Junio

Punta caj cristianucuna ilajpita sasacunapa pasaptinpis manami guelanacärirganchu. Ayvecis paycuna mana yarpashgan hora chiquishga cargan. Ricärishun Bernabetawan apóstol Pabluta ima pasashganta Listra marcacho Diospita yachachicuycaptin. Galananlachoga runacuna ali chasquicur shumaj wiyargan. Ichanga chay junajcho chiquicojcunaga runacunata shimita jatipargan, chaura Pabluta sagmargan y wanushgatano jaguirergan (Hech. 14:19). Pero Bernabewan Pabluga juc ciudämanna aywaycur jinala yachachicur galaycurgan. Chayraycu “achca runacuna Jesusman yäracuran” y ruraynincunawan y ima nishganwanpis cristiano masincunata shacyächergan (Hech. 14:21, 22). Bernabewan Pablo chiquishga captinpis manami yamacäcurganchu y chayga achca runacunatami yanapargan. Noganchipis mana yamacäcur Jehová mandamashganchita ruranapaj calpachacuptinchega achca bendiciuncunatami chasquishun. w23.04 16, 17 parr. 13, 14

Rey David achca cuti chiquejnincunaraycu cawaynin peligrucho caycargan, chaymi cutin cutin Jehovata mañacurgan yanapänanpaj. Davidga segurumi caycargan ima mañacushgantapis Jehová contestashganta. Chaynolami noganchitapis Jehová contestaycalämäshun. Bibliaga nimanchi imano Jehová calpanta y yachayninta sirvejnincunata goycun. Jina hermanunchicunawanpis y hasta jäpa runacunawanpis Jehová yanapaycalämanchi imaycacunata aguantanapaj. Öraga ima mañacushganchitapis munashganchino Jehová goycamäshunchu, pero ama gongashunchu, payga contestaycalämäshunmi. Payga musyanmi ima necesitashganchita y tiempulanchomi goycalämäshun. Ali yäracur mañacuycäshunla, Jehovaga canan wichanpis shamoj tiempuchopis cuidaycalämäshunmi, “kuyaparmi lapan kawaqkunapaqpis” bendiciunninta churamunga (Sal. 145:16). w23.05 8 parr. 4; 13 parr. 17, 18

Calpachacushgayquipita ima bendiciuncunata tarinayquipaj cajman yarpachacuy. Bibliata imano leinayquipaj y Diostapis imano mañacunayquipaj calpachacuycaptiquega, yarpachacuy chay lapanta ruraptiqui Jehovawan más amiguraj canayquipaj (Sal. 145:18, 19). Ali cristiano cayta munarga yarpachacuy imanotaj cayga yanapäshunquiman piwanpis ali goyäcunayquipaj (Col. 3:14). ¿Ima mastataj ruranquiman? Alichi canman imaraycu imatapis rurashgayquita anotacurcuptiqui, y chay anotacushgayquitaga gongaycuychu. Jina shacyächicoj amigucunawan juntacuy (Prov. 13:20). Öraga ganasninchega imalapäpis mana captinpis calpachacushwanrämi Diosta mastaraj sirvinapaj, y chaypäga maypitapis calpata ashinchi. Chayta ruranapaj sasa captinpis, imayca bendiciuncunatami chasquishun. w23.05 27, 28 parr. 5-8

Imalachopis pantashganchiraycu laquishga ricacuptinchega yanapämäshun mana ali rurashganchita wilacunapaj, cawayninchicho cambiucunata ruranapaj y unay rurashganchicunata manana ruranapaj yapay chaycunaman mana ishquinapaj. Chayno rurarga imaycamapis cawayta chasquinapaj jinala corriycäshun. ‘¿Imanirtaj cayta rurashcä?’ nerga, laquicuycarla ama cacuychu. Pantashgayquicunalaman ama yarparäcuychu ni piñacuypischu, jina waquincunatapis ama culpanquimanchu. Chaypa trucanga reconöcinquiman pantashgayquipita y puedishgayquimanno calpachacuy alicunata ruranayquipaj. Culpayoj ricacuptiquega, ñanpu shongulayquiwan Jehovata mañacur ‘juchäpita perdunaycalämay’ nirmi payta mañacunquiman (Sal. 25:11; 51:3, 4). Y pitapis ofendishga carga disculpacunquimanmi, munarga ancianucunapa yanapacuynintapis ashinquimanmi (Sant. 5:14, 15). Pantashgayquicunapitaga yachacunquiman yapay chaycunata manana ruranayquipaj. Chayta ruraptiquega Jehová yanaparcushunqui y ricaynincho ali caycanquipaj (Sal. 103:8-13). w23.08 28, 29 parr. 8, 9

Jehoiadapa yanapacuyninwan mozularaj caycar rey Jehoás calpachacurgan alicunata rurar Jehovata cushichinanpaj (2 Rey. 12:2). Ichanga Jehoiadá wanucuycuptin, Jehovata mana aduraj Judá nacionpa autoridänincunata rey Jehoás wiyar galaycurgan (2 Crón. 24:4, 17, 18). Chayraycu alapa laquishga caycarpis, “profëtankunata TAYTA DIOS kacharqan wilakushqanta chaskikur pay munashqanno kawapäkunanpaq. Tsayno wilakuptinpis paykunaqa manami chaskikärirqantsu”. Jehoasga manami cäsucurganchu Jehoiadapa wamran Zacariasta, payga Diospa profetan, sacerdote y primunpis cargan, chaypa trucan Zacariasta wanuchinanpaj mandargan (2 Crón. 22:11; 24:19-22). Jehová nishga cargan: “Manakaqman churamaqkunataqa penqaymanmi churashaq”. Y chaytami Jehoasta pasargan (1 Sam. 2:30). Jehovata respetayta y manchacuyta jaguishganpita, tiempo pasariptin Siria soldaducunaga walcala caycarpis Jehoastawan “tsaytsika soldädunkunata vencipäkurqan” (2 Crón. 24:24-25). Jehoás antsa jitaraycajta ricar “kikinpa yanapaqnincunala wanutsipäkurqan”, chaytaga rurargan sacerdote Zacariasta wanuchishganpitami. w23.06 18, 19 parr. 16, 17

Achca watacunana pasashga cargan apóstol Pablo Éfeso marcacho caycashganpita, payga chaycho Diospa Gobiernunpa ali wilacuyninta yachachicurgan (Hech. 19:1, 8-10; 20:20, 21). Pabluga yäracoj masincunata alapa cuyajmi y yanapayta munargan Jehovata sirviycarla caycänanpaj. Efesupita cristianucuna rasunpa cajta manaraj yachacur, imayca luta creenciancuna y costumbrincunapis caycargan. Chay marcacho tiyaj runacunaga jucwan jucwan cacärej y pengacuyninpis manami carganchu. Teatrucunacho y fiestacunachopis galapächu runacuna caycargan y ganra ruraycunatapis rurapäcoj (Efes. 5:3). Runacunapäga ni ichiclapis pengacuynin carganchu (Efes. 4:17-19). Conciencianpis o shongunpis chucruyashga cargan. Shumaj tantiarganchu ima ali cashganta y ima mana ali cashgantapis. Chaymi Pabluga nergan juiciuyniynaj cashganta y Dios munashganno mana cawacushganta. Pero waquin Efesupita runacunaga chacaycho caycashganpita yargushga cargan, chaymi Pabluga nergan: ‘cananga “atsikyaqchöna kawarkaykanki”’. w24.03 20 parr. 2, 4; 21 parr. 5, 6

Gedeonga alapa calpachacurganrämi israelitacunata ali pushananpaj. Juc cuticho Gedeonwan soldaduncunaga pasaypa utishga carcaycargan madianita runacunawan peliaycashganpita. Madianita runacuna gueshpir aywacäriptin, paycunaga guepanta gaticachar aywargan. Jordán mayutapis chimparganrämi chiquejnincunata taripaycur wanuchinanpaj (Juec. 7:22). Chacaycho peliar madianitacuna gueshpishgan näni pasaypa sasa purinanpaj captinpis chaytami rurapäcurgan (Juec. 8:4-12). Gedeón chayta ruraptin, Jehová yanaparganmi (Juec. 6:14, 34). Juc cuticho, ishcay rey madianitacuna camëlluncunata muntacurcur gueshpircaycaptin Gedeonwan soldaduncunaga guepanta chaquilapa aywargan, y taripaycur wanurachergan (Juec. 8:12, 21). Canan wichan ancianucunapis yäracärinmanmi Jehová imaypis yanapänanpaj cajta, payga “manami janjampaykachantsu ni utikantsu”. Chaymi yäracäriy imapäpis Jehová calpalanta goycushunayquipaj (Is. 40:28, 29). w23.06 6 parr. 14, 16

Ima pruebacunapa pasarpis, shongupita mana cachaypa Jehovata sirvinquiman. Chaypäga Jehovalaman yäracunquiman. Diospa sirvejnin Barac Jehovata lapancho cäsucuptin chiquejnincunata vencirgan. Chay wichan israelitacunapäga imaycancunapis manami carganchu peliapäcunanpaj. Chayno captinpis Jehovaga Baracta nergan Sisarapa soldaduncunawan peliapäcunanpaj (Juec. 5:8). Paycunaga ali camaricushga carcaycargan. Jehovaga Baracta nergan Tabor jircapita urämunanpaj Cisón pampaman, chaycho Sísara 900 carretancunawan shuyarpaycargan. Chay pampacho Sísara carretancunawan vencinanpaj cajta musyarpis, Baracga Jehovata cäsucurganmi. Paywan soldaduncuna uraycämuptin, Jehová locu tamyata tamyachimurgan, chaura Sisarapa carretancunaga mitucho tunir y jaticar galaycurgan. Chayno Jehová Baracta yanapargan vencinanpaj (Juec. 4:1-7, 10, 13-16). Noganchitapis Jehová yanapämashwanmi payman lapan shongunchiwan yäracuptinchi y lapan nimashganchicunata cäsucuptinchi. w23.07 19 parr. 17, 18

Salvaciunninchega canga pacienciacoj captinchirämi. Unay Diospa sirvejnincunapis pacienciayoj cashganraycu Jehová prometishgancunatami chasquipäcunga (Heb. 6:11, 12). Chacracho aroj runapis imatapis mururga manami musyanchu imaytaj winananpaj cajta, ichanga pacienciayoj captin musyanmi imaylapis cosechananpaj cajta (Sant. 5:7, 8). Chaynolami cristiano cajcunapis imaycacunata ruran Jehovata sirvinanpaj, Señorninchi cutimunanpaj cashganta imay junaj mana musyarpis (Mat. 24:42). Jehovaman yäracurmi musyanchimi tiempulancho lapan aunishgancunata cumplinanpaj cajta. Pero ¿imaraj pasanman pacienciacoj mana captinchega? Capaz yamacäcushwanmi Jehovata sirvir y paypitapis raquicäcushwanchi. Jina shongunchi munashgalantana ruraytapis galaycushwanchi. Ichanga pacienciacoj captinchega, cay mundo ushanancama aguantaycashwan y salvaciuntapis tarishun (Miq. 7:7). w23.08 22 parr. 7

Daniel 2:41-43 textucho caycaj profeciatami Daniel y Apocalipsis librucunacho waquin profeciacunawan tincuchiptinchega, tantiarcunchi canan wichan Reino Unido y Estados Unidos naciuncuna cashganta; chay naciuncunaga canan wichan alapa munayniyoj caycan. Rey Nabucodonosor sueñushganta Daniel tantiachiptin nergan: “Tsay nacioncuna aybësis fiërruno fuerti kanqa y aybësis mituno débil kanqa”. ¿Imanirtaj “aybësis” débil canman cargan? Chay naciuncunacho tiyaj runacunaga gobiernucunapa contranman sharcupäcuptin manami jaguirinchu autoridäcuna munashgancunata camacächinanpaj. Nabucodonosor sueñuynincho ricashganpita Daniel wilacushganga imaycata yachacunapaj caycan. Juc, Reino Unido y Estados Unidos naciuncuna alapa munayniyoj car Punta caj y Ishcay caj Jatun Guerracuna wichan waquin naciuncunata vencirgan. Ichanga chay naciuncunacho runacunaga quiquincunapura chiquinacärin y autoridäcunapa contranchopis sharcupäcun, chaymi munashgancunata rurayta camäpacunchu. Ishcay, cay ishcay naciuncunaga jinala munayniyoj caycanga Diospa Gobiernun cay Pachacho gobiernucunata ushacächiyta galaycuptin. w23.08 10, 11 parr. 12, 13

Imayca sasacunapa pasarmi Davidga laquicurganmi (Sal. 18:4, 5). Pero Jehová juc taytano alapa cuyashganta ricar, Davidpa calpanpis yapay yurirgan. Y Jehová amigun cashganta musyar, nergan “ali qewakunachömi mitsiman. Chuya yakumanmi pushaman” nir. Chaynopa calpatapis yapay tarirgan Jehovata cushishga sirviycänanpaj (Sal. 18:28-32; 23:2). Noganchipis sasacunapa pasarga cayno nishwan: “TAYTA DIOSQA imaypis kuyamantsimi. Kuyapäkuq kashqanqa manami ushakantsu” (Lam. 3:22; Col. 1:11). Davidpäga achca chiquejnincuna caycargan y wanuchiytapis munargan. Pero Jehová alapa cuyashganta musyar seguro caycargan imapitapis chapänanpaj. Jehová ladulancho imaypis caycashgantano ricacurgan. Chaymi cayno nergan: “Mantsariptïpis paymi valorta qomashqa” (Sal. 34:4). Davidpa cawaynin cutin cutin peligrucho caycaptin, payga Jehová alapa cuyashganman más yarpachacurgan, chaymi manchacuyninpis aywacurgan. w24.01 30 parr. 15-17

Jehoás mana alicunata rurashgantaga ama ruraychu. Jehoiadá wanushganpita, Jehoasga Jehovata mana cuyaj Judacho mandajcunapa consejuncunata cäsucuyta galaycurgan, paycunaga mana ali amigucuna cargan (2 Crón. 24:17, 18). Chayta rurashganpita mana alicunaman chayargan, y primun Zacarías corrigiptinpis Jehoasga piñashga caycar wanuchinanpaj mandargan (2 Crón. 24:20, 21; Mat. 23:35). Upa runano lutanta rurargan. Galananlacho alicunata rurarpis, tiempuwanga runa wanuchejman ticrargan y Jehovapa contranmanpis churacargan. Chaymi sirvejnincunala payta wanuchergan (2 Crón. 24:22-25). ¡Jehovata y Diosta cuyajcunata cäsucurga manachi mana alicunamanga chayanmanchu cargan! w23.09 9 parr. 6

Jesusga musyarganmi apóstol Pedro ali shongu cashpan cäsucoj cananpaj. Chaymi cuyacuywan cayno nergan: “Ama mantsakaytsu”. Chayta wiyarga Pedruga alapachi cushicurgan, chaymi tiempuwan wauguinwan Andrés trabajunta jaguiriycur Jesuspa discipuluncunaman ticrapäcurgan. Chayta rurashganraycu, achca bendiciuncunata tarergan (Mar. 1:16-18). Jesuspa discipulun cashpan, Pedruga ricargan Jesús gueshyaycajcunata alchacächishganta, supaycunata gargushganta y wanushgacunatapis cawarachimushganta (Mat. 8:14-17; Mar. 5:37, 41, 42). Jina juc visiunchopis ricargan imano Jesús Diospa Gobiernuncho rey cananpaj cajta (Mar. 9:1-8; 2 Ped. 1:16-18). Aumi, Pedruga manachi yarparganchu chaycunata ricaycunanpaj. ¡Mayrajchi Pedruga cushicurgan quiquinpita mana alita yarpar guepaman mana cutishganta! Jesuspa discipulunman ticraycur achca bendiciuncunata chasquergan. w23.09 21 parr. 4, 5

Naupa caj cartancho apóstol Pedro nergan: “Rasunpa kuyakuq runaqa imaykata ruraptinpis perdonanmi” (1 Ped. 4:8). Cayta escribiycur Pedruga yarparganchi unaycho Jesuswan perdonpita parlashganta. Payga Jesusta nergan: Runa masëtaga, “¿ayka kutitaq perdonäman? ¿Qanchis kutitsuraq?”. Chayno nir Pedruga yarparganchi alita ruraycashganta. Ichanga Jesusga yachachergan ganchis chunca ganchis cuticuna o mana yupaypa perdunananpaj; chaypitaga noganchipis yachacunchimi (Mat. 18:21). Juchasapa cashganchiraycu Jesús nishganta cäsucunapaj sasa captenga ama guelanäcuychu. Lapan puedishgayquimanno calpachacuy runa masiquita perdunanayquipaj, chaynopa paycunawan jaucala goyäcunayqui. w23.09 29 parr. 12

Jatun pescadupa pachancho caycar, Jonás musyarganmi rurashganpita arrepenticuptin y shongupita mañacushgantaga Jehová wiyananpaj. Y, chayman yarpachacur yäracurgan Jehová yanapänanpaj cajta. Chaymi pescadupa pachanpita yargushgana captin, camaricushga caycargan cargunta shumaj cumplinanpaj (Jon. 2:10–3:4). Pruebacunapa pasar laquishga caycaptiqui, ¿sasachu caycan mañacunayquipaj o ganasniquipis canchu Bibliayquita leinayquipaj? Chayno captenga ama gongaychu, Jehovaga musyanmi imano sienticushgayquita. Chaymi, calpaynaj caycar shumaj oraciunta mana rurarpis, seguro canayqui Jehová wiyashunayquipaj cajta (Efes. 3:20). Chauraga imalayquipis nanäshuptiqui o ganasniqui mana captin leinayquipaj y estudianayquipaj, ali canman Biblianchipita o publicaciunninchicunapita grabraciuncunata wiyanayquipaj. Jina jw.org paginacho caycaj videucunata ricarcuptiqui o canciuncunatapis wiyaptiquega yanapäshunquimi. Chay lapanta ruraptiquega “Jehová calpayquiwan yanapaycalämay” niycashgayquinomi canga. w23.10 13 parr. 6; 14 parr. 9

Sagrado tolducho y tiempuwan templucunachopis ishcay cuartucuna caycargan: “Lugar Santu” y “Lugar Santïsimu” cajcuna, y chaycunataga juc cortina raquirargan (Heb. 9:2-5; Éx. 26:31-33). Lugar Santuchoga caycargan goripita candelabro, inciensuta goshtachinanpaj altar y juc mesapis Tayta Diospaj tantata churananpaj. Chaymanga acrashga sacerdoticunalami yaycoj Jehová mandashganta rurapäcunanpaj (Núm. 3:3, 7, 10). Lugar Santïsimuchona goriwan enchapashga pacto babul caycargan y chayga ricächicoj Jehová chaycho caycashganta (Éx. 25:21, 22). Chay cuartumanga mandaj sacerdotila yaycoj. Y Perdunta Tarinan Junajcho mandaj sacerdotiga pacto babulpa jananman uywacunapa yawarninta chajchoj, chaynopa quiquinpa y Israel masincunapapis juchancuna perdunashga cananpaj (Lev. 16:2, 17). Tiempuwanga Jehová shumaj tantiachicurgan sagradu toldupa rurincho caycajcuna imacunawan tincushganta (Heb. 9:6, 7). w23.10 27 parr. 12

Bibliachoga achca cuticunacho cayno nimanchi: “Jukniki juknikipis kuyanakäriy” (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Pero cuyacuyninchega shogulanchichomi yurimun; pipis ricayta puedinchu. Chauraga, ¿imanopataj waquincunaga musyapäcunman cuyacoj cashganchita? Chayga ricacämunga rurayninchicunacho y parlashganchichopis. Ricärishun imanotaj ricächicunchi yäracoj masinchicunata rasunpa cuyashganchita. Bibliaga nimanchi “ama lulapänakuytsu” (Zac. 8:16). ‘Runa mayikiwan kuyanakur ali kaway’ (Mar. 9:50). “Wakinkunapis ali kawananpaq yarpachakäriy” (Rom. 12:10). ‘Jucniqui jucniquipis shumaj chasquinacuy’ (Rom. 15:7). “Perdonanakäriy” (Col. 3:13). “Jukniki juknikipis shakyätsinakur yanapanakäriy” (Gál. 6:2). “Jukniki juknikipis shakyätsinakäriy” (1 Tes. 4:18). “Jukniki juknikipis tantiyatsinakur shakyätsinakäriy” (1 Tes. 5:11). “Jukniki juknikipaqpis Tayta Diosta manakäriy” (Sant. 5:16). w23.11 9 parr. 7, 8

Waran waran decidishganchicunacho ricacan yäracuyninchi imano cashganta. Öraga acrashwan pïcuna amigunchi cananpaj, imawan puclanapaj, imataj estudianapaj, piwan casaracunapaj, wamracunata imano yanapacunapaj o aruy asuntupitapis. Cayno tapucushwan: “¿Imatataj ricacämun decidishgäcunacho? ¿Decidishgäcunawan ricächicöchu cay mundo ushacänanpaj ichiclana pishiycashganta yäracushgäta? ¿O cay munducho runacunano shongö munashgalanta rurar cawacö?” (Mat. 6:19, 20; Luc. 12:16-21). Mushoj Pacha caylachona caycashganta lapan shongunchiwan yäracuptinchega, calpachacushunmi alicunata ruranapaj. Jina pruebacunapa pasarpis, yäracuyninchi sinchi caycanman aguantanapaj. Öraga creencianchiraycu chiquishga o gaticachashga cashwan, fiyupa gueshyaycushwan o ima sasacunapa pasarpis guelanacushwanmi. Galananlacho chay lapanta aguantarpis, imapa pasaycashganchi jucla mana ushacaptenga necesitashunraj yäracuyninchi sinchi caycänanpaj guepaman mana cutiycur cushi cushila Jehovata sirvir caycänapaj (1 Ped. 1:6, 7). w23.04 27 parr. 4-5

Jehová munan mañacushganchino calpachacushwan ruranapaj. Juc cristiano masinchish jatun asambleaman aywayta munan, chaypäga Jehovata mañacun yanapänanpaj patronninwan parlananpaj. ¿Imanotaj Jehová mañacuyninta contestan? Capazchi calpata o valurta goycunman. Chayno captinpis quiquinraj aywanman patronninta permisuta mañacunanpaj, y galaycunancho mana munaptinpis cutin cutinraj parlapänan. Jina aroj masinpis paypa trucan arunanpaj parlapanman o chay junaj mana arushganpita mana pagananpaj. Jehová munan cutin cutin mañacunapaj laquichimashganchicunapita. Jesusga nergan lapan mañacushganchicunata Jehová juclaga mana contestananpaj (Luc. 11:9). Chayno captinpis, jinala mana yamacaypa lapan shongunchiwan mañacuycäshun (Luc. 18:1-7). Chayno ruraptinchega, Jehovata niycanchi mañacushganchicuna manami juc ratulapächu cashganta, sinoga yäracuycanchi yanapämänanchipaj cajta. w23.11 22 parr. 10, 11

Jehová amigun Abrahanta aunirgan miraynincunaraycu lapan Pachacho runacuna bendicishga cananpaj (Gén. 15:5; 22:18). Jehovaman alapa yäracushpan Abrahanga seguro caycargan Dios aunishganta rasunpa cumplinanpaj. Pero Abrahán 100 watayojna y Sarapis 90 watayojna caycar wamranga manami carganrächu (Gén. 21:1-7). Chayno captinpis Bibliaga nin “tsay promitishqanta Tayta Dios imanöpa cumplinanpaq kashqanta mana tantiyarpis Abrahamqa criyirqanmi” (Rom. 4:18). Y Abrahán shuyarashganga rasunpa cumplicurgan, cuyashgan wamran Isaac yurirgan. ¿Imanirtaj Abrahanga seguro caycargan Jehová aunishganta rasunpa cumplinanpaj? Abrahanga ali reguirgan Jehová pï cashganta, chaymi “payqa criyirqan promitishqanta Tayta Dios cumplinanpaq” (Rom. 4:21). Ali yäracoj captin Jehovaga alita ruraj runatano ricargan y juchaynajtano chasquirgan (Sant. 2:23). w23.12 8 parr. 1, 2

Chayno captiquega ima ruraytapis gänas gänaswan ruranqui. Jesusman yarpachacuy. Payga Taytan mandashganta imaypis cumplejmi, chayta rurananpaj sasa captinpis. Discipuluncunata cuyajmi, chaymi paycunaraycu y lapan runacunaraycu wanurganpis (Juan 13:1). Jesusno ima cargutapis chasquirga, calpachacuy lapanta cumplinayquipaj. Y imano ruranayquipaj mana yacharga, humilde canquiman pogushga cristianucunapa yanapacuyninta mañacunayquipaj. Ama conformacuychu ichiclata rurarga (Rom. 12:11). “Imata rurarpis runakunapaqnölaqa ama rurapäkuytsu, sinöqa [Jehovapajno] lapan shonquykiwan rurapäkuy” (Col. 3:23). Jina imalachopis pantaycurga humilde cashpayqui calpachacuy mejoranayquipaj (Prov. 11:2). w23.12 26 parr. 8

Pipis bautizacuptenga Jehovapa familian rurincho caycan. Y chayga ¡cushicuypämi! Rey David nishgannopis paycunaga cushishga caycar cayno nipäcun: “Kushishqami kawan templuyki patiucho taq runaqa. Paytami akrashqanki nawpaykicho tänanpaq” (Sal. 65:4). Jehovapa marcanmanga manami jinaylapitaga pipis yaycunchu. Payga acraycunraj pïcuna amiguncuna cananpaj (Sant. 4:8). Pipis Diosta sirvinanpaj auniptin y bautizacuptenga, Jehová paycunata nin: “Gamkunaman bendicionnïta putsuy putsuy churamushaq” nir (Mal. 3:10; Jer. 17:8). Bautizacurga chayraj Diosta sirviyta galaycunchi. Chaymi ima tentaciuncuna y ima pruebacunapis captin lapan cristianucuna calpachacunanchirämi Diosta aunishganchino cawacunanchipaj (Ecl. 5:4, 5). Jina Jesús rurashgantapis rurananchi y mandätuntapis cäsucunanchi (Mat. 28:19, 20; 1 Ped. 2:21). w24.03 8 parr. 1-3

Waquin casaducunaga junto puriylatapis munapäcunmanchu. ¿Gampis chaypa pasaptiquega imataraj ruranquiman? Tulpapita parlarcushun. Rataycachiptinchega chaylarämi rupar galaycun, pero shanshapis miraycunanpäga y puca puca cashgancama rupananpäga cutin cutinrämi yantata tuquipanchi. Chaynolami casado vidachopis olgu cajpis warmi cajpis calpachacärinman tiempuncunata ali camacächir cushi cushila imatapis rurapäcunanpaj (Sant. 3:18). Chayno captenga cuyanacärishganga manami ushacäcungachu, manami upicäcungachu. Casado vidachoga respeto captinrämi imapis ali camacanga. Respetuga wayra japuymi, tulpapis ali ratananpäga wayrapitarämi canga o ali pücapaptinchiraj. Aumi, respeto mana captenga, matrimoniuchoga cuyanacuy ushacäcunmanmi. Ichanga majayojcuna respetanacäriptenga alapa cuyanacuycarlami cawacärenga. Manami pipis shimilapitaga ninmanchu ‘nogaga respetuosumi cä’ nir. Quiquin majanchimi ninman ‘majaläga respetaycalämanmi’ nir. w23.05 22 parr. 9; 24 parr. 14, 15

Biblia wilacun, unaycho Diospa siervuncuna chiquejnincunaraycu y sasa problemancunaraycu manchariywan sicsicyar ricacushganta (Sal. 18:4; 55:1, 5). Capazchi noganchipis nacaycanchi estudiaj masinchi, familianchi, aroj masinchi y autoridäcunapis Jehovata sirvishganchiraycu chiquimaptinchi. ¿Fiyu gueshya charimaptinchi wanunanchipänacu caycanchi? Chaycunapa pasarga, calpaynaj ichic wamranomi ricacushwan. ¿Imataj Jehová ruran yanapämänanchipaj? Pay shogamanchi y shacyächimanchi. Chaymi alichi canman tiempunchita jorguptinchi Bibliata leinapaj y Jehovata mañacunapäpis (Sal. 77:1, 12-14). Chaycunata rurarga, sasacunapa pasarpis Jehovapa yanapacuynintami imapitapis más puntata ashishun. Jehovata wilapashwan ima manchachimashganchicunapita, ima yarpachimashganchicunapita y payga Palabranwan shogamäshun y shacyächimäshun (Sal. 119:28). w24.01 24, 25 parr. 14-16

Diosta sirvir mastaraj ruranapäga ganasniyojmi cananchi. Ganasninchi captenga Diosta sirvinanchipaj alapa calpachacushunmi. Y ganasninchi captenga Jehovata sirvinapaj ima aunicushganchicunataga cumplishunmi. Chauraga ganas ganasla Jehovata sirvinapäga, ¿imatataj rurashwan? Jehovata ruwacuy imatapis ganas ganasla ruranayquipaj. Espiritunwanmi Jehovaga yanapayculäshunqui ima aunicushgayquitapis cumplinayquipaj. Öraga nishwanchi ‘Dios mandaycämaptenga rurashächi’ nir, ichanga shongupitaga chayta ruraycanchichu. Gamraycu Jehová ima rurashgancunaman yarpachacuy (Sal. 143:5). Apóstol Pabluga yarpachacurganmi Jehovapita lapan chasquishgancunaman, y chayshi yanapargan ganas ganasla y cushi cushila payta sirvinanpaj (1 Cor. 15:9, 10; 1 Tim. 1:12-14). Pablunola noganchipis Jehová imano yanapämashganchicunaman yarpachacurga yanapämäshunmi masraj Payta sirvinapaj (Sal. 116:12). w23.05 27 parr. 3-5

Jehovaga cuyacoj Taytanchimi, payga cushicun jutinta alabaptinchi (Sal. 119:108). Runacunaga ali tucunalanpaj alabananta munan, pero ¿lapanta puedej Jehovaga chaynochuraj? Manami. Satanasga noganchipita mana cashgantami parlan. Payga nin pï runapis ima pruebacunapa pasaptin Jehovata jaguirinanpaj y jutintapis manacajman churananpaj. Payga yarpan ima nacaycho caycaptinchi vidanchita salvananchiraycu Jehovapa contranman churacänapaj (Job 1:9-11; 2:4). Pero Job ricächicurgan Satanás lulacoj cashganta. Noganchipis Jehovalata alabaptinchega Satanás lulacushgantami ricächishun. Chaymi cada ununchimi valurcharcushun Jehovapa jutinta imaypis defendinapaj, chayta rurarga Jehovatami cushichishun (Prov. 27:11). w24.02 8, 9 parr. 3-5

Moisespa y Josuepa tiempun pasariptinna Jehová juezcunata acrargan marcanta pushananpaj. Y reycuna cawashgan wichancho profetacunata acrargan. Diosta cuyaj reycunaga profetacuna nishgantami cäsucurgan. Juc cuticho rey David humilde cashpan profeta Natán anyapashganta chasquicurgan (2 Sam. 12:7, 13; 1 Crón. 17:3, 4). Rey Jehosafatpis cäsucurgan profeta Jahaziel nishganta y marca masincunata shacyächergan Diospa profetancuna nishganta cäsucunanpaj (2 Crón. 20:14, 15). Rey Ezequías manchacushgan hora profeta Isaiasta ashirgan yanapänanpaj (Is. 37:1-6). Jehová nishganta reycuna cäsucuptin, pay imaypis bendicej y marcantapis chapaj (2 Crón. 20:29, 30; 32:22). Chaura claro caycargan Jehová profetancunawan marcanta pushaycashganta. w24.02 21 parr. 8

Satanasga munan Diosta mana cäsucoj runacunawan shuntacänapaj paycunano canapaj. Chaymi noganchega alapa cuidacunanchi. ¿Imanir? Waquincunawan mana shuntacarpis internetcho imaycacuna caycan waquincunawan amistäta ruranapaj. Cay munducho runacunaga imayca ganra ruraycunata alitanomi ricapäcun, noganchi ichanga chaycunapita cuidacunanchi (Efes. 4:19, 20). Chaymi calpachacunanchi Diospa mandätuncunata mana cäsucoj runacunawan mana shuntacänapaj, estudiaj masinchicunawan y aroj masinchicunawan ni imaraycurlapis goturänapaj. Jina runacuna jamurpämaptinchipis valurcharcunchi Diospa leynincunata respetanapaj. Congregación rurinchopis shumajraj acrananchi pïcuna amigunchicuna cananpaj, chaypita parlaycämun 2 Timoteo 2:20-22 textucuna. Ali amigucunaga imaypis yanapämäshun Jehovata sirvinapaj. w24.03 22, 23 parr. 11, 12

¿Imaylapis yarpachacushcanquichu Jehová imano cashganta? Payta mana ricarpis, Bibliaga shumaj tantiachimanchi imano cashganta. Payga “escüduno imaykapitapis tsapämantsi” y ‘imatapis nina rupar ushajnomi’ caycan (Sal. 84:11; Heb. 12:29). Profeta Ezequielpis juc visiuncho ricargan Jehová zafiro rumino cashganta, broncino chipchipyaycajta y turmanyano achicyaycajta (Ezeq. 1:26-28). Jehovata mana ricarga capaz öraga sasami canman creinapaj pay cuyamashganchita. Y caway vidanchicho taytaynaj winashga carga, yarpashwanchi Jehovapis mana cuyamashganchita. Pero Jehová musyanmi imano cawayninchi cashganta y imano ricacushganchitapis. Chaymi cuyamashpanchi Palabrancho musyachimanchi imano cashganta. Bibliaga nimanchi Jehová cuyacoj cashganta (1 Juan 4:8). Paypa cuyacuyninga alapa jatunmi, chaymi cuyamashpanchi ali runacunapaj y mana ali runacunapäpis imaycata ruran (Mat. 5:44, 45). w24.01 26 parr. 1-3

Jehová Moisestami acrargan israelitacunata Egiptupita jorgunanpaj, y musyachicurgan paycunawan caycashganta. Israelitacunaga junajpa ricargan naupancho ichiraycaj pucutay aywaycajta y chacaypana ichiraycaj ninata (Éx. 13:21). Moisesga ichiraycaj pucutayta y ninatapis gatipar Puca lamarman israelitacunawan chayargan. Pero Egipto runacuna taripaycur wanuchinanpaj yarpar israelitacunaga pasaypa manchacärirgan. Pero chayga manami Moisespa culpanchu cargan. Quiquin Jehovami Moisesta pushargan chay sitiuman chayananpaj (Éx. 14:2). Nircur juc milagruwan salvargan (Éx. 14:26-28). Moisés 40 watacunapami ichiraycaj pucutayta y ninatapis gatipargan israelitacunata chunyaj jircapa pushananpaj (Éx. 33:7, 9, 10). Jehovaga chay ichiraycaj pucutaypita Moisesta parlapargan y Moisesnami Jehovapa mandätuncunata israelitacunata wilapaj. Chaynomi israelitacuna cuentata gocurgan Jehová Moisesta acrashganta marcanta pushananpaj. w24.02 21 parr. 4, 5