Mayo

Punta caj cristianucuna pasaypa yarpachacärerganchi “maytsaychöpis pasaypa muchuy kananpaq kashqanta” musyar. Taytacunaga alapachi yarpachacurgan familianta imano manteninanpaj. Mozo jipashcunapis Diosta sirvishgancho mastaraj rurayta munarpis capaz yarpargan nircur-raj rurananpaj. Imano captinpis cristianucunaga laquicuycarla caycarganchu. Chaypa trucan puedishganmanno yachachicur carcaycargan y cushi cushila imalatapis apachicärej Judeacho caycaj cristianucunapaj (Hech. 11:29, 30). Yanapacuyta chasquejcunaga ricarganchi imano Jehová paycunata cuidashganta (Mat. 6:31-33). Jina yanapacuycaj hermanucunatapis masraj cuyar galaycärerganchi. Chaypitapis aycalatapis o imalatapis goycojcuna o jucnopapis hermanuncunata yanapajcunaga alapami cushicärergan (Hech. 20:35). w23.04 16 parr. 12, 13

Öraga jäpa runacunatapis Jehová shongunta yataycunmanmi yanapaycalämänanchipaj. Chayta pasargan Artajerjes reywan, payga Nehemiasta permisuta gorgan Jerusalenpa murallancunata yapay sharcachinanpaj (Neh. 2:3-6). Chaynolami canan wichanpis mana Testigo cajcunapis imalachopis yanapämanchimi, Jehovami caycashga paycunapa guepancho. Mañacushganchita Jehová contestamunanpäga manami jatun milagrutarächu rurapämäshun. Ichanga imano yanapaycalämashganchega paypita mana raquicäcunapämi canga. Chaymi aliraj cuentata gocunanchi mañacushganchicunata imano Jehová contestaycashganta (Sal. 66:19, 20). Jehovata mañacunapäga manami yäracunalanchichu, sinoga imano contestaycalämashganchitapis chasquicushwanmi (Heb. 11:6). w23.05 11 parr. 13; 12 parr. 15, 16

Juc mañacuycho Jehovata aunishcanchi paylata mana guelanaypa sirvinapaj. Öraga chayta cumplinapaj sasano captinpis manami lasaj guepinochu caycan. ¿Imanir? Jehová camamashganchi voluntäninta ruranapaj (Apoc. 4:11). Jinamanpis shongunchicho churashga paylata reguinapaj y sirvinapaj, payno cuyacoj canapäpis. Chaymi Jehová munashganta ruranapaj listo caycanchi. Jehovapa voluntäninta ruraptinchi y churin Jesús rurashganta ruraptinchega alapa cushishgami cawacushun (Mat. 11:28-30). Jina lapan rurashgancunaman y shamoj tiempucho bendicimänanchipaj cajman yarpachacuy, chaynopa Diosta masraj cuyar cäsucuytapis munanqui. Jehovapa mandätuncunata cäsucunapäga manami sasachu caycan (1 Juan 5:3). Nircur, Jesús rurashganta ruray. Payga Taytanpa voluntäninta rurananpäga cutin cutinmi mañacoj yanapänanpaj y premiuta chasquinanpaj cajmanpis yarparaycargan (Heb. 5:7; 12:2). Jesusnopis Jehová calpata goycushunayquipaj mañacuy y ali cawanayquipaj cajmanpis yarparay. Chauraga Jehovata cuyaptiqui y Jesusta gatiraptiqui aunishgayquita cumplinquimi. w23.08 27, 28 parr. 4, 5

Lapanchimi ali ricacunchi pacienciacoj runacunawan caycar. Cushicunchimi paycuna mana piñacuylapa shuyarämaptinchi, y imalachopis pantarcuptinchi jucla mana rabiacuptin. Jina agradecicunchi Bibliapita yachachimajninchita pacienciawan shumaj tantiachimashganchipita Biblia nishganta, y ichiclapa ichiclapa yanapämashganchipitapis Jehová munashganno cawacunapaj. Ichanga imapitapis masga, ¡Jehovata agradecicunchi noganchiwan pacienciacoj captin! Waquincuna pacienciacoj captenga alapa alimi. Y noganchega, ¿pacienciacojchu canchi? Capaz öraga viajipa aywar carreteracho ima chapapis captenga sasami canman jaucala caycänapaj, masraj apurado caycarga. Capaz pilapis rabianächimaptinchi jucla piñacunchi. Y Mushoj Pachaman yarpar ‘imayraj chayga chayamunga’ nir yarpanchi. Chaycuna pasamaptinchega alapa pacienciacoj cananchi. w23.08 20 parr. 1, 2

Jehová nishganta cäsucur Gedeonga walca soldaducunalawan quedacurgan. Öraga caynochi yarpargan: “¿Imanirtaj chayno Jehová mandaycäman? ¿Ganashächuraj guerrata walcajcunalawan?” nir. Chayno yarparpis Jehovata cäsucurganmi. Ancianucunapis pushacoj hermanucunapa wilacuyninta chasquicur cäsucärin (Heb. 13:17). Manchacuycarpis y cawaynin peligrucho captinpis Gedeonga Jehovata cäsucurganmi (Juec. 9:17). Payga musyarganmi Jehová yanapänanpaj Israel masincunata cuidananpaj, chaymi jaucala ricacurgan. Testigucunata chiquishgan naciuncunacho tiyaj ancianucunaga Gedeonno valiente capäcun. Paycunaga reuniuncuna y predicaciunpis cananpaj camacächin. Manami manchacunchu carcelman apacäriptinpis, magashga captinpis o aruyninpita gargushga captinpis. Jatun nacay wichanchoga ancianucuna cawaynintapis peligruman churar valiente cangapaj ima wilacuycunatapis cäsucärinanpaj. w23.06 5, 6 parr. 12, 13

Sumo Sacerdote Jehoiadá lapan alicuna rurashganta Palabrancho caycänanpaj Jehová guelgachergan noganchicunata canan wichan yanapämänanchipaj (Rom. 15:4). Y mana chaylachu, Jehoiadá “Tayta Dios munashqanno kawarmi Israel runakunatapis y templutapis ali rikarqan. Tsaymi wanuykuptin Davidpa Markancho reykuna pamparashqanman pampapäkurqan” (2 Crón. 24:15, 16). ¿Imanotaj Jehoiadá rurashganga lapanchita yanapämanchi? Ancianucunaga yachacärinman imano altanto carcaycänanpaj Jehovapa sirvejnincunata yanaparcunanpaj (Hech. 20:28). Edayashga hermanucuna Jehovata manchacur paylata cäsucäriptenga, manami gonganmanchu Jehová imaypis yanapänanpaj cajta. Jehoiadata Jehová imano tratashganman yarpachacur jovincunaga yachacärinman edayashga cajcunata respetuwan y cuyacuywan trataycunanpaj, masraj paycuna achca watapana Jehovata sirviycaptin (Prov. 16:31). Jina lapanchi yachacunchi pushamajninchi hermanunchicunata imaypis cäsucärinapaj (Heb. 13:17). w23.06 17 parr. 14, 15

Reuniuncho achca cuti comentayta munar maquiquita jogarinayquipaj yarparga, waquincunaman yarpänayqui. Cutin cutin maquinchita jogariptinchega, estudiuta pushaj hermanuga capaz nimäshun comentanapaj waquincuna manaraj comentashga captinpis. Chayta ricar öraga waquincunapis comentayta munanganachu (Ecl. 3:7). Reuniuncho achca hermanucuna comentamuptenga, capaz munashganchino comentayta puedishwanchu. Y öraga reunión ushashgana captinpis capaz ni juclaylapis comentashwanchu cargan. Chayno captin laquicuptinchipis mana piñacushwanchu (Ecl. 7:9). Munashgayquino reuniuncho comentayta mana puediptiquipis, waquincuna parlacamushganta wiyayta puedinqui y felicitaytapis reunión ushariptin. Cuyacuywan hermanucunata felicitaptiquega, paycunata shacyächinqui comentariuyquicunata rurayta munashgayquino. w23.04 23, 24 parr. 14-16

Juc árbol winashganman tupu sapincunapis may chaypa mashtacan y más racuman ticraycun, chayno captenga imapis tunichinchu. Chaynolami ali yäracoj runa canapäga canga Diospa Palabranta estudiaptinchi y yachacushganchiman yarpachacuptinchi, chayga yanapämäshun más convencido caycänapaj Bibliacho caycaj consejucunaga bienninchipaj cashganta (Col. 2:6, 7). Jina yarpachacunanchi unay Diospa sirvejnincuna Jehovapa consejuncunata y leynincunata cäsucur imano bienninpämi cashganta. Ezequielga juc visiuncho ricaycurgan juc ángel templuta tupuycashganta, pay ricashganga manami yäracuyninlatachu sinchiyächergan, sinoga noganchitapis yachachimanchi Jehovapa leynincunata respetanapaj pay munashganno aduranapaj (Ezeq. 40:1-4; 43:10-12). Noganchipis tiempunchita raquiptinchi Bibliata estudianapaj y yachacushganchiman yarpachacunapaj cawayninchicho alapa yanapämäshun. Lapan shongupita Jehovaman yäracuptinchi, ni yarpaylapis yarpäshunchu paytami cachaycunapaj (Sal. 112:7). w23.07 18 parr. 15, 16

Bibliacho wilacun unay tiempucho waquin runacuna imano Jehovata cuyashganta y marcantapis tucuynopa yanapashganta. Familiayquicho y congregaciunchopis chayno hermanucunaga caycanchari paycunapita yachacunayquipaj (Heb. 13:7). Jina Jesuspitapis yachacunquimanmi (1 Ped. 2:21). Chayta rurashgana captiqui, yarpachacuy jucnin jucnincunapita imataj yachacunqui (Heb. 12:1, 2). Nircur yarpachacuy imacunata ruranquiman paycunano canayquipaj. Shumaj yarpachacoj olgucunaga imatapis jucla manaraj decidir shumajraj yarpachacun. Gampis calpachacuy chayno ruranayquipaj. Puntata yachacuy Jehovapa mandätuncunata y yarpachacuy imanirtaj chaycuna ali cashganta. Nircur yachacushgayquimanno imatapis ali cajta decidiy Jehovata cushichinayquipaj (Sal. 119:9). Chaynopa pogushga cristianuman ticranquipaj (Prov. 2:11, 12; Heb. 5:14). w23.12 24, 25 parr. 4, 5

Taytacunaga wamrancunata shumaj yachachinman ali shimilapa parlapänanpaj pilapis creenciancunaraycu rimanacuyta munaptin (Sant. 3:13). Diosta aduranapaj horachomi waquin taytacunaga wamrancunawan shumaj yachacun imano creenciancunata defendinanpaj. Jinamanpis wamrancunata yachachipäcunman mana rabiacuylapa parlapänanpaj, chaynopa waquincuna maslata yachacuyta munananpaj. Familianchiwan yachacushganchega jovincunata yanapanga creenciancunapita shumaj tantiachicunanpaj, jina quiquincuna imaman creishgancunapitapis seguro caycänanpaj. Chaypäga jw.org paginacho caycan “Jóvenes” nishgan yanapacuy, chaycho yurimun “Ponlo por escrito” nishgan ruraycuna jovincunapaj. Chaycunaga jovincunata yanapan yäracuynin masraj mirananpaj y quiquincuna creenciancunapitapis tantiachicunanpaj. Lapanchipis chaycunapita y “Los jóvenes preguntan” nishganpita yachacurga, musyashunmi imano creencianchicunapita pï maytapis ali shimilapa parlapänanchipaj. w23.09 17 parr. 10; 18 parr. 15, 16

Öraga nishwanmi ‘cayta wacta rurashaj’, pero hora chayamuptenga sasa ticracurin cumplinapaj. Philip hermanunchega nerganshi ‘cananga shongüta mashtapayparaj masraj Diosta ruwacushaj’ nir, pero nircurga tiempuntaga mana shumaj camacächirganchu chayta rurananpaj. Erika paninchipis nerganshi ‘cananga predicanäpaj reuniunman tuta tutala chayashaj’ nir. Chayno nishga captinpis junagäpacojshi. Diosta sirvir mastaraj ruranayquipaj sasano ticracuriptinpis ama guelanäcuriychu. Alirämi calpachacunanchi Diospa naupancho imaycata ruranapaj. ‘Puedishänachu’ ninayquipaj trucanga aliraj calpachacuy, chaychomi ricacämunga Jehovata amatar cuyashgayqui. Lapan calpachacushgayquita Jehová ricaycanmi y puedishganchilata ruranapaj payga shuyaran (Sal. 103:14; Miq. 6:8). Chaymi jucninchi jucninchi yarpachacunanchi Diosta sirvir imata ruranapaj puedishganchi cajlaman. w23.05 26 parr. 1, 2

Öraga valiente runacunapis manchacärinmanmi, chayno captinpis ali cajcunata jinala rurarcaycan, jucmi cargan Daniel mozu. Payga imaypis yachacuycashgalami cargan Diospa profetancunapita, jucnin cajmi cargan Jeremías. Ali yachacushganraycurchi cuentatapis gocurgan judiucuna Babiloniapita cutimunanpaj tiempo chayaycämushgantana (Dan. 9:2). Lapan profeciacuna imano cumplicuycashganta ricarga, masrämi Taytan Jehovaman yäracurgan. Pipis Jehovaman yäracunanpaj alapa calpachacuptinrämi selläma valiente runaman ticranga (Romanos 8:32, 37-39 textucunawan tincuchiy). Cawaynincho imaypis valurcharcunanpäga Jehovata cutin cutin mañacushganmi yanapargan (Dan. 6:10). Ima pantashganpita y shongulancho ima yarpashgantapis lapantami Diosta wilapaj yanapänanpaj (Dan. 9:4, 5, 19). Daniel quiquilanpitaga manami valiente carganchu. Lapan cawayninchomi payga calpachacoj valiente cananpaj, chaypäga profeciacunapita yachacoj, Taytan Jehovata cutin cutin mañacoj y payman lapan shongunwan yäracoj. w23.08 3 parr. 4; 4 parr. 7

Autoridäcunata cäsucuyga alapa alimi caycan. ¿Imanir? Mana cäsucoj runacunatanoga mana castigamäshunchu (Rom. 13:1, 4). Jina cäsucoj cashganchiraycu waquin runacunapis Testigucunata ali ricanga. Chayga pasargan unay watacho Nigeria naciuncho. Juc cutichoshi soldaducuna juc Salunman yaycurgan impuestucunata mana pagayta munajcunata ashinanpaj. Pero capitanninga nerganshi hermanunchicunata imatapis mana rurananpaj. Nergan: “Jehovapa testiguncunaga cäsucojmi, impuestutapis pagapäcunmi”. Chaymi ama gongaychu autoridäcunata cäsucuptinchega, lapan Pachacho hermanunchicuna ali ricashga cananpämi yanapacuycanchi. w23.10 9 parr. 13

Waquin Jehovapa sirvejnincuna achca watacunapa shuyarpaycan cay mundupa ushacaynin chayamunanpaj. Chaymi waquincunaga ‘chay junajga mayna chayamunmanmi cargan’ nir yarpapäcunman, ichanga Jehovaga musyanmi sirvejnincuna imano ricacushganta. Chaymi profetan Habacucta nergan: “Cananga manami chayamunrächu öra chay ricaycashayquicuna cumlinanpäga. Ichanga imano carpis cumlengapämi. Gamga ayca wata päsaptinpis shuyaray. Chaycunaga päsanga imaypis päsananpaj caj junajchömi” (Hab. 2:3). ¿Jehová nishganga Habacuclapächuraj cargan o noganchicunatapis yanapämanchi? Canan wichanpis Jehová nishganga cristianucunata yanapacunmi, noganchipis shuyaraycanchi mushoj Pacha chayamunanpaj (Heb. 10:37). Chayta jucla cumplicushganta manaraj ricaycarpis, seguro caycashwan “imano carpis [Jehová] cumlengapämi”. Chayga “päsanga imaypis päsananpaj caj junajchömi”. w23.04 30 parr. 16

Jehová tucuynopa musyachicuycaptinpis Moisesta acrashganta marcanta pushananpaj, israelitacuna cäsucuyta manami munarganchu (Núm. 14:10, 11). Cutin cutin manami reconocirganchu Jehová Moisesta acrashganta paycunata pushananpaj. Chaymi Jehovaga permitirganchu mana cäsucoj israelitacuna Aunishgan Pachaman yaycunanpaj (Núm. 14:30). Pero waquin israelitacunaga Jehová pushaycashgantami reconocirgan, chaymi Jehová nergan: “Sirvimaqnï Calebmi itsanqa nishqäkunata cäsukaman” (Núm. 14:24). Caleb cäsucoj captinmi Jehová bendecirgan y Canaán marcamanpis yaycurgan tiyananpaj (Jos. 14:12-14). Caleb rurashganno, tiempuwan yurej israelitacunapis Josueta cäsucurgan, “payta imaypis respitapäkurqan”. Moisés wanucuycuptin Jehová Josueta acrargan marcanta pushananpaj (Jos. 4:14). Israelitacuna cäsucushganraycu Jehová bendecirgan y pay Aunishgan Pachamanpis yaycuchergan (Jos. 21:43, 44). w24.02 21 parr. 6, 7

Juc doctorga juc runapa pulsun débil o fuerte caycashganta yataycur-raj musyan shongun imano cashganta. Chaynolami noganchipis waquincunata cuyashganchichomi ricacämunga Jehovapaj cuyacuyninchi imano cashganta. Chaura yäracoj masinchicunata alapa manana cuyashganchita cuentata gocurga, Jehovapaj cuyacuyninchipis ushacaycanmanchi. Pero hermanunchicunata alapa cuyashganchiraycu imaycatapis ruraptinchega, Jehovapaj cuyacuyninchipis masraj winaycanga. ¿Imaraj pasanman yäracoj masinchicunata alapa manana cuyarga? Chayno captenga Jehovawan amistäninchipis peligruchochi caycanman. Chaymi apóstol Juan cayno nergan: “Runa mayintsita rikaykar mana kuyaykarqa ¿imanöparaq mana rikashqantsi Tayta Diosta kuyashwan?” (1 Juan 4:20). ¿Imataj yachacunchi? Jehovata cushichiyta munarga jucninchi jucninchirämi cuyanacushun (1 Juan 4:7-9, 11). w23.11 8 parr. 3; 9 parr. 5, 6

Rey Jehoás itilaraj caycaptin, taytanmi wanurgan. Chaymi sacerdote Jehoiadá wamrantano uywargan y Jehovapita yachachicurgan. Jehoiadá ali consejashganta cäsucur Jehoás ali cajcunata acrargan, Jehovalata sirvirgan y israelitacunatapis yanapargan Jehovata sirvinanpaj. Jina Diospa templuntapis alchachergan (2 Crón. 24:1, 2, 4, 13, 14). Taytayquicuna o pilapis Bibliapita yachaycächishuptiquega juc shumaj regaluta goshushgayquinomi caycan (Prov. 2:1, 10-12). Taytacunaga tucuynopami wamrancunata yachachinman alicunata acrananpaj. Taytayquicuna Bibliawan consejashushgayquita cäsucuptiquega paycuna cushicärenga, y masga Jehovata cushichinqui. Jina paywan imaycamapis amigo cayta puedinqui (Prov. 22:6; 23:15, 24). Chayta munaptiquega calpachacuy Jehoás rurashganno ruranayquipaj. w23.09 8, 9 parr. 3-5

Jehová aunimanchi mañacushganchicunata wiyamänanchipaj. Jehová sirvejnincunatami cuyan, chaymi mañacushgancunata imaypis wiyan (Sal. 10:17; 37:28). Öraga canan wichan lapan mañacushganchicunataga Jehová manami gomanchichu. Mushoj Pachachoraj shongunchi lapan munashganta Jehová camaripämäshun. Jehová munaynintaraj más puntaman churan mañacuyninchita manaraj contestar (Is. 55:8, 9). Payga munan shamoj tiempucho olgupis warmipis Gobiernunta yanapänanpaj, y lapancuna cushishga juc shongunola cawapäcunanpaj. Pero Satanasga nergan runacunapura gobernacuptin más ali cawapäcunanpaj (Gén. 3:1-5). Chaura Satanás lulacoj cashganta musyacänanpaj Jehová jaguirgan quiquin runacunapura gobernacunanpaj, y chayraycumi canan imayca mana alicunata ricanchi (Ecl. 8:9). Pero Jehovaga canan wichan chaycunata mana alchachingachu. w23.11 21 parr. 4, 5

Jehová cayta Abrahanta aunirgan: “Qam kaynikipami kay patsacho lapan casta runakunapis bendicionnïta chaskipäkunqa”. Pero Abrahán 100 watayojna y Sarapis 90 watayojna caycar wamran manaraj yuriptin, paycunaga yarpachacurganchi Jehová aunishganta manana cumplinanpaj. Chayno captinpis “promitishqanta Tayta Dios imanöpa cumplinanpaq kashqanta mana tantiyarpis Abrahamqa criyirqanmi” (Rom. 4:18, 19). Y tiempuwanga Abrahán ima shuyarashgan cumplicurgan, wamran Isaac yurirgan (Rom. 4:20-22). Noganchipis munanchi Jehová alita ruraj runatano ricamänanchipaj y amiguncunapis canapaj. Chaymi, Abrahanpita parlarmi Pabluga nergan: “Abraham yäracushanpita Tayta Dios alli ricashanta rimar manami payllapächu rimaycan. Noganchïpäpis rimaycanmi. Noganchïtapis allimi ricamäshun taytanchi Jesucristuta cawarachimoj Tayta Diosman yäracushaga” (Rom. 4:23, 24). Chaypäga Abrahanno Diosman yäracushganchi rurayninchicunacho ricacämunman y shuyarashwan aunishgantapis cumplinanpaj. w23.12 7 parr. 16, 17

Gampis sasacunapa pasaycaptiqui manchacuycarga, ama gongaychu Jehová altanto caycan imacunapa pasaycashgayquipita y imano sienticushgayquipitapis. Egiptucho israelitacuna esclavuno carcaycaptin Jehová ricargan fiyupa laquicur nacarcaycashganta (Éx. 3:7). Laquicuycunapa pasarga capaz öraga cuentata gocunchichu imano Jehová yanapaycämashganchita. Chaymi mañacuyninchicho Jehovata nishwan yanapämänanchipaj noganchiraycu ruraycashganta ricanapaj (2 Rey. 6:15-17). ¿Yarpanquichu maygan discursulapis o pilapis reuniuncho comentashgan shacyächishushgayquita? ¿Ima publicaciunlapis, videupis o canciunpis yanapäshushcanquichu? ¿Maygan hermanulapis Bibliawan calpata goshushcanquichu? Cay tapucuycunaman yarpachacurga alapa alimi canga. Jehová amatar cuyamashpanchimi cuyacoj hermanunchicunawan y Palabran Bibliawanpis yanapämanchi, chaymi sasacunapa pasarga chaycunata ama gongashwanchu (Is. 65:13; Mar. 10:29, 30). Jehová chay lapanta ruran noganchiraycu alapa yarpachacur, chaymi paylaman yäracunanchi (Is. 49:14-16). w24.01 4, 5 parr. 9, 10

Cielupa cuticunanpäna caycarmi Jesusga gatejnincunata yarpächergan ali wilacuyta apapäcunanpaj “Jerusalencho, Judea probinsyacho, Samaria probinsyacho, may-chay nasyunchöpis” (Hech. 1:8; Luc. 24:46-48). Chay wichancunalachomi pushacoj religiosucunaga Pedrutawan Juanta carcelmanpis y autoridäcunapa naupanmanpis apapäcurgan. Wanuchinanpaj juraparmi mandapäcurgan manana yachachicärinanpaj (Hech. 4:18, 21). Pedruwan Juanga caytami nipäcurgan: “Shumaq tantiyakäriy, taytakuna. ¿Aliku kanman Tayta Diosta cäsukunäpa trukan qamkunata cäsukäriptï? Rikashqäta y mayashqätaqa manami upälakärïmantsu” (Hech. 4:19, 20). Pushacoj religiosucuna cacharcäriptinshi cay ishcay apostulcunaga waquin discipulucunawan juntacärergan. Nircurga lapancunana Jehovata ruwacärergan voluntäninta rurapäcunanpaj. Chayno mañacärishgantaga Jehová contestarganmi (Hech. 4: 31). w23.05 5 parr. 11, 12

Jehovawan Jesusga chaychica watacuna junto caycashga. Chaymi alapa cuyanacärin, paycunanoga manami pipis canchu. Cay junajpaj acrashgan textucho Jehová Jesusta nergan cuyashganta. Payga manami nirganlachu “Paypitami kushishqa kaykä”, sinoga waquincunata musyachicuyta munargan wamranta alapa cuyashganta, chaymi nergan: “Payqa kuyay tsurïmi” (Efes. 1:7). Jesusga yarpaylapis yarparganchu Taytan Jehová mana cuyashganta, chaypa trucan payga imaypis convencido caycargan Jehová alapa cuyashganpita (Juan 3:35; 10:17; 17:24). w24.01 28 parr. 8

Imaraj canman juc cuyashga ayluyqui gampita manacajta parlar galaycuptin. Pero gam musyanqui chayga mana rasunpa cashganta, chayno captinpis waquincunaga rasunpa cajtano creir galaycärin y waquincunatapis wilapan. Jutiqui manacajman churashga captin, alapachi yarpachacunqui y laquishgapis ricacunquichi ¿au? Cay tantiachicuywan cuentata gocunchi Jehová imano ricacushganta, juc angelnin Paypita manacajta parlaptin y jutintapis manacajman churaptin. Nircur Adanwan Evapis chay mana ali ángel nishganta creircur, Diospa contranman churacargan. Chayraycu lapan runacuna juchasapa canchi y tiempuwanga wanunchipis (Gén. 3:1-6; Rom. 5:12). Satanás lulacushganpitami imayca mana alicunapis yurimushga, wanuy, guerracuna y ima nacaycunapis. Chay lapancunata ricar Jehová alapami laquicun, pero manami rabiashgalachu o ajayashgalachu cawacun. Chaypa trucanga Biblia wilacun cushishgala cawaj Dios cashganta (1 Tim. 1:11). w24.02 8 parr. 1, 2

Noganchipis, ¿imataj rurashwan Joseno canapaj Jehovapita mana raquicäcunapaj? Cananlapitana yarpachacushwan imata ruranapaj juc tentación captin. Yachacushwanpis Jehová chiquishgancunata jucla chiquinapaj, chaycunamanga ni ichiclapis yarpashwanchu (Sal. 97:10; 119:165). Rasunpa cajta mayna tarishga carga, munaycanquichi Jehovata lapan shonguyquiwan sirvinayquipaj. Pero, ¿imalapis michaycäshunquichu Jehovalata sirviyta auninayquipaj y bautizacunayquipaj? Chayno captenga Davidno ruray, payga Jehovata cayno mañacurgan: “Tayta Dios, imano kawashqätapis rikaykalämay. Shonqü alita o mana alita yarpashqantapis musyaykulay. Yarpashqäpis, parlashqäpis o rurashqäpis mana ali kaptinqa tantiyaykatsilämay. Qamwan imayyaqpis kawanäpaq yachaykatsilämay” (Sal. 139:23, 24). Jehovata lapan shonguyquiwan cuyashgayquega ricacämunga paylata sirvinayquipaj auniptiqui y bautizacuptiqui. Jehovaga aunicun sirvejnincunata bendicinanpaj (Heb. 11:6). w24.03 6 parr. 13-15

Mandaj Sacerdotiga sacrificiucunata rupachipäcoj israelitacunapa juchancuna perdunashga cananpaj. Sagrado Tolduta sharcarcachirna Jehovaga Aaronta acrargan mandaj sacerdote cananpaj. Ichanga apóstol Pabluga nergan “mandaq cüra [o sacerdote] wanuptin juknami trukan yaykuq” (Heb. 7:23-26). Jinamanpis chay mandaj sacerdoticuna juchasapa cashganraycu quiquincunapäpis sacrificiucunata rupachipäcoj. Jesús ichanga chay mandaj sacerdoticuna rurashgannochu rurargan, ¿imanir? Señorninchi Jesucristo cananga “jana patsacho kaq Sagrädu Tolduchömi mandaq cüra [o sacerdote] kaykan. Tsay toldutaqa manami runakunatsu sharkatsishqa, sinöqa kikin Tayta Diosmi” (Heb. 8:1, 2). Pabluga nergan Jesucristo “mana ushakaq kar imayyaqpis mandaq cüra kaykan”. Jina “jutsaynaq santu kar”, unay mandaj sacerdoticunano cutin cutin sacrificiucunata rupachipäcunchu. w23.10 26 parr. 8, 9

‘Nawpa kaq ciëlo’ niptenga parlaycan Diablupa y demoniucunapa maquincho caycaj gobiernucunapämi (Mat. 4:8, 9; 1 Juan 5:19). Y Bibliacho Pachapita parlarga öraga parlaycämun cay Pachacho tiyaj runacunapämi (Gén. 11:1; Sal. 96:1). Chauraga, ‘nawpa kaq patsa’ niptenga parlaycämun Diosta mana cäsucoj runacunapämi. Jehovaga mana ali gobiernucunata y fiyu runacunatapis ushacächenga y trucachenga paypa Gobiernunwan y mushoj Pachacho cäsucoj runacunalami cawapäcunga. Jehová cay Pachata alchachenga y runacunatapis yanapanga juchaynaj cananpaj. Profeta Isaías nishganno, cay Pachaga cuyaylapaj paraisuman ticranga. Noganchitapis tucuy gueshyacunapita aliyächimäshun. Mana purejcuna, mana ricajcuna y mana wiyajcunapis aliyächishga canga, jina wanushgacunapis cawarimunga (Is. 25:8; 35:1-7). w23.11 4 parr. 9, 10

Bibliaga wilacun jatun nacay ilajpita galaycunanpaj (Mat. 24:21). Chayno captinpis manami manchacushunchu waquin desgraciacuna waquincunata manchachishganno. Jesús gatejnincunata nergan mayna camaricushgala carcaycänanpaj chay junajpaj. Jesús nishganta cäsucurga chay junajcho manami wanushunchu y waquincunatapis yanaparcushun salvacärinanpaj (Luc. 21:36). Chaypäga valurwan imatapis aguantaj runa cashwan, valurwan imatapis aguantarmi Jehovata cäsucushun y payman yäracushun (Hab. 3:17, 18). Jina cuyapäcoj runa cashwan. Maygan cristiano masinchicunapa imalancunapis mana captin cuyapäcoj car jinan hora imalawanpis yanaparcushun (Ezeq. 38:10-12). Jinamanpis cuyacoj runa cananchi. Chiquimajninchicuna ushacächimänanchita munaptin, capaz öraga juc tacsha cuartulacho cristiano masinchicunawan caycashwan shacyächinacur calpata gonacunapaj. w23.07 2 parr. 2, 3

Casaducunaga imayca yachacärinanpaj caycan Áquila y Priscila matrimoniupita. Paycunaga apostulcuna cawashgan wichan Diosta sirvipäcurgan (Rom. 16:3, 4). Paycunaga arupäcoj, predicapäcoj, waquincunatapis yanapacärej (Hech. 18:2, 3, 24-26). Bibliachopis ishcancuna juntula caycashganpitami wilacun. Casaracushga cajcunaga, ¿paycuna cawapäcushganno cawacuyta puedipäcunmanchuraj? Aumi. Imatapis raquinacushgano rurapäcunanpaj trucanga imalapis caycangachi ishcancunaraj rurapäcunanpaj. ¿Manachuraj gamcunapis Áquila y Priscila rurashganno ishcayquicuna yargur Diospita yachachicärinquiman? ¿Manachuraj wasichopis ima trabajulapis captenga ishcayquicuna arupäcunquiman? (Ecl. 4:9). Ali parlapacur jucniqui jucniqui yanapänacurga casado vidayquega alimi ricacunga. w23.05 22, 23 parr. 10-12

Lapanchimi öraga imalapitapis manchacushwanmi. Davidpis öraga manchacurganmi Saúl wanuchinanpaj gaticachaycaptin. Davidga Gat marcaman gueshpir aywacurgan pacacunanpaj. Pero Gat marcapa Reynin Akista cayno wilargan ‘achca runacunata wanuchej Davidmi caycho caycan’ nir, chayta mayar David alapami manchacurgan (1 Sam. 21:10-12). Payga yarparganchi rey Akís wanuchinanpaj cajta. ¿Imataj David rurargan manana alapa manchacunanpaj? Salmo 56 capitulucho David wilacun Gat marcacho caycar imano ricacushganta. Chaycho nimanchi imanir pay alapa manchacushganta y imano Jehovaman yäracushgan yanapargan alapa manana manchacunanpaj (Sal. 56:1-3, 11). Jehovapa yanapacuyninwan Akispa naupancho David loco tucurgan, y chay rurashganga alipämi cargan. Rey Akís Davidta manana cäsupargannachu. Chauraga David gueshpicurgan (1 Sam. 21:13–22:1). w24.01 2 parr. 1-3

¿Pïcunapätaj cay texto parlaycan? Cielupa acrashga cajcunapaj. Paycuna cieluchona carcaycaptin, Jesuswan y waquin angelcunawanpis Armagedoncho peliapäcunga Diospa chiquejnincunawan. Cayman yarpäshun: Pachacho caycaj waquin cielupaj acrashga cristianucuna edayashgana caycar calpaynaj carcaycan. Pero cawarircamur cieluchoga angelcunano poderyoj capäcunga y Reyninchi Jesusta yanapanga. Armagedón usharcuptinna Pachacho caycaj runacunata yanapanga juchaynajman ticrananpaj. Paycunaga canan wichan mayna imaycacunata ruraycan Diospa sirvejnincunaraycu, pero cieluchona caycaptin cay Pachacho caycajcunata masrämi yanapacunga. w24.02 6, 7 parr. 15, 16

Waquincuna listuna caycaptinpis Jehovata sirviyta auninanpaj y bautizacunanpäpis manami ruranchu. Paycunaga manchacärinmi jatun juchata rurananpaj y congregaciunpita gargushga cananpaj. Pero Bibliachoga Jehová sirvejnincunata aunicun yanapänanpaj “pay munashqanno” cawacunanpaj y alicunata rurapäcunanpaj (Col. 1:10). Chaymi gampis manchacuycarga, seguro caycay waquincunata yanapashganno Jehová gamtapis yanapäshunqui alicunata ruranayquipaj (1 Cor. 10:13). Pipis jatun juchaman ishquishga carpis, shongupita arrepenticurga congregaciunpita gargushga cangachu. Jehovaga yanapämanchimi paylata sirvir caycänapaj. Juchasapa cashganchiraycu, öraga ima tentaciunmanpis ishquiyta munashwanchi (Sant. 1:14). Pero, ima tentaciunpis captenga quiquiquipitami caycan acranayquipaj chayman ishquinayquipaj o manapis. Waquincunaga nipäcun ima munashgancunata controlayta mana puedishganta. Pero chayga manami rasunchu. Lapanchimi yachacuyta puedinchi ima munashganchicunata y yarpashganchicunatapis controlayta. w24.03 5 parr. 11, 12