Jinala “jucniqui-jucniquipis shacyächinacuy”

1. ¿Imachotaj lapanchi yanapacunchi 1 Tesalonicenses 5:11 texto nishganno?

¿IMAYLAPIS Diosta aduranapaj localta sharcachiycho o alchachiycho congregaciunniqui yanapacushgachu? Chauraga Jehovata agradecicushpayqui cushicuypitaga punta caj reuniuncho shumaj cantanayquipäpis puedishcanquichu. Aumi, chayno cuyaylapaj localcunaga Jehovatami alaban. Ichanga localcunata sharcachiypitapis, ¿imataj más ali caycan? Chayga caycan Jehovalata alabanapaj hermanucunata yanapaptinchimi. Chaypämi apóstol Pablo parlamurgan cay yachachicuycho acracämushga textucho, 1 Tesalonicenses 5:11 (leiriy).

2. ¿Imataj yachacushun cay yachachicuycho?

² Imano hermanunchicunata shacyächinapaj y yäracuyninta sinchiyächinapaj apóstol Pablo rurashganpitami yachacushun. Payga musyargan cristiano masincunata imano yanapacunanpaj. Cay yachachicuycho yachacushun cristianucunata imano pay yanapashga pruebacunata aguantananpaj, jucnin jucninpis jaucala cananpaj y Jehovaman masraj yäracunanpäpis. Ricärishun pay rurashganno imano ruranapaj (1 Cor. 11:1).

CRISTIANO MASINCUNATA PABLO YANAPARGAN PRUEBACUNATA VENCINANPAJ

3. ¿Imanotaj Pabluga ricargan aruyninta y predicaciunta?

³ Hermanuncunata Pablo alapa cuyaj y quiquinmi imayca pruebacunapa pasargan, chaymi laquipargan y pruebacunapa pasaycaj hermanucunatapis shumaj tantiargan. Juc cutichomi guellaynin ushacargan, chaymi necesitashgancunapaj y paywan purejcuna necesitashgancunapäpis quiquinmi arurgan (Hech. 20:34). Payga tolducunatami ruraj, chaymi Corinto marcaman chayar, Aquilawan Priscilawanpis tolducunata rurar arupäcoj. Sábado junajcunami ichanga judiucunata y griegucunatapis yachachej. Silaswan Timoteo chayamuptinna “aruyninta kachaykur waran waran Tayta Diospa wilakuyninta wilakurqan” (Hech. 18:2-5). Apóstol Pabluga imaypis más puntaman churaj Jehovata sirvinanpämi. Ali aroj runami cargan y cristiano masincunata shumaj consejaycunanpäpis listumi caycargan, imaraycur o familiaraycurpis mana michänanpaj Jehovata sirvipäcunanpaj (Filip. 1:10).

4. ¿Imanotaj Pabluwan Timoteuga cristiano masincunata aguantananpaj yanapargan?

⁴ Tesalónica marcacho chaylaraj formacashga congregaciunta chiquicojcuna gaticachar galaycärergan. Chaymanmi chiquicojcuna Pablutawan Silasta mana tarirmi waquin hermanucunata gaparpaycar y garachaypa autoridäcunaman apacärergan. Gaparar cayno nergan: “Chay runacunaga mas mandaj Cesarpa laynincunatami manacajman churaycan” (Hech. 17:6, 7). ¡Wawalau!, chaylaraj bautizashga cristianucunaga manchacashgachi caycargan marca masincuna chiquir gaticachar galaycäriptin. Chaycunapa pasarga guelanar imarchi galaycärergan, Pablumi ichanga mana munarganchu guelanacärinanpaj. Pabluwan Silas aywacunanpaj captinpis chay marcacho hermanucuna ali ricashga y shacyächishga cananpämi camacächergan. Tiempuwan Tesalónica cristianucunata cayno yarpächergan: “Timoteota cachamurä [...] mas yäracunayquipaj shacyächishunayquipämi. Chaynöpami runacuna chiquishuptiquipis mana llaquicunquipächu” (1 Tes. 3:2, 3). Quiquin Timoteupis Listra marcacho cawashgan wichanga gaticachashgachi cargan. Jinapis ricarganchi chay marcacho caycaj cristianucunata Pablo imano shacyächishganta y Jehová imano yanapashgantapis. Chauraga chay hermanucunata alimi yargungapaj nir shacyachinanpaj camacajmi (Hech. 14:8, 19-22; Heb. 12:2).

5. ¿Imanotaj Ramón wauguiga ricacurgan juc anciano yanapaptin?

⁵ ¿Imano mastaj Pabluga hermanucunata shacyächergan? Pay Bernabewan Listraman, Iconiuman y Antioquiaman cutipäcamuptin, cada congregaciuncunachomi ancianucunata churargan (Hech. 14:21-23). Chay hermanucunaga canan wichan ancianucunanopis hermanucunataga shumajchi shacyächergan y yanaparganpis. Ricärishun Ramón jutiyoj waugui wilacushganta: “15 watayoj caycaptëmi taytäga wasipita aywacurgan y mamanënami congregaciunpita gargushga cargan. Chaycuna pasaptin japalämi ricacurgä”. ¿Imataj yanapargan? Paymi nin: “Tony jutiyoj juc ancianumi reuniuncunacho y juc horacunachopis nogawan parlaj. Waquin hermanucuna pruebacunapa pasarpis cushishgala Jehovata sirvishganpita experienciacunata wilamaj. Salmo 27:10 textutami leipämaj y unay rey Ezequiaspita wilamaj, paypa taytan mana ali ejemplo captinpis payga Jehovatami cushishga sirvirgan”. Chayno shacyächishga cashganpitaga, ¿imanotaj Ramón ricacurgan? Paymi wilacun: “Tony shacyächimashganga yanapämargan lapan tiempüwan Jehovata sirvinäpaj, cananga cushishgami Jehovata sirviycä”. Ancianucuna mayaj mayajla carcaycay Ramón pasashganno pilatapis shacyächicoj palabracunawan yanapanayquipaj (Prov. 12:25).

6. ¿Imanotaj Pabluga unay wilacuycunawan waquincunata shacyächej?

⁶ Pabluga hermanucunata yarpächergan aypala Jehovata unay sirvejcunaga imayca pruebacunapa pasarpis aguantapäcushga Jehová yanapaptinmi (Heb. 12:1). Musyarganmi chay wilacuycunaga mana manchacunanpaj yanapänanpaj y imayajpis cawaj Diospa marcanman yarparaycänanpaj (Heb. 12:22). Noganchitapis unay wilacuycuna Gedeonpita, Samuelpita, Davidpita y más waquincunapitapis yachacuptinchega yanapämanchimi (Heb. 11:32-35). Canan wichanpis hermanucunapa experienciancunapita publicaciuncho yargamushganpita, hermanucunaga yäracuyninta sinchiyächishganpita agradecicushpan central mundial nishganman achca cartacunatami apachicamun.

PABLUGA YACHACHERGAN HERMANUCUNA WAQUINCUNAWAN JAUCALA GOYÄNANPAJ

7. ¿Imataj yachacunchi Romanos 14:19-21 textucunacho Pablo consejacushganpita?

⁷ Hermanunchicunata yanapanchi paycunawan jaucala goyäcunapaj calpachacuptinchi. Biblia nishganno imapis contran mana captenga yarpashganchino imapis cananpäga mana yarpanchichu. Roma marcacho congregaciunchoga judío y griego cristianucunami cargan, paycunata pasashganta ricärishun. Moisespa leynin unaypaj cashga captinmi imata micunanpäpis manami michäcojnachu (Mar. 7:19). Waquin judiucunaga ima micuytapis micojmi, waquincunami ichanga micunanpaj yarpaylapis mana munajchu. Chayraycurmi congregaciunga raquicärergan. Pabluga jaucala goyänanpaj munarmi cayno consejacurgan: “Yäracoj-masiqui guepaman cutinanpaj captenga aychatapis ama micuychu ni bïnutapis ama upuychu. Chaynölla imatapis ama ruraychu jucha cashanta yarpaptenga” (leiriy Romanos 14:19-21). Chayno parlaycashganwanga hermanucunata tantiachicurgan chayno yarpapäcushganga quiquincunapaj y congregaciunpäpis mana ali cashganta. Quiquin Pablupis calpachacurgan waquincunata mana pantachinanpaj (1 Cor. 9:19-22). Noganchipis Pablo rurashganno hermanunchicunawan jaucala goyäcunapaj mana rimanacushunchu yarpashganchiwan acuerducho mana caycaptin.

8. ¿Imatataj Pablo rurargan hermanucuna mana raquicänanpaj?

⁸ Ruranapaj o mana ruranapaj cashganpita jucnopa yarparga Pablo rurashganpitami yachacushwan. Apostulcuna cawashgan wichan congregaciunchoga waquin cristianucuna nipäcoj judío mana cajcuna cristianuman ticraptenga señalacunanpaj, chaynopa waquincuna mana jamurpänanpaj (Gál. 6:12). Apóstol Pablo paycunawan acuerducho mana caycaptinpis manami yarpashganno ruracänanpaj nirganchu, chaypa trucan Jerusalencho caycaj ancianucunaman y apostulcunaman chay asuntuta arreglananpaj aywargan (Hech. 15:1, 2). Chay rurashganwanmi congregaciuncho jaucala y cushi cushila goyäcunanpaj yanapargan (Hech. 15:30, 31).

9. ¿Imatataj rurashwan Pablo rurashganno ruranapaj?

⁹ Congregaciuncho pilawanpis pasaypa rimanacushga imarga ancianucunapa yanapacuyninta ashishwan jaucala goyäcunapaj. Jina Bibliapita jorgacämushga publicaciuncunacho y wilacuycunacho imata ruranapäpis yanapacuycunata tarishun. Chay wilacuycunata cäsucunapaj calpachacuptinchi y quiquinchi yarpashganchita mana ruraptinchega hermanunchicunawan jaucalami goyäcushun.

10. ¿Imano mastataj Pablo yanapacurgan hermanuncuna jaucala goyäcunanpaj?

¹⁰ Jucnopapis Pablo yanapacurganmi hermanuncuna jaucala goyäcunanpaj. Pantashgancunaman yarparänanpaj trucan ali cajcunata rurashgancunamanmi yarparaj. Chayno rurashgantami ricanchi Romanucunata cartacamushgancho, ushanancho waquin hermanucunapa jutincunapa y alita rurashgancunapita wilacamurgan. Noganchipis chayno rurashun waquincuna ali rurashgancunapita parlaptinchi. Chaynomi yanapacushun hermanucuna jucnin jucnin amigo cananpaj y masraj cuyanacunanpaj.

11. ¿Imatataj rurashwan jaucala goyänapaj rimanacushga imarga?

¹¹ Pogushga hermanucunapis öraga rimanacärinmanmi, chaytami pasargan Pabluta Bernabewan amigo caycaptinpis. ¿Imaraycurtaj rimanacärergan? Bernabega paycunawan Marcos aywananpaj munargan, Pablumi ichanga munarganchu. ¿Imamantaj chayargan? Bibliami cayno wilacun: “Pabluqa Bernabéwan pasaypa rimanakur rakikarqan” (Hech. 15:37-39). Nircur ichanga Pablo, Bernabé y Marcos amistanacärergan. Chaynopa hermanucunata yachachergan jaucala goyäcunanpaj. Tiempuwanga Pabluga alitami parlaj Bernabepita y Marcospitapis (1 Cor. 9:6; Col. 4:10). Noganchipis pilawan rimanacushga imarga amistanacushwanmi. Ali cajta rurashgantami yarparaycashwan, chaynopa jaucala goyäcunapaj (Efes. 4:3).

PABLUGA CRISTIANO MASINCUNAPA YÄRACUYNINTA SINCHIYÄCHERGAN

12. ¿Ima pruebacunatataj hermanunchicunaga aguantarcaycan?

¹² Jina hermanunchicuna ali caycänanpaj yanapanchi Jehovaman yäracuyninta sinchiyächiptinchi. Waquin hermanucunapa Jehovata mana reguej familiancuna, estudiaj masincuna o aroj masincuna burlacäriptin aguantacärinanpaj calpachacärin. Waquincunana gueshyarcaycan o shonguncho ima laquicuycunatapis aguantarcaycan. Y juccunaga cay mundo ushacänanpaj achca watana shuyarpaycan. Cay lapancunami yäracuyninta pruebaman churan. Chaypami pasargan punta caj cristianucunapis. ¿Y imatataj rurargan Pabluga paycunata shacyächinanpaj?

13. Cristiano cashganraycur pipis jamurpacuptin, ¿imanotaj Pablo paycunata yanapargan?

¹³ Diospa Palabranwanmi apóstol Pabluga cristiano masincunapa yäracuyninta sinchiyächergan. Öraga judío cristianucunaga manachi musyapäcurganchu imata ninanpaj ‘judaísmo religiunga más ali caycan cristianismo religiunpita’ familiancuna niptin. Hebreo cristianucunata Pablo cartacamushgancho maynachi shacyächergan paycunata (Heb. 1:5, 6; 2:2, 3; 9:24, 25). Pablo escribishgan cartami alapa yanapacurgan chay cristianucunata pipis jamurpacuptin. Hermanunchicunapita creencianraycur pipis jamurpacuptin, ¿imanotaj paycunata yanapashwan Pablo rurashganno? Chaypäga hermanunchicuna publicaciuncunata imano utilizananpaj yachachishwan. ¿Es la vida obra de un Creador? y El origen de la vida. Cinco cuestiones dignas de análisis nishgan folletucunawan mozo jipashcunata yanapashwan juc Camacoj Dios cashganta waquincunata imano tantiachinanpaj.

14. ¿Imatataj Pablo rurargan Diospita yachachicur ocupado caycarpis?

¹⁴ Cristiano masincunata Pablo nergan cuyapänacur imalawanpis yanapacunanpaj (Heb. 10:24). Judeapita cristianucunaga muchuy cashgan wichanchoga Pablo yanapacuycunata apargan, chaynopa shimilapitachu yanapacurgan, sinoga ruraynincunawanpis (Hech. 11:27-30). Runacunata Diospita yachachicuycarpis tiempunta camacächergan waccha cristianucunata yanapänanpaj (Gál. 2:10). Chayno rurarmi hermanucunata yanapargan paycunawan Jehová imaypis caycashganta yäracunanpaj. Canan wichanpis hermanucunapa yäracuyninta sinchiyächinchi tiempunchita shumaj camacächiptinchi, labores de socorro nishgancho calpanchiwan yanapacuptinchi, y guellayninchiwan cada cadala yanapacuptinchipis. Chayno rurarmi hermanunchicunata yanapaycanchi mana jaguicoj Taytalanchi Jehovaman yäracunanpaj.

15, 16. ¿Imanotaj ricashwan Jehovata sirvinanpaj guelanaycajcunata?

¹⁵ Jehovata sirvinanpaj guelanaycajcunata jinalami Pabluga yanapaycargan. Laquiparganmi y cuyapaylapami parlapargan (Heb. 6:9; 10:39). Tantiarinapaj, hebreo cristianucunata cartacamushganchomi consejacuptin parlargan “noganchicuna” nir (Heb. 2:1, 3). Chaynopa quiquinpis consejacushgantaga cäsucunanpaj. Pablo rurashganno noganchipis guelanaycajcunata yanapanapäga Jehovata sirvinanpaj paycunaman yarpachacunchi y cuyashganchitapis ricachicunchi. Cuyapaylapaj y shacyächiylapaj parlapanapäpis shumaj yarpachacushwan.

¹⁶ Pabluga cristiano masincunata yarpächergan Jehovata sirvinanpaj rurashgantaga Jehová mana gongaycushgantami (Heb. 10:32-34). Chaynolami noganchipis rurashwan guelanaycajcunata yanaparcunapaj. Imanotaj rasunpa cajta yachacushga y Jehovatapis reguirgan, jina Jehovata sirviptin imano yanapashganta wilamänanchipaj nirishwanmi. Wilapämashganchi hora yarpächishwan unaycho Jehovata sirvinanpaj rurashgantaga pay imaypis mana gongangachu, shamoj tiempuchopis yanapänanpaj cajta (Heb. 6:10; 13:5, 6). Chayno parlapacuptinchimi hermanunchicunata yanapanga Jehovata sirvir siguinanpaj.

“JUCNIQUI-JUCNIQUIPIS SHACYÄCHINACUY”

17. ¿Imacunata rurartaj más ali shacyächicoj y yanapacoj ticrashun?

¹⁷ Imanomi juc obrero tiempuwanga juc maestruman ticran, chaynolami noganchipis hermanunchicunata cada cadala shacyächiptinchega ali yanapacojmanmi ticrashun. Hermanunchicuna pruebacunata aguantananpaj yäracuyninta sinchiyächishun waquin hermanucuna pruebacunata aguantashganpita wilapar. Hermanunchicunawan jaucala cawacunapäga paycunapita ali cajcunalata parlashwan y rimanacushga imarga amistanacushun, chaynopa imaypis jaucala goyäcunapaj. Y hermanunchicunapa yäracuyninta sinchiyächishun Bibliapita rasunpa cajta parlapar y necesitaycashgancho imalawanpis yanapar, y Jehovata sirvinanpaj guelanaycajcunata shacyächir.

18. ¿Imata ruranayquipätaj imaypis calpachacunquiman?

¹⁸ Diosta aduranapaj localcunata sharcachejcuna cushi cushila sienticärin. Chaynolami hermanunchicuna ali caycänanpaj imalachopis yanapacuptinchega masrämi cushicurcushun. Localcunaga tiempuwan juchucar ushacanmi, hermanunchicuna ali caycänanpaj yanapashganchi ichanga imaycamapis ricacaycangami. Chauraga calpachacushun imaycanopapis 1 Tesalonicenses 5:11 textuta cäsucunapaj, chaychoga nin: “Imaypis shacyächinacushayquinölla jucniqui-jucniquipis shacyächinacuy”.