Marzo

Jehová aunishgan mushoj Pacha manaraj chayamuptinpis yarpachacushun goylarcunaman, yöracunaman, uywacunaman y runacunamanpis. Chaycuna imaypis mana cashga captinpis, pipis nieganmanchu rasunpa caycashganta. Canan yäracunchimi quiquin Jehová chaycunata camashganta (Gén. 1:1, 26, 27). Chaura juc mushoj Pachata gomänanchipaj aunimashganchi captenga yäracushwanmi aunishganta rasunpa cumplinanpaj. Chaychoga imaycamapis mana gueshyaypana cawacushun. Chay junaj chayamuptenga canan caycashgancunata rasunpa ricashganchino mushoj Pachapis rasunpami canga (Is. 65:17; Apoc. 21:3, 4). Mushoj Pacha chayamunancama imaycanopapis calpachacushun yäracuyninchita sinchiyächinapaj. Chaypäga Jesuspa wanuyninman y Jehovapa poderninmanpis yarpachacushun, jina Jehovapa voluntäninta rurar caycäshun. Chay lapancunata rurarga “Tayta Diosninchiman yäracur pasensiacogcuna” chasquishganno, noganchipis Jehová aunimashganchita chasquishun (Heb. 6:11, 12). w23.04 31 parr. 18, 19

Jesús cieluta ricärir Taytanta mañacurgan. Payga munan Taytan alabashga cananpaj chaycho rurananpaj caycashganpita. Nircur fuertipa cayno nin: “¡Lázaro, llojshimuy [o yargamuy]!” (Juan 11:43). Y jinan hora Lázaro cawarircamur yargamurgan. Jesús rurashgantaga waquincuna rurayta camäpacojchu cargan. Cay wilacushganga yanapämanchi wanushgacuna cawarimunanpaj masraj yäracunapaj. Yarparcushun Martata Jesús aunishganta, nergan: “Turiquega cawarimongami” (Juan 11:23). Taytannopis Jesusga munaycunmi y maquincho caycan chayta rurananpaj. Jesús wagashganga tantiachimanchi shongupita munaycashganta wanuyta y laquicuytapis ushacächinanpaj. Lazaruta cawarircachimur, Jesús musyachimanchi poderyoj caycashganta wanushgacunata cawarachimunanpaj. Canan junajpaj textucho Jesús Martatapis ima nishganman yarpärishun. Imaycacuna caycan seguro caycänapaj Jehová wanushgacunata rasunpa cawarachimunanpaj cajta. w23.04 11, 12 parr. 15, 16

Jehovapa voluntäninta masraj tantiarga, capaz imalapis mañacushganchipitaga trucachishwan. Ama gongashwanchu, lapan aunicushgantaga cumplirmi Jehová galaycungana. Ushacächinanpäna caycan lapan nacachimashganchicunata, cay Pachacho imayca desgraciacunata, jina wanuytapis. Gobiernunwanmi lapanta ruranga (Dan. 2:44; Apoc. 21:3, 4). Canan wichan ichanga cay munduga Diablupa maquinchoraj caycan (Juan 12:31; Apoc. 12:9). Diablo gobernaycamuptin lapan nacaycunata Jehová ushacächiptenga, pipis ninmanchi ‘Diablo gobernamuptinpis alimi cawacuycanchi’ nir. Chauraga cay munducho ali cawayta Jehová apamunanpaj shuyaraycaptinpis, payga imaypis yanapaycamäshun. w23.05 8 parr. 4; 9, 10 parr. 7, 8

¿Imatataj rurashwan waquincunapis Conmemoraciunman shapäcamunanpaj? Predicaciuncho runacunata invitaciuncunata aypushun, jinamanpis reguishganchicunapa jutincunata invitaciuncho guelgashwan, paycunaga caycanman familianchicuna, aroj masinchicuna, estudiaj masinchicuna y waquincunapis. Invitaciunninchicuna ushacaptenga, jw.org paginanchicho yargamoj invitaciunta ricananpaj nishwan. Capazchi waquin runacuna shapäcamunmanpis (Ecl. 11:6). Pilapis puntata Conmemoraciunman shamuptenga imayca tapucuynincunalapis caycangachi. Chaymi ali canman yarpachacunapaj imano contestanapaj. Y Conmemoración pasariptinna, waquincuna más yachacuytaraj munapäcun. Chauraga imaycanopapis calpachacushun Conmemoración junaj manaraj chayamuptin, chay junajcho y pasashgana captinpis ali shongu runacunata yanapänapaj (Hech. 13:48). w24.01 12 parr. 13, 15; 13 parr. 16

Bibliachoga wilacunmi pusaj runacuna cawarimushganta Pachacho cawacunanpaj. Chaymi alichi canman jucnin jucnincunapita yachacur, caway vidanchipaj ali yachachicuyta ashinapaj, jina yarpachacushun imanotaj tantiachimanchi Jehová rasunpa munaycashganta y maquincho caycashgantapis wanushgacunata cawarachimunanpaj. Chaypitapis masga yarpachacushun Jesús cawarimushganman. Achca runacuna ricapäcurgan Jesús yapay cawaycashganta y chayta musyarpis yäracuyninchita sinchiyächin (1 Cor. 15:3-6, 20-22). Jehovatami agradecicuyculanchi wanushgacuna cawarimunanpaj cajta musyarir. Musyanchimi chayga rasunpa pasananpaj, payga munaycunmi y maquincho caycan rurananpaj. Cada ununchita “cuyashga castayquicuna cawarimungami” nimashganchitano ricacushun. Chaymi jinala yäracuyninchita sinchiyächishun wanushgacuna rasunpa cawarimunanpaj cajman. Chayta ruraptinchega Jehovaman masraj guelicushun, paymi chayta aunimanchi (Juan 11:23). w23.04 8 parr. 2; 12 parr. 17; 13 parr. 20

Pipis humilde captin manami ali tucunchu, ni ‘lapantapis rurayta puedë’ ninchu (Filip. 2:3). Jina humilde cajga pitapis aliman churar respetan. Gedeonga humilde car lapantaraj rurayta manami munarganchu. Juc ángel Gedeonta niptin Jehová acrashganta israelitacunata librananpaj, pay humilde car cayno nergan: “Manasés trïbu runakunacho noqapa aylüqa waktsami kaykan. Tsaynöpis noqaqa alqu wiruqlanpaqpis manami välïtsu” (Juec. 6:15). Gedeonga yarpargan Jehová mandashgantami rurayta mana puedinanpaj. Ichanga Jehovaga musyarganmi yanapacuyninwan Gedeonta lapanpis ali yargunanpaj. Ancianucunaga humilde cashganraycurmi lapantaraj rurayta munapäcunchu (Hech. 20:18, 19). Imatapis rurar ali yarguptin, ‘nogano pipis canchu’ nipäcunchu, jina imalachopis pantarcuptenga ‘imapäpis valëchu’ nirpis yarpachacunchu. w23.06 3 parr. 4, 5

Satanaspa uman nitishga cananpaj 1,000 wata pishinrämi (Apoc. 20:7-10). Chayga manaraj galaycuptenga, puntata Bibliaga nin runacuna nipäcunga “alli goyayllami caycan” nir (1 Tes. 5:2, 3). Chayno nircaycaptinmi, ilajpita Diosta mana cäsucoj runacunaga luta religiuncunata ushacächinga, chaynopa jatun nacay galaycunga (Apoc. 17:16). Nircur Jesús runacunata juzgar galaycuptin cabra nirajcunapita uysha nirajcunata raquinga (Mat. 25:31-33, 46). Satanasna pasaypa rabiashpan Diosta mana cäsucoj runacunaman mana ali yarpayta churanga Diospa sirvejnincunata ushacächinanpaj (Ezeq. 38:2, 10, 11). Chay wichancho cielupaj acrashga cajcuna lapancuna shuntacashga canga Jesuswan peliamunanpaj Armagedón guerracho, chaynopa ushacanga jatun nacay (Mat. 24:31; Apoc. 16:14, 16). Chaypitana Jesusga Waranga Watacunapa gobernayta galaycamunga (Apoc. 20:6). w23.10 20, 21 parr. 9, 10

Canan wichanpis Jehovapa achca sirvejnincuna Testigucunata chiquishgan marcacunacho tiyapäcun. Autoridäcuna camacächishganta cäsucurpis, Abdías rurashganno Taytalanchi Jehovalata adurapäcun (Mat. 22:21). Chaymi jinala Diospita yachachicurcaycan y pacaylapa shuntacan shacyächinacunanpaj. Jina calpachacärin ima publicaciunpis o videucunapis tiempulancho yargunanpaj cristiano masincunapaj (Mat. 10:16, 28). Chaychomi paycunacho ricacämun Jehovata masraj manchacushganta pï runapitapis (Hech. 5:29). Henri hermanunchipita parlarcushun, payga África naciuncho unay Testigucunata chiquishgan marcachoshi tiyargan. Payshi aunirgan hermanucunaman publicaciuncunata apananpaj. Cayno wilacun: “Nogaga pasaypa manchacoj runa cä, pero Jehovaga yanapämargan valurcharcunäpaj”. Gampis lapan shonguyquiwan Jehovata manchacuptiquega valiente canquipaj. w23.06 16 parr. 9, 11

Adanwan Eva juchalicushganpita, Diabluga yarparganchi Jehová munayninta manana cumplinanpaj. Chaura Jehovaga Adantawan Evata ushacächir juc mushoj runata y warmita camaycunman cargan munayninta cumplinanpaj. Pero chayta Jehová ruraptenga, Diablo tumpanman cargan lulacoj cashganta. ¿Imanir? Génesis 1:28 textuchoga Jehová Adantawan Evata aunirgan miraynincuna cay Pachacho junta cananpaj. Jina Satanasga yarparganchi Adanwan Evapa wamrancuna captinpis, paycunaga imaycamapis juchasapala cananpaj (Ecl. 7:20; Rom. 3:23). Chayno captenga, Diabluga Jehovata tumpanman cargan munayninta cumpliyta mana puedishganta. ¿Imanir? Jehovaga munargan Pachacho juchaynaj runacuna junta cananpaj. w23.11 6 parr. 15, 16

Bibliacho niycashganpita yapapaycur-raj mana yachachicunapaj, ni quiquinchi yarpashganchicunata mana ruranapaj, Jehovaga Palabranwan y pushacoj hermanucunawanpis shumaj tantiachimanchi imacunata ruranapaj (Prov. 3:5-7). Apostulcuna cawashgan wichan waquin runacunaga quiquincuna yarpashgancunapita yachachicärej, manami Biblia nishganpitachu. Jina cristianucunatapis creichiyta munapäcurgan unay Ley nishganta lapanta cäsucärinanpaj, chay lapancunapita guepancho Satanás caycargan. Payga mana munarganchu runacuna Jehovapita rasunpa cajta yachacärinanpaj. Cananpis Satanasga luta yachachicuycunawan runacunata pantacaycächin jaucala mana cawacunanpaj (Col. 2:8). Chaytaga ruran internetcho, televisiuncho o radiucho yargamoj luta wilacuycunawan. w23.07 16 parr. 11, 12

¿Imataj Jehová rurargan alchachinanpaj Satanás, Adán Evapis contranman churacashganpita? Jehovaga jaguirgan Adanwan Evapa wamrancuna cananpaj, chaynopa ricächicurgan mana lulacoj cashganta. Nircur wilacurgan imanotaj Adanwan Evapa miraynincunata salvananpaj, chayta rurar ricächicurgan munaycashganta cumplinanpaj (Gén. 3:15; 22:18). Satanasga manachi yarpaylapis yarparganchu Jehová cuyashga Wamranta cachamunanpaj runacunaraycu wanunanpaj. Jehovaga chayta rurash runacunata amatar cuyashpan (Mat. 20:28; Juan 3:16). Satanás ichanga pasaypa fiyu car pitapis cuyapanchu, quiquilanman yarpachacun. Chaura, ¿imataj logracanga Jesuspa wanuyninwanga? Waranga Watacuna usharcuptin, Jehová munashganno Adanpa cäsucoj miraynincunaga juchaynajna caycar cuyaylapaj paraisucho cawapäcunga. w23.11 6 parr. 17

Yawarta y cawayta alapa valejtano ricashwan. Levítico 17:14 textucho Jehová nin: “Lapan kawaqkunapaqa yawarninchömi vïdan kaykan”. Aumi, cawayga cuyaylapaj regalo Jehovapita caycan. Unaycho Noeta y familianta uywacunata micunanpaj Jehová niptin, ‘yawartashga aychata ichanga ama micunquichu’ nergan (Gén. 9:4). Tiempuwan yapaymi israelitacunatapis yarpächergan yawarta mana micunanpaj (Lev. 17:10). Apostulcuna cawashgan wichanpis cristianucunata pushaj cajcuna mandargan yawarta mana micunanpaj (Hech. 15:28, 29). Canan wichan noganchipis yawarpita Jehová ima nishganta cäsucunchimi. Jinamanpis ‘majayquilawan cacunquiman’ Jehová nishganta imaypis cäsucushwan. Apóstol Pabluga cristianucunata consejashgancho nergan ‘shonguyqui mana alicunata munashganta ama ruraychu’. Chaywanga niycämanchi fornicación o jucha rurayman chayachicoj ganra ruraycunata mana ricänapaj ni wiyanapäpis, fácil mana captinpis calpachacunanchimi (Col. 3:5; Job 31:1). w23.07 15 parr. 5, 6

¿Sansonga manachuraj musyargan Dalila imata munaycashganta? Payta cuyar, ¿locutashgachuraj caycargan? Imano captinpis, Dalila cutin cutin tumpala tapupaptin calpan maypita yurishganta, payga mana wilacunanpaj cajta wilacurgan. Chayta rurashganraycu Sansonga calpanta ogrargan, y Jehovapa yanapacuynintapis manami chasquirgannachu (Juec. 16:16-20). Jehovaman yäracunanpaj trucan Sansonga Dalilaman yäracurgan, chaymi mana alicho ushargan. Filisteo runacunaga Sansonta preso chariycur ishcan nawinta jorgurgan. Nircur Gaza marcaman apaycur, carcelcho cadenawan watapäcurgan rumi molinuta tumachinanpaj. Paycuna yarpapäcurgan diosnin Dagón Sansonta maquinman cachaycushganta, chaymi juc fiestata rurargan y sacrificiucunata rupachipäcurgan. Jina cushicärishpan cayno nipäcurgan “¡Sansónta burlakunantsipaq carcilpita apamuy!” nir (Juec. 16:21-25). w23.09 5, 6 parr. 13, 14

Öraga maygan estudiaj masinchi o aroj masinchi tapupämashwan imanirtaj Biblia nishganno cawacushganchipita. Creencianchicunapita ali tantiachicuyta munarpis, alimi canman paycuna creishgancunata respetaptinchi (1 Ped. 3:15). Chaymi creencianchicunapita tapupämaptinchega juzgaycämashganchitanoga ricashwanchu. Chaypa trucanga cuentata gocushwan imaman yarpachacushganta, chaynoparaj musyashwan imano ali shimilapa contestanapaj. Chayta ricarga quiquincunami cuentata gocärenga imaman creishgancuna luta cashganta. Imaraj canman maygalan aroj masinchi tapupämaptinchi imanir cumpleañuta mana rurashganchipita. ¿Imamantaj naupataga yarpachacushwan? ¿Yarpachacunchuraj aroj masinchicuna cushish cananta mana munashganchita? Imano captinpis agradecicushwan aroj masinchicunapaj yarpachacushganta. Chayta ruraptinchega yapaycho cumpleañuspita Biblia ima nishganta wiyaytapis munanmanchi. w23.09 17 parr. 10, 11

Chay tiempo chayamunancama cushi cushila runacunata yachachicuycashwan. Apóstol Pedruga nimanchi camaricushgala carcaycänapaj Jehovapa junajninpita (2 Ped. 3:11, 12). Chaytaga ruranchi cada cadala yarpachacuptinchi mushoj Pachacho imano cawacunapaj cajman. ¿Ricacunquinachu jaucala o tranquilula goyaycashgayquita y mishqui micuycunata micuycashgayquita? ¿Yarpachacunquichu cuyashga castayquicuna wanushganpita cawarircamur chasquishgayquita y unay runacunatapis canan wichan profeciacuna imano cumplicuycashganta tantiachishgayquita? Cay lapanman yarpachacurga riccha ricchala shuyarcaycanqui Jehovapa junajninta y cay mundupa ushacaynintapis. Musyanchinami ichiclacho imacuna pasananpaj cajta, chaymi luta yachachicuycunawan pantachimänanchita jaguishunchu. w23.09 27 parr. 5, 6

Jovincunaga escuelancunacho ricapäcun estudiaj masincuna “mamanta y taytanta mana cäsukuq” cashganta (2 Tim. 3:1, 2). ¿Imanirtaj chayno wamracuna capäcun? Waquin jovincuna cayno nipäcun: “Taytäcuna parlashgancunata mana cumpliptenga, imanirtaj nogapis cäsucöman” o “taytä nimashgancunaga canan tiempo yanapämannachu” nir. ¿Imaylapis gam chayno yarpashcanquichu? Cäsucunayquipaj sasa captinpis, ¿imaraj yanapäshunquiman chayta ruranayquipaj? Cäsucoj wamra o joven canayquipäga, Jesuspita yachacunquiman (1 Ped. 2:21-24). Jesús juchaynaj caycarpis, juchasapa tayta mamanta imaypis cäsucoj (Éx. 20:12). w23.10 7 parr. 4, 5

Hebreo cristianucuna yarpapäcurgan Ley nishganno sacrificiucunata rurar juchancunapita perdunashga cananpaj. Ichanga Pabluga tantiachicurgan chay Leyga mana vigentina caycashganta. Chaymi apóstol Pabluga paycunata shumaj yachachergan Jesuspa wanuyninwanraj Jehovaman más guelicamuyta puedipäcushganta (Heb. 7:19). Pabluga hebreo yäracoj masincunata shumaj tantiachicurgan canan wichan cristianucuna Jehovata imano adurashgan unay judiucuna imano adurashganpita más ali cashganta. Payga nergan unay judiucuna Jehovata adurashganga “lantuyno pasaqla karmi Jesucristo shamushqanyaqla kashqa” (Col. 2:17). Imatapis shumaj tantiarcunapäga imalawanpis tincuchishwanraj. Chaynolami unay judiucuna Diosta adurashganga ricächicurgan shamoj watacunacho cristianucuna imano Diosta adurapäcunanpaj. Shumaj tantiarcushun imataj Jehová camacächirgan juchanchicunata perdunamänanchipaj, chaynoparaj musyashun pay munashganno aduranapaj. w23.10 25 parr. 4, 5

Daniel 11 caj capitulucho wilacun ishcay reycunapita o ishcay gobiernucunapita, paycunaga chiquinacärin y peliapäcun cay munduta gobernananpaj. Bibliacho caycaj waquin profeciacunawan tincuchiptinchi, tantiarcunchi “norte caj reyga” caycan Rusia y yanapajnin naciuncuna, y “sur caj reyga” caycan Reino Unido y Estados Unidos naciuncuna. “Norte caj rey” mandashgan naciuncunacho Diospa sirvejnincunaga yäracuyninraycu chiquishga, gaticachashga, magashga y carcelarashga carcaycan. Ichanga hermanunchicunaga manchacärinchu chaycunapa pasar. Paycunaga musyapäcun chiquishga cananpaj Daniel librucho wilacushganno, chaymi yäracuyninga sinchi caycan (Dan. 11:41). Noganchipis chay profeciata shumaj tantiarcurga yanapämäshun ima captinpis Jehovata mana cachaycunapaj y shamoj tiempuman yarpar caycänapaj. w23.08 11 parr. 15, 16

Jehovaga nin sirvejnincunaga ñawinpa ñiñunno o ruyrunno cashganta. Ñawinchega alapa delicado y valuryojmi. Chaymi ima mana alicuna pasamaptinchega, Diosninchi cayno nimashganchino caycan: “Pilapis mana alicunata rurashuptiquega ñawïpa ñiñunta togriycashgannomi caycan” nir. Payga pasaypa cuyacoj car imapitapis chapämänanchita munan, imapis laquichimaptinchega paypis laquicun. Chaymi Jehovata cayta nishwan: “Nawi ñiñuykitano imapitapis tsapaykalämay” (Sal. 17:8). Diosnilanchi Jehovaga munan quiquinchi convencido caycänapaj amatar cuyamashganchita. ¿Imanir? Öraga cawayninchicho imacunapa pasashganchicuna y canan wichan problemacunapa pasarpis capaz dudashwanmi Pay cuyamashganchipita. Chaura, ¿imataj yanapämäshun mana gonganapaj Jehová cuyamashganchipita? Chaypäga ricärishun imanotaj Jehová ricächicun cuyacoj cashganta Jesuswan, cielupaj acrashgacunawan y noganchiwanpis. w24.01 27 parr. 6, 7

Esdrasga ricashgami imano Jehová sirvejnincunata yanapashga sasacunapa pasaptin. 484 watacho rey Asueruga Persia naciunpa munaynincho caycaj judiucunata ushacächinanpaj mandargan, y Esdrasga chay wichan Babiloniachochi caycargan (Est. 3:7, 13-15). Cawayninga peligruchomi caycargan. Chaymi judiucunaga pasaypa laquicärishpan gachga ropata jaticuycur ayunapäcurgan y Jehovatapis ruwacurganchi yanapänanpaj (Est. 4:3). Y Esdraswan waquin judiucunaga alapachi cushicärergan chiquejnincuna guerucho wanushganta ricar (Est. 9:1, 2). Esdras cawaynincho imacunapa pasashganga yanaparganmi shamoj tiempucho pruebacunata aguantananpaj, yäracuyninpis masraj mirarganchi Jehová sirvejnincunata imaypis yanapänanpaj. w23.11 17 parr. 12, 13

Apóstol Pablo parlaycargan israelitacuna chasquishgan Ley ima nishganpita (Rom. 3:21, 28). Waquin judío caj cristianucunapäga sasami cargan tantiarcunanpaj unay chasquishgan Leycuna manana vigente cashganta, y chaycho mandashgancuna manana cäsucunanpaj. Chaymi, Pabluga Abrahanpita parlarmi nergan salvaciunta tarinapäga canga Diosman yäracushganchipitami y manami unay Ley nishganta cäsucushganchipitachu. ¿Imataj caypita yachacunchi? Noganchitapis Jehová ali nawilanwan ricamänanchipäga payman y Jesusmanpis yäracunanchi. Santiago 2 caj capitulucho ali ruraycunapita parlaptin, manami parlaycanchu unay Ley mandashganta ruranapaj Pablo parlashganpita. Santiaguga parlaycan canan wichan Diosta sirvishganchicho imacunata rurashganchipita (Sant. 2:24). Chayta rurashganchichomi claro ricacämun Jehovaman lapan shongunchiwan yäracushganchita o manapis. w23.12 3 parr. 8; 4, 5 parr. 10, 11

Hermanacuna, shumajraj yarpachacunayqui piwan casaracunayquipaj. Yarpay runa cajtami Jehová autoridäta goshganta familianta pushananpaj (Rom. 7:2; Efes. 5:33). Chaymi caycunata tapucuy: “¿Payga ricächicunchu pogushga cristiano cashganta y Diospa cajtachu más puntaman churan? ¿Alichu imatapis decidin? ¿Warmicunata respetanchu? ¿Espiritual cajcho ali pushacojchuraj canga y imaycäcunatapis manachuraj pishëchimanga?”. Ali majata tariyta munarga, gamraj puntata calpachacunayqui ali warmi canayquipaj. Warmi cajga runanpa yanapacojnin cashganta (Gén. 2:18). Jina Jehovata cuyar imatapis mana ruranchu runanta pengayman churananpaj (Prov. 31:11, 12; 1 Tim. 3:11). Chaymi casaracuyta yarpaycarga, cananlapitana Jehovata masraj cuyanayquipaj calpachacuy, chayta rurarga ali yanapacoj canqui wasiquicho y congregaciunchopis. w23.12 22, 23 parr. 18, 19

Diosninchi Jehová yachayta gomaptinchiraj ali cajcunata acrashun. Y caway vidanchichoga imaycapäpis yachaj runami cayta munanchi. Jinamanpis imaycata aguantanapaj Jehová calpanwan yanapämäshun (Fil. 4:13). Chaypäga hermanunchicunawanpis yanapämanchimi. Wanunanpäna caycaptinmi Jesusga ruwacuyparaj Taytanta mañacurgan. Aumi, ruwacurganmi Diospa contrancho lutanta parlaj runacuna nishganpita librananpaj. Pero jinan hora chaypita Jehová libraycunanpaj trucanga juc angeltami mandargan shacyächinanpaj (Luc. 22:42, 43). Chaynolami canan wichanpis Diosninchega maygan hermanulawanpis yanapämanchi, paycunaga mayna gayaycämanchi o imanolapapis watucaycämanchina. Jucninchi jucninchi shacyächinacurmi ‘ali shimilapa’ cushi cushila parlapacushwan (Prov. 12:25). w23.05 10, 11 parr. 9-11

Conmemoraciunman aywaj gasacashga hermanucuna capazchi yarpachacun hermanucuna imano chasquinanpaj cajman. Chaymi shumaj yarpachacushwan imata ninapaj mana pengachinanchipaj y mana laquichinapäpis. Paycunaga cuyashga hermanunchicunami caycan, y alapami cushicunchi paycunawan Jehovata yapay juntula aduraptinchi (Sal. 119:176; Hech. 20:35). Alapami cushicunchi Jesús mandamashganchipita cada wata wanushganta yarpänapaj. Chay junajta yarparga noganchita y waquincunatapis yanapämanchi (Is. 48:17, 18). ¿Imano? Jehovata y Jesustapis masraj cuyanchi. Alapa agradecicunchi noganchiraycu lapan rurashganpita. Hermanunchicunawan juntula caycanchi, y waquin runacunatapis yanaparcunchi imata rurananpaj Jesús wanushganraycu bendiciuncunata tarinanpaj. Chaymi camaricushgala shuyaraycäshun Conmemoración junajta, chayga mana gonganapaj junajmi caycan. w24.01 14 parr. 18, 19

Jehovaga pushamanchi Palabran Bibliawanmi. Jina waquin hermanucunata churashga pushamänanchipaj. Tantiaj y yäracuypaj esclavuga tiempulanchomi imayca yachachicuycunata jorgaramun yanapämänanchipaj ali decisiuncunata acranapaj (Mat. 24:45). Chaypitapis caycan congregaciunta watucamojcuna, congregaciuncho caycaj ancianucunapis. Paycunaga shacyächimanchi y consejamanchi mana alicunapa pasarpis jinala Jehovata sirviycänapaj, amiguncunaman ticranapaj y cawayman apacoj nänipa purinapaj. Chaymi Jehovata alapa agradecicuyculanchi chayno hermanucunata pushamänanchipaj churashganta. Pero pushacoj hermanucuna noganchino juchasapa captin, öraga sasami canman nimashganchicunata cäsucunapaj. Chaycuna pasamaptinchega, masraj yäracunanchi Jehová marcanta pushaycashganta y calpachacunanchi nimashganchicunata ruranapaj. w24.02 20 parr. 2, 3

Bibliata leir calpachacunanchi shumajraj yarpachacunapaj Jehovapita imata yachacushganchiman. Chaypäga caycunatami tapucunanchi: “¿Imanotaj cay textucuna ricächiman Jehová cuyamashganta? ¿Imanotaj cay versículo yanapaman Jehovata masraj cuyanäpaj?”. Cay lapancunata rurar yanapämäshun Jehovata masraj cuyanapaj. Jehovaga atentula caycan mañacuyninchicunata wiyamänanchipaj (1 Juan 3:21, 22). Chaymi shongunchita mashtapar Diosta mañacuptinchega yanapämäshun payta masraj cuyanapaj (Sal. 25:4, 5). Jina waquincunatapis masraj cuyashwan. Apóstol Pabluga cristianuna captin ali mozo Timoteuta reguirgan. Jehovatawan runa masincunata Timoteo cuyashganta ricar caytami nergan Filipos congregaciuncho caycaj hermanucunata: “Timoteunöqa manami pipis kantsu. Paylami noqano qamkunapaq yarpachakun” (Filip. 2:20). Pabluga almiracurgan imano Timoteo yäracoj masincunata cuyashganta. Congregaciuncho hermanucunaga mayna shuyaraycarganchi Timoteo watucoj aywananpaj (1 Cor. 4:17). w23.07 9 parr. 7-10

Moisesga wanucurgan israelitacuna Dios aunishgan Pachaman manaraj yaycuptin. Chaura, ¿pipis manana carganchuraj israelitacunata pushananpaj? ¿Marcantaga Jehová chunyajcho cachaycurganchu? Manami. Jehovaga sirvejnincunata manami cachaycurganchu cäsucoj capäcuptin. Moisés manaraj wanucuptin, Jehovaga nergan paypa trucancho Josué israelitacunata pushananpaj (Éx. 33:11; Deut. 34:9). Jina yachaj, tantiacoj y yarpayniyoj runacunapis caycargan israelitacunata pushananpaj (Deut. 1:15). Diospa sirvejnincunaga japalancuna manami caycarganchu. Profeta Eliaspis achca watacunapami israelitacunata yanapargan Jehovalata sirvinanpaj. Pero nircur, Jehovaga Eliasta mandargan Judá sur caj laduman (2 Rey. 2:1; 2 Crón. 21:12). Chauraga, ¿manacu pipis cargannachuraj chunca tribucho caycaj Diosta cuyaj israelitacunata pushananpaj? Au, carganmi. Eliasga achca watacunapa Eliseuta yachaycächergan israelitacunata pushananpaj. Jehovaga jinala munayninta ruraycargan y cäsucoj sirvejnincunatapis cuidaycargan. w24.02 5 parr. 12

Efesupita cristianucunaga Jehovapa Palabran nishganno cawacur galaycushga cargan (Sal. 119:105). Jina luta religiunninta, costumbrincunatapis y jucha ruraytapis jaguipäcurgan. Calpachacärergan Dios munashganno cawapäcunanpaj y adurapäcunanpäpis (Efes. 5:1). Noganchipis rasunpa cajta manaraj yachacur, luta religiuncho caycashganchi y juchacunata rurar cawacushcanchi. Waquincunaga capaz luta fiestacunatapis rurashcanchi y mana ali vidatapis apashganchi. Pero Jehovapita yachacur ima yarpashganchita y munashganchitapis cambiashcanchi. Jina ali cajta y mana ali cajtapis shumaj tantiarcur Dios munashgannona cawacur galaycushcanchi y chayga cawayninchicho yanapämashcanchi (Is. 48:17). Pero imayca pasashgancunata ricar öraga sasami canman Tayta Dios munashgannola cawapäcunapaj. Chaymi calpachacunanchi chacaycho caycajnomi mana canapaj, sinoga achquicho caycajno waran waran cawacunapaj. w24.03 21 parr. 6, 7

Öraga caynochi yarpanqui: ‘Diosta sirviyta auninäpaj y bautizacunapäga pishiycämanraj’ nir. Yarpanquichi más cambiucunataraj cawayniquicho ruranayquipaj y yäracuyniquipis más jatunraj cananpaj (Col. 2:6, 7). Pero ama gongaychu lapan estudianticunaga mana igual cashganta. Waquincunaga Jehovata alapa cuyar rasla cambiucunata ruran, juccunaga wamralaraj o jovinlaraj caycaptin decidipäcun Diosta sirvinanpaj. Chaymi shumaj yarpachacurcuy y quiquiquipa voluntäniquipita decidinayqui listunachush caycanqui bautizacunayquipaj o manapis (Gál. 6:4, 5). Cuentata gocuptiqui Jehovata sirviyta auninayquipaj manaraj listo caycashgayquita ama laquicuychu, sinoga jinala calpachacuy. Jehovatapis mañacuy yanapäshunayquipaj cambiucunata ruranayquipaj (Filip. 2:13). Seguro canayqui pay mañacuyniquicunata wiyananpaj y yanapäshunqui sirvejninman ticranayquipaj (1 Juan 5:14). w24.03 5 parr. 9, 10

Juc cuticho Sarami alapa yarpachacuycunawan caycar imaycata Abrahanta nergan, jina imano ricacushgantapis payta culpargan. Abrahanga reguirganmi warminta, Saraga payta yanapajmi, respetuosa warmi cargan. Chaymi Abrahanga masraj yarpachacurgan ima problematapis imano alchananpaj (Gén. 16:5, 6). ¿Imatataj yachacunchi? Musyanchimi familiachoga runa cajmi autoridäyoj caycan (1 Cor. 11:3). Pero warminta amatar cuyashpanmi payta shumaj wiyarcur japalanla imatapis decidinanpaj camäpacunchu (1 Cor. 13:4, 5). Juc cutichopis Abrahanga jäpa runacunata imalatapis garaycunanpaj wasinman yaycamunanpaj nergan. Ichanga Sarawanga parlarganchu, jina mandargan tantacunata rurananpaj, payga chay hora ocupadash caycargan (Gén. 18:6). Saraga jinan hora ali shongulanwan runanta cäsucurgan. Warmicuna, Saranola runayquita cushi cushila yanapacäriptiquega alapa alimi canga. Chaypitami canga casado vidayquipis ali cananpaj (1 Ped. 3:5, 6). w23.05 24, 25 parr. 16, 17

Israelitacunapa jueznin Gedeón captin, Jehová payta nergan Baalpaj rurashgan altarta ushacächinanpaj. Chaychomi ricacämunman cargan mana manchacoj y cäsucoj cashganta (Juec. 6:25, 26). Tiempuwanpis, Gedeón chaychica soldaducunata shuntaptin, Jehová ishcay cuticho nergan walcayächinanpaj (Juec. 7:2-7). Jina Jehová mandashgantami cäsucur chiquejnincunaman chacaypa yaycurgan vencipäcunanpaj (Juec. 7:9-11). Ancianucunapis cäsucoj canmanmi. Maygan ancianupis cäsucoj captenga, manami shuyaranchu waquincunala Biblia y Diospa marcan nishganta cäsucärinanpaj, quiquincunaraj chayta rurapäcun. Ichanga öraga sasami canman chayta rurananpaj. Masraj chaylaraj yargamushgan wilacuycunapita altanto mana caycaptin. Öraga caynopis capaz tapucunman, ‘¿cay wilacuyta cäsucuptëga alichuraj caycan o mana?’ nir. Y, ¿imaraj canman vidanta peligruman churar imalatapis rurananpaj caycaptenga? Chaycunapa pasarga, ¿imanotaj ancianucunaga Gedeonno cäsucoj capäcunman? Pushaj hermanucuna wilacushganta chasquicur cäsucäriy. w23.06 4, 5 parr. 9-11