Agosto

Cay versiculuchoga ishcaycunapita parlaycämun: 1) cäsucoj runacunapäga imalapis caycanmi laquicunanpaj y 2) Jehová Diosmi imaypis yanapan. ¿Imanotaj Jehová yanapämanchi pruebacunapa pasaptinchi? Payga tantiachimanchi cay caway vidacho chaycunapa pasanapaj. Jehovaga aunimanchi payta sirvir cushishga cawacunapaj. Ichanga cayga manami ninanchu cay tiempo cawayninchicho problemacuna mana cananpaj cajta (Is. 66:14). Payga munan shamoj tiempuman yarpachacunapaj, chay wichan ichanga cawayninchega cushicuypämi canga (2 Cor. 4:16-18). Chay junaj chayamunancama payga waran waran yanapaycalämanchi aguantanapaj (Lam. 3:22-24). ¿Imataj yachacunchi unay wichan y canan wichan yäracoj Jehovapa sirvejnincunapita? Mana shuyarashganchi problemacunapa pasarga Jehovaman yäracuptinchi, paymi yanapämäshun (Sal. 55:22). w23.04 14, 15 parr. 3, 4

Ricärishun Josewan María cäsucoj cashganpita imata yachacunchi. Paycunaga autoridäcuna mandashgan cumplinanpaj sasa captinpis cäsucurganmi (Luc. 2:1-6). Juc cuticho, César Augusto gobernaj runa mandargan lapan runacuna yurishgan marcanman aywaycur inscribicärinanpaj. Pero Josewan Mariapäga sasachi cargan chayta cäsucunapaj. ¿Imanir? Paycunaga achca junajcunaraj viajapäcunan cargan. Jina Mariaga gueshyaj juntana o wachananpäna caycargan. Paycunaga yarpachacärirganchi ‘quiquin nänicho wamrä yuriptenga, imataraj ruräman’ nir. Chauraga, ¿María Diospa Wamranta gueshyacunanpaj cajman yarparchuraj chay mandatuta cäsucurgannachu? Imano captinpis Josewan María autoridäcuna nishgantami cäsucärirgan. Chayno rurashganpita Jehová bendicirgan. Belenman ali chayapäcurgan, wamranpis sanula yurirgan; chaynopa Dios aunicushganpis cumplicurgan (Miq. 5:2). w23.10 8 parr. 9; 9 parr. 11, 12

Waquincunaga manchacurna galaycun reuniuncho comentananpaj yarpaptinlami. Chayno gamtapis pasashuptiquega, ¿imataraj ruranquiman? Chaypäga ali canman shumaj preparacunayquipaj (Prov. 21:5). Juc temapita shumaj yachacurga, facilmi canga maquinchita jogarinapaj. Jina ichic comentariutapis rurayta puedinchimi (Prov. 15:23; 17:27). Achcataraj parlanapaj mana captin, alapa manchacushunnachu. Y juc publicaciuncho guelgashganta leircur-raj mana comentaptiquega, waquincunaga ricanga ali preparacushgayquita y chay tematapis shumaj tantiashgayquita. ¿Imataraj ruranquiman waquin yanapacuycunata practicaman churashgana captiquipis ichic manchacur-raj juc ishcay cutila comentamuptiqui? Yarparay Jehová alapa valurashganta lapan rurashgayquicunata comentanayquipaj (Luc. 21:1-4). Payga manami shuyaranchu lapan puedishgayquipita mastaraj ruranayquipaj (Filip. 4:5). Chauraga quiquiqui camacächiy ayca cuti comentanayquipaj, nircur shumaj preparacuy y Jehovata mañacuy yanapäshunayquipaj jaucala caycänayquipaj. Galaycunayquipäga ali canman juc ichic comentariuta ruranayquipaj. w23.04 21 parr. 6-8

Unaycho soldaducunaga imaypis camaricushgala caycanman cargan peliaj aywananpaj. Chaynolami cristianucunapis cananchi. Chaymi Pabluga nergan imaypis “chalëcuntsi” y “cascuntsi jatishqanömi” caycänapaj. Chaytaga ruranchi yäracoj y cuyacoj captinchi, jina Jehovapa aunicuynincunapis cumplicunanta shuyaraptinchi. Imanomi juc chaleco soldadupa shongunta chapaycun, chaynolami yäracoj y cuyacoj cashganchega yanapämanchi Jesusta gatirpänapaj y Jehovata sirvir mana cachaycunapaj. Lapan shongunchiwan yäracunchi sirvejnincunata Jehová bendicinanpaj cajta (Heb. 11:6). Imayca sasacunapa pasarpis yäracoj cashpanchi guepaman manami cutinchichu. Ricärishun imano waquin hermanucuna guellayraycu o chiquishga cashganraycu nacaycarpis Jesusta gatirayta jaguipäcunchu, y chayga yäracuyninchitami sinchiyächenga. Jina Diospa voluntäninta puntaman churajcunapita, chararashgancunalawan cawajcunapita yachacushganchipis yanapämäshun imaycayoj cayta mana ashinapaj. w23.06 10 parr. 8, 9

Ali controlacoj runaga yarpashgantapis rurashgantapis controlanmi. Chayno captinchega, mana ajayaypa calpachacushun sasa captinpis o mana munarpis Diospaj más rurananchipaj. Diosga espiritunta gomaptinchiraj ali controlacoj runami cashun, chaymi paytaga mañacunanchi (Luc. 11:13; Gál. 5:22, 23). Jina imacunapis aliman ticranantaraj shuyaranquimanchu. Cay mana ali munducho cawaycarga manachi shuyaycäshunchu imacunapis munashganchino ali camacänantaraj. Diosninchita sirvir mastaraj ruranapäga ima pasaptinpis calpachacuycashwanmi. Öraga pipis ninman “lapan aunicushgäcunaman yarpachacurga sasanomi cumplinapaj, ‘imayraj cumplishaj’ nirmi desanimacö”. Cay tapucuy ali caycan yarpachacunayquipaj: ¿Imataraj ruranquiman ali cristianuman ticrayta munarga? Ali canman imalachopis mejoranayquipaj calpachacuptiqui. Bibliatapis leiyta y yachacuyta mastaraj munaptiquega, alichi canman walca walcalapita galaycuptiqui. w23.05 29 parr. 11-13

Cay ushanan junajcunacho Jehová marcanwan yanapaycämanchi espiritual cajcho ali caycänapaj, chaynopa sagrado nänipa purir siguinapaj (Is. 35:8; 48:17; 60:17). Pipis Bibliapita yachacuyta galaycuptin, sagrado nänipa puriyta puedinmanmi. Waquincunaga sagrado nänipa puripäcunnachu Bibliapita yachacuyta manana munaptin. Y waquincunana chay sagrado nänipa ushanancama chayananpaj calpachacärin. Chaura, ¿maymantaj chay näni apan? “Sagrädu Näni” cielupaj aywajcunata apan “Tayta Diospa ñaupancho” imaycamapis cawapäcunanpaj (Apoc. 2:7). Y cay Pachacho cawajcunataga cay näni apan Waranga Wata usharcuptin Jesús Gobernaycashganman, lapan runacuna juchaynaj capäcuptin. Gam, ¿maymantaj chayayta munanqui? Maymanpis chayanayquipaj captenga, guepaman ama cutiychu. Chay nänipita ama yargucuychu ali cawayman chayanayquicama. w23.05 17 parr. 15; 19 parr. 16-18

Jina Jehová gamraycu lapan rurashgancunamanpis yarpachacunquiman, chayga yanapäshunqui agradecido car payta sirviyta auninayquipaj (Sal. 116:12-14). Bibliaga nimanchi lapan alicunata chasquishganchicunaga “kamaq Taytantsipitami kaykan” (Sant. 1:17). Cuyashgan Wamrantapis cay Pachaman cachamurgan alapa cuyamashpanchi. Chaymi cananga Diospa amigun caytapis puedinchimi y imaycamapis cawayta shuyaraycanchi (1 Juan 4:9, 10). Chauraga, Jehovata auniptinchi sirvinapaj ricacämun pay noganchipaj lapan rurashgancunapita y cuyacoj cashganpitapis agradecido caycashganchita (Deut. 16:17; 2 Cor. 5:15). w24.03 5 parr. 8

Lotga alita ruraj runa cargan, chaymi Jehovata alapa respetar cuyashpan mana cäsucoj runacuna mana alicunata rurashganta ricar pasaypami chiquej. Bibliaga nin, “tsay markakunacho taq fiyu runakuna jutsata rurar kawapäkuptin” payga laquicur goyargan (2 Ped. 2:7, 8). Noganchipis Lot ricacushganno ricacunchi. May chaychopis ricanchi imano runacuna Diospa leynincunata manacajman churashganta, waquincunaga ni ichiclapis respetanchu. Cay mundo chayno captinpis, Diosnilanchita cuyar manchacuptinchega pay munashganno cawaj runa cashun. Chaymi Jehová Proverbios libruwan shumaj shacyächimanchi imano chayta ruranapaj. Aumi, lapanchimi olgucuna, warmicuna, jovincuna, edayashgana cajcuna, chaycho caycaj consejucunapita yachacushwanmi. Jehovata manchacoj runaga cuentata gocun mana ali amiguncuna mana alicunaman chayachinanpaj y juchancunatapis mana pacaycunchu. w23.06 20 parr. 1, 2; 21 parr. 5

Diospa Gobiernunta puntaman churashgayquipita capaz familiayquicuna chiquishunqui y mana alipis ricashunqui. Jina ali pagashga trabajuyquitapis jaguishcanquichi (Mat. 6:33). Chayno captenga seguro caycay Jehová mana gongashganta paypaj lapan rurashgayquita (Heb. 6:10). Quiquiqui cawayniquicho ricashcanquichi Jesús nishganga rasunpa cashganta, payga nergan: “Pipis wayinta, wawqinkunata, paninkunata, mamanta, taytanta, [warminta,] tsurinkunata y chakrankunatapis noqa rayku y ali wilakuynï rayku kachariq kaqqa kay vïdacho pachak (100) kuti mastami chaskinqa. Tsawraqa wayinkuna, wawqinkuna, paninkuna, mamankuna, tsurinkuna y chakrankuna paypa kanqa. Chaskikamashqanpitami itsanqa chikipäkunqa. Tsayno kaptinpis juk vïdacho mana ushakaq kawaytami tarinqa” (Mar. 10:29, 30). Lapan bendiciuncuna chasquishgayquicunaga masrächi caycan Jehovata sirvinayquipaj lapan jaguishgayquipita (Sal. 37:4). w24.03 9 parr. 5

Judeacho caycaj cristianucunaga alapa nacapäcuycargan muchuy cashganraycu. Chauraga Antioquiapita cristianucuna “wilanakurqan imatapis kashqanpita shuntarkur Judeacho kaq wawqi panikunaman apatsinanpaq” (Hech. 11:27-30). Muchuyraycu nacaycaj cristianucuna alapa carucho caycaptinpis, Antioquiapita cristianucunaga listo carcaycargan yanapänanpaj (1 Juan 3:17, 18). Noganchipis cuyapäcoj cashganchita musyachicunchi nacaycaj hermanunchicunata yanaparcuptinchi. Chaypäga ancianucunata wilashwan imalachopis yanaparcunapaj munashganchita, aycalatapis guellayninchita apachicushwan, y nacaycajcunapäpis mañacushwanmi. Öraga achca hermanucunapaj sasami canga ima necesitashgancunata taripäcunanpaj. Chaymi ali caycan cananlapitana yachacunapaj waquincunawan cuyapäcoj cayta. Chayno captenga Reyninchi Jesús runacunata juzgananpaj chayamuptin, payga nimäshun ‘qamkunapaq Taytä kamarishqanta’ chasquicuy (Mat. 25:34-40). w23.07 4 parr. 9, 10; 6 parr. 12

Cay Pachacho caycar Jesuspis Taytannola pitapis ali tantiapar jucla yanapaycoj. “Ogracasha uyshacunanöpis caycaj Israel runacunallaman” Taytan Jehová mandashga captinpis juc cutichoga juc jäpa warmitami yanapargan. Chay warmimi Jesusta ruwacurgan “wamrätami dyablu löcuyaycächin” ‘yanapaycalämay’ nir. Jesusga laquiparmi ruwacushgannola chay warmita yanapargan (Mat. 15:21-28). Caypis ali caycan yachacunapaj. Juc cutichomi Diospita yachachicur galaycushgancho Jesús cayno nergan: “Pimi runacunapa ñaupancho nogata ñïgamanga, […] ‘manami rejsëchu’ nishämi” (Mat. 10:33). ¿Pero imatataj Jesús rurargan juc cuticho runacunapa naupancho Pedro niegariptin? Jesusga manami payta rechazarganchu, ali yäracoj y arrepentido cashganta ricarmi perdunaycurgan. Wanushganpita sharcamurga naupataga Pedrutami Jesús yuripargan, y chaychoga nerganchi perdunashganta y cuyapashgantapis (Luc. 24:33, 34). Jehovawan Jesusga pitapis laquiparmi ali shongu capäcun. Noganchipis paycunanola canapämi calpachacunanchi, chaytami Jehová shuyaran. w23.07 21 parr. 6, 7

Canan yachacushcanchi imanirtaj yäracushwan cay Pacha juc paraíso cananpaj. ¿Imataraj waquincunata nishwan paycunapis chayman yäracunanpaj? Nishwanmi quiquin Jehová chayta aunimashganchita. Apocalipsis nin: “Trönucho jamaraykaqnami kayno nimurqan: ‘Lapantapis mushuqtami ruraykä’”. Diosninchega munaycanmi cumplinanpaj munayninta, y yachayninpis poderninpis caycanmi chayta rurananpaj. Jina seguro caycan munaynin ruracänanpaj, chaymi parlapämanchi mayna cumplicushgantanomi. Chaymi payga nin: “Kay nishqäkunaqa rasun kaqmi kaykan”. Caytapis nin: “Lapanpis cumplishqanami kaykan”. Jehová imatapis rurayta galaycuptenga, manami jamanchu ushanancama. Pay caynomi nin: “Alfa y Omegami noqa kaykä” (Apoc. 21:6). Jehová munashganta cumplicuptin, claro ricacämunga Satanás lulacoj cashganta. Waquincuna ‘¿chayga rasunpachuraj canga?’ niptenga, ali canman 5 y 6 versiculucunata leipar shumaj tantiarcachiptiqui. Chayta ruraptiqui, paycunapis tantiacäringa imanirtaj yäracunman Diospa aunicuynincuna rasunpa cumplicunanpaj. Jehová aunishganga quiquin firmanta churashganno legal caycan cumplicunanpaj (Is. 65:16). w23.11 7 parr. 18, 19

Jehovaga Abrahanta chaytami aunicurgan. Chay wichanpäga Abrahán 75 watayojna caycargan, ichanga wamrancunaga carganrächu. ¿Abrahanga ricashgachuraj Jehová aunishganta? 25 watacuna pasarcuptinraj Abrahanpa wamran Isaac yurirgan. Y 60 watacuna masraj pasarcuptin Esauwan Jacob wilcancuna yurirgan (Heb. 6:15). Ichanga Abrahanga manami ricashgachu miraynincuna jatun naciunman ticrashganta, ni Aunishgan Pachamanpis yaycushganta. Chayno captinpis Jehovata sirvir cushishga caycargan (Sant. 2:23). Paraisucho Abrahán cawarimuptenga alapachi cushicunga yäracoj cashganpita Pachacho lapan runacuna bendicishga cashganpita (Gén. 22:18). ¿Imatataj yachacunchi? Capaz manami ricashwanchu Jehovapa lapan promesancuna cumplicushganta canan wichan. Ichanga Abrahanno pacienciacoj captinchega Jehová cananmi bendecimäshun y shamoj tiempuchoga masraj canga (Mar. 10:29, 30). w23.08 24 parr. 14

Joven cashpanmi Uziasga humilde cargan y ‘TAYTA DIOS munashqannömi kawarqan’. Chaymi lapanchopis Jehová bendicirgan, payga 68 watacamami cawargan (2 Crón. 26:1-4). Payga calpachacurganmi Jerusalén marca imapitapis chapashga cananpaj, chaymi achca chiquej marcacunata vencirgan (2 Crón. 26:6-15). Jehovapa yanapacuyninwan imaycacunata rurashganta ricar Uziasga cushicurganchi (Ecl. 3:12, 13). Uzías rey cashpanmi pï maytapis cayta wacta rurananpaj mandacoj. Chaychi lapan munashgancunata rurananpaj yarpargan. Juc cuticho, Jehovapa templunman yaycuycur inciensuta rupachergan, chaytaga sacerdoticunalami ruranman cargan (2 Crón. 26:16-18). Chayraycu sumo sacerdote Azarías piñapaptinpis, payga alapa rabiacurgan. Uzías achca watacunapa alicunata rurashga carpis nircur pantaycurgan, y chayraycu Jehová leprawan castigargan (2 Crón. 26:19-21). ¡Humilde runa carga chayta manachi ruranmanchu cargan! w23.09 10 parr. 9, 10

Espíritu santuwan acrashgana caycaptinpis, apóstol Pedruga jinala luchanman cargan juchasapa cayninwan. 36 caj watacho, Jesús shamushganpitana Pedruga ricargan mana judío caj Cornelio jutiyoj runa espíritu santuta chasquishganta. Chaywanga cuentata gocurgan Tayta Dios pï may runacunatapis chasquishganta sirvejnincuna cananpaj (Hech. 10:34, 44, 45). Chaypita pacha Pedruga mana judío cajcunawanpis micupacoj, ichanga unaychoga chayta ruranmanchu cargan. Waquin judío caj cristianucunaga mana judío cajcunawanga micupäcojchu. Chaymi juc cuticho Antioquiaman Pedro chayaycur mana judío caj cristianucunawan micupacuyta munarganchu, judío caj cristianucuna mana jamurpänanpaj. Chayta ricaycur apóstol Pabluga waquincunapa naupancho Pedruta olgupargan (Gál. 2:13, 14). Chayno pantarpis, Pedruga Jehovata imaypis jaguirganchu. w23.09 22 parr. 8

Imalachopis mejoranayquipaj captenga, ama guelanäcuychu, yarparay Tayta Dios cuyacoj cashganta y yanapäshunayquita munaycashgantapis (1 Ped. 2:3). Pedruga nimanchi “Tayta Dios yanapämäshun jutsata mana ruranantsipaq”. Juc cuticho Pedro mana valejno ricacurgan Jesuspa naupancho caycaptin (Luc. 5:8). Ichanga Jehovawan Jesús yanapashganta ricar, Pedruga wanunancama Jesuspa discipulun cargan, chayraycu “salvamaqnintsi Señor Jesucristo” mandaycashganman yaycurgan (2 Ped. 1:11). ¡Pedro chasquishgan bendiciunga alapa shumajmi! Gampis Pedruno valurcharcuptiqui y Jehovata mana cachaycuptiquega, mana ushacaj cawayta chasquinqui. Aumi, Diosman yäracurga ‘salvacionta tarinquimi’ (1 Ped. 1:9). w23.09 31 parr. 16, 17

Unaycho Sagrado tolduchoga juc patiupis caycargan, chaychoga sacerdoticuna Jehová mandashganta rurapäcoj. Jina chaycho caycargan cobripita rurashgan altarpis sacrificiucunata rupachipäcunanpaj, y cobripita rurashgan lavatoriupis caycargan sacerdoticuna sagrado ruraynincunata manaraj rurar chaycho maylacärinanpaj (Éx. 30:17-20; 40:6-8). Cielupaj acrashga cajcuna Jehovapa templun nirajcho ruri caj patiucho lapan shongunwan sirvircaycan. Y unay sagrado toldupa patiuncho lavatoriucho caycashgan yacuga paycunata y noganchitapis yarpächimanchi limpio y santo runacuna cananchipaj. Y cay Pachacho aypala cawananpaj runacunaga, ¿maychotaj sirvircaycan? Paycunaga Jehovapa templun nirajcho yaycunan patiucho carcaycan, chaymi apóstol Juan nergan: “Tsay runakunaqa Tayta Dios jamarashqan trönun nawpanchömi karkaykan. Paqasta junaqtami templuncho alabarkaykan” (Apoc. 7:9, 13-15). ¡Selläma cushicurcunchi Jehovapa templun nirajcho aduraycashganchipita musyar! w23.10 28 parr. 15, 16

Jehovaga ancianucunawanpis calpata gomanchi (Is. 32:1, 2). Chaymi imalapis yarpachacächishuptiquega ancianucunawan parlacamuy y yanapäshunayquita munarga chasquicuy. Jehovaga paycunawan yanapämanchi calpayoj ricacunapaj. Imaycamapis cawayta tarinapaj cielucho cajpis y cay Pachacho cajcunapis Biblia nishganman yarpararga calpata gomanchi (Rom. 4:3, 18, 19). Jehová aunimashganchiman yarparga calpata tarinchi pruebacunata aguantanapaj, jinala predicanapaj y congregaciuncho cargucunatapis cumplinapaj (1 Tes. 1:3). Chaypis apóstol Pabluta yanapargan. Runacuna payta chiquipar ashlipargan, magargan y wanuchiytapis munargan (2 Cor. 4:8-10). Jehová aunishganman yarpar, Pabluta calpata gorgan chay lapanta aguantananpaj (2 Cor. 4:16-18). Payga yarpachacoj shamoj tiempucho cielucho ali cawananpaj cajman. Y Dios aunishganman yarpar “waran waran mas mözunömi” ricacurgan. w23.10 15, 16 parr. 14-17

Jehovata mañacurga, ¿mañacuyninchicunata jucla contestamänanchitachu munanchi? Lapanchimi munanchi Jehová rasla mañacuyninchita contestananpaj. Pero payga musyanmi imay tiempucho más ali cashganta contestamänanchipaj (Heb. 4:16). Munashganchi hora Jehová mana contestamaptinchega, manami ninanchu mana munashganta contestamänanchipaj, sinoga nircur-raj contestamäshun. Yarpäshun juc mozuman gueshyanpita aliyänanpaj mañacushganta. Pero manami aliyäcushgachu. Jehová payta aliyächiptenga, Satanasga ninmanchi chay mozo Jehovata sirviycan aliyächishganlapita (Job 1:9-11; 2:4). Pero Jehovaga mayna camacächishgana lapan gueshyacunata ilgächinanpaj (Is. 33:24; Apoc. 21:3, 4). Chaymi canan wichan ama shuyarashwanchu Jehová juc milagruwan aliyächimänanchipaj. Chaura, ¿imataj chay mozo Jehovata mañacunman? Ruwacunmanmi calpata gonanpaj y gueshyawan caycarpis cushishgala Jehovata mana cachaypa sirvinanpaj. w23.11 24 parr. 13

Sansón pantaycurpis Jehovata manami cachaycurganchu. Payga valurcharcur Jehovapa voluntäninta jinala rurayta munargan (Juec. 16:28-30). Chaymi mañacuynincho cayno nergan: “TAYTA DIOS, kalpä yurinanpaq yapay yanapaykalämay. Tsaynöpami […] filisteo runacunata ushakätsishaq”. Jehovaga mañacuyninta wiyargan y calpanta yapay yurichergan. Chaura chay cuticho filisteo runacunata Sansón wanuchishganga más achca cargan unaycho wanuchishganpitapis. Sansón pantashganraycu o mana alita rurashganraycu alapa nacaycarpis, yapay valurcharcurgan Jehovapa voluntäninta rurananpaj. Noganchipis öraga imalachopis pantashwanmi, chaura pilapis corrigimäshunmi o maygan carguchopis manana yanapacunapaj nimäshun. Chayno captinpis jinala calpachacushun Jehovata sirvinapaj. Payga ali nawilanwan ricamäshun calpachacuptinchi voluntäninta ruranapaj (Sal. 103:8, 9). Pantaj runa captinchipis, Sansonno Jehovapäga valuryoj caycanchi. w23.09 6 parr. 15, 16

Jehovaga manami cushicunchu nacaycunapa pasaptinchi, chaypa trucanga aguantashganchipita cushicun. Gampis ima captinpis Jehovalata mana yamacaypa sirviptiquega paytami cushichinqui (Sal. 5:12). Abrahán pruebacunapa pasar ali aguantashganpita Diosninchi ali ricargan. Amigunman ticrargan y Diospa ricaynincho alita ruraj runa cargan (Gén. 15:6; Rom. 4:13, 22). Noganchitapis ali ricamäshun ima pruebacunapapis pasar aguantashganchipita, manami congregaciuncho tucuy carguyoj cashganchipitachu. Y chaytaga lapanchi rurayta puedinchi ima edäyoj carpis o ima habilidäta chararpis. ¿Canan wichan ima pruebacunapapis pasaycanquichu? Chayno captenga, ama gongaychu Jehovata mana cachaycuptiquega pay ali ricashunqui. ¿Manachu chayta musyarga shamoj tiempupaj ima shuyarashganchiman masraj confiacunchi? w23.12 11 parr. 13, 14

Caytaga lapan olgu cristianucuna yachacärinman. Chaynoparaj yachacunqui waquincunata shumaj wiyayta y ima yarpashganta imano sienticushgantapis tantianayquipaj (Prov. 20:5). Waquincunawan parlapacur-raj vozninpa tonuncho o gajlanchopis cuentata gocunqui imano sienticushganta. Pero celularpa, mensajilapa o correulapa waquincunawan parlapacurga, sasami canga cara cara piwanpis parlapacunayquipaj. Chaymi calpachacuy waquincunawan imalatapis rurar parlapacärinayquipaj (2 Juan 12). Pogushga cristianucunaga calpachacunmi quiquinpaj y familianpäpis lapanta camaripänanpaj (1 Tim. 5:8). Chaymi alichi canman gampis imalatapis yachacur quiquiqui mantenicunayquipaj (Hech. 18:2, 3; 20:34; Efes. 4:28). Ali arucoj carga imata ruranayquipaj captinpis lapantami cumplinqui. Chaura runacunapis ali ricashunqui y juc trabajuta tariycurga calpachacunqui mana ogranayquipaj. w23.12 27 parr. 12, 13

Unaycho Jehová chiquejnincunata ushacächergan. Chaynolami Bibliacho Jehovapa junajninpita parlaptenga, parlaycämun Armagedón guerracho chiquejnincunata ushacächinanpaj cajta (Is. 13:1, 6; Ezeq. 13:5; Sof. 1:8). Jesús discipuluncunata chay junajpita parlar nergan imaypis “kamarikushqala karkaykay”. Chay junajga galaycunga lapan luta religiuncunata ushacächir galaycuptin y ushanga Armagedón guerracho. Chay junajcho salvacärinapäga, cananlapitanami calpachacushwan camaricushgala carcaycänapaj (Mat. 24:21; Luc. 12:40). Cristiano masincunata yanapayta munarmi, Pabluga naupa caj Tesalonicenses cartacho shumaj tincuchicuycunawan tantiachicamurgan Jehovapa junajnin imano cananpaj (2 Tes. 2:1-3). Chay junaj chayamunanpaj alapa pishiycashgantaraj musyarpis, cristianucunata shumaj tantiachicamurgan imanir camaricushgala carcaycänanpaj. w23.06 8 parr. 1, 2

Japón naciuncho 1978 watacho, jatuncaray edificiuta runacuna sharcachergan. Chayta ricaycur waquincuna cayno tapucärej: “Pacha cuyuptin, ¿chay edificio juchucäcungachuraj?” nir. Ichanga cada cadala terremoturaycu chay edificio cuyuptinpis, manami juchucäcurganchu. ¿Imanir? Chay edificiuga sharcachishga cargan mana juchucäcunanpämi. Noganchipis chay jatuncaray edificiuno cananchi, ¿imanirtaj chayta ninchi? Ali cimientuyoj edificiutaga imapis tunichinchu, chaynolami lapan shongunchiwan Jehovata cuyaptinchega imapis tunichimäshunchu; chaypa trucanga mana guelanaypa y mana ajayaypa mandatuncunata cäsucushun. Chayno captinpis tantiacoj runacuna cananchi. Chayno carga manami shuyarashwanchu waquincuna noganchi yarpashganchino y rurashganchino imatapis rurananpaj (Sant. 3:17). Jina manami nishunchu ‘cayta wacta ama ruraychu’, ni ‘gampitachä canga ruranayquipaj o manapis’ nir. w23.07 14 parr. 1, 2

Satanás Jesusta quimsa cuticho tentargan Jehovata jaguinanpaj (Mat. 4:1-11). Satanasga imaycanopapis munargan Jesús juchalicunanpaj, noganchiraycu mana wanunanpaj. Runacunata yachachishganchopis tucuy pruebacunapa pasargan. Fiyu runacunaga pasaypa chiquirgan y wanuchiytapis munargan (Luc. 4:28, 29; 13:31). Discipuluncuna cutin cutin pantarcuptinpis, paycunawan pacienciacoj cargan (Mar. 9:33, 34). Wanunanpaj sentenciashgana caycaptin, pasaypa magapäcurgan, ashlipargan y burlacärirganpis. Nircur juc suwacoj runatano guerucho clavaycurgan, chayga alapa laquicuypächi cargan (Heb. 12:1-3). Y wanunanpäna caycaptin Jehová cachaycurgan quiquilan ushananyaj aguantananpaj (Mat. 27:46). Jesús noganchiraycu wanushganga alapa valuryojmi caycan, payga imayca sasacunapa pasargan. Chaymi noganchiraycu lapan rurashgancunaman yarpachacurga shongupita payta masraj cuyayculanchi. w24.01 10, 11 parr. 7-9

Pacienciacoj carga waquincunawanpis alimi apanacushun. Santiago 1:19 nin “shumagrag mayapäcuy waquincagcuna imapita parlangantapis”. Pacienciacoj carga pï maywanpis jaucalami cawacushun, imapitapis juclaga rabiacushunchu, parlayninchiwanpis laquichishunchu ni paycuna ruramashganchinoga manami rurashunchu. Chaypa trucanga, cuyacuywan aguantanacushun, ayca cutipis perdunanacushun (Col. 3:12, 13). Pacienciacoj carga imaypis ali cajcunata acrashwanmi. Imatapis jucla mana ruranapaj trucan, shumaj yarpachacur-raj musyashwanmi maygantaj más ali cashganta acranapaj. Öraga aruyniynaj caycar capaz imanopapis aruyta munashwan, ichanga pacienciacoj carga tantiarcushwanmi chay trabajo familianchipita y Jehovapitapis mana raquicächimänanchita. w23.08 22 parr. 8, 9

Mana ali munayniquicunawan lucharga capaz laquicurpis galaycunquimanmi. Pero ama gongaychu Jehovata sirvinayquipaj aunishgayquita, chayga calpatami goshunqui ima tentaciunmanpis mana ishquinayquipaj. ¿Imanirtaj chayta ninchi? Pipis Diosta sirvinanpaj auniptenga, shongun munashganno cawacunnachu. Dios chiquishgan ruraycunatapis chiquin (Mat. 16:24). Chaymi ima pruebalapis o tentaciunpis captenga manami chayraj yarpachacur galaycunchichu imata ruranapaj, sinoga imaypis decidido caycanchi Jehovalata sirvir caycänapaj. Jehovata sirvinapaj aunirga, nishcanchi shongunchi munashgancunata manana ruranapaj. Jobno cayta munanchi, payga tucuy pruebacunapa pasarpis ‘cawashgäyajga Jehovata manami cachaycushächu’ nergan (Job 27:5). w24.03 9 parr. 6, 7

Jehová cuyacojmi caycan (2 Cor. 13:11). Payga jucninchi jucninchipaj yarpachacun. Payman “yärakuq runakunataqa Tayta Diosmi kuyapar” yanapan (Sal. 32:10). Cada cadala yarpachacuptinchi Jehová cuyamashganchita, rasunpa Taytanchitano ricar payman masraj guelicushun. Chaymi shongunchita mashtapar mañacuyninchicho nishwan cuyaycalämananchipaj. Paytaga wilapashwan lapan laquicuyninchicunata y seguro caycashwan tantiamänanchipaj y yanapämänanchipäpis (Sal. 145:19). Imanomi gasaycho tulpapa ladunman witircunchi goñurcachimänanchipaj, chaynolami Jehovamanpis ashuycushwan o guelicushwan imaypis cuyamänanchipaj. Jehovapa cuyacuyninga alapa jatunmi, y alapa cushicurculanchi Jehová amatar cuyamaptinchi. Chaymi noganchipis nishwan: ‘Jehovata pasaypa kuyä’ (Sal. 116:1). w24.01 31 parr. 19, 20

Jesusga manami yachachicurganlachu Diospa jutin Jehová cashganta. Judiucunaga mayna musyapäcurgan chayta. Chaymi Jesusga paycunata yachachergan Jehová Dios imano cashganpita (Juan 1:17, 18). Escrituras Hebreas o unay testamentucho niycargan Jehová “kuyapäkuq y perdonakuq” cashganta (Éx. 34:5-7). Pero Jesús juc tincuchicuywan shumaj tantiachicurgan imano Jehová cuyapäcoj y perdunacoj cashganta. Juc wamrashi shongun munashgalanta rurayta munar wasinpita aywacurgan. Ichanga taytanga churin arrepentido “karulataraq kutiykaqta rikärirshi” payga “kushikushpan warakayla aywar makalakurkur mutsarqan” y juchantapis perdunargan. Chay wilacuywan Jesús ricächicurgan Jehová cuyapäcoj y perdunacoj cashgantami (Luc. 15:11-32). Chaynopami Jesusga runacunata yachachergan Jehová imano Dios cashganpita. w24.02 10 parr. 8, 9

Jehovapis cuyamashpanchi shogamaptinchega shongunchipis ancashyarcunraj. ¿Imaraj noganchitapis yanapämäshun waquincunata laquipar shoganapaj? Jehovano laquipäcoj captinchimi. ¿Imanotaj chayta rurashwan? Yäracoj masinchicunawan waran waran jinala cuyanacunapaj y shacyächinacunapäga, paycunawan juc shongunola cuyapänacur cawacushwan (1 Tes. 4:18). Chaypäga paycunaman yarpachacushun y familianchitano ricashun (Col. 3:12; 1 Ped. 3:8). Cuyapäcoj captinchega mayna yarpaycanchina nacaycajcunata imanolapapis yanaparcunapaj. Jesuspis nergan: “Runaqa shonqun yarpashqantami alitapis o mana alitapis parlan. Ali runaqa shonqun alita yarpashqantami parlan” (Mat. 12:34, 35). Chauraga, hermanunchicunata cuyapar shogaptinchega, ricacämun paycunata alapa cuyashganchitami. w23.11 10 parr. 10, 11

Jucpa yanapacuyninwanrämi shumaj tantiarcunchi profeciacunataga. Gamshi pasiaj aywanquiman juc mana reguishga marcaman, ichanga chay marcata shumaj mana reguirga manchacunquichi ogracunayquipaj, pero chay marcata ali reguej amiguyqui gamwan caycaptenga cushicunquichi. Payga nishunqui caypa wacpa o maypa aywanayquipaj. Jehovapis chay ali amiguno musyanmi shamoj watacunacho imacuna pasananpaj cajta. Chaymi, profeciacunata shumaj tantiarcunapäga, ali shongulanchiwan Jehovata mañacushwan yachayta gomänanchipaj (Dan. 2:28; 2 Ped. 1:19, 20). Cuyacoj taytacunaga imaypis munapäcun wamrancuna ali cawapäcunanpaj, chaynola Jehovapis sirvejnincunapaj munan (Jer. 29:11). Runacunaga musyapäcunchu shamoj watacunacho imata pasananpaj, Jehová ichanga musyanmi. Chaymi Palabrancho guelgachimurgan imacunata pasananpaj cajta musyanapaj (Is. 46:10). w23.08 8 parr. 3, 4