanmi y manami gonganchu lapan rurashganchicunata payta sirvinapaj. Jina cushicunmi familianchicunata ali cuidaptinchi, respetuwan y cuyacuywan trataptinchi (Rom. 12:10). w24.02 18 parr. 11, 13