Imaycamapis cawacushwanmi

1. ¿Imanotaj yanapämanchi imaycamapis cawacunapaj Jehová aunicushganman yarpachacuptinchi?

CÄSUCOJCUNATAGA imaycamapis cawapäcunanpämi Jehová aunicun (Rom. 6:23). Chayman yarpachacuptinchega Jehovata masraj cuyayculanchi. Cayman yarpachacushun Taytalanchi Jehovaga alapami cuyamanchi chaymi imaycamapis cawacunapaj y paypita mana raquicänapaj munan.

2. ¿Imanotaj yanapämanchi imaycamapis cawanapaj aunicuyga?

² Imaycamapis cawacunapaj Dios aunimashganchega pruebacunata aguantanapämi yanapämanchi. Chiquimajninchi wanuchimänanchipaj nimaptinchipis jinala Jehovata sirviycanchi. ¿Imanir? Juc cajga caycan, wanushganchicama fiel captinchega Jehová cawachimäshunmi y imaypis manami wanushunchu (Juan 5:28, 29; 1 Cor. 15:55-58; Heb. 2:15). Imaycamapis cawacunapaj segurumi caycanchi, ¿imanir? Tantiarcunapaj waquincunalata ricärishun.

JEHOVAGA IMAYPIS CAWAYCANGAMI

3. ¿Imanirtaj ninchi imaycamapis cawachimänanchipaj Jehová puedishganta? (Salmo 102:12, 24, 27).

³ Jehovapita Biblia nin: “Pï-maytapis cawachinqui” y imaycamapis cawanga, chaymi imaycamapis cawachimänanchipaj puedinmi (Sal. 36:9). Jehová imaypis cawashgami y imaycamapis cawangami, chayta tantiachicoj juc ishcay textucunalata ricärishun. Salmo 90:2 nin payga “unaypita-pacha imaycamapis” cawan. 102 Salmupis chaynolami tantiachicun (leiriy Salmo 102:12, 24, 27). Profeta Habacuc cielucho caycaj Taytalanchipita parlar escribergan: “TAYTA DIOS, imaypitapis kawaq santu Diosmi kaykanki. Imaypis mana ushakaqmi kaykanki” (Hab. 1:12).

4. ¿Imanirtaj yarpachacushwanchu Jehová imaypis y imaycamapis cawacushganta shumaj mana tantiaptinchi?

⁴ ¿Jehová ‘imaypis cawacushganta’ sasachu tantianayquipaj? (Is. 40:28). Manami gamlapachu sasa caycan. Elihú Diospita cayta nergan: “Manami musyanchïchu ayca watayoj cashantapis” (Job 36:26). Chauraga imatapis shumaj tantianapaj sasa captenga manami ninanchu rasun mana cashganta. Tantiarinapaj, achqui imano achicyashganta lapanta mana musyarpis, chayga manami ninanchu achqui mana cashganta. Chaynolami runacunaga manachi imaypis shumaj tantiashunchu Jehová imaypitapis y imaycamapis cawacushganta. Chayga manami ninanchu Diosga imaycamapis mana cawacushganta. Tayta Camacojpita ima rasun cashganta manami noganchi tantiashganchipitachu caycan (Rom. 11:33-36). Jinamanpis payga cawaycargannami mana atipaypaj jana cielo, Inti y waquin goylarcuna mana captinraj. Bibliami nimanchi: Paymi “munayninwan cay pachata camasha”. Y caytapis nin: “Syëlutapis camacächisha” (Jer. 51:15; Hech. 17:24). Imaycamapis cawacushwanmi chayta tantiarcunapaj juc masta ricärishun.

IMAYCAMAPIS CAWACUNAPÄMI CAMASHGA CASHGANCHI

5. ¿Imapätaj Adanwan Evata Jehová camargan?

⁵ Cay Pachacho cawajcuna casi lapancunami tiempuwanga wanunga, runacunami ichanga mana wanunganachu. Paycunaga imaycamapis cawapäcunanpämi camashga cargan. Chayno captinpis Adanta Jehová nergan: “Ama micunquichu allita mana allita musyachicoj yörapa wayuynillanta. Chayta micushpayquega wañunquipämi” (Gén. 2:17). Adanwan Eva Jehovata cäsucuptenga manami wanunmanchu cargan. Tiempuwanga “imaycamapis cawachicoj yörapa wayuyninta” micunanpaj Dios permitinmanmi cargan. Chayga ali claro ricächinman “imaycamapis” cawapäcunanpaj (Gén. 3:22).b

6, 7. 1) ¿Ima pruebacunataj más caycan mana wanunapaj camashga cashganchita? 2) ¿Imata ruraytataj munanqui imaycamapis cawacuptiqui? (Fotucunatapis ricäriy).

⁶ Alapa alimi juc ishcay cientificucuna tantiapäcushganta tojshunchiga wanushganchicama yachacushganchipitapis masraj yachacunapaj puedishganchita. 2010 watacho Estados Unidos naciuncho, cientificucuna juc revistacho nergan tojshunchi imaycacunata yachacuyta puedishganta. Y tincuchergan 3 millones horacunano video japuy grabananpaj puedishganta, y chayta ricanapaj 300 watacunachorämi ricayta ushashwan. Capazchi mastapis yachacuyta puedishwanmi. Chayga clarumi ricachicun Jehová tojshunchita camashga 70 u 80 watacuna yachacushganchipitapis mastaraj yachacunapaj puedishganchita (Sal. 90:10).

⁷ Wanuytaga manami munanchichu, Jehovaga chayno camamashcanchi. Biblia nishganno Diosga “kamakätsishqa mana ushakaq kaway kashqanta tantiyanantsipaq” (Ecl. 3:11). Chayga tantiachimanchi runacunapaj wanuyga juc enemigo cashganta (1 Cor. 15:26). Cayman yarpachacushun, fiyu gueshya charimaptinchega, ¿imatapis mana rurashwanchuraj? Manami. Doctormanmi aywanchi y jampicunatapis upunchi. Aumi, imaycatami ruranchi mana wanunapaj. Cuyashga castalanchipita mayganpis wanucuptenga pasaypami laquicunchi y raslaga manami ilacanchu (Juan 11:32, 33). Camacojninchi cuyamashpanchi shongunchicho churashga mana wanuypa cawacuyta munanapaj. Chauraga, ¿manachuraj imaycamapis cawacunapaj camamashcanchi? Masrämi caycan imaycamapis cawacunapaj creinapaj. Jehová unayna rurashgancuna y canan wichan ruraycashgancunapis claro ricachicun runacunapa galanancho munashganta jinalami munaycan. Chaypita juc ishcaylata tantiarcushun.

JEHOVÁ UNAYCHO AUNISHGANTA MANAMI CAMBIARGANCHU

8. ¿Imataj Isaías 55:11 nimanchi Jehová munashgan cajpita cumplinanpaj?

⁸ Adanwan Eva juchalicushganraycur miraynincunaga wanupäcun, ichanga Jehová runacunapaj munaycashgantaga manami gongaycushgachu (leiriy Isaías 55:11). Jinalami munaycan cäsucoj runacuna imaycamapis cawapäcunanpaj. Mä yachacushun imatataj Jehová, mayna ruraycämun unaycho aunicushgannola.

9. ¿Imataj Dios aunicurgan? (Daniel 12:2, 13).

⁹ Jehovaga aunicushga wanushgacuna cawarimunanpaj y imaycamapis cawapäcunanpaj puedishgantapis (Hech. 24:15; Tito 1:1, 2). Jehovata sirvej Jobga convencido caycargan wanushgacunata Jehová cawarachimunanpaj pasaypa munaycashganta (Job 14:14, 15). Profeta Danielpis musyargan wanushgacuna cawarircamur imaycamapis cawapäcunanpaj puedishganta (Sal. 37:29; leiriy Daniel 12:2, 13). Jesús Pachacho cawashgan wichan judiucunapis musyarganmi mana jaguiypa Jehovata sirvejcunaga imaycamapis cawapäcunanpaj (Luc. 10:25; 18:18). Achca cutimi chay aunicuypita Jesús parlargan y quiquin Taytanmi payta cawarachimurgan (Mat. 19:29; 22:31, 32; Luc. 18:30; Juan 11:25).

10. ¿Imataj ricachicun unaycho cawarachimushga cajcunapita wilacuycuna? (Dibujutapis ricäriy).

¹⁰ Jehovami cawachimanchi, y wanushgacunatapis cawarachimuyta puedinmi. Jehová Eliasta poderninta goycurgan Sarepta marcapita juc viudapa wamranta cawarachimunanpaj (1 Rey. 17:21-23). Tiempo pasariptinna Eliseuta Dios yanapaptinmi Sunem marcapita juc warmipa wamranta cawarachimurgan (2 Rey. 4:18-20, 34-37). Cawarachimushga cajcunapita y waquin wilacuycunapis clarumi ricächimanchi wanushgacunata Jehová cawarachimuyta puedishganta. Y Jesús cay Pachacho cawashgan wichanpis ricächicurgan Jehovapita poderta chasquishganta wanushgacunata cawarachimunanpaj (Juan 11:23-25, 43, 44). Cananga Jesús cieluchonami caycan y Taytanga maquincho “llapantami churasha cay pachacho cajtapis syëlucho cajtapis”. Chauraga pamparaycajcunata cawarachimuyta imaycamapis cawapäcunanpaj cumpliyta puedinmi (Mat. 28:18; Juan 5:25-29).

11. ¿Imanotaj Jesús wanushgan yanapämanchi imaycamapis cawanapaj?

¹¹ ¿Imanirtaj Jehová permitergan cuyashga Wamran pasaypa nacar-raj wanunanpaj? Chayta Jesús contestargan cayno nir: “Tayta Diosga runacunata fiyupa cuyarmi japallan cuyay wamranta cachamuran Payman pipis yäracoj cäga mana wañunanpaj chaypa ruquenga imaycamapis cawananpaj” (Juan 3:16). Diosga Wamrantami entregargan juchanchipita perdunashga canapaj y chaynopa imaycamapis cawacunanchipaj (Mat. 20:28). Chayga caycan Dios munashganno cumplicunanpaj cajta, y apóstol Pabluga caynomi tantiachicurgan: “Juc runalla juchata rurashanpitami llapanchïpis wañunanchïpaj cashcanchi. Cananpis juc runallapitami wañojcuna cawarishun. Adanpita miraj carmi llapanpis wañojlla caycan. Jesucristuta chasquicojcunami ichanga llapan cawarimonga” (1 Cor. 15:21, 22).

12. ¿Imanotaj Jehová voluntäninta cumplenga?

¹² Jesús discipuluncunata yachachergan mañacamunanpaj Diospa Gobiernun cay Pachaman shamunanpaj y voluntänin cay Pachacho ruracänanpäpis (Mat. 6:9, 10). Jinapis cay mañacuy tantiachimanchi runacuna imaycamapis cawapäcunanpaj Jehová munaycashganta. Chaypämi Jehová Wamranta Rey cananpaj churargan, y cay Pachapita 144.000 runacunatami shuntaycargan Jesuswan junto mandacamur voluntäninta cumplinanpaj (Apoc. 5:9, 10).

13. ¿Imataj canan wichan Jehová ruraycan, y gamga imataj ruranquiman?

¹³ Canan wichan “mana atipaypaj chaychica runacunata” Jehová shuntaycan y yachachiycan mushoj Pachacho cawapäcunanpaj (Apoc. 7:9, 10; Sant. 2:8). Cay munducho Diosta mana reguejcunaga chiquinacurlami cawacärin, Jehová yachaycächishgan runacunami ichanga shongunpita lapan chiquinacuycunata jorgunanpämi calpachacärin. Espadancunatapis yapiananpaj rejacunamanmi ticraycächin (Miq. 4:3). Guerracunaman aywar wanuchicunanpaj trucan may chaychopis runacunata yachaycächin Diospa Gobiernunpita y ‘rasunpa ali cawayta taripäcunanpaj’ (1 Tim. 6:19). Diospa Gobiernunta yanapaptinmi öraga familianpis contranman sharcupäcun o guellaynin walcala captinmi nacapäcun, chayno captinpis ima necesitaycashgancunata tarinanpäga Jehovaga yanapaycunmi (Mat. 6:25, 30-33; Luc. 18:29, 30). Chay lapancunami yachachimanchi Diospa Gobiernun rasunpa cashganta y entero Pachacho Diospa voluntänin ruracänanpäpis jinalami mandacaycämunga.

SHAMOJ TIEMPUCHO CUYAYLAPÄMI CANGA

14, 15. ¿Imanotaj wanuy ushacächishga cananpaj Jehová aunicushgan cumplicunga?

¹⁴ Cielucho Diospa Gobiernuncho Jesús maynami mandacaycämun y Jehová lapan aunishgancunatami cumplenga (2 Cor. 1:20). 1914 watapita pacha chiquejnincunata munaynincho chararaycan (Sal. 110:1, 2). Ichiclachona Jesús 144.000 acrashgacunawan junto lapan Diospa contrancho caycajcunata vencipäcur ushacächenga (Apoc. 6:2).

¹⁵ Waranga watacuna Jesús mandacamushgan wichan, wanushgacunatami cawarachimunga y ichic ichiclapa juchaynaj runacuna capäcunanpaj yanapanga. Último pruebacho Jehovapa ricaynincho ali cajcuna “alli pachacho tiyanga. Chayllachömi imaycamapis goyäconga” (Sal. 37:10, 11, 29). Y “llapanta binsiycurnami wañuytapis binsenga” (1 Cor. 15:26). ¡Chayga cushicuypämi canga!

16. ¿Imanirtaj Jehovata imaypis sirvishwan?

¹⁶ Ricashganchino imaycamapis cawacunapaj shuyaraycashganchega Bibliami shumaj yachachicun. Chayman yarparaycarga cay ushanan tiempucunacho Jehovata sirvir imaycacunata aguantanapaj yanapämanchi. Jehovata cushichinapäga manami salvacunanchilapächu payta y Jesusta cäsucushun, sinoga paycunata cuyaptinchimi imaypis sirviycäshun (2 Cor. 5:14, 15). Paycunata cuyashpanchimi paycunano canapaj calpachacushun y shamoj tiempucho shuyaraycashganchipita cushi cushila yachachicuycäshun (Rom. 10:13-15). Cada cadala más cuyacoj canapaj y waquincunata yanaparcunapaj calpachacuptinchega Jehová imaypis amigunchi cananpaj munanga (Heb. 13:16).

17. ¿Imataj jucninchi jucninchi ruranapaj caycan? (Mateo 7:13, 14).

¹⁷ ¿Y noganchega?, ¿imaycamapis cawacushunchuraj? Chaytaga Jehová camacächishganami, ichanga noganchicunami imaycamapis cawacunapaj apacoj nänipa jinala aywarcaycänanchi (leiriy Mateo 7:13, 14). Chauraga imaycamapis cawacuptinchega, ¿imanoraj cawacushun? Chaytaga gatejnin yachachicuychonami ricärishun.