Runacuna politicucunaman manana yäracärinchu | ¿Ima nintaj Biblia?

2024 watacho entero Pachacho autoridäcunata acrananpäga más elecciuncuna canga. Chayno captinpis achca runacuna politicucunaman mana yäracärinnachu.

• Estados Unidos achca runacunata cay asuntupita tapuparishga y achcajmi nipäcurgan “politicucuna quiquilanman yarpar o guellayraycu imatapis ruran”, y rasunpaga runa masincunapäga yarpachacunchu (centro de investigación Pew Research Center, 19 setiembripita, 2023).a

Mozo jipashcunapis politicucunaman mana yäracärinnachu.

• “Mozo jipashcunaga alapa munapäcun waquin problemacunata alchacänanpaj, pero paycunaga nipäcun politicucuna mana yanapacushganta” (The New York Times, 29 enerupita, 2024).

• “Waquin jovincunaga youtubers nishgan runacunaman más yäracärin” (The Korea Times, 22 enerupita, 2024).

Chauraga, ¿politicucuna shamoj watacunacho ali cawananchipaj imalatapis ruranmanchuraj? ¿Pïmantaj yäracushwan?

Pïmantaj yäracunayquipaj ali acrarcuy

Shumaj yarpachacur-raj acrashwan pïmantaj yäracunapaj. Bibliami nin: “Mana tantiyakuq runaqa pï nishqantapis juklami criyin. Tantiyakuq runami itsanqa lutalaqa pitapis mana criyintsu” (Proverbios 14:15, Tayta Diospa Wilacuynin).

• Maygantaj rasunpa caj wilacuycuna musyanayquipäga, cayta leiriy “Cómo protegerse de la información falsa”.

Jinamanpis, politicucuna ali rurayta munaptinpis lapan problemacunata mana alchacuyta puedipäcunchu. Chaymi Bibliaga cayta consejamanchi:

• “Ama yärakushuntsu munayniyuq runakunamanqa. Paykunaqa runala kar manami salvamäshunpaqtsu” (Salmo 146:3, TDW).

Juc yäracuypaj mandacoj

Juc munayniyoj y yäracuypaj mandacoj cananpaj Dios acrashganta Biblia nin, paymi Jesucristo (Lucas 1:32, 33). Diospa Gobiernunpita Jesús mandacojninmi, cay gobiernuga cielucho caycan (Mateo 6:10).

• Ricäriy imanir Jesusman y shamoj tiempucho imacunata rurananpaj cajman yäracunquiman. Caycunata leiriy “¿Quién es el Rey del Reino de Dios?” y “¿Qué hará el Reino de Dios?”.