Jehová munashganno cawarcaycäshun

1. ¿Imanirtaj ali caycan Jehovata imano reguishganchipita parlapacuptinchi?

“¿IMANOTAJ rasunpa cajta yachacushcanqui?” nir tapupämaptinchi achca cutinachi wilacushcanchi. Chayno tapunacunchi waquin hermanucunawan reguinacurmi. Cushishgami wiyarcunchi hermanucuna Jehovata imano reguiycushganpita y cuyar galaycushganpita wilamaptinchi. Jina quiquinchipis chaypitaga cushishgalami parlapacunchi (Rom. 1:11). Chayno parlapacushganchega Jehovapa testigun cashganchi alapa ali cashgantami yarpächimanchi. Jina yanapämanchi “Jehová munashganno cawacunapaj” chaynopa Jehovata cushichinapaj y bendiciunnintapis chasquinapaj (3 Juan 4).

2. ¿Imacunapitataj parlarcushun cay yachachicuycho?

² Cay yachachicuychomi yarpäshun juc ishcay yachachicuycunata imanir rasunpa cajta cuyashganchita. Jina ricärishun imanotaj musyachicushwan rasunpa cajta valurashganchita. Chaypitami más agradecido caycäshun rasunpa cajta Jehová yachaycächilämashganchipita (Juan 6:44). Y waquincunatapis ganas ganasla yachachicuycäshun.

IMANIRTAJ JEHOVÁ MUNASHGANNO CAWACUNCHI

3. ¿Imanirtaj Jehová munashganno cawacuyta munayculanchi?

³ Imaycacunami caycan Jehová munashganno cawacunapaj. Punta cajga Jehovata cuyashganchimi, paymi rasunpa cajta yachachimanchi. Palabranchomi yachacushcanchi alapa poderyoj Diosnilanchi cay Pachata y cielutapis camashganta. Masga yachacushcanchi Taytalanchi Jehová cuyaycalämashganchita y jucninchi jucninchipaj yarpachacushgantapis (1 Ped. 5:7). Musyanchimi Jehovaga ‘cuyapäcoj, ali shongu Dios, jucla imapitapis mana rabiacoj, pasaypa cuyacoj, rasun cajta ruraj’ cashganta (Éx. 34:6). Payga ali cajtami cuyan (Is. 61:8). Alapa nacaycashganchita ricar Jehovapis laquicunmi, chaymi piñacuy junajnin chayamuptin lapan mana alicunata ilgächenga (Jer. 29:11). ¡Mayna munaycunchi chay junaj chayamunanta! Chaymi Taytalanchi Jehovata alapa cuyayculanchi.

4, 5. ¿Imanirtaj apóstol Pabluga nergan shamoj tiempupaj cawayta shuyarayga juc anclano cashganta?

⁴ Jina rasunpa cajta cuyanchi cawayninchicho yanapämaptinchimi. Tantiarcunapaj Bibliacho jucnin caj yachacushganchega caycan mushoj Pachacho cawacunapaj shuyaraycashganchimi. Chaypita parlarmi apóstol Pablo cayno nergan: “Payman yärakushqantsiqa büqui mana kuyukunanpaq tsararaq anclanömi kaykan” (Heb. 6:19). Imanomi juc büquipa anclan yanapan mana talpucänanpaj, chaynolami Jehovapa aunicuynincuna yanapämanchi alapa mana yarpachacunapaj pruebacuna chayamuptin.

⁵ Chaypita apóstol Pablo parlarga cielupaj acrashga cajcunapämi parlaycargan. Jina nishganga cay Pacha juc paraisuman ticraptin cawajcunapäpis parlarganmi (Juan 3:16). Chaynomi mushoj Pachacho imaycamapis cawacunapaj yachacushganchega calpata gomanchi mana yamacaypa Jehovata sirvircaycänapaj.

6, 7. ¿Imanotaj Yvonneta yanapargan shamoj tiempupita Bibliacho yachacushganga?

⁶ Yvonne jutiyoj panipita parlarcushun. Payshi Jehovata mana reguej juc familiacho winargan y wamralaraj caycaptinshi wanuyta manchacoj. Juc cutichoshi juc librucho leiycurgan “Ilajpitami lapancuna wanunga” nejta. Paymi nin: “Leishgäman yarparar punuytapis puedejcächu y shamoj tiempupaj yarpachacur tapucoj cä: ‘¿Imapätaj cay munducho yuriycushcä? ¿Cay caway vidaga caylachuraj lapan caycan?’. ‘¡Wanuytaga manami munächu!’ nirmi yarpachacoj cä”.

⁷ Jipashyarcuptinshi Jehovapa testiguncunata reguirgan. Paymi wilacun: “Mushoj Pachacho cawanäpaj yäracur galaycurgä, rasunpa cajta yachacushgämi alapa yanapämargan”. Paymi caynopis wilacun: “Cananga chacaycunapa yarpachacönachu wanuyman y shamoj tiempupäpis”. Yvonnega yachacushganta cuyanmi chaymi runa masincunata shamoj tiempucho Paraisupita yachachinanpaj calpachacun (1 Tim. 4:16).

8, 9. 1) Tesoruta tarishgan Jesús tincuchishga runaga, ¿imanotaj ricächicurgan chay tesoruta valurashganta? 2) ¿Ima ninquimantaj rasunpa cajta yachacushgayquipita?

⁸ Diospa ali wilacuycunapis rasunpa cajcunami y Bibliachomi caycan. Diospa Gobiernunpita yachachicuycunata Jesusga tincuchirgan guellaywanmi. Caynomi nergan: “Tayta Dios mandaykashqanqa chakracho qellay pamparaqmanmi tinkun. Juk runashi chakracho tsaytsika qellay pamparaykaqta tarirqan. Tsay qellayta tariykurshi kashqalanman pampaykurqan. Nirkurshi lapan imaykantapis rantikuykur tsay qellay pamparaykaq chakrata kushishqa rantirqan” (Mat. 13:44). Chay runaga manami guellayta o tesoruta ashiycarganchu, tariycurmi ichanga dueñun cananpaj imaycancunatashi ranticuycurgan. Chayno rurananpäga chay tesoro alapa valuryoj cashgantami tantiacurgan y imawanpis mana tincushganta.

⁹ ¿Gampis rasunpa cajtaga cuyanquicu? ¡Aumi cuyanquichi! Diosta sirvishganchega y shamoj tiempucho Diospa Gobiernun mandacamuptin imaycamapis cawacunapaj shuyarashganchega manami imawanpis tincunchu. Jehovawan más amigo canapaj imata rurashganchipis o imata cachaycushganchipis alapa alimi. Aumi, Jehovawan amigo cashganchega manami imawanpis tincunchu. Y masraj cushichimanchi lapancho cäsucunapaj calpachacuptinchi (Col. 1:10).

10, 11. ¿Imataj Michaelta yanapargan cawaynincho cambiucunata rurananpaj?

¹⁰ Achca cristianucunami imaycacunata rurashga Jehovata cushichinanpaj. Waquincuna cay munducho ali reguishga cananpaj yachacuycashganta cachaycärishga. Waquincunana riquezacunalata mana ashinnachu. Y juccunaga Jehovata reguishpan imano cawacushganta cambiargan. Chaytami ruraycurgan Michael, payga Jehovata mana reguishgan juc familiachomi winargan. Mozo cashgan wichan karate nishgan peliatashi yachacurgan. Paymi wilacun: “Cuerpö ali cashganpitami orgulloso caycargä. [...] ‘Nogataga manami pipis vencimangachu’ nirpis yarpargä”. Ichanga Bibliapitami yachacur galaycurgan y peliacunata Jehová chiquishgantami tantiacurgan (Sal. 11:5). Bibliapita yachaycächishgan matrimoniupaj parlarmi Michael cayno nin : “Paycunaga manami imaypis nimarganchu karatita cachaycunäpaj. Bibliapitalami paycunaga yachachipäcamaj”.

¹¹ Jehovapita cada cadala yachacuptinshi masraj cuyaycoj. Jehová sirvejnincunata cuyapashganta yachacuptinshi shonguntapis cuyurcachergan. Chauraga yarpachacurgan Jehová munashganno cawacunanpaj. Paymi wilacun: “Karate peliata cachaycunapäga sasami cargan, ichanga cachaycunäpaj calpachacuptëga Jehovatami cushichishaj. Chaymi manami ‘yangalapächu canga’ nirmi yarpaycashcä”. Michaelga rasunpa cajta yachacushganmi yanapargan cawaynincho cambiucunata rurananpaj (Sant. 1:25).

12, 13. ¿Imanotaj rasunpa cajga Mayli panita yanapashga?

¹² Rasunpa caj alapa valuryoj cashganta tantiacunapämi, Bibliaga tincuchin chacaycho juc lámpara achicyaycashganwanmi (Sal. 119:105; Efes. 5:8). Azerbaiyán naciunpita Mayli jutiyoj paniga agradecida caycan rasunpa cajta yachacushgan cawaynincho yanapaptin. Familianchoshi taytanga cargan musulmán religiunpita y mamannashi judío religiunpita. Paymi wilacun: “Dios cashgantaga tantiacurgämi, ichanga musyayta munargä cay tapucuycunapita: ‘¿Imanirtaj Dios camamashcanchi?, ¿imanirtaj cay caway vidacho nacanchi, nircur wanurpis infiernuman aywanchi nacanapaj?’. Runacunaga nipäcun cay munducho imacuna pasacushganpis Diospa voluntänin cashganta, chayga yarpachacächimaj: ‘¿Juc muñecunolächuraj Diospa maquincho caycanchi? ¿Y nacaycajta ricamaptinchi cushicunchuraj?’”.

¹³ Mayliga jinalami yachacuyta munaycargan. Chaymi Jehovapa testiguncuna yachachinanpaj niptin aunicurgan, nircur quiquinpis Jehovapa testigunman ticrargan. Paymi nin: “Tapucuycashgäpita Bibliachomi shumaj yachacushcä, chaymi cananga chaypita yarpachacönachu y jaucala cawacö”. Mayli panino lapalanchi Jehovata sirvejcunaga ‘chacaypita japuy achicyajmanno jorgamashganchipita’ payta alabaycanchi (1 Ped. 2:9).

14. ¿Imatataj rurashwan rasunpa cajta masraj cuyanapaj? (“Waquin tincuchicuycuna” recuadruta ricäriy).

¹⁴ Chaylaraj parrafucunacho wilacuycunapita parlashganchega rasunpa caj alapa valuryoj cashgantami tantiachimanchi. Jina maynachi más wilacuycunata yarpaycanchi. ¿Manachuraj rasunpa cajpita masraj yachacunapaj calpachacushwan? Rasunpa cajta cada cadala cuyashganchega ricacangami cawayninchicho y imacuna rurashganchichopis.

IMANOTAJ RICÄCHICUNCHI RASUNPA CAJTA CUYASHGANCHITA

15. ¿Imanotaj rasunpa cajta cuyashganchita ricächicushwan?

¹⁵ Rasunpa cajta cuyashganchita ricächicushun Bibliapita y publicaciuncunapita masraj yachacuptinchi. Rasunpa cajpita chaylaraj yachacuyta galaycushga car o unaypitana yachacuycashgayquina carpis lapanchimi cada cadala yachacunapaj caycan. Punta caj inglés rimaycho La Atalaya revista nergan: “Rasunpa cajga caycan ichic wayta chunyajcho jachacunapa chaupincho caycashganno. Chayga ninan rasunpa cajga cay sasa caway vidacho achca luta yachachicuycunapa chaupincho caycashganno. Tariyta munarga mayaj mayajla caycänayqui; [...] y charayta munarga humildimi canayqui. Juc ishcay tarishgayquilawanga ‘chaylapämi’ niychu. [...] Jinala ashiycay y shuntaycay”. Yachacunapäga calpachacushwanrämi, ichanga yachacushganchega alapami yanapämäshun.

16. ¿Imatataj ruranqui Bibliapita masraj tantiacunayquipaj? (Proverbios 2:4-6).

¹⁶ Leiyta y yachacuytaga manami lapanchitachu gustamanchi, chayno captinpis rasunpa cajpita cada cadala yachacunapämi Jehová nimanchi (leiriy Proverbios 2:4-6). Chauraga ganas ganasla shumaj yachacuptinchega quiquinchipämi canga. Juc waugui Corey jutiyoj Bibliapita yachacuptinshi maygan versiculutapis shumaj tantiananpaj calpachacun. Paymi wilacun: “Shumaj tantianäpäga ichic wilacuycunatapis leï, waquin textucunata y publicaciuncunachopis yachacö. [...] Chaynopami masraj tantiacö”. Wauguinchino rurar o manapis, Bibliapita yachacunapaj tiempunchita raquiptinchi y calpachacuptinchega rasunpa cajta cuyashgantami ricächicushun (Sal. 1:1-3).

17. ¿Imatataj rurashwan rasunpa cajta cäsucuycashganchita musyanapaj? (Santiago 1:25).

¹⁷ Rasunpa cajta yachacushganchega shongunchimanpis chayanmanmi y caway vidanchicho cäsucushwan, chaynoparämi rasunpa cushishga goyäshun (leiriy Santiago 1:25). ¿Imanotaj cuentata gocushun rasunpachush yachacushganchita cäsucuycanchi o manapis? Chayta musyanapäga juc waugui nishganno quiquinchishi tapucushwan imataj ali ruraycanchi y imachotaj más aliyarcunapaj caycan. Apóstol Pablupis caytami nergan: “Imano captinpis Jesucristo munashannölla cawashun ari” (Filip. 3:16).

18. ¿Imanirtaj imaycanopapis calpachacunchi rasunpa cajta cäsucunapaj?

¹⁸ Imaycanopapis rasunpa cajta yachacunapaj y cäsucunapaj calpachacushganchipita Jehovata y hermanunchicunatapis cushichiycanchi, jina cawayninchipis aliyarcunmi. Chay alicunaman imaypis yarparaycäshun (Prov. 27:11; 3 Juan 4). ¡Chaycunaga manami imawanpis tincunchu rasunpa cajta cuyanapaj y cawayninchicho cäsucunapäpis!