Julio

Jesús imano cashgan y yarpashganga Taytannomi cargan, chayta ricanchi ima nishgancunacho y rurashgancunachopis (Juan 14:9). ¿Imata yachacunchi Jesuspa milagruncunapita? Jesuswan Taytanga amatar cuyamanchi. Jesús Pachacho caycar runacunata alapa cuyashpan achca milagrucunata rurargan yanapänanpaj. Juc cuticho ishcay gapra runacuna gaparaypa ruwacurgan yanapänanpaj (Mateo 20:30-34). Bibliaga nin chayta ricaycurshi paycunata cuyapar y laquipar nawincunata yataycurgan quichacänanpaj. Pipis waquincunapaj amatar yarpachacur laquipashganga cuerpunchopis ricacämunraj. Chaynomi Jesuspis ricacurgan, chaymi runacunata cuyashpan micuycunata garargan, y leprawan gueshyaycaj runatapis alchacächergan (Mat. 15:32; Mar. 1:41). Cayga tantiachimanchi Diosninchi Jehová y Wamranpis fiyupa cuyamashganchita, y nacaycashganchita ricar paycunapis laquicunmi (Luc. 1:78; 1 Ped. 5:7). Chaymi shongupita pacha munaycan lapan nacachimashganchicunata ushacächinanpaj. w23.04 3 parr. 4, 5

Ima tentaciunlapis captenga jucla witicurishwan. Umalanchi ali yarpayniyojla cananpäga Bibliapitami shumaj yachacunanchi, reuniunman aywananchi y Diospita yachachicojpis yargushwanmi. Ima pruebacunapapis pasarga Jehová jaguirimäshunchu, payga calpalanta gomänanchipaj aunicush (1 Cor. 10:12, 13). Cay ushanan tiempucho riccha ricchala caycänapäga mana gongaylapa cada cadalami Diosta mañacunanchi. Jehovaga munan shongunchita mashtapänapaj (Sal. 62:8). ‘Alabado cayculay Tayta Dios’ nir agradecicushwanmi. Mañacuy ali valurcharcur predicanayquipaj, ima problemacuna captinpis alapa laquicuycarla mana caycänayquipaj, ima tentaciuncuna captinpis aguantanayquipaj. Diosninchita cushi cushila mañacunayquipäga imapis michäshunquimanchu. w23.05 7 parr. 17, 18

¿Imanirtaj reuniuncunaman aywanchi? Jehovata alabanapaj, chayga imapitapis más ali caycan (Sal. 26:12; 111:1). Jina sasa tiempucho cawashpanchi reuniuncunaman aywar jucninchi jucninchi shacyächinacunchi (1 Tes. 5:11). Y comentaptinchega Jehovatami alabanchi y waquincunawan shacyächinacunchi. Ichanga öraga comentanapaj ima chapacunapis canmanmi: parlamuyta munarpis capaz manchacushpanchimi maquinchita jogarinchichu comentanapaj o cutin cutin maquinchita jogariptinchipis capaz manami acramanchichu munashganchino parlacaramunapaj. ¿Imata rurashwan? Apóstol Pablo nergan: “Jucninchi jucninchipis shacyächinacushun”. Chauraga waquincunata shacyächiyta puedinchi juc ichic y sencillo comentariuta rurarpis, y chayman yarparga manami alapaga manchacushunnachu maquinchita jogarinapaj. Y munashganchino cutin cutin parlacaramuyta mana puediptinchega, cushicushwanmi waquincuna parlacamushganta wiyar (1 Ped. 3:8). w23.04 20 parr. 1-3

Judiucunaga 70 watacunanona Babilonia marcacho tiyarcaycargan, chayno captinpis segurumi caycargan Israel marcanman cutipäcamunanpaj (Esd. 1:2-4). Jehovapa yanapacuynilanwanmi chayta rurargan. Babiloniucunaga preso japuy caycajcunata chaynolaga manami cachaycojchu (Is. 14:4, 17). Ichanga tiempuwan mushoj mandacojna yaycurgan y nergan Judiucunata marcanman cutinanpaj. Chauraga lapan Judiucuna shumaj acrapäcunanpaj cargan Babiloniapita aywacärinanpaj o chaycho quedacärinanpaj. Pero waquincunapäga chayta decidipäcunanpaj manami facilchu cargan. Waquin judiucunaga edayashga cashganraycu sasami cargan carutaraj viajapäcunanpaj, jina achca judiucuna Babiloniacho yurishganraycumi chaycho wasinpis caycargan. Paycuna Israeltaga awiluncunapa marcantanolami ricargan, waquincunana Babiloniacho ricuyashganraycu alapa sasachi cargan shumaj negociuncunata jaguirir mana reguishgan marcaman aywapäcunanpaj. w23.05 14 parr. 1, 2

Diospa Palabran shacyächimanchi mana yamacaypa valurwan aguantanapaj, cuyapäcoj y cuyacoj canapaj. Lucas 21:19 nin: “Imano nakarpis [valurwan aguantarcuptiquirämi] salvakärinkipaq”. Colosenses 3:12 nin: “Kuyapänakur kawapäkuy”. 1 Tesalonicenses 4:9, 10 nin: ‘Kuyanakur ali kawanaykipaqmi Tayta Dios tantiyatsipäkushushqanki. Tsaymi qamkunata shakyätsipäkamü masraq kuyanakunaykipaqmi’. Cay textucuna nishganno unay cristianucuna mayna chayno cawacuycarpis jinala calpachacärinan cargan aguantananpaj, cuyapäcoj y cuyacoj capäcunanpaj, y noganchipis chayta rurashwan. Chaypäga yachacuy punta caj cristianucuna ima rurashganta, gampis chayno ruranayquipaj. Chayga yanapäshunqui jatun nacay wichan shamuptin aguantanayquipaj. w23.07 3 parr. 4, 8

Cielupa aywajcuna y cay Pachacho cawajcuna, Sagrado Nänilapa purircaycäshun. Cay nänicho caycarmi Jehovata hermanunchicunawan juc shongunola aduraycanchi y shamoj tiempucho achca bendiciuncunatapis chasquishun (Juan 10:16). 1919 watapita, chaychicaj olgu, warmi y wamracunapis Jatuncaray Babiloniapita yargupäcurgan y sagrado nänipa purircaycan. Babiloniapita cutipäcamoj judiucuna Israelman alila chayananpaj Jehovami yanapargan (Is. 57:14). ¿Canan wichanpis sagrado nänipa puriycänanchipaj Jehová yanapaycämanchicu? Aumi. 1919 watapita más unaypitanami, Jehovaga ali shongu runacunatami utilizargan chay sagrado nänita camacächinanpaj (Isaías 40:3 textuwan tincuchiy). Chay ali shongu runacunaga espiritual cajchomi imaycata rurapäcush, Jatuncaray Babiloniapita achca runacuna yargupäcunanpaj y Jehovalata adurayta galaycärinanpaj. w23.05 15, 16 parr. 8, 9

Jehovaga munan shongupita y cushishga paylata sirvinanchitami (2 Cor. 9:7). Chauraga, ¿imanirtaj Diosta mastaraj sirvinapaj calpachacushwan shongulanchicho ganasninchilapis mana captenga? Chaypaj parlar apóstol Pablo cayno nergan: “Cuerpöta duminanäpaj sumaj yachacächë” (1 Cor. 9:25-27). Cay textucho cuentata gocunchi Pabluga alapa calpachacurgan Jehovata sirvir mastaraj rurananpaj ganasnin cananpaj. Chayno calpachacushgantaga ali nawilanwanmi Jehová ricargan, y bendiciunnintapis goycurganmi (2 Tim. 4:7, 8). Taytalanchi Jehovapis cushicunmi payta mastaraj sirvinapaj calpachacuptinchi, öraga ganasninchi walcala captinpis. Öraga ima rurashganchicunapis munashganchino camacanchu, pero payta amatar cuyarmi rurayculanchi. Pabluta bendicishgannolami noganchicunatapis bendeciycalämäshun (Sal. 126:5). Bendecimashganchita ricarga ganasninchipis yapay mirar galaycun. w23.05 29 parr. 9, 10

Pipis punuycaptenga imatapis musyanchu, imatapis ruranchu, pitapis yanapayta camäpacunchu. Chaynolami cay munducho caycaj runacunapis espiritual cajcho punucashgano carcaycan. Paycunaga cuentata gocärinchu ushanan junajcunacho cawaycashganchita y jatun nacaypis caylachona cashganta (Rom. 11:8). Waquincunaga Jehovapa junajninpita musyaycarpis, ‘chayga imayraj canga’ nipäcun (2 Ped. 3:3, 4). Noganchicuna ichanga musyanchimi imaypis camaricushgala carcaycänapaj, masraj cay ushanan junajcunacho (1 Tes. 5:6). Chayno captinpis, ali juiciuyoj car manami alapa yarpachacushwanchu. ¿Imanir? Ali juiciuyoj caj cristianuga shumaj yarpachacur-raj imatapis acran rurananpaj y imapis pasaptin laquicuypaj captenga manami yarpachacuycarla caycanchu. Jehovapa junajnin caylachona caycaptin, más sasarämi canga cay munduwan mana talucänapaj, masraj política asuntucunacho. Chayno captinpis ama yarpachacushwanchu imata ruranapaj, Taytalanchi Jehovaga santo espiritunwan yanapaycalämäshunmi mana yarpachacuycarla cawanapaj y imatapis shumaj yarpachacur-raj ruranapaj (Luc. 12:11, 12). w23.06 10 parr. 6, 7

¿Imamantaj yarpachacunqui Sansón runapita wiyarga? ‘Payga alapa calpayoj runa cargan’ ninquichi. Chayga rasunmi, pero calpayoj captinpis pantaycurganmi y chayraycu nacargan. Chayno captinpis, Jehovaga ricargan ali yäracoj runa cashganta. Chaymi vidanpita Palabrancho guelgachimurgan yachacunapaj. Marcanta chapänanraycu Jehovaga Sansonta yanapashga imaycacunata rurananpaj. Chaymi achca watacuna wanushgana caycaptinpis, Jehovaga apóstol Pabluta guelgachimurgan Sansonpa jutin yurinanpaj waquin Diosman ali yäracoj runacunapa jutincuna yurimushgancho (Heb. 11:32-34). Sansón cawaynincho tucuy jinanpa pasarpis Jehovaman lapan shongunwan yäracurgan. Lapanchimi paypita yachacushwan, y rurashgancunaga shacyächimashwan. w23.09 2 parr. 1, 2

¿Imaraj yanapämäshun mana yamacaypa aguantanapaj? Shongunchita mashtapar Jehovata mañacuptinchi (1 Tes. 5:17). Canan pruebacunapa mana pasarpis, ¿imataj ruranqui laquishga, rabiashga o alapa yarpachacushga captiqui? ¿Jehovapa yanapacuynintachu ashinqui? Cananlapitana imapäpis Jehovata mañacur yanapacuyninta ashiptiquega, shamoj tiempucho chayno masraj ruranqui cawayninchi más sasa captin. Aumi, lapan shonguyquiwan yäracunquimi Jehová yanapäshunayquipaj cajta (Sal. 27:1, 3). Cananlapita imayca pruebacunata aguantaptinchi jatun nacaychopis aguantashunmi (Rom. 5:3). Achca hermanucuna nipäcun, cananlapita tucuy pruebacunapa pasarga chayga yanapämanchi más sasa pruebacunatapis aguantanapaj. Paycunaga yäracärin Jehová imaypis yanapänanpaj cajta. Chaymi Jehovaman yäracushpan ima captinpis mana yamacaypa aguantapäcun (Sant. 1:2-4). w23.07 3 parr. 7, 8

Jehovaga tantiapämanchi y yanapaycalämanchi humilde y laquipäcoj carmi. Juc cutichomi Sodoma marcacho cawajcunata ushacächinanpäna caycaptin, angelcunawan Lot-ta wilacächergan familiancunawan jircapa gueshpir aywacärinanpaj. Ichanga Lotga manchacurchi, chaypa aywayta munarganchu. Jehovata ruwacurgan familianwan Zóar marcapa aywacärinanpaj. Diosga yarpaycarganna chay marcatapis ushacächinanpaj. Diosninchega ninmanchi cargan upälala cäsucunanpaj, pero chayta rurarganchu. Lot mañacushgantaga wiyarganmi y chayraycur Zóar marcatapis ushacächirgannachu (Gén. 19:18-22). Tiempuwanpis Nínive marcacho cawajcunata laquiparganmi Tayta Jehová. Profetan Jonastaga mandashgana cargan wilacunanpaj chay marcacho tiyajcuna alapa mana alicunata rurapäcushganraycu wanuylata taripäcunanpaj cajta. Ilgächinanpaj caycaptinpis ninivita runacuna arrepenticushganta ricarga Jehovaga laquiparmi perdunaycurgan (Jon. 3:1, 10; 4:10, 11). w23.07 21 parr. 5

¿Imataj yachacunchi Jehoasta pasashganpita? Jehovataga manami respetashwanchu o manchacushwanchu familianchicuna, amigunchicuna o waquin hermanucuna chayta ruranapaj nimaptilanchi. Chaypa trucanga quiquinchi calpachacunanchi Jehovapita yachacunapaj, rurashgancunaman yarpachacunapaj y mañacunapäpis; chayga yanapämäshun payta masraj cuyaycunapaj y respetanapäpis (Jer. 17:7, 8; Col. 2:6, 7). Jehoasga alicunata rurargan sumo sacerdote Jehoiadá yanapaptilanmi, manami shongupitachu Jehovata cuyargan. Chaymi Jehoiadá wanucuycuptin y lutan yachachicuycuna yurimur galaycuptin Jehoasga Jehovata cäsucurgannachu. Jehovalata shongupita manchacurga ima problemacuna captinpis jinala aguantashwan, y Jehovalata sirvishwan. Imapis Jehovapita raquichimäshunchu. Eclesiastés 12:13 textupis cayno nimanchi: ‘Tayta Diosta mantsakur mandamientunkunata cumpliy. Tsaypaqmi kay patsacho runa kawan’. w23.06 19 parr. 17-19

Apocalipsis 21:5 textupa galaycunancho apóstol Juan cayno nir galaycun: “Trönucho jamaraykaqnami kayno nimurqan”. Chay visiunchoga Juan manami ricarganchu juc poderyoj ángel ni Jesús parlaycashganta, sinoga Jehová parlaycashgantami. Chaymi pay aunicushganman masraj yäracunchi, “Tayta Diosqa manami lulakuntsu” (Tito 1:2). Chaura Apocalipsis 21:5, 6 textucuna nishganmanga lapan shongunchiwan yäracunanchi. Jehovapa aunicuynincuna shamoj tiempuchoraj cumplicunanpaj captinpis, payga mayna niycämanchi chaycuna rasunpa cumplicunanpaj. Chaymi shamoj tiempucho imacunata rurananpaj cajpita parlar, Jehovaga nin: “Ruranäpaq yarpashqätaqa lapantami rurä” (Isa. 46:10). w23.11 3, 4 parr. 7, 8

Apóstol Pedro imaycata ricashga y wiyashga carpis, achca cuticunacho pantaycurganrämi. Juc cuticho Jesús tantiachicuycaptin imano nacananpaj y wanuyninwan profeciacuna cumplicunanpaj, Pedruga Jesusta olgüpargan (Mar. 8:31-33). Jina waquin apostulcunawanpis achca cuticunacho rimanacärergan pï más importante cashganta (Mar. 9:33, 34). Jesús wanushgan chacaychopis, rabiashga caycashpan juc runapa rinrinta cuchurirgan (Juan 18:10). Nircur chay chacaylacho alapa manchacushpan quimsa cuti Jesusta niegargan reguishganta (Mar. 14:66-72). Chaycunacho pantarcur icchuypa icchuyparaj wagargan. Pedro rurashganpita laquishga caycaptinpis, Jesusga jinala musyachicurgan cuyaycashganta. Chaymi cawarircamur, Pedruta yuriparcur nergan uyshancunata cuidananpaj (Juan 21:15-17). Jesús nishganta wiyar Pedruga calpachacurgan cäsucunanpaj. Chaymi Pentecostés junajcho Pedro Jerusalencho caycaptin espíritu santuwan acrashga cargan. w23.09 22 parr. 6, 7

Pedruga waquin ancianucunata nergan: “Tayta Diosman yärakuqkunata shumaq rikapäkuy” (1 Ped. 5:1-4). Ancianucunaga yäracoj masincunata cuyanmi, chaymi imanopapis yanapacuyta munapäcun. Ichanga achca ruraynincuna captin o utishga caycar sasachi canman lapantaraj cumplipäcunanpaj. Chayno captenga, ¿imataraj ruranquiman? Imano ricacushgayquita Jehovata wilarcuy, Pedruga nergan: “Wakinkunata yanapanaykipaq habilidäta chaskishqa kaykarqa Tayta Dios yanapashushqaykiman tupu yanapay” (1 Ped. 4:11). Congregaciuncho hermanucuna imacunapa pasashganga capaz canan wichan alchacangachu. Ichanga ama gongaychu Jesucristo gampitapis masraj rurayta puedishganta, chayga canman canan tiempucho y shamoj tiempuchopis. Jehovaga munan ancianucuna yäracoj masincunata cuyananpaj, ali pushananpaj y waquincunapa ricaynincho ali ricashga cananta. w23.09 29, 30 parr. 13, 14

Cuidacunanchimi Diosta mana cäsucoj runacunano mana yarpänapaj. Paycunano yarpar galaycuptinchega Jehovapa contranman churacuycashwanchi (1 Cor. 3:19). Diosta mana chasquicoj runacuna yachaj cashganga shongun munashgalanta rurar cawapäcun. Chaynomi pasargan Pérgamo y Tiatira congregaciuncho caycajcunawan. Runacunaga jucwan jucwan punucärej y idulucunatapis adurapäcoj. Chayta ricaycur waquin cristianucunapis chayno rurayta galaycärergan. Chaymi Jesusga paycunata anyapargan chay ruraycunata jaguirinanpaj (Apoc. 2:14, 20). Canan wichan runacunapis paycunano yarpar lutancunata ruranapaj munan. Maygan castanchicuna o amigunchipis öraga ‘shonguyqui munashganta ruranquiman’ nir shimita jatipämanchi Diospa leynincunata mana cäsucunapaj. Paycunaga yarpapäcun shongunchi munashganta rurar cawacunapaj y Biblia yachachicushganga canan wichanpäno mana cashganta. Öraga noganchipis Jehovapa marcanpita maygan wilacuycunata chasquicur shumaj mana tantiarcurga, capaz Bibliacho nishganta yapapaycur quiquinchi yarpashganchino rurayta munashwan (1 Cor. 4:6). w23.07 16 parr. 10, 11

Jesuspa maman Mariaga valurcharcunanrämi cargan Jehovapa voluntäninta cumplinanpaj. Payga alapachi yarpachacurgan ángel Gabriel wilacuptin Jesuspa maman cananpaj cajta musyar. Manaraj casacur gueshyaj ricacunan cargan, y chaylaraj juc wamratapis uywanan cargan. Payga juc runawanga manami imaypis cacurganchu o punurganchu, y noviun Josetapis wilanan cargan gueshyaj caycashganta (Luc. 1:26-33). ¿Imataj rurargan María chasquishga carguta ali cumplinanpaj? Ángel Gabrielta nergan maslata wilacunanpaj imano Diospa Wamranta ashmananpaj (Luc. 1:34). Nircur, juc viajitapis rurargan aylun Elizabet-ta watucunanpaj. Elizabetga felicitaycurganmi Mariata, y Diospa espiritunpa yanapacuyninwan juc profeciatapis wilacurgan Jesuscho cumplicunanpaj (Luc. 1:39-45). Chayta wiyar, Mariaga cushicur Jehovapita parlar nergan “pipis mana rurashqankunatami payqa ruran” (Luc. 1:46-51). Jehovaga Gabrielwan y Elizabetwan Mariata shacyächergan. w23.10 14, 15 parr. 10-12

Jehovaga 144.000 runacunatami wamrancunatano acrargan cielucho tiyananpaj. Paycunaga sacerdoticunano cielucho Jesuswan carcaycanga (Apoc. 14:1). Paycuna cay Pachachoraj carcaycaptin Jehovaga espiritunwan paycunata acran y churincunatano ricapäcun. Chaura Sagrado Tolducho caycaj Lugar Santuga ricächimanchi paycuna Jehovawan juc pactuta rurashganta paylata sirvinanpaj (Rom. 8:15-17). Pero Sagrado Tolducho caycaj Lugar Santïsimuga tincun Jehová tiyanan cieluwan. Y chay ishcay cuartucunata raquiraj cortinaga tincun Jesuspa cuerpunwan. Pay aychayoj y tuluyojraj caycaptin cieluman aywayta puedirganchu, pero wanuyninwanga puncuta quicharishganno cargan acrashga caj cristianucuna cieluman aywananpaj. Pero chayno cananpäga cay acrashga cristianucunapis wanunanrämi. Cielumanga pipis aychayoj y yawaryojga yaycuyta puedinchu, chaymi wanunanraj (Heb. 10:19, 20; 1 Cor. 15:50). w23.10 28 parr. 13

Gedeonga jaucala caycargan Efrainpita runacuna gayapayparaj rimapaptin (Juec. 8:1-3). Rabiacunanpaj trucanga shumajla wiyargan, y cuyacuywan parlapargan. Gedeonno ancianucunapis jamurpajnincunata shumajla wiyan y cuyacuylawan parlapan (Sant. 3:13). Chayno rurashgancunawanmi, congregaciunchopis jaucala capäcun. Israelitacunaga Gedeonta alabayta munargan madianitacunata venciptinmi, ichanga payga nergan Jehovapa yanapacuyninwan vencishganta (Juec. 8:22, 23). Chaynolami ancianucunapis Gedeón rurashganno lapanchopis Jehovalata alabapäcunman (1 Cor. 4:6, 7). Chaymi juc ancianuta felicitaptin ali yachachicushganpita, chay ancianuga ninman ‘lapanchitami Jehovaga Palabranwan yachaycalächilämanchi’ nir. Öraga ancianucuna caynopis tapucärinman: “¿Yachachicushgäwanga Jehovatachu alabaycä? ¿O noga ali ricashga caytachu munä?” nir. w23.06 4 parr. 7, 8

Lapan mañacushganchicunata Jehová mana contestaptenga, tapucushun, ¿mañacuyninchicuna Jehová munashgannochuraj caycan? Öraga Diosta mañacur yarpanchimi imataj más ali cashganta noganchipaj, pero tiempuwanga capaz chaytaga mana necesitashunnachu. Tantiarinapaj, capaz cutin cutin mañacuycanchi imano juc problemata alchanapaj, pero cuentata gocunchichu jucnopapis chay problema alchacänanpaj. Jina öraga mañacushganchicuna Dios mana munashgannopis canmanmi (1 Juan 5:14). Taytacuna wamranta purichinanpaj ali caj nänicho Jehovata ruwacushganpita yachacunquimanmi. Mañacushgan alino captinpis, Jehovaga pitapis obliganchu Payta sirvinanpaj. Payga munan quiquinchicuna acranapaj adurananchipaj o manapis (Deut. 10:12, 13; 30:19, 20). Chauraga, ¿imataj chay taytacuna Jehovata mañacunman cargan? Jehovata ruwacunman yachachishgancuna wamranpa shongunman chayananpaj, chaynopa quiquin Jehovata cuyar amigunmanpis ticrananpaj (Prov. 22:6; Efes. 6:4). w23.11 21 parr. 5; 23 parr. 12

¿Imanirtaj chayta ruraptinchiraj rasunpa cuyanacuycanchi? Juc librupis cayta nin: “‘Shacyächinacuyga’ ninanmi ‘pipis sasacunapa pasaycaptin laduncho caycashwan shacyächinapaj’”. Chauraga maygan hermanunlanchipis nacaycajta ricar shacyächiptinchega yanapacuycanchi jinala Jehovata sirviycänanpaj. Jina wagaycajta ricarga, paycunawan waganchi, chaynopa ricächicunchi paycunata cuyashganchita (2 Cor. 7:6, 7, 13). Juc runa laquipäcoj captenga, maquincho caycashgantami ruran nacaycajta shacyächinanpaj, shogananpaj y puedishganmanno yanapananpäpis. Chaura puntataga laquicunraj pipis nacaycashganta ricar, nircur calpachacun imanolapapis yanapananpaj. Y chay lapantaga shongupitami ruran. Chaynolami Jehovapis noganchiwan ruran. Pabluga nergan Jehová runacunata cuyapashganraycurmi shogan. Aumi, Jehová Diosga “kuyapämantsi y imaypis shakyätsimantsi” (2 Cor. 1:3). w23.11 9, 10 parr. 8-10

Apóstol Pabluga nergan sasacunapa pasaptinchiraj masraj confiacushwan ima shuyarashganchiman. Lapan cristianucuna musyanchi imayca sasacunapa pasanapaj, chaymi Pablo Tesalónica caycaj cristianucunata cayno nergan: “Qamkuna kaqcho kaykar wilarqä Jesucristuman yärakushqantsipita runakuna chikimänantsipaq kashqanta. Tsay nishqänölami lapanpis pasaykan” (1 Tes. 3:4). Y Corinto cristianucunatana nergan: “Runakuna [...] tsayjinanpa nakatsimaptin mana awantar kawanäpaq kashqantapis manami yarparqänatsu” (2 Cor. 1:8; 11:23-27). Canan wichan Diospa sirvejnincunapis musyanchi runacuna chiquimänanchipaj (2 Tim. 3:12). Gampis Jesuspa discipulunman ticrashgayquiraycu amiguyquicuna o familiayquipis burlapäshunquichi o mana ali runatanopis ricashunquichi. ¿Cuentata gocushcanquichu honrado runa captiqui runacuna chiquishushgayquita? (Heb. 13:18). ¿Gobiernucho caycaj autoridäcuna michaycäshunquichu Diospita mana parlapänayquipaj waquincunata? Pabluga nimanchi imayca sasacunapa pasarpis cushicärinapaj. w23.12 10, 11 parr. 9, 10

Jacobga achca problemacunapa pasargan. Ishcan wamrancuna Simeonwan Leví rurashganwan familianpa y taytanpa jutintapis ganratargan. Jinamanpis cuyashga warmin, ishcay caj wamranta gueshyapacuycaptin wanucurgan. Y marcancho muchuy captin, Jacobga edayashgana caycar Egiptuman aywargan tiyananpaj (Gén. 35:16-19; 37:28; 45:9-11, 28). Chay jinanpa pasaycarpis, Jacobga Jehovaman y promesancunamanpis yäracojmi. Y Jehovapis Jacobta tucuynopa bendecirgan. Chaymi Jacobga Jehovapa bendiciunninwan imaycayoj runaman ticracurgan. Jina Jehovatapis alapa agradecicurganchi achca watacuna pasariptin wamran Josewan tincuriptin, payga yarpargan wanushga cashganta. Jehovawan ali amigo cashpanmi Jacobga imayca pruebacunatapis aguantargan (Gén. 30:43; 32:9, 10; 46:28-30). Noganchipis imayca problemacunata aguantashunmi payno Jehovawan ali amigo captinchi. w23.04 15 parr. 6, 7

Salmo 23 caj capitulucho David wilacun Jehová alapa cuyashpan imano cuidashganta. David nergan Jehová michicojnin cashganta y payman yäracushganta. Chayta musyar David jaucala cawacurgan, imaypis payman guelicoj. Davidga musyarganmi wanunanyaj sirviptenga Jehová imaypis yanapänanpaj. Ricärishun imanir David chayno ricacushganta. David cawaynincho ricargan lapan imaycancunata o necesitashgancunata Jehová camaripashganta. Jina musyarganpis Jehová ali amiguntano ricashganta y paywan cushishga caycashgantapis. Chaymi payga seguro caycargan imacunapa pasaptinpis imaycancunata Jehová camaripänanpaj cajta. Laquicuynincuna captinpis Jehová amatar cuyashganmanmi más yarpachacurgan, y chayraycu alila y cushishgapis cawacurgan (Sal. 16:11). w24.01 29 parr. 12, 13

Ishcay caj Jatun Guerra ushariptin, Diospa sirvejnincunaga may chaycho libre yachachicur carcaycargan. Achca runacuna Jehovata reguir Testiguncunaman ticrargan, cananga lapan Pachachomi yachachicurcaycan. Canan wichanpis Jehovapa testiguncunata Pushajcunaga Jesús pushananta ashipäcun. Chaymi jorgamushgan wilacuycunaga Jehovawan Jesús munashganno caycan. Jina ancianucunawan y congregaciunta watucamojcunawan chay wilacuycunata congregaciuncunaman chayachimun. Cielupaj acrashga waquin ancianucunapis Jesuspa alauga caj maquinchomi carcaycan (Apoc. 2:1). Y juchasapa cashganraycu öraga paycunaga pantarcunmi Moisés, Josué y apostulcunapis pantashganno (Núm. 20:12; Jos. 9:14, 15; Rom. 3:23). Chayno captinpis, musyanchimi tantiaj y yäracuypaj esclavuta y ancianucunatapis Jesús pushaycashganta. Cayta musyarga yanapämanchi pushamajninchi hermanunchicuna wilacuycuna gomashganchiman masraj yäracunapaj. w24.02 23, 24 parr. 13, 14

Noganchipis Jehovata alabanchi paypita cuyacuywan parlaptinchi. Chaymi runacunata yachachicur yarguptinchi, munanchi waquin runacunapis Jehovata alapa cuyar galaycunanpaj (Sant. 4:8). Bibliawanmi runacunata yachachinchi Jehová cuyacoj, alilata ruraj, yachaj y poderyoj cashganpita. Nircurpis Jehovata alabanchi y shongunta cushichinchi payno cuyacoj captinchi y yarpashganno yarpaptinchi. Dios munashganno cawaj runa captinchega, waquin runacunapis ricangami cay munducho runacunano mana cashganchita y öraga chaypitapis parlapacur galaycushwanchi (Mat. 5:14-16). Aumi, capaz creencianchipitapis tapupämashwan o imalapitapis musyayta munanman. Ali shonguyoj runacunaga Diospa Palabranta ali chasquiycur Diospita yachacuyta munangami. Cay lapancunata rurarmi Jehovapa shongunta cushichishun (1 Tim. 2:3, 4). w24.02 10 parr. 7

Pogushga cristiano canayquipaj imalatapis rurayta yachacunquiman. Chaycunaga yanapäshunqui aruyta tarinayquipaj, congregaciuncho masraj yanapacunayquipaj, familiayquitapis manteninayquipaj y waquincunawan ali apanacärinayquipaj. Chaypäga shumaj leiyta y escribiytapis yachacunquimanmi. Bibliaga nin cushishga y ali goyäcoj runaga Tayta Diospa Palabranta junaj junaj lein y leishganman yarpachacun (Sal. 1:1-3). Chayta rurar cuentata gocun Jehová imano yarpashganta y chayga yanapan shumaj yarpachacur-raj imatapis rurananpaj (Prov. 1:3, 4). Congregaciuncho hermanucunaga, pogushga cristianucuna Bibliawan yachachinanta y consejananta ashin. Chaymi leiyta y escribiytapis shumaj yachacurga, ali discursucunata ruranqui y comentariuyquiwanpis waquincunata shacyächinqui. Jina notayquicunata ruranqui mana gonganayquipaj y quiquiquipa yäracuyniquita y waquincunapitapis sinchiyächinqui. w23.12 26, 27 parr. 9-11

Manchacushpayqui hora yarpachacuy shamoj tiempucho cawacuy imano cananpaj cajman. Satanasga ilgächishga captin Jehovaga noganchipaj imayca alicunata ruranga. 2014 wata jatun asambleachoga juc actuaciuncho juc hermano familianwan 2 Timoteo 3:1-5 textupita parlar yarpachacurgan Paraisucho runacuna imano cananpaj cajman: “Shamoj tiempucho runacuna nacanganachu. Runacunaga runa masinta y Jehovapa cajcunata cuyanga, mana ali tucoj, humilde, Diosta respetaj, taytanta y mamanta cäsucoj, agradecicoj y mana jaguicoj, familianta cuyaj, mana tumpacoj, waquincunapita alita parlaj, geniunta controlacoj, alilata ruraj, confiacuypaj, tantiacoj, mana runa tucoj, imapitapis masga Diosta cuyaj y mandashgancunata ruraj. Chayno runacunawanmi juntacashwan”. ¿Noganchipis parlacunchichu familianchiwan o hermanucunawanpis Paraisucho caway imano cananpaj cajpita? w24.01 6 parr. 13, 14

Bibliaga nin “kuyashqan runakunata rikarmi TAYTA DIOS kushikun”, y chayta musyar cushicunchimi (Sal. 149:4). Pero öraga capaz waquincuna guelanashga caycar cayno ninman: “Jehovaga marcanwanmi cushishga caycan, pero ¿nogapita cushicunchuraj?” nir. Unaycho waquin Diospa sirvejnincunapäpis, öraga sasami cargan creinanpaj Jehová paycunawan cushishga caycashganta (1 Sam. 1:6-10; Job 29:2, 4; Sal. 51:11). Bibliaga yachachimanchi juchasapa captinchipis alicunata ruraptinchi, Jesusman yäracuptinchi y bautizacuptinchega Jehová ali nawilanwan ricamanchi (Juan 3:16). Chayta ruraptinchi waquincuna cuentata gocärin juchanchicunapita arrepenticushganchita y Jehovatapis aunishganchita voluntäninta ruranapaj (Hech. 2:38; 3:19). Jehovaga alapami cushicun chaycunata ruraptinchi amigunman ticranapaj. Y payta aunishganchino cawacunapaj calpachacuptinchega, noganchiwan cushishga caycan y amigunchimanpis ticran (Sal. 25:14). w24.03 26 parr. 1, 2

Imaylapis autoridäcuna predicanapaj michämaptinchega unay discipulucunaman yarpashwan. Jehovata ruwacushwan valurtapis yachaytapis gomananchipaj, Diosninchega yanapämäshun paypita yachachicur siguinanchipaj. Jehová Diosta mañacushun ima problemacunapa pasarpis laquishgala mana ricacunapaj. Mayraj canan hora mayganchilapis alapa laquishga caycanchi castanchi wanushganraycu, chiquishga marcacho tiyashganchiraycu o ima gueshyaraycurlapis. Pandemiaraycurpis guerracunaraycurpis masrächi nacashganchipis. Chaymi Jehovataga shongunchita mashtapäshun. Payga cuyapäcoj Taytalanchimi. Yanapämänanchipäga listumi caycanga (Sal. 37:3, 5). Waran waran mañacushganchimi yanapämäshun imayca nacaycunata aguantanapaj (Rom. 12:12). Jehovaga musyanmi ima nacaycunapa pasashganchita, ‘ausiliuta mañacuptinchega’ wiyamanchimi (Sal. 145:18, 19). w23.05 5, 6 parr. 12-15

Cawayninchicho imalatapis decidinapaj captenga, shumaj yarpachacunanchi Tayta Dios munashganno cananpaj y nircur rurananchi (Efes. 5:17). Ima asuntupäpis Bibliacho caycaj yachachicuycunata o consejucunata ashirga, quiquin Jehová chay asuntupita ima yarpaycashgantami ashiycanchi. Chay consejucunata cäsucurga imaypis ali decisiuncunata acrashun. Satanasga alapami munan cay munducho ruraycunaman jatiräcushga caycänapaj y Diospa cajta manacajman churanapaj (1 Juan 5:19). Öraga Jehovata sirviyta munarpis, capaz masga yarpachacunchi guellayman, trabajuman y masta estudianapäpis. Chayno captenga cay munducho caycaj runacunano yarparna galaycuycanchi. Caycuna alino captinpis, cawayninchichoga manami puntaman churashwanchu. w24.03 24 parr. 16, 17