Jehovata sirvejcunaga pay munashganno alita ruranchi

1. ¿Ima pruebapataj José pasargan y imataj rurargan?

RICÄRISHUN ima pruebacunapataj pasargan Jacobpa wamran José. Potifarpa warmin cutin cutin Joseta nergan ‘nogawan cacushun’, chayno niptinpis Josega cäsuparganchu. Öraga pipis cayno tapucunman: Potifar wasincho mana caycaptinpis, ¿imanirtaj Josega Potifarpa warminwan mana punurganchu?, nir. Chay warmipa ashmaynin caycaptenga imayca mana alicunatachi Joseta ruranman cargan, aruyninpitapis jitarinmanmi pay mana cäsupaptin. Waran waran chay warmi gatiraptinpis, Josega manami paywan punurganchu. ¿Imanir? Quiquinmi cayno nergan: “¿Imanöparaq Tayta Diosta rabyanätsir jutsata rurayküman?” (Gén. 39:7-12).

2. ¿Imanirtaj Josega musyargan adulteriuta Jehová chiquishganta?

² Moisespa leynin escribishga cananpaj 200 watacuna pishiycaptinpis, ¿imanirtaj Josega musyarganna adulterio juchata Dios chiquishganta? (Éx. 20:14). Josega Jehovata reguishpanmi shumaj tantiargan jucwan jucwan cacuyga mana ali cashganta. Tantiarcushun, payga musyarganchi matrimoniuta Jehová camacächishganga cargan casaracushgacuna jucwan jucwan mana cacunanpaj. Jinamanpis musyarganchi chachan Sarata ishcay cuticho Jehová chapashganta ishcay reycuna paywan mana punucunanpaj. Y awilan Rebecata chayno mana pasananpaj Jehová chapashgantapis (Gén. 2:24; 12:14-20; 20:2-7; 26:6-11). Chay lapancunaman yarpararga José cuentatachi gocurgan Jehová imacunataj cuyashganta y imacunataj chiquishganta. Jehovata alapa cuyashpanmi pay munashganno cawaj y mandamientuncunatapis respetaj.

3. ¿Imapitataj canan yachacushun?

³ Gamga Diosta cäsucur cushi cushilachi cawacunqui. Juchasapa cashpanchimi öraga shumaj musyashunchu imataj ali caycan y imataj mana ali caycan, chaymi cuidacunanchi cay mundo jucnopa mana yarpächimänanchipaj (Is. 5:20; Rom. 12:2). Chaymi yachacushun ima ninantaj Diospa naupancho ali cajlata rurar cawacunapaj y imanirtaj chaytaga imaypis rurashwan. Jinamanpis yachacushun ima mastataj rurashwan Diospa mandatuncunata ganas ganasla cäsucunapaj.

¿IMANOTAJ DIOS MUNASHGANNO CAWACUNCHI?

4. ¿Imacunataj Diospa ricayninpaj pasaypa mana ali caycan?

⁴ Jesús cay Pachacho caycaptin pushacoj religiosucuna nipäcoj “nogacunalami waquincunapitapis más ali cajcunata rurapäcö”. Chayno capäcushganga Jesuspäga pasaypa mana alimi cargan, chaymi musyaj tucoj y ali tucärishganpita paycunata piñapargan (Ecl. 7:16; Luc. 16:15). Paycunanolami canan wichan waquin runacunaga mana alicunata rurar alicunata rurashganta yarpapäcun. Jina “nogacunalami más yachaj cä” nir ali tucärin. Caycunaga Diospa naupancho pasaypa mana alimi caycan, manami tincunchu imano cawacunapaj Dios mandamashganchiwan.

5. Biblia nishganno ali cajcunata ruranapaj nerga, ¿imapätaj parlaycanchi? Mä tantiachicamuy.

⁵ Ali cajcunata rurashganchega alapa alimi. Alicunata rurar cawacushganchita ricarga Taytalanchi Jehovapis mayraj cushicun. Ali cajcunata rurar cawacunapaj nerga parlaycanchi Dios mandamashganchino imaypis cawacunapaj, chaytami Biblia tantiachicamun. Tantiarcushun, Bibliacho Jehová mandacurgan negocianticunapa ‘pësanpis tupunpis completo’ cananpaj (Deut. 25:15). Chaymi maygan cristianupis Diospa ricaynincho ali cajcunata rurayta munarga, ima negociunchopis pitapis engañanmanchu. Y Jehovapa mandatuncunata cuyajcunaga manami cushicunchu waquincunata pipis engañashganta ricar. Y imatapis manaraj rurar ‘Taytalä Jehová caypita imataraj nenga’ nirmi yarpachacunraj (Col. 1:10).

6. Ali cashganman y mana ali cashganman yarpachacur, ¿imanirtaj Jehovapa mandatuncunaman yäracushwan? (Isaías 55:8, 9).

⁶ Bibliami wilacun Jehová “alli goyächej” Dios cashganta. Cayga tantiachicun Jehovaraycurlami alila cawacunchi (Jer. 50:7). Camacojninchi captinmi Payla nimäshun imataj ali caycan y imataj mana ali caycan. Imano yarpashganpis imano ricashganpis noganchi yarpashganchiwanga manami tincunchu, noganchicunaga alpapita juchasapa runacunalami canchi (Prov. 14:12; leiriy Isaías 55:8, 9). Pero, ¿mandamashganchinolaga cawacushwanchuraj? Aumi, Bibliaga niycan Paynola rurashga cashganchita (Gén. 1:27). Imano cawacunapaj mandamashganchitaga ganas ganaslami cäsucunchi. Diosta amatar cuyashpanchimi lapantapis ruranchi (Efes. 5:1).

7. ¿Imanirtaj mandatucunaraj y leycunaraj captin alapa ali caycan? Tantiachicamuy.

⁷ Imaypis alilami cawacushun Jehová mandamashganchicunata cäsucurlami. Tantiarcunapaj caypita parlarcushun, ¿imaraj canman juc naciunpa marcancuna munashganno leynincunata camacächiptin carrucuna imano purinanpaj y semaforupa achquinpis imano funciunananpaj cajta? O, ¿imaraj canman juc hospitalpa doctorcuna jucnin jucninpis acuerducho mana caycar munashganno gueshyaycaj runacunata jampipäcuptin?, chayno captenga pilapis wanunmanchi ¿au? Chauraga leycunaraj y mandatucunaraj captinmi imapis ali yargun. Chaynolami Diosninchi camacächishgan mandatuncunapis ali cawacunapaj caycan.

8. Dios munashganno ali cajcunalata rurajcunaga, ¿ima bendiciuncunatataj chasquenga?

⁸ Jehová munashganno cawajcunata pay bendecinmi. Chaymi Palabrancho cayno nimanchi: “Alli runacunami ichanga alli pachacho tiyanga. Chayllachömi imaycamapis goyäconga” (Sal. 37:29). Lapan runacuna Dios munashganno cawapäcuptin, ¿imanoraj caway canga? Alila, cushishga, jaucala y juc shongunola cawapäcushun. Jehovami munan chayno cawacunanchipaj. Chaymi imaypis ali cajcunalata rurar cawacuycäshun. Cananmi ricärishun, ¿imataj yanapämäshun ali cajcunalata rurar cawanapaj?

¿IMATATAJ RURASHWAN MASRAJ DIOSPA MANDATUNCUNATA CÄSUCUNAPAJ?

9. ¿Pitataj más cuyashun y imanir?

⁹ Naupa caj: Jehová Diostami más cuyananchi. Ali cajcunalata rurayta munarga puntata Jehová Diosninchitami cuyananchi, paymi ali cajta o mana ali cajtapis ruranapaj wilamanchi. Jehovata alapa cuyarga mandamashganchicunatapis masraj cäsucuyta munashun. Adanwan Eva chayta rurarganchu ni Jehovatapis mana cuyarganchu (Gén. 3:1-6, 16-19).

10. ¿Imatataj Abrahán rurashga Jehovata más reguinanpaj?

¹⁰ Adanwan Eva juchalicushganno mana juchalicunapaj Jehová Diosninchita más reguinapaj calpachacunanchi, pay imano cashgan y imano yarpashgantapis shumaj tantiananchi. Chayno rurarga Jehová Diosninchita más cuyashun. Abrahanpita parlarcushun, payga Jehovata amatar cuyargan. Jehová mandashganta shumaj mana tantiarpis Jehovata cäsucoj y calpachacurgan Jehová imano yarpashganta musyananpaj. ¿Imanotaj Abrahán ricacurgan Jehová Sodoma y Gomorra marcacunata ushacächinanpaj cajta musyarir? Payga manchacurgan lapan runacunapa jueznin ali rurajcunata mana ali rurajcunawan junto ushacächinanpaj. “¿Imanirtaj cuyacoj Dios chayta ruranga?” nir yarpänanpaj trucanga Jehovatami tapucurgan. Jehová pacienciawan Abrahanta lapanta tantiachergan, chayraycurmi Abrahanga shumaj tantiargan Jehová runacunatapis jucnin jucninta reguishganta, chaymi ali cajcunata rurajcunataga manami imaypis ilgächinchu (Gén. 18:20-32).

11. ¿Imanotaj Abrahán musyachicurgan Jehovata cuyashganta y payman yäracushganta?

¹¹ Sodoma y Gomorra marcacunapita Jehovawan parlaptinmi Abrahanga shacyächishga sienticurgan. Jina yanapargan Jehovata más cuyananpaj y respetananpaj. Tiempuwanna Abrahanpa yäracuynin pruebaman churacargan, wamranta Isaac sacrificiuno rupachinanpaj Jehová niptin. Chaypäga Taytan Jehovata ni ima tapucuytapis rurargannachu payta alapa reguishganraycur, chaypa trucanga Jehovata cäsucunanpaj listo caycargan. Chayno captinpis facilchu cargan Jehová nishganta rurananpaj. “Taytalä Jehovaga alapa cuyacoj, alita ruraj, imapitapis ali juezmi caycan” nirchi yarpachacoj. Apóstol Pablo wilacushganno, Abrahanga yäracurgan Jehová wamran Isaacta cawarachimunanpaj cajta (Heb. 11:17-19). Abrahán chayno yarpashganga alimi cargan, payta Jehová aunirgan Isaacpa miraynincuna achca cananpaj, ichanga Isaacga wamrayoj carganrächu. Jehovata amatar cuyashpanmi Abrahanga paypita ni ichiclatapis dudarganchu. Chaymi Jehovaman yäracur lapanta cäsucurgan (Gén. 22:1-12).

12. ¿Imataj yachacunchi Abrahanpita? (Salmo 73:28).

¹² Abrahán rurashganno noganchipis Jehovata alapa reguinanchi. Chayno rurarga Payman más guelicushun y cuyashunpis (leiriy Salmo 73:28). Jinamanpis Dios yarpashgannomi conciencianchega imapäpis ali caycanman (Heb. 5:14). Chayga yanapämäshun pipis ‘cayta wacta ruray’ nimaptinchi mana ninapaj. Ni yarpaylapis yarpäshunchu Jehovata laquichinapaj ni Paypita raquicänapaj. ¿Imatataj rurashwan ali cajlata rurar imaypis caycänapaj?

13. ¿Imatataj rurashwan Dios munashganno ali cajcunalata ruranapaj? (Proverbios 15:9).

¹³ Ishcay caj: Calpachacushun Jehová munashganno ali cajcunalata ruranapaj. Imanomi waran waran fisicata ruraptinchiraj cuerpunchipis ali caycan, chaynolami Jehovapa mandatuncunata cuyanapäpis manami ichicla calpachacushganchipitachu canga. Musyanchimi Taytalanchi Jehovaga imata ruranapaj puedishganchipitapis mastaraj manami mañamäshunchu (Sal. 103:14). Palabranchopis niycalämanchi Payga cuyanmi “munashanno goyaj runacunata” (leiriy Proverbios 15:9). Espiritual cajcho imata logranapäpis calpachacunchimi ¿au? Chaynolami Dios munashganno cawanapäpis ganas ganasla calpachacunchi. Jehovaga yanapaycalämäshunmi ichiclapa ichiclapa ali runaman ticranapaj calpachacuptinchi (Sal. 84:5, 7).

14. Chapacuna chalecupa parlarga, ¿imapätaj parlaycanchi y chayga imanotaj yanapaycalämanchi?

¹⁴ Cuyapämashpanchimi Jehovaga niycalämanchi alicunata ruranapaj cajcunaga sasa mana cashganta (1 Juan 5:3). Ali cajcunata rurashganchega waran waran yanapämanchi, chapaycalämanchimi. Pabluga parlamurgan juc soldaduno ali visticunapaj, mä chaypita parlarcushun (Efes. 6:14-18). ¿Imataj juc cristianupa shonguntaga chapaycun? “Allillata ruraj cashayqui” ninmi apóstol Pablo, chayga caycan Jehovapa mandatuncunami. Imanomi juc chalecuga soldadupa pechunta chapayculan, chaynolami Jehovapa mandatuncunaga shongunchicho imano cashganchita chapaycalämanchi. Chauraga espiritual cajcho imano visticushganchichoga mana gongashwanchu Diospa mandatuncunata, chayga juc chaleco japuy caycan (Prov. 4:23).

15. Alicunalata rurashganchega, ¿imanotaj chapacuna chalecuta jaticushganchino canman?

¹⁵ Waran waran alicunalata ruraptinchega, chayga chapacuna chalecuta jaticushga caycashganchino caycan. Imacunatapis manaraj parlar, ima musicatapis o cushicunapaj cajcunatapis manaraj acrar o ima librucunatapis manaraj leir caytaraj tapucunanchi: “¿Cayga shongulata aliyarcachingachuraj? ¿Jehová Diosnëta cushichingachuraj? ¿O mana alicunalamanchuraj yarpachacächimanga peliacunalaman, chiquinacuycunalaman o ganrra cajcunalaman?” (Filip. 4:8). Cawayninchicho lapan decidishganchicuna Jehová munashganno captenga, Palabrancho caycaj consejucunaga yanapaycalämäshunmi shongunchitapis chapayculangami.

16, 17. ¿Imanotaj tantiachicun Isaías 48:18 texto Jehovapa mandatuncunata imaypis cäsucunapaj puedishganchita?

¹⁶ ¿Quillacuna pasaptin watacuna pasaptin “Dios munashganno cawacuyta puedëchu” nir yarpachacuycarga? Mä Isaías 48:18 (leiriy) textupita parlarcushun, mä imatash chaycho Jehová tantiachimanchi. Chay textucho ali rurashganchicunata tincuchin lamarpa pulchajyayninwan. Lamarpa cuchuncho caycarga ricashwanmi olacuna imanomi shamun cuticun, shamun cuticun chaynolami waran waran. Chay olacuna ilacänanpäga manami yarpachacunchichu. Unaypitami chay olacunaga pulchajyamur caycan y chaynola siguingapis.

¹⁷ Chauraga, ¿imatataj rurashwan mana ilacaj chay olacunanola ali cajta rurashganchicuna cananpaj? Imatapis manaraj rurar acranapäga Jehovamanraj yarpachacushun, “pay munashgannochuraj ruraycä” nir. Imatapis decidinapaj sasa captenga Taytalanchi Jehovaga yachayninta y calpantami goycalämäshun, ali cajcunata rurar imaypis paylata cäsucunapaj (Is. 40:29-31).

18. ¿Imanirtaj yarpashganchino pitapis mana juzgashwanchu?

¹⁸ Quimsa caj: Jehová juzgananpaj maquincho cachaycushun. Jehová munashganno cawanapaj calpachacuycarpis pitapis manami juzgashwanchu ni “waquincunapita más ali cä” nirpis yarpashwanchu. Noganchega manami nishwanchu “payga Jehová munashganno ruraycanchu” nir, chaypa trucanga lapan runacunapa jueznin Jehová Diosninchipa maquinchomi jaguiycunchi (Gén. 18:25). Hermanunchicunapa jueznin canapäga Dios manami churamashcanchichu. Quiquin Jesusmi cayno nergan: “Tayta Dios mana juzgashunaykipaq runa mayikita ama juzgaytsu” (Mat. 7:1).b

19. ¿Imanirtaj Josega mana vengacurganchu?

¹⁹ Josepita yapay parlarcushun, contrancho hermanuncuna pasaypa mana alicunata rurashga captinpis paycunata juzgarganchu. Tiempuwan Egiptucho hermanuncunawan tincuptin ni shongulanchopis juzgarganchu, “gamcuna wanuchimayta munashcanqui ¿au?, rantipäcamashcanqui ¿au?, taytätapis wanushgäta creichipäcushcanqui ¿au?”, nir. Hermanuncunaga yarparganchi vengacunanpaj cajta. Chaypa trucanga José cayno nergan: “Gamcuna ama manchacamaychu. Nogaga manami Dioschu cä pita jusganäpäpis” (Gén. 37:18-20, 27, 28, 31-35; 50:15-21). Chaycho ricacämun José ñanpu shongu runa cashganta y Jehovapa maquincho lapanta churarergan.

20, 21. ¿Imaraj yanapämäshun “nogalami waquincunapitapis más justo caycä” imaypis mana ninapaj?

²⁰ Josenolami noganchicunapis Jehová juzgananpaj maquincho churarinchi. Hermanunchicunapis imanir imata rurananpaj o mana rurananpäpis lapantaga manami musyanchichu, Tayta Jehovalami musyan shonguncunacho ima cashgantapis. Paymi nin: “alli u mana alli yarpashancuna cashantapis” (Prov. 16:2). Jehovaga may chay runacunatami cuyan, ima casta captinpis, ima rimayniyoj captinpis. Caytapis mandaycalämanchi alapa cuyapänacur mana chiquinacuypa cawacunapaj (2 Cor. 6:13). Imapitapis masga pitapis juzganapaj trucanga alapa cuyanacurmi cawacuyta munanchi.

²¹ Jäpa runacunatapis, vecinunchicunatapis manami juzgashwanchu (1 Tim. 2:3, 4). Mana testigo caj familianchicunatapis manami juzganchichu, imaylapis ichanga Jehovapa testigunman ticrapäcunmanmi. Testigo cashganchiraycur pitapis juzgaycarga pasaypachi ali tucuycashwan. Jehovaga shuyaraycanrämi maypita captinpis imano captinpis runacuna arrepenticärinanta (Hech. 17:30). Ama gongashunchu Jehovaga rasunpa ali cajta rurajcunalatami chasquinga, manami chasquingachu “nogalami waquincunapitapis más justo caycä” nejcunataga.

22. ¿Gamtaga imataj yanapäshunqui ali cajcunalata ruranayquipaj?

²² Jehová munashgannola cawacunapaj ganas ganasla calpachacurga cushi cushilami caycäshun y waquincunapis “gamnola cayta munä” nimäshunmi. Y mana chaylachu, Diosninchita más cuyanga y noganchicunatapis cuyaycalämäshunmi. Noganchicunapis imaypis “Tayta Dios munashqanno kawayta” munanchi (Mat. 5:6). Jina ama gongashunchu Jehovaga ricaycanmi payta cushichinapaj waran waran calpachacuycashganchita. Cay munduchoga may chaycho mana ali cajta rurajcunalata ricanchi, pero chayga manami guepamanga cutichimashwanchu. Caypis caycan umachicurcunapaj “TAYTA DIOSGA cuyanmi alli runacunata” (Sal. 146:8).