Imata rurananchi edayarpis cushish caycänanchipaj

1, 2. ¿Imanotaj Jehová rican edayashga hermanunchicunata? (Salmo 92:12-14; garancho caycaj).

WAQUIN naciuncunachoga edayashgacunata yachaj cashgantano rican. Ichanga waquin marcacunachoga runacuna edaman chayaptin mana gustanchu. Chaymi sogu yargamuptenga jorgurin, pero jorguriptinpis mozo jipash cashganman manami cutinchu.

² ¿Imanotaj Jehová rican edayashga hermanunchicunata? (Prov. 16:31). Paycunata Jehová cuyaylapa waytaraycaj yoratano tincuchin (leiriy Salmo 92:12-14). Waquin yöracunaga achca watapa pasarpis cuyaylapa waytaraycaj y raprancunapis shumajmi caycan. Japón naciuncho y waquin naciuncunachopis chayno yöracuna can, waranga watacunapa pasarpis cuyaylapa waytacunata tuctun. Chay pogush yöracunanomi edayashga hermanunchicuna caycan Jehovapa ricaynincho. Payga manami ricanchu ajchan soguyashganta sinoga ali cristiano cashgantami rican. Paycunaga achca watapami ali y mana ali tiempuchopis Jehovata sirvircaycan.

3. Wilacaramuy imano Jehová edayashga sirvejnincunata utilizargan munayninta cumplinanpaj.

³ Auquinyarpis Jehovapäga alapa valuryojmi canchi.a Chaymi unaycho edayashga sirvejnincunata munayninta rurananpaj utilizargan. Chayga pasargan Sarawan, chacuanna caycaptin wamran cananpaj Jehová nergan miraynincunapita jatun naciunman ticrananpaj cajta, Mesías shamunanpaj cajtapis wilacächergan (Gén. 17:15-19). Chaynomi cargan Moiseswanpis, auquinna caycaptin Jehová nergan israelitacunata Egiptupita jorgunanpaj cajta (Éx. 7:6, 7). Apóstol Juanpis auquinna caycar Jehovapa santo espiritunwan pichga librucunata escribirgan.

4. Proverbios 15:15 nishganno, ¿imanotaj edayashga hermanunchicuna goyäcunman mana alicunapa pasarpis? (Fotutapis ricay).

⁴ Chachayashga caycajcunapäga ajami caycan. Chaymi waquin runacunaga nipäcun: “Chachayarnaga wamrano ticrashganta”. Hermanunchicunaga edayashganraycu mana alicunapa pasarpis cushishga caycarga manami laquicunmanchub (leiriy Proverbios 15:15). Cay yachacuycho yachacushun imatataj ruranman hermanunchicuna edayashga caycarpis cushishga caycänanpaj. Jina yachacushun congregaciuncho caycaj hermanunchicuna imanoraj yanapanman edayashga hermanunchicunata. Puntataga yachacushun imanirtaj mana facilchu canman edayash hermanunchicuna cushishga caycänanpaj.

EDAYASH HERMANUNCHICUNA CUSHISHGA CAYCANANPAJ MANAMI FACILCHU

5. Edayay chayaptin, ¿imata laquichinman?

⁵ Edayay chayaptin, ¿imaraj laquichinman? Capazchi unay mozo y jipash cashganman yarpar laquicun. Unay calpayoj ali saludyoj cashganman yarpaptin y unay rurashganno manana puedir laquichinmanpis (Ecl. 7:10). Ruby jutiyoj hermananchi cayno nin: “Nogapäga ropäta jaticunäpaj alapami sasa, lapan cuerpöcuna nanaptin hasta cuyuytapis puedënachu. Mediasnëta jaticunapäpis pasaypa nacä. Artrosis gueshyawan maquë nanaptin imata ruraytapis puedënachu”. Harold hermanunchi, Betelcho achca watapa yanapacurgan, pay nin: “Unay mozula caycar pelotawan puclayta gustamaj. Chaymi waquin caj amigucunaga nimaj ‘¡Haroldta pelotata pasay, pay alimi puclan! nir’. Canan pelota jitaytapis mana puedënachu, unay rurashgäno canan rurayta mana puedirmi alapa rabiacö”.

6. 1) ¿Imata más laquichimashwan? 2) ¿Imatataj edayashga hermanunchicuna cuentaman churanman carruta manejayta siguinanpaj o manapis? (Cay revistacho “¿Carruta manejayta jaguirëmancu?” nej yachacuy ricäriy).

⁶ Edayayman chayaptinchega imatapis mana rurayta puedir laquichimashwan. Chaymi nestanchi pilapis yanapämänanchipaj o wamranchipa wayinmanpis aywananchi yanapämänanchipaj. Gueshyanchiraycu nawinchi mana ricaptinna japalanchi maypapis aywayta puedinchinachu hasta carruta manejaytapis puedinchinachu, ¡chayga laquicuypajmi caycan! Imatapis rurayta mana puedirga o japalanchi tiyayta mana puedir cayman yarpäshun: Jehovapaj y waquincunapaj ricayninchoga alapa valuryojmi caycanchi. Jehová musyan imano sienticushganchita, paypis musyaycan hermanunchicunata y payta cuyashganchita (1 Sam. 16:7).

7. “Cay mundupa ushacaynin chamuptin mana rishajnächu” nir laquicur ¿imamantaj yarpänanchi?

⁷ Chachayayman más chayarga “shamoj tiempucho cay mundo ushacänanpaj cajta manami ricashajnächu” nir laquicushwanchi. Pero yarpäshun Jehovaga manami munanchu pipis wanunanta. Chaymi maychicaj runacuna payta reguinanta y payta sirvinanta munan, chayraycur cay mana ali munduta manaraj ushacächiptin pacienciawan shuyaraycan (Is. 30:18; 2 Ped. 3:9). Chauraga laquicushganchi hora yarpäshun, Jehová cay munduta manaraj ushacächiptin paypa paciencianraycu maychicaj runacuna hasta familianchicunapis salvacuyta puedinmanmi.

8. Edayashga gueshyanraycu, ¿öraga imanotaj waquincunata tratanman?

⁸ Joven car o mayor car mana ali sienticushganchiraycu capazchi mana alita parlashwan o lutantapis rurashwan, nircur “imanirtaj chayno nishcä o rurashcä” nir laquicushwanpis (Ecl. 7:7; Sant. 3:2). Chaynomi Diosta sirvej Jobtapis pasargan, pasaypa nacashgancho caycar lutanta parlargan (Job 6:1-3). Gueshyanchiraycu capazchi imatapis lutanta rurashwan o waquincunatapis nanachiylapa parlapashwan. Chayno captinpis manami pitapis mana alipa tratanmanchu “gueshyäraycu o edayashgäraycu ali atiendimächun y aguantamächun” nir. Chauraga pitapis mana alipa tratashganchipita o nanachiylapa nishganchipita perduntami mañacunanchi (Mat. 5:23, 24).

IMATA RURASHUN CUSHISHGALA CAYCÄNANCHIPAJ

9. ¿Imanirtaj waquincuna yanapämänanchipaj chasquicushun? (Fotutapis ricay).

⁹ Waquincuna yanapämaptinchi chasquicushun (Gál. 6:2). Galaycunanchoga sasami canman pipis yanapämaptinchi chasquicunanchipaj. Gretl cristiana cayno nin: “‘Waquincunata mana afananäpaj’ nir yanapämänanpaj mana munächu. Tiempuwanraj tantiargä waquincuna yanapämänanpaj cajta nestashgäta, chaynopa humilde caytapis yachacurgä”. Waquincuna yanapämänanchita jaguiptinchi, paycunatapis yanapaycanchi cushishga cananpaj (Hech. 20:35). Paycuna noganchipaj yarpachacushganpita y cuyamashganchipita noganchipis cushishmi sienticushun.

10. ¿Imanirtaj mana gongashwanchu waquincuna yanapämashganchita agradecicunanchipaj? (Fotutapis ricay).

¹⁰ Agradecido caycashganchita musyachicushun (Col. 3:15; 1 Tes. 5:18). Waquincuna noganchipaj alita rurashganpita ayvecisga “graciaslä” ninanchipaj gongarishwanmi. Cushicuywan agradecicuptinchega yanapamajninchitapis cushichishunmi. Lea hermananchi, Betelcho caycar hermananchicunata yanapan, pay cayno nin: “Edayashga hermananchicunata cuidashgächo, juc nana nogapaj tacsha papelman escribircur walca palabrala captinpis nogata cuyamashganta musyächiman. Escribishganta leiptë pasaypami cushichiman y yanapashgäpita valoramaptin cushicömi”.

11. ¿Imata rurartaj waquincunata yanapashwan? (Fotutapis ricay).

¹¹ Waquincunatapis yanapashun. Waquincunata imano yanapänanchipaj cajman yarparga manami problemanchicunalaman yarparäcushunchu. África naciunchoga runacuna edayashgacunata librucunawanmi tincuchipäcun. Pero librucunata mana leiptinchega manami imatapis yachachimanchichu ni wilamanchichu. Chaynolami edayashga hermanunchicuna joven cajcunata mana yachachiptin ima pasashganpita mana wilapaptin jovincunaga mana yachangachu ni musyangapischu. Chaymi shumaj consejanan y yachachinan, y jovincuna parlashgantapis shumaj wiyanan. Yachachiy Jehovata imaypis cäsucunanpaj paycuna cushishga caycänanpaj. Paycunata yäracuynin sinchiyänanpaj yanapaptinchi y consolaptinchi noganchipis cushishmi caycäshun (Sal. 71:18).

12. Isaías 46:4 textucho, ¿imataj aunicun Jehová edayashga sirvejnincunata? (Fotutapis ricay).

¹² Calpata gomänanchipaj Jehovata mañacushun. Noganchi runa car laquicunchi y uticanchi, pero Jehovaga “manami janjampaykachantsu ni utikantsu” (Is. 40:28). Jehová calpayoj car edayashga sirvejnincunata calpanta gon y yanapan (Is. 40:29-31). Payga calpata gonanpaj aunicun (leiriy Isaías 46:4). Jehovaga aunishganta imaypis cumplinmi (Jos. 23:14; Is. 55:10, 11). Pay cawayninchicho yanapämashganchita y cuidaycämashganchita ricar alapami cushicunchi.

13. 2 Corintios 4:16-18 nishganno, ¿imamantaj yarpashwan? (Fotutapis ricay).

¹³ Yarpay chachayashgaga manami imayajpis caycanquipajchu. Ima mana ali ushacänanpaj cajman yarpaptinchi yanapämanchi imayca nacaycunata aguantananchipaj. Jina Biblia nimanchi chachayay nacaycuna imaypis manana cananpaj cajta y gueshyacunapis manana cananpaj cajta (Job 33:25; Is. 33:24). ¡Chaymi cushicuy shamoj tiempuchoga ali saludyoj más calpayoj cuyaylapaj imaypis mana chayno cashgayquinomi canquipaj! (Leiriy 2 Corintios 4:16-18). Chaurasga canan tiempucho waquincuna, ¿imanotaj yanapanman?

¿IMATA RURARTAJ EDAYASHGA HERMANUNCHICUNATA YANAPASHWAN?

14. ¿Imanirtaj edayashga hermanunchicunata gayananchi y watucunanchi?

¹⁴ Paycunata seguido gayacushun y watucushunpis (Heb. 13:16). Edayashgacunaga öraga japanlami sienticärin. Wauguinchi Carlos jutiyojc cayno nin: “Wasëpita yarguyta mana puedirga pasaypa aburridumi cacö. Öraga jaulacho wichgarashga uywanömi sienticö”. Edayashga hermanunchita watucuptinchega cuyashganchita y valurashganchita musyachicuycanchi. Capazchi “hermanunchicunata gayashaj o watucushaj” nir yarpashcanchi, pero manami rurashcanchirächu. Imayca rurayninchicuna captinchi calpachacushun edayashga hermanunchicunata watucoj aywananchipaj (Filip. 1:10). Chaypäga hermanunchicunata gayacunanchipaj mensajita escribinanchipaj calendariunchicho o celularninchiman yarpächimänanchipaj churananchi. Watucoj aywananchipaj imay hora imay junaj aywananchipaj acrashun.

15. Joven cajcuna edayashga hermanucunawan, ¿imataj rurapäcunman?

¹⁵ Capaz gam joven captiquega manami musyanquichu edayashga hermanucunawan imapita parlacunayquipaj o imata ruranayquipaj. Pero ama yarpachacuychu, calpachacuy paycunawan amigo canayquipaj (Prov. 17:17). Reunión manaraj galaycuptin o usharirpis paycunawan parlay. Capazchi ninquiman “maygan Bibliapa textuncunapita masta gustashushgayquita o wamra cashgayquicho imapa pasashgayquita mä wilapämay” nir. JW Broadcasting^® programata ricananpaj nirinquimanpis. Jina yanapay celularnincho o tabletanincho jw.org paginanchipita publicaciuncunata jorgunanpaj imano utilizananpäpis. Edayashga hermananchi Carol jutiyoj cayno rurananchipaj nimanchi: “Gam edayashga captiqui gustashushgayquita ruranayquipaj joven cajcunawan rurapäcunayquipaj niriy. Achca wata carpis ranticoj yarguyta, restauranticho micuyta y pasiashgächo Jehová camashgancunata ricanäpaj gustaman, caycunata ruraptëga alapa cushichiman”. Y hermananchi Maira cayno nin: “Noga 33 watayojmi cä y juc caj yanasä 90 watayojna caycan. Ishcäcuna igual watayojna mana carpis cushi cushila puripäcö, peliculacunatapis ishcäcuna ricä y asicurla ishcäcuna capäcö. Noga paypis ima problemacunapa pasarpis ishcäcuna yanapänacö”.

16. ¿Imanirtaj edayashga hermanunchicunata yanagashwan doctorman aywananpaj?

¹⁶ Doctorman aywananpaj yanagashun. Manami hospital-laman aywananpaj yanagashun, sinoga doctorpa consultoriunmanpis paycunawan yaycushun, chaynopa ali atiendishga cananpaj (Is. 1:17). Y doctor nishgantapis papelcho escribiypashwan. Hermananchi Ruth cayno wilacun: “Doctorcunaman japalä aywaptëga, gueshya caycashgäpita wilaptë manami cäsumanchu. Öraga niman ‘ardela gueshyaycanqui’ nir. Pero, pipis yanagamaptenga alimi atiendiman. Chaymi turi nanachicuna doctorman aywanäpaj yanagamashganpita alapa agradecicö”.

17. ¿Imatataj rurananchi edayashga hermanunchicunawan yachachicoj yargunanchipaj?

¹⁷ Paycunawan predicaj yargushun. Edayashga hermanunchicuna calpaynaj car wasin wasin predicaj yarguyta puedinnachu. Capazchi carrituwan predicananchipaj nirishwan, jina bancutapis apashwan paycuna jamacunanpaj. O capazchi Bibliapita yachacojwanpis paypa wasinman aywashwan Bibliapita yachachinanchipaj. Ancianucunapis edayashga hermanunchicunapa wasincho predicación reuniunta rurapäcunman, chaynopa edayashga cajcunapaj más fácil canga yargunanpaj. Caycunata rurarga edayashga hermanunchicunata respetaycanchi y cuyashganchitapis musyachicuycanchi, chayta ricar Jehovapis cushicungami (Prov. 3:27; Rom. 12:10).

18. ¿Imapitataj juc caj yachacuycho yachacushun?

¹⁸ Cay yachacuy yarpächimanchi Jehová y hermanunchicuna edayashga hermanunchicunata alapa cuyashganta y valurashgantapis. Edayash cajcuna imayca problemacunapa pasaycaptinpis Jehovapa yanapacuyninwan imaypis cushish caycanga (Sal. 37:25). Pero yarpay, ¡shamoj tiempuchoga canan wichanpitapis más cushishmi cawacunquipaj! Chaurasga, maygan gueshyaycaj castayquita, wamrayquita o juc gueshyaycaj amiguyquita cuidaycarga, ¿imataraj ruranquiman cushishga caycänayquipaj? Gatejnin yachacuycho caypita masla yachacurcushun.