¿Bibliaga trucachishgacu cashga?
Manami, maychicaj watapa Bibliaga jucman jucman mana duraj papelcunaman copiacashga captinpis, más unay caj escribishgancunawan tincuchishgaga igual-lami caycan.
Chaurasga, ¿nishwanchuraj imaypis mana pantapäcushganta?
Bibliata más unay caj escribipäcushganga maychicajmi taricashga. Waquin textucunaga manami igualchu caycan, chaymi cuentata gocunchi pantapäcushganta. Waquin pantapäcushgancunaga manami cambianchu textucuna imata yachachicushganta. Chayno captinpis waquincunachoga cambianmi, chaytaga capazchi unay wichan rurapäcushga lutan yachachicuycunata yachachicuyta munar. Ricärishun juc ishcay ejemplucunata:
Waquin Bibliata traducishganchoga 1 Juan 5:7 texto caynomi nin: “Cielucho Tayta Dios, Wamran y Espíritu Santo. Quimsanmi juclachacashga caycan”. Chayno captinpis original caj escribishganchoga manami chaynochu niycan, tiempuwannami chay palabracunataga yapaparcushga.a Chaymi yaracuypaj mushoj traducciuncunachoga cannachu.
Diospa jutinga maychicaj cutimi yurin más unay caj Bibliacunacho, pero waquincunachoga jorgurcurmi “Dios” o “Señor” nir churapäcushga.
¿Imanirtaj seguro caycanchi masga mana pantashganta?
Canan wichanga maychicaj Bibliata escribishgantami charanchi, chaymi más fácil musyanchi maycho pantapäcushganta.b Cay lapan escribishgancunata tincuchir, ¿imatataj tarishcanchi? ¿Canan wichan chararashganchi Bibliaman yaracushwancu?
Escrituras Hebreas o Antiguo testamentuno reguishga Bibliapämi William Henry Green yachaj runa cayno nin: “Biblia mana pantaypa escribishga cashgannoga manami ni ima librupis canchu”.
Bibliacunata estudiaj Frederik Bruce yachaj runami cayno escribirgan Escrituras Griegas Cristianas o nuevo testamentuno reguishga Bibliapa: “Maychicaj pruebacunami can mushoj testamento Bibliaga rasunpa cashganta waquin librucunapitapis y manami pipis niegayta puedinchu”.
Unay escribishgan Bibliacunata estudiaj Sir Frederic Kenyon yachaj runanami cayno nirgan: Juc runa “Bibliata chararga mana manchacuypami ninman Diospa rasunpa caj palabranta chararaycashganta, y unaypita tiempo canancama mana pantaypa escribishga cashganta”.
¿Imanir mastaj seguro caycanchi chararashganchi Bibliaga Diospa rasunpa caj Palabran cashganta?
Bibliata copiaj judiucuna y cristianucunapis mana jorguypami escribishga chay wichan Diospa marcan pantashgancunata (Números 20:12; 2 Samuel 11:2-4; Gálatas 2:11-14).c Jina mana wiyacoj cashganraycur castigashga cananpaj cajta y runacunapa mana ali creenciancunatapis escribirgan (Oseas 4:2; Malaquías 2:8, 9; Mateo 23:8, 9; 1 Juan 5:21). Cay textucunata mana jorguypa Bibliata copiajcuna escribishganmi, yachachimanchi honrado cashganta y Diospa Palabranta alapa respetashganta.
¿Chaurasga manacu cuentata gocunchi Bibliata escribichej Diosninchi Palabranta mana trucachinanpaj mana permitishganta? (Isaías 40:8; 1 Pedro 1:24, 25).d Payga manami munarganchu unay runacunalata yanapänanpaj, sinoga noganchitapis yanapämänanchitami munargan (1 Corintios 10:11). Chaymi “Tayta Diosninchïpa palabrancho llapan isquirbiraycajcunaga tantiyacunanchïpämi caycan. Palabranta tantiyarmi ñacarpis pasinsacushpanchi mana yamacaypa shuyaraycanchi ñaupanman pushacamänanchïpaj” (Romanos 15:4, Tayta Diosninchi Isquirbichishan).
Jesús y gatirajnincunapis Escrituras Hebreaspa copiancunatami utilizapäcushga y manami manchacurganchu lutanta yachachicuycashganta (Lucas 4:16-21; Hechos 17:1-3).
a Estas palabras no aparecen en el Códice Sinaítico, el Códice Alejandrino, el Manuscrito Vaticano 1209, la Vulgata latina original, la versión siríaca Filoxeniana-Harclense ni en la Peshitta siríaca
b 5.000 copiacunami taricashga Escrituras Griegas o Mushoj testamentuno reguishga Bibliata.
c Bibliaga manami ninchu Diosta sirvej runacunaga mana pantaj runacuna cashganta, chaypa trucanga nin: “Cay pachachöga manami pipis canchu juchata mana ruräga” (1 Reyes 8:46).
d Bibliaga yachachicun runacuna Palabranta escribinanpäga manami Diosninchi dictarganchu, sino yarpaynincunatami pushargan espíritu santunwan (2 Timoteo 3:16, 17; 2 Pedro 1:21).