¿Rasunpachuraj fútbol mundial nishganga juc castanola cawanapaj yanapacun? | ¿Imataj Bibliaga nin?

5.000 millones runacunanoshi ricapäcunga Copa Mundial de la FIFA nishganta, chayga galaycunga 20 noviembripita - 18 diciembricama, 2022 wata. Achca runacuna nipäcun cayno pelotata puclajcunata ricarga may chaychopis juc shongunola juc yarpayla cawanapaj yanapacun.

• “Ima puclacunapis cay mundo aliyananpämi yanapacun, runacunapa cawayninta cambiachin y may chaycho caycarpis juc castanola cawanapäpis yanapacun” (Nelson Mandela, expresidente de Sudáfrica).

• “Futbolga [...] alicunamanmi yarpachimanchi; lapanchita amatar cushichimanchi y piwanpis tincur cuyanacunapäpis yanapämanchi” (Gianni Infantino, presidente de la FIFA).a

¿Fútbol mundial nishganga o imayca puclacunapis rasunpachuraj ali cawayta tarichimashwan? ¿Ima puclacunaraycurpis runacunaga juc castanola y jaucala cawacuycanchuraj?

¿Masraj cuyanacunanchipächuraj yanapacun?

Cay quillacunacho pelotata puclapäcushganga manami cushishgala ricaräcunalapächu caycan. Runacunataga caycunamanmi yarpachacächish: waquincunapa derechuncunata mana respetacashganman, naciunninraycur y guellayraycur chiquinacärishgan cajmanpis.

Chayno captinpis, runacunaga nipäcun ‘nogalätawan familiätaga cushircächimanmi chayno puclacunaga’. Cushicunapaj hora caycaptinpis ratulachomi chayga ushacan. Nircur jinala runacunaga chiquinacärir galaycärin. Maynami Bibliaga chaypaj parlamurgan, cay ‘último tiempuchoshi’ runacunaga mana cuyanacärinmannachu (2 Timoteo 3:1-5).

Diospa Gobiernunlami cay munduta juclayächenga

Bibliaga wilacun imano may chaypita runacuna juc shongunola juc yarpayla cawananpaj. Cayga cumplicämunga juc castanola cay pachacho cananpaj Diospa Gobiernunchomi (Lucas 4:43; Mateo 6:10).

Diospa Gobiernunpa Jesucristumi rey caycan, paymi ruranga runacuna entero munducho jaucala cawapäcunanpaj. Bibliaga cayno nin:

• “Ali mandaptin lapanpis jawka kawaykulätsun. Jana patsacho killa ushakashqanyaq imayyaqpis mandaykulätsun” (Salmo 72:7, MYL).

• “Reyqa waktsakuna manakuptin yanapanqami [...]. Nakatsiq runakunapa makinpitapis jorqunqami” (Salmo 72:12, 14, MYL).

Mayna canan wichanpita Jesuspa yachachicuynincuna 239 naciuncunapita y marcacunapitapis runacunata yanapashga mana chiquinacuypa jaucala cawapäcunanpaj. Maslata musyanayquipaj, cay yachachicuycunata leiriy “Rompamos el ciclo del odio”.