Abril

Unay Jehovapa sirvejnincunapis öraga mana yarpashgan problemacunapa pasargan. Jacob imapa pasashganta yarparcushun. Taytanga nergan Diosta aduraj tiyun Labanpa juc wamranwan casaracunanpaj. Y nerganpis Jehová imayca bendiciuncunata gonanpaj (Gén. 28:1-4). Chaura Jacobga taytanta cäsucur Canaán marcapita yargurgan, y tiyun Labán caycashgan marcaman aywargan; wamrancuna cargan Lea y Raquel. Jacobga Raquelta cuyar galaycurgan, payga shulcajmi cargan. Chaymi paywan casacuyta munar Labanpa ganchis watacuna arunanpaj aunirgan (Gén. 29:18). Ichanga manami yarpashgannochu yargurgan. Labanga Jacobta engañaycur wamran Leata gorgan warmin cananpaj. Juc semana pasariptin jaguirergan Raquelwan casaracunanpaj, pero ganchis watacuna masraj Labanpaj arunan cargan (Gén. 29:26, 27). Y mana chaylachu. Labanga achca cutimi parlashganno manami cumplirganchu, payga achca cutimi Jacobta aunishgan paguntapis manami cumplirganchu. ¡20 watacunano Jacobpita chayno aprovechacurgan! (Gén. 31:41, 42). w23.04 15 parr. 5

Pipis shogamänanchita o pushamänanchita munarga, ¿pitataj mañacunchi? Noganchega musyanchimi chaytaga Jehovata mañacunapaj. Quiquinmi chayta ruranapaj mañamanchi. Payga cada cadala paywan parlanapaj munan, chaymi Palabrancho cayno nimanchi: “Imay hörapis manakäriy” (1 Tes. 5:17). Jehovataga mana manchacuypa parlapashwanmi y lapan cawayninchicho pushamänanchipaj mañacushwan (Prov. 3:5, 6). Pay alapa ali captin, imay horapis ayca cutipis mañacunapaj munan. Jesusga musyarganmi mañacuyninchicuna alapa ali cashganta Jehovapaj. Cieluchoraj caycaptin payga ricargan imano Taytan sirvejnincuna mañacushgancunata contestashganta. Jesusga Taytanpa laduncho caycargan Anapa, Davidpa, Eliaspa y waquin sirvejnincunapa mañacushgancunata contestaptin (1 Sam. 1:10, 11, 20; 1 Rey. 19:4-6; Sal. 32:5). Chaychi discipuluncunata Jesús nergan mana manchacuypa imaypis mañacärinanpaj (Mat. 7:7-11). w23.05 2 parr. 1, 3

Jezabelpa wamran Ataliaga pasaypa fiyu warmi cargan. Judacho mandacur galaycuptin, reypa lapan miraynincunata wanuchinanpaj mandargan, wilcancuna captinpis chayta rurargan (2 Crón. 22:10, 11). Ichanga sumo sacerdote Jehoiadaga Jehovata alapa manchacojmi. Chaymi juc cuticho Jehoiadapa warmin Jehosabeat, Ataliapa juc wilcanta pacaycurgan mana wanuchinanpaj, jutinga cargan Jehoás. Chayta rurashpan Davidpa miraynin pï rey cananpaj manami ilacarganchu. Jehoiadaga chay wichancho 100 watapitapis masrächi caycargan. Chayno captinpis, Ataliata manchacunapaj trucan Jehovata masraj manchacoj y cäsucojpis. Jehoás ganchis watayoj caycaptin, Jehoiadá yapay musyachicurgan Jehovalata cuyashganta. Chaypäga juc pactuta rurargan levitacunawan y Israel runacunapa mandajnincunawan Jehoasta rey churapäcunanpaj, payga Davidpa miraynin cargan. Chay pacto mana ali yarguptenga, Jehoiadá wanunmanchi cargan. Ichanga Jehovapa yanapacuyninwanmi Jehoiadaga rurashganga ali yargurgan. w23.06 17 parr. 12, 13

Chayta wiyarga rey Nabucodonosor yarparganchi Daniel contrancho churacaycashganta y wañuchinanpäpis mandanmanchi cargan, pero Danielga valurcharcurganmi ima wilananpaj cajtaga lapantami wilargan. ¿Pipitataj Daniel yachacurgan lapan cawaynincho valiente cananpaj? Mozula cashgan wichan taytancunapitami (Deut. 6:6-9). Payga manami Chunca Mandamientucunalapitachu yachacushga cargan, Danielga musyarganmi israelitacunapa ima micuycuna impuro cashganta (Lev. 11:4-8; Dan. 1:8, 11-13). Jina musyarganmi unaycho Diospa marcan mana cäsucoj captin ima pasashganta (Dan. 9:10, 11). Lapan cawaynincho imaycacunapa pasashganchomi cuentata gocurgan quiquin Jehovapis y angelnincunapis yanapänanpaj listo caycashganta (Dan. 2:19-24; 10:12, 18, 19). w23.08 3 parr. 5, 6

Rebecaga ali yarpachacoj warmi cargan. Chaymi shumaj yarpachacur-raj imatapis ruraj (Gén. 24:58; 27:5-17). Respetosa y cäsucoj warmipis cargan (Gén. 24:17, 18, 65). Gampis Rebecano humilde y respetosa warmi captiquega, familiayquicho y congregaciunchopis waquincuna gampita alita yachacunga. Lapan cristianucunaga ali tucoj cayta manami munanchichu. Esterga mana ali tucoj warmimi cargan. ¿Imanirtaj chayta ninchi? Pay reina caycarpis waquincunapita manami ali tucurganchu. Jina primun Mardoqueupa consejuncunatapis ali chasquicur cäsucojmi (Est. 2:10, 20, 22). Gampis Esterno canquipaj waquincunapa consejuncunata mañacuptiqui y cäsucuptiqui (Tito 2:3-5). ¿Imano mastaj Esterga ricächicurgan ali tucoj mana cashganta? ‘Payqa kuyaylapaq ali jipash’ caycarpis manami creirganchu waquincunapita más cuyaylapaj cashganta (Est. 2:7, 15). w23.12 19, 20 parr. 6-8

Ima juchalatapis rurashganpita perdunashgana caycarpis cutin cutin ‘culpämi cash’ niycarga, lasaj guepita apaycashganchinomi canga, y chayno ricacunanchitaga Jehová munanchu. Aumi, juchalicushganchipita arrepenticurga y chayta manana ruranapaj calpachacurga, mana laquicushwanchu, Jehovaga perdunamashganchina (Hech. 3:19). Jehovapa naupancho ali conciencialanchiwan caycarga mananami yarpaycashwannachu unay rurashganchicunaman, pajta sinoga mana alichopis ushashwanchi (Sal. 31:10). Waran waran laquishgala caycarga, guepaman cutir rasunpa caj caminupitapis witicurishwanchi (2 Cor. 2:7). Unay pantashgayquilaman yarpachacunayquipaj trucanga, Jehová perdunacoj cashganman yarpachacunquiman (Sal. 130:4). Rasunpa arrepenticojcunapaj parlarmi Jehová cayno nin: “Ima jutsata rurashqantapis manami yarparäshaqnatsu” (Jer. 31:34). Alimi tantiaycanchi Jehovaga pitapis perdunaptenga yarpaylapis yarpannachu pantashgancunaman. Öraga pipis juchalicushganraycu nacarpis nacangachi tiempuwanga, pero ama gonganmanchu Jehovaga juchanta perdunashgana. Juchalicushgayquiraycu congregaciuncho ima cargulatapis ograshga captiquega, Jehovaga gongashgana juchalicushgayquita. Mana laquicushpayqui gampis chayta ruray. w23.08 30, 31 parr. 14, 15

COVID-19 gueshya wichan Jehovapa testiguncunaga yäracuypaj pushacoj hermanucuna nishganta cäsucur jaucala carcaycargan (Mat. 24:45). Micunapaj, upunapaj, puclanapaj y arunapaj ruraycuna alino captinpis, chaycunalaman jatiräcurga mana alimanpis chayashwanchi (Luc. 21:34, 35). Chaycunaga tiempunchita ograchimashwan ali ruraycunata ruranapaj, chaymi Bibliacho nimanchi más alinnin caj ruraycunata puntaman churanapaj (Filip. 1:9, 10). Televisiuncho o radiupa politicucuna rimanacushgancunataga ricashwanchu ni wiyashwanchu. ¿Imanir? Chaycunalata ricaycurga shongulanchicho mayganlatapis yanapacuyta munashwanchi. Ricashganchino, Satanás imaycacunawan pantachimänanchita munan ali cajcunata mana ruranapaj. w23.07 16, 17 parr. 12, 13

Jehovapa testiguncunaga cada wata mana gongaypa Jesús wanushgan junajta yarpapäcun. Quiquin Jesusmi mandashga chayta ruranapaj (Luc. 22:19, 20). Conmemoración junajchoga yarpachacunchi Jesús wanushgan alapa valuryoj cashganta, y chaypita imano agradecicunapäpis (2 Cor. 5:14, 15). Jina hermanunchicunawanpis shuntacanchi shacyächinacunapaj (Rom. 1:12). Achcajmi chay reuniunman shamojcuna chaycho ricashganpita y wiyashganpita Bibliapitapis yachacur galaycärin. Jina chay junajcho ricacan Jehovapa sirvejnincuna may chaychopis juc shongunola caycashganchita. Caycunaraycumi Jesús wanushgan junajga mana gongaypaj caycan. w24.01 8 parr. 1-3

Jehovawan Jesús noganchiraycu rurashgantaga manami pipis ruranmanchu cargan, chaymi paycuna rurashganman shumaj yarpachacurga tantiashun alapa cuyamashganchita y masraj cuyaycushun (Gál. 2:20). Jehová cuyamashpanchimi Jesusta cachamurgan. Payga jaguirgan cuyashga Wamranta nacananpaj y noganchiraycu wanunanpaj. Mana alicunapa pasar laquicuptinchega, Jehovapis laquicunmi. Payga tucuynopa musyachimanchi cuyamashganchita (Jer. 31:3). Cuyamashpanchimi marcanmanpis pushamashcanchi (Deuteronomio 7:7, 8 textucunawan tincuchiy). Pipis ni imapis Jehovapita raquichimäshunchu (Rom. 8:38, 39). Cay lapanta musyarga, ¿imanotaj ricacunqui? w24.01 28 parr. 10, 11

Cielupaj acrashga cristianucunaga cushicärinmi ima shuyarashgancunaman yarpar. 1991 watacho Frederick Franz hermanunchi cayno nergan: “Musyanchimi imata shuyarashganchicunaga rasunpami cumplicunanpaj. Aumi, 144.000 cajcunapita lapäcuna seguro carcaycä ima shuyaraycashganchi cumplicuptenga yarpashganchipitapis masraj canga”. Nircur nergan: “Imata shuyaraycashganchitaga cada cadalami masraj valuranchi. [...] Y shuyanapaj captinpis cushi cushila shuyaraycanchi. Chaymi ayca watapis pasacuchun, imata shuyaraycashganchitaga jinala shuyaraycäshaj”. Lapaninchimi alapa cushicunchi cielucho o Pachacho imaycamapis cawanapaj shuyaraycashganchipita. Y tiempuwanga imata shuyaraycashganchicuna masraj cumplicunanpaj munanchi. w23.12 9 parr. 6; 10 parr. 8

Sagrado Toldupa yaycunancho broncipita rurashga juc altar caycargan, y chaycho uywacunata rupachipäcoj Jehovapaj (Éx. 27:1, 2; 40:29). Pero chay sacrificiucunawanga runacunapa juchancuna chipyaypa perdunashga cashgachu (Heb. 10:1-3). Uywacunata sacrificiuno rupachishganga, ricächicurgan shamoj watacunacho imano runacunapa juchancuna chipyaypa perdunashga cananpaj. Jesusga musyargan runacunaraycu wanunanpaj Taytan cay pachaman cachamushganta (Mat. 20:28). Chaymi bautizacurna camaricushga caycargan papäninpa voluntäninta rurananpaj (Juan 6:38; Gál. 1:4). Jesusga “juk kutila wanurqan” payman lapan yäracojcunapa juchancuna chipyaypa perdunashga cananpaj (Heb. 10:5-7, 10). w23.10 26, 27 parr. 10, 11

Quiquilanchega juchapita y wanuypitapis manami imaypis libracushwanchu cargan (Sal. 49:7, 8). Chaymi Jehovaga cuyashga wamranta cachamurgan chaycunapita libramänanchipaj. Jehovawan Jesús amatar cuyamashganchita cada cadala yarpachacurga, shongupitami alapa agradecido caycashwan. Adán juchalicuptin chay lapanta ogrargan y miraynincunapis juchasapana yurirgan. Chaymi Adán rurashganpita libramänanchipaj Jesús juchaynaj cawayninta noganchiraycu gorgan. Payga Pachacho caycar “manami ima jutsatapis rurarqantsu ni pitapis lulaparqantsu” (1 Ped. 2:22). Adán ograshganga alapa valuryoj cargan, chaymi Jesuspa wanuyninraj chaywan tincurgan (1 Cor. 15:45; 1 Tim. 2:6). w24.01 10 parr. 5, 6

Jesús cawarircamur Lugar Santïsimuman yaycurgan. Canan wichan Jehovata imano aduranapaj cajga, más alimi caycan unaycho judiucuna imano Payta adurashganpita. Mandaj sacerdote Lugar Santïsimuman yaycushganga runacuna rurashgalanmi cargan, chaymanga uywacunapa yawarninwanraj yaycoj. Ichanga Jesusga jana pachacho caycaj templumanmi yaycurgan, chaychomi payga noganchiraycu wanushganta juc sacrificiuta rurashgantano papäninta entregargan “jutsantsipita perdonashqa kanantsipaqmi” (Heb. 9:24-26). Cielupaj aywanapaj carpis o cay pachacho cawanapaj carpis, Diospa templun nirajcho adurashwanmi. w23.10 28 parr. 13, 14

Jesús cielucho Rey y cuyapäcoj Mandaj Sacerdotino ima ruraycashganmanpis yarpäshun. Jesucristupa jutincho Jehovata “manakurqa trönuncho paywan parlaykaqnömi kaykantsi”, y “ima nakaycho kaptintsipis paymi kuyapämashpantsi yanapamäshun” (Heb. 4:14, 15). Chaymi Jehová y Jesús imano yanapaycämashganchiman ni juc junajlapis yarpayta jaguishunchu. Chayno cuyamashganchipita alapa agradecido caycarga, lapan shongupita paylata sirvishun (2 Cor. 5:14, 15). Agradecido caycarga, ¿imataraj rurashwan? Waquincunata yanapashun Jehovata sirvinanpaj y Jesuspa gatejnin cananpäpis (Mat. 28:19, 20). Apóstol Pablupis agradecido caycar chaytami rurargan. Payga musyargan Jehová munashganta “lapan runakuna ali wilakuyninta chaskikur salvashqa kanantami” (1 Tim. 2:3, 4). w23.10 22, 23 parr. 13, 14

Predicaciuncho Dios aunicushganwan runacunata shoganchi o consolanchi, jina yachachinchi paraisucho caway imano cananpaj. ¿Imanopataj runacunata yanapashwan Apocalipsis 21:3, 4 nishganman yäracunanpaj? ¿Noganchipis imataj rurashwan Jehovaman y aunicuynincunamanpis masraj yäracunapaj? Jehovaga manami aunimanchilachu imata rurananpaj, sinoga nimanchipis imano chaycunata cumplinanpaj cajta. Ricärishun imataj Jehová nergan apóstol Juanta paraisucho aunicuyninta cumplinanpaj. Juanga nin: “Trönucho jamaraykaqnami kayno nimurqan: ‘Lapantapis mushuqtami ruraykä’. Tsaypitanami kayno nimarqan: ‘Kay nishqäkunaqa rasun kaqmi kaykan. Tsawraqa kay nishqäkunata lapanta qelqay’. Nirkurnami kayno nimarqan: ‘Lapanpis cumplishqanami kaykan. Alfa y Omegami noqa kaykä. Qalaykunan y ushananmi kaykä’” (Apoc. 21:5, 6a). w23.11 3 parr. 3-5

Juc mozu shumaj yarpachacoj cashgantaga ricächicun imano visticushgancho y najchacushganchopis. Canan wichan moda nishgan ropacunata rurajcunaga Jehovata respetacärinchu ni cäsucärinchu. Chaymi chiri chiri ropacunata ruran olgucuna warmicunano ricacänanpaj. Pero juc mozu pogushga cristianuman ticrananpaj calpachacuycarga Diospa mandätuncunata cuentaman churan y congregaciuncho ali cristianucunapitapis imano visticushganpita yachacun. Cayno tapucunquiman: “¿Visticushgächo ricacämunchuraj ali yarpachacoj mozu cashgäta y waquincunamanpis yarpachacuycashgäta? ¿Imano visticushgächo ricacanchu Diosta sirviycashgäta?” (1 Cor. 10:31-33). Mozucuna ali yarpachacoj captenga, hermanucunapa respetunta gänacunga y Jehovatapis cushichenga. w23.12 26 parr. 7

‘Sur caj reypis’ unaychoga Diospa sirvejnincunata alapa nacachergan punta y ishcay caj jatun guerracuna wichan (Dan. 11:40). Achca hermanucunata carcelcho wichgarachergan y wamracunatapis escuelapita gargupäcurgan. Ichanga guepa watacunapita jucnopana Diospa sirvejnincunata pantachiyta munan, chaytaga ruran campañacuna captin juc mushoj alcalde o presidente cananpaj. Capaz juc cristianuga mayganlatapis yanapacuyta munanman shongulancho o yarpaynilancho. Öraga votaciunninwan jucta mana yanapacurpis capaz shongulancho munanman pilapis ganananpaj. Ichanga lapan shongunchiwan Jehovata sirvinapäga rurayninchicunata, yarpayninchicho y shongunchicho ima caycashgancunatapis cuidananchi (Juan 15:18, 19). w23.08 12 parr. 17

Bibliaga ninmi “ali cörriq kaqla premiuta chaskishqanta” (1 Cor. 9:24). Imapita cuidacunapaj parlar Jesuspis nirganmi micuycarla, upyaycarla y imacunapitapis yarpachacuycarla mana caycänapaj (Luc. 21:34). Cay textucunapis waquin textucunapis tantiachimäshunmi imata ruranapaj mana ushacaj cawayta tariyta munarga. Ama gongashwanchu ushanancama corrinapäga Jehovami calpalanta gomäshun (Is. 40:29-31). Guepaman cutinayquipäga yarpaylapis yarpaychu. Apóstol Pabluno calpachacuy premiuta chasquinayquipaj (Filip. 3:13, 14). Maquiquichomi caycan ushanancama corrinayquipäga, Jehovaga espiritunwanmi yanapäshunqui. Imalapis lasaj guepino caycaptenga Diosninchega calpanta goshunquimi. Pay yanapäshuptiquirämi ushanancama mana uticaypa corrinqui. w23.08 31 parr. 16, 17

Jesús 12 watayoj caycaptin taytanwan y mamanwanpis Jerusalenman aywashga cargan Jehovata adurananpaj (Luc. 2:46-52). Pero cutipäcamushgancho Jesús manami caycarganchu paycunawan. Josewan María cuentata gocunmanmi cargan lapan wamrancuna paycunawan caycashganta, ichanga chayta mana rurapäcurganchu. Chaura Jerusalenman cutiycur Jesusta tariycurna, mamanga olgüpargan imanir paycunawan mana caycashganpita. Pero Jesús rabiacunanpa trucan respetulawan y ali shimilapa contestargan. Chaypita “paykunawan Nazaretman Jesús kutikur mandashqankunata rurarqan”. Taytayqui y mamayqui pantarcuptenga öraga sasachi canman cäsucunayquipaj. Chayno captinpis, ¿imaraj yanapäshunqui cäsucunayquipaj? Yarpay cäsucoj captiqui, Biblia nishganno Jehovapa shongunta cushichiycanqui (Col. 3:20). Öraga capaz taytayqui mamayquiwan ‘cayta wacta ruray’ nishunquiman, y chaycuna gustuyquipäno mana captenga ama gongaychu Jehová lapanta ricaycashganta. Pero chayno captinpis cäsucuptiquega, Jehovapis cushicungami. w23.10 7 parr. 5, 6

Capaz öraga estudiaj masinchicuna nimashwan olgupura warmipura cacojcunata Testigucuna mana ali ricashganta. Chayno captenga tantiachicushwanmi cada uno acrashganchitapis respetashganchita (1 Ped. 2:17). Chayta rurarga capaz Bibliapita parlapaptinchi shumaj wiyamashwanmi. Pilapis creencianchiwan acuerducho mana captenga, ¿jucla nishwanchuraj payga Bibliapa contrancho caycashganta? Juc estudiaj masiqui ‘loco imachi caycanqui Diosman creinayquipaj’ nishuptiqui, ¿jucla ninquimanchuraj pay evoluciunpita lapan musyashganta? Capaz yarpashgapischu chaycunaman. Jina Dios ima camashgancunapita jw.org paginacho caycaj juc temapita enlacintapis apachicunquiman. Chayta ruraptiquega capaz maygan temalapitapis o videulapitapis parlapacuyta munanman. Pitapis respetuwan trataptinchega noganchipita alitana yarpar galaycunga. w23.09 17 parr. 12, 13

Mana ali rurashganchicunata corriginapaj calpachacuptinchi y Jehovapa yanapacuyninta ashiptinchega, payga bendicimäshunmi y ali nawilanwan ricamäshun (Prov. 28:13). Sansón juchasapa cashganraycu Dalilawan cananpaj mana alita acrashga carpis, jinala valurcharcurgan Jehovata sirvinanpaj. Jehovapis paytaga manami cachaycurganchu. Paypa ricayninchoga ali yäracoj runa cargan, chaymi Hebreos 11 caj capitulucho Diosman yäracoj runacunapa jutincuna caycashgancho Sansonpa jutintapis Jehová churargan. Amatar cushicurculanchi Taytalanchi Jehová alapa cuyamaptinchi, calpanta gomaptinchi y sasa problemacunata aguantanapaj yanapämaptinchimi. Chaymi Sansón rurashganno Jehovata nishun: “TAYTA DIOS, kalpä yurinanpaq yapay yanapaykalämay” (Juec. 16:28). w23.09 7 parr. 18, 19

Jehovapa junajnin caylachona caycashganta musyar waquin runacunatapis Diospa ali wilacuynincunata yachachicuyta munanchi. Ichanga öraga runacunata manchacur chaycunapita parlapayta munanchichu. Chaytaga Pedrutapis pasargan, Jesusta juzganan chacaycho payga manami nirganchu Jesuspa discipulun cashganta y quimsa cuticunacho niegargan payta reguishganta (Mat. 26:69-75). Ichanga tiempuwanga manami manchacurgannachu, chaymi cayno nergan: “Pitapis ama mantsakärinkitsu ni chikishuptikipis lakikärinkitsu” (1 Ped. 3:14). Noganchipis Pedruno runacunata manami manchacushwanchu. ¿Imaraj yanapämäshun runacunata mana manchacunapaj? Pedruga nimanchi “Jesucristo ämuyki kashqanta” yarparay (1 Ped. 3:15). Señorninchi Jesusga poderyoj Rey cielucho caycan. w23.09 27, 28 parr. 6-8

Cuidacunanchimi “Tayta Diosta mana cäsukuq runakuna lutankunata” rurashganta mana ruranapaj (Efes. 5:11). Pilapis pornografiata o ganra ruraycunata ricaptin, wiyaptin o chaycunalapita parlar cacuptin fornicación juchaman ishquinga (Gén. 3:6; Sant. 1:14, 15). Satanasga runacunapa yarpaynincunata upatacächin mana musyananpaj ima ali cashganta o ima mana ali cashgantapis (Is. 5:20; 2 Cor. 4:4). Diosta mana cäsucoj runacunaga creichimananchita munan cay munducho caycaj mana ali ruraycuna alino cashganta (2 Ped. 2:19). Pero peliculacunacho, televisiuncho y internetchopis Dios chiquishgan ruraycuna yargamun. Diabluga imanopapis munan yarpänapaj cay munducho caycaj caway, ruraycuna y costumbricunapis alino cashganta (Efes. 5:6). w24.03 22 parr. 8-10

Israelitacunaga Sagrado Tolducho o Tincunan Tolducho shuntacärej Diosta adurar sacrificiucunata rupachipäcunanpaj (Éx. 29:43-46). Chunyaj jircacho caycar maypa aywarpis Sagrado Toldutaga apacärej (Éx. 25:8, 9; Núm. 9:22). Chaytaga 500 watacunano utilizargan Jerusalencho templo sharcachishgancama. Ichanga chay Sagrado Tolduga ricächicurgan shamoj watacunacho cristianucuna imanotaj Diosta adurapäcunanpaj. Jina ricächicurgan shamoj watacunacho Jehovapa templun nirajcho imano aduranapaj cajta. Chaymi apóstol Pabluga nergan “jana patsacho kaykaq Sagrädu Toldu niraqta rurashqalanchömi Tayta Diosta” sirvinchi (Heb. 9:9). Pablo hebreo cristianucunata cartacamushga wichanga, cristianucunaga mayna Tayta Diospa templun nirajcho adurayta galaycushga cargan 29 caj watacho Jesús shamushganpitana. Chay watacho Jesús bautizacurgan y Mandaj Sacerdotino sirvir galaycushga cargan (Heb. 4:14; Hech. 10:37, 38). w23.10 25, 26 parr. 6, 7

Diosta sirviycashganchicho öraga imano yarpashganchita cambiashwan, chaynopami ima yarpachacächimaptinchipis ama guelanäshunchu, y waquincuna ima nimashganchicunata y ima decidishgancunatapis respetashun. Diosta sirvejcunaga lapanchimi calpachacuyta munanchi ali shongu, humilde y laquipäcoj runa cananchipaj. Bibliaga wilacunmi Jehovaga juc gagano cashganta, mana juchucäcoj ni mana cuyoj (Deut. 32:4). Chayno captinpis voluntänin cumplicänanpäga imatapis rurananpäga aliraj tantiapan. Chauraga noganchipis paynola camashga caycarga, ali tantiarcur vidanchicho o cay munducho imacuna pasaptinpis rasunpa caj caminupitaga yargucushunchu. Diosninchega mandatuncunatapis goycalämashcanchi ali pushamänanchipaj. Bibliata leirmi cuentata gocunchi Jehovaga mana cuyoj gagano caycarpis, ali tantiapämashpanchimi ali shongu caycan lapanchiwan. w23.07 20 parr. 1-3

Bibliachoga nimanchi Jehovaga juc cuyacoj mamano cashganta (Is. 66:12, 13). ¿Ricashcanquichu juc cuyacoj mama imata rurashganta? Wamranta cuyashpan imatapis ruran yanapänanpaj. Chaynolami Diosninchi Jehovapis laquicushganchi hora manami imaypis jaguimanchichu. Pantarcuptinchipis jinala cuyamanchi (Sal. 103:8). Israelitacuna cutin cutin juchata ruraycur arrepenticuptin Jehovaga jinalami cuyargan. Chaymi juc cuticho paycunata cayno nergan: “Qamkunata pasaypami kuyä. Imaykapitapis masmi välipäkunki” (Is. 43:4, 5). Chaynolami noganchitapis Jehová amatar cuyamanchi. Jatun juchata rurarpis shongupita arrepenticuptinchi y yanapacuyninta ashiptinchega jinala cuyamäshun. Payga aunimanchi imaypis perdunamänanchipaj (Is. 55:7). Bibliaga nin Jehová perdunamaptinchega cushishgana cawacushun (Hech. 3:19). w24.01 27 parr. 4, 5

Noganchipis pruebacunapa pasaptinchi Jehová listo caycan yanapämänanchipaj. Capazchi öraga patrunninchita permisuta mañacuyta munashwan asambleaman aywanapaj y aruyninchichopis juc horacunacho arunapaj reuniunninchicunaman mana faltanapaj. Chaypa pasarga alimi canman yarpachacunapaj imano Jehová yanapämashganchiman. Y mañacushganchita chasquiptinchega, Jehovaman yäracuyninchipis masraj winanga. Esdras humilde carmi Jehovapa yanapacuyninta ashirgan. Imayca ruraynincuna captinmi Esdrasga Jehovata ruwacoj yanapänanpaj (Esd. 8:21-23; 9:3-5). Chayta ricarmi waquincunapis Esdrasta yanapargan, y Jehovamanpis yäracurgan (Esd. 10:1-4). Chaymi guellayraycu o familianchita imano yanapänapaj yarpachacuycarga, seguro caycashwan lapan shongunchiwan Jehovata mañacuptinchega pay yanapämänanchipaj cajta. w23.11 18 parr. 15-17

Jehovaga manami mañamanchichu Abrahanno wasinchita y marcanchitapis jaguirinapaj ali nawilanwan ricamänanchipaj. Sinoga imayca ruraycuna caycan Diosman yäracushganchita ricächicunapaj. Payga cushicunmi chaylaraj reuniuncunaman aywajcunata ali chasquiptinchi, nacaycaj hermanucunata yanaparcuptinchi o imalatapis ruraptinchi familianchicunata yanaparcunapaj (Rom. 15:7; 1 Tim. 5:4, 8; 1 Juan 3:18). Jina Diosman yäracushganchega ricacämun runacunatapis cushi cushila yachachicuptinchi (1 Tim. 4:16). Musyanchimi Jehovapa aunicuynincuna rasunpa cumplicunanpaj y pay rurashgancuna imaypis ali cashganta. Chaura Diosman yäracushganchi rurayninchicunacho ricacämuptenga, paypa ricaynincho alita ruraj runa cashun y amigunmanpis ticrashun. w23.12 2 parr. 3; 6 parr. 15

Apóstol Pablo Corinto cristianucunata nergan jana texto nishganga. Pablo nishgantaga lapan mozu cristianucuna cäsucärinman. Cawaynincho imapis ali yargupänanpäga Jehovapa mandätuncunata cäsucärinman y Biblia nishganno cawacärinman (Luc. 2:52). ¿Imanirtaj mozucunaga calpachacärinman pogushga cristianuman ticrananpaj? Olgu cristianucunapäga achca ruraycuna caycan familiancho y congregaciunchopis. Mozularaj caycarga yarpachacuycanquinachi shamoj watacho imacunata rurayta munanquiman. Capazchi yarpaycanqui precursor canayquipaj, siervo ministerial o ancianupis. Jina casaracuyta y wamrayquicuna canantapis munanquichi (Efes. 6:4; 1 Tim. 3:1). Pero chay lapanta lograyta munarga, pogushga cristianumanraj ticranayqui. w23.12 24 parr. 1, 2

Jehová congregaciuncunacho ancianucunatami acrashga cuyashgan siervuncunata cuidananpaj. Paycunaga lapan shongunwanmi calpachacärin Jehová munashganno hermanuncunata yanapänanpaj y ali michicoj capäcunanpaj (Jer. 23:4; 1 Pe. 5:2). ¡Alapami cushicunchi congregaciuncunacho chayno hermanucuna captin! Gedeón imano cashganpita alimi caycan ancianucuna yachacärinanpaj (Heb. 6:12). Payga alimi yanapaj y pushaj Jehovapa siervuncunata (Juec. 2:16; 1 Crón. 17:6). Canan wichanpis ancianucuna calpachacärin sasa tiempucho caycarpis, Jehovapa siervuncunata ali pushananpaj y cuidananpaj (Hech. 20:28; 2 Tim. 3:1). Gedeonga manami japalan imatapis rurarganchu, humilde y cäsucoj cargan, jina sasacunapa pasarpis aguantarganla. Paypita ancianucuna ali yachacärinman. Gedeón rurashganga congregaciuncho caycajcunatapis yanapanga ancianucunapa ruraynincunata valurananpaj y shongupita yanaparcunanpaj (Heb. 13:17). w23.06 2 parr. 1; 3 parr. 3